འདི་ནི་དཔལ་མགོན་རྫོང་དྲ་ཐོག་ཚོང་དོན་སྤྱི་པའི་ཞབས་ཞུ་ལྟེ་གནས་ཀྱི་ཐོན་རྫས་འགྲེམས་ཁུལ་ཡིན་པ།

ཉེ་བའི་ལོ་ཤས་རིང་། “དྲ་སྦྲེལ+”དེ་རང་ལྗོངས་སུ་རྒྱ་ཁྱབ་ངང་འགྲེམས་པ་དང་ཕྱོགས་ཡོངས་ནས་ཁྱབ་གདལ་བཏང་བ་དང་བསྟུན་ནས། “སྦུག་ཁང”ནང་ལུས་པའི་ཁྱད་ལྡན་ཞིང་འབྲོག་ཐོན་རྫས་དེ་བས་མང་བར་དྲ་རྒྱའི་གཤོག་ཟུང་བསྒར་ཡོད། ཆ་འཕྲིན་ཅན་གྱི་ཤར་རླུང་ཁྲོད་དཔལ་མགོན་རྫོང་གིས་དྲ་ཐོག་ཚོང་དོན་འཕེལ་རྒྱས་ཤུགས་ཆེན་བཏང་བས། བྱང་རྩྭ་ཐང་གི་ཁྱད་ལྡན་འབྲོག་ལས་ཐོན་རྫས་སྣ་ཚོགས“དྲ་སྦྲེལ+”མགྱོགས་འཁོར་ཐོག་ནས་ལྗོངས་ཕྱིའི་ས་ཕྱོགས་གང་སར་ཕྱིར་གཏོང་བྱས་པ་རེད།

ཤར་རླུང་ལ་བརྟེན་ནས་དྲ་ཐོག་ཚོང་དོན་ལས་སྟེགས་བསྐྲུན་པ།

དྲ་ཐོག་ཚོང་དོན་གྱིས་མཉམ་ལས་ཁང་ལ་རོགས་རམ་བྱེད་པའི་སྐོར་གླེང་སྐབས། ཕུར་བུ་གྲོང་རྡལ་མི་རིགས་ལག་ཤེས་ཁྱད་ལྡན་ལས་སྣོན་ཆེད་ལས་མཉམ་ལས་ཁང་གི་འགན་འཁུར་བ་ཚེ་རྡོར་ལ་མྱོང་ཚོར་ཟབ་མོ་ཡོད་ཅིང་། “2016ལོའི་གོང་དུ་ང་ཚོའི་མཉམ་ལས་ཁང་གི་བེའུ་མང་པོ་ཞིག་ཕྱིར་ཚོང་བྱེད་ས་མེད་པར་འགྱུར། གལ་སྲིད་འཚོང་ས་ཡོད་ནའང་རིན་གོང་མཐོ་པོ་རག་གི་མེད། སྔོན་ཆད་ང་ཚོས་བྲེགས་པའི་བལ་གྱིས་འུར་རྡོ་བཟོས་ཀྱང་ཉོ་མཁན་ཧ་ཅང་ཉུང་ཉུང་ཡིན”ཞེས་ཚེ་རྡོར་གྱིས་བརྗོད་པ་དང་། ཁོང་གིས་2014ལོར་ཕུར་བུ་གྲོང་རྡལ་མི་རིགས་ལག་ཤེས་ཁྱད་ལྡན་ལས་སྣོན་ཆེད་ལས་མཉམ་ལས་ཁང་བཙུགས་རྗེས“འུར་རྡོ”སྟོང་ཕྲག་མང་པོ་འཚོང་ལམ་མེད་སྟབས་མཉམ་ལས་ཁང་གི་མཛོད་ཁང་ནང་འཇོག་རྒྱུ་ལས་མ་འདས་ཞེས་བརྗོད།

“2016ལོར་གཞི་ནས་གནས་ཚུལ་དེ་ལེགས་སུ་འགྲོ་འགོ་ཚུགས”ཚེ་རྡོར་གྱིས་གསར་འགོད་པར་2016ལོའི་ཟླ་1པོར་བོད་བྱང་ཐང་གི་དྲ་སྦྲེལ་བྲིན་འཚོང་ལས་སྟེགས་དང་པོ་སྟེ་དཔལ་མགོན་རྫོང་གི་དྲ་ཐོག་ཚོང་དོན་སྤྱི་པའི་ཞབས་ཞུ་ལྟེ་གནས་དངོས་སུ་བེད་སྤྱོད་གཏོང་འགོ་ཚུགས་པས་དཔལ་མགོན་རྫོང་གི་མང་ཚོགས་ཀྱི་ཁྱད་ལྡན་ཐོན་རྫས་ལ་མཐར་ཚོང་ལམ་ཡག་པོ་ཞིག་བྱུང་ཡོད།

སྲིད་ཇུས་ཀྱི་དཔྱིད་རླུང་དལ་གྱིས་ལྡང་བ་དང་བསྟུན་ནས། དཔལ་མགོན་རྫོང་གི་འབྲོག་ཁུལ་སྒྱུར་བཅོས་དེ་ལྗོངས་ཡོངས་ཀྱི་མདུན་གྲལ་དུ་སླེབས་པ་དང་། གྲོང་གསེབ་ཀྱི་དྲ་ཐོག་ཚོང་དོན་མ་ལག་དེ་ཡང་གཞན་གྱི་སྔོན་ལ་བསྐྲུན་ཡོད།

2015ལོར། དཔལ་མགོན་རྫོང་དེ་ཚོང་དོན་པུས་རྒྱལ་ཁབ་རིམ་པའི་དྲ་ཐོག་ཚོང་དོན་གྲོང་གསེབ་ཏུ་ཁྱབ་གདལ་གཏོང་བའི་ཕྱོགས་བསྡུས་དཔེ་སྟོན་རྫོང་ལ་གཏན་འཁེལ་བྱས་པ་དང་དེ་ཡང་ལྗོངས་ཡོངས་ཀྱི་དྲ་ཐོག་ཚོང་དོན་གྲོང་གསེབ་ཏུ་ཁྱབ་གདལ་བཏང་བའི་ཕྱོགས་བསྡུས་དཔེ་སྟོན་རྫོང་ཁག་དང་པོར་གྱུར་ཡོད། ཚགས་ཤ་སོས་པ་དང་། སྦྲང་རྩི། བོད་སྨན་གྱིས་བཟོས་པའི་སོ་སྨན། སྐྱེ་ལྡན་ལུད། དཔལ་མགོན་གྱི་གཡང་ཊི་སོགས་རྩྭ་ཐང་ཐོག་གི“ནོར་མཛོད”སྣ་ཁ་60ལྷག་ཙམ་དྲ་ཐོག་བརྒྱུད་སུའུ་ཉིང་དང་། ཐའོ་པའོ། ཧྲེན་མའེ་སྤུས་ལེགས་ཐོན་རྫས་སོགས་དྲ་ཐོག་ཚོང་དོན་ལས་སྟེགས་ལ་བརྟེན་ནས། བོད་ནས་ཁྱིམ་ཚང་ཁྲི་སྟོང་མང་པོར་སྐྱེལ་ཏེ་ས་གནས་དེ་གའི་མང་ཚོགས་ལ་འབབ་འཕར་ཕྱུག་འགྱུར་ཡོང་བར་སྐུལ་འདེད་ནུས་ལྡན་བཏང་ཡོད།

ཞབས་ཞུ་ཤུགས་ཆེར་བཏང་ནས་དྲ་ཐོག་ཚོང་དོན་འཕེལ་རྒྱས་ལ་སྐུལ་འདེད་བཏང་བ།

“ཉེ་བའི་ལོ་ཤས་རིང་། དཔལ་མགོན་རྫོང་གི་དྲ་ཐོག་ཚོང་དོན་སྤྱི་པའི་ཞབས་ཞུ་ལྟེ་གནས‘དཔལ་ཡུལ’དང‘བསེ་རུ’‘དཔལ་མགོན་གྱི་འུར་རྡོ’བཅས་སྤུས་རྟགས་3གྱི་ཚོང་རྟགས་ཐོ་འགོད་ལས་དོན་ལེགས་གྲུབ་བྱུང་ཡོད”དཔལ་མགོན་རྫོང་དྲ་ཐོག་ཚོང་དོན་སྤྱི་པའི་ཞབས་ཞུ་ལྟེ་གནས་ཀྱི་གཉེར་སྐྱོང་ཅིང་ལི་ཧྥན་ཝུན་དབྱིས་གསར་འགོད་པར“ང་ཚོ་རྟག་ཏུ་ཤང་དང་གྲོང་རྡལ་དང་། གྲོང་ཚོ(གྲོང་ལྷན)ཁག་ཏུ་བརྟག་ཞིབ་བྱེད་པར་བསྐྱོད་པ་མ་ཟད། ཁྱད་ལྡན་ཐོན་རྫས་ཉོ་སྒྲུབ་ཀྱང་བྱས་ནས་དྲ་རྒྱ་བརྒྱུད་ཕྱིར་ཚོང་བྱས་པ་ཡིན། འདི་ལོའི་ཟླ་7པ་བར་དྲ་ཐོག་ནས་ཕྱིར་ཚོང་བྱེད་ཚད་སྒོར་ཁྲི་122ལྷག་ཙམ་ཟིན་པ་དང་། རིམ་རྩིས་བརྒྱབ་ན་མི་29ཡི་ལས་ཞུགས་གནད་དོན་ཐག་གཅོད་བྱས་ཡོད”ཅེས་བརྗོད། སྐབས་ཤིག་རིང་། ནག་ཆུ་གྲོང་ཁྱེར་གྱི་ཆེད་ལས་མཉམ་ལས་ཁང་མང་པོ་ཞིག་གིས་རང་སོ་སོའི་ཁྱད་ལྡན་ཐོན་རྫས་ཁྱེར་ནས་དྲ་སྦྲེལ་གྱི་ཕྱིར་ཚོང་ལས་སྟེགས་སུ་ཞུགས་ཡོད། ཐོན་རྫས་ཀྱི་སྤུས་ཚད་དང་ཆུ་ཚད་མཐོ་རུ་དང་འཛད་སྤྱོད་ཀྱི་བདེ་འཇགས་འགན་ལེན་བྱ་ཆེད། དཔལ་མགོན་རྫོང་གིས་དྲ་ཐོག་ཚོང་དོན་གྱི་སྤུས་ཚད་ཁུངས་འདེད་མ་ལག་བཙུགས་ཤིང་། མིག་སྔར་ཐོན་རྫས་སྣ་ཁ་30ལྷག་ཙམ་གྱི་སྤུས་ཚད་ཁུངས་འདེད་ཀྱི་རྩ་གཉིས་ཨང་རྟགས་བཤེར་ཐུབ་ཀྱི་ཡོད།

“ང་ཚོ་ཕུར་བུ་གྲོང་རྡལ་གྱི་ངོས་ནས་བརྗོད་ན། གྲོང་མི་འདི་གར་ཡོང་ནས་ཁ་པར་གྱི་འགྲོ་གྲོན་བླུགས་མཁན་མང་ཤོས་ཡིན་པ་དང་། དེ་ནས་གྱོན་ཆས་ཉོ་བར་ཡོང་མཁན་རེད། སྐབས་རེར་རླངས་འཁོར་གྱི་ལྷུ་ལག་དང་ཁྱིམ་སྤྱོད་གློག་ཆས་སོགས་ང་ཚོར་རྒྱུས་མངའ་དེ་ཙམ་མེད་པའི་ཚོང་ཟོག་གི་དགོས་མཁོ་ཡོད་དུས་ང་ཚོས་དཔལ་མགོན་རྫོང་དྲ་ཐོག་ཚོང་དོན་སྤྱི་པའི་ཞབས་ཞུ་ལྟེ་གནས་ལ་རོགས་རམ་གནང་རོགས་ཞུ་བ་དང་། ཁོང་ཚོས་ང་ཚོར་ཚབ་ཉོ་བྱེད་ཀྱི་ཡོད”ཅེས་དཔལ་མགོན་རྫོང་ཕུར་བུ་གྲོང་རྡལ་དྲ་ཐོག་ཚོང་དོན་དྲ་ཚིགས་ལྟེ་གནས་ཀྱི་ཉི་ཤར་གྱིས་གསར་འགོད་པར་བརྗོད།

ཕུར་བུ་གྲོང་རྡལ་དྲ་ཐོག་ཚོང་དོན་ས་ཚིགས་ལྟེ་གནས་ཀྱི་ལས་དོན་པ་པ་སྐྱིད་སྒྲོལ་མ་དེ་གར་ལས་ཀར་མ་ཡོང་གོང་གང་འདྲ་ཞིག་ལ་དྲ་ཐོག་ཚོང་དོན་ཟེར་བ་ཤེས་ཀྱི་མེད་ལ། དྲ་ཐོག་ནས་དངོས་ཟོག་ཉོ་མྱོང་ཡང་མེད། 2016ལོའི་ལོ་མཇུག་ཏུ། པ་སྐྱིད་སྒྲོལ་མ་དཔལ་མགོན་རྫོང་དྲ་ཐོག་ཚོང་དོན་སྤྱི་པའི་ཞབས་ཞུ་ལྟེ་གནས་ཀྱི་གསོ་སྦྱོང་ཁང་དུ་བསྐྱོད་པ་ནས་བཟུང་། ཁོང“ངོ་མཚར་ཆེ་བའི”ལས་ཀ་དེར་ཧ་ཅང་དགའ་པོ་ཡོད། “ད་ཆ་གྱོན་ཆས་དང་བྱུག་རྫས་སོགས་འཚོ་བའི་མཁོ་ཆས་ཚང་མ་དྲ་ཐོག་ནས་ཉོ་གི་ཡོད། གང་ལགས་ཤེ་ན། དྲ་ཐོག་ཏུ་གདམ་ག་མང་བ་དང་རིན་གོང་ཡང་དེ་བས་ཁེ་བ་ཡོད་པས་རེད། ངས་གྱོན་པའི་གྱོན་ཆས་ནི་ན་ནིང་དྲ་ཐོག་ནས་ཉོས་པ་ཡིན”དེ་ཙམ་མ་ཟད་མཐའ་འཁོར་གྱི་ཞིང་འབྲོག་མང་ཚོགས་ཀྱིས་གང་ཞིག་མཁོ་བ་དྲ་ཚིགས་ལྟེ་གནས་ཀྱི་ལས་དོན་མི་སྣས་རྒྱུས་མངའ་ཆེན་པོ་ཡོད་ཅེས་བརྗོད།

དྲ་ཐོག་ཚོང་དོན་ལས་སྟེགས་དང་དྲ་ཐོག་ཚོང་དོན་ཞབས་ཞུ་ས་ཚིགས་ཀྱིས་ཕྱོགས་གཅིག་ནས་ས་གནས་དེ་གའི་མི་རིགས་ལག་ཤེས་ཐོན་རྫས་དང་ཞིང་འབྲོག་ཐོན་རྫས“གྲོང་ཁྱེར་དུ་ཕྱིར་གཏོང”ལ་སྐུལ་འདེད་གཏོང་བ་དང་། ཕྱོགས་གཞན་ཞིག་ནས་འཛད་སྤྱོད་ཐོན་རྫས“གྲོང་གསེབ་ཏུ་ནང་འདྲེན”ལ་ཡང་སྐུལ་འདེད་བཏང་བས། གྲོང་ཁྱེར་ཆེ་གྲས་དང་རྫོང་གྲོང་ཕྱོགས་གཉིས་ཀྱི་ཚོང་དོན་འཁོར་རྒྱུག་མ་ལག་ལ་སྐུལ་མ་ཐེབས་ནས། ཞིང་ལས་ཐོན་རྫས་བྲིན་ཚོང་མི་ཐུབ་པ་དང་གོང་ཁེ་པོས་འཚོང་བ་སོགས་ཀྱི་གནད་དོན་དུས་ཐོག་ཏུ་ཐག་གཅོད་ཐུབ་པ་མ་ཟད། ཚད་གཞི་ངེས་ཅན་གྱི་ཐོག་ནས་གྲོང་གསེབ་ཀྱི་ཁྲོམ་རའི་ནང་མཁོ་རྒྱ་ཆེར་བཏང་ནས་གྲོང་ཁྱེར་དང་གྲོང་གསེབ་མཉམ་དུ་འཕེལ་རྒྱས་འགྲོ་བར་སྐུལ་འདེད་ཐེབས་ཡོད།

འདུ་ཤེས་བསྒྱུར་ནས་དྲ་སྦྲེལ་གྱི་འཚོ་བར་འགྱུར་ལྡོག་བཏང་བ།

ཉེ་བའི་ལོ་ཤས་རིང་དང་ལྷག་པར་དུ་དབུལ་སྒྲོལ་འགག་སྒྲོལ་ལས་དོན་སྤེལ་ཚུན། དཔལ་མགོན་རྫོང་གིས“སྐོར་སྐྱོད་འཁྱག་གསོག་རླངས་འཁོར་སྒྲིག་སྦྱོར་འདུ་འགོད་དང་། འཁོར་རྒྱུག་ཁྲོམ་རའི་མཐོར་གཏོང་འདུ་འགོད། དྲ་ཐོག་ཚོང་དོན་སྐུལ་འདེད་འདུ་འགོད། རྫོང་དང་། ཤང་། གྲོང་ཚོ་བཅས་ཀྱི་ཟོག་འགྲེམས་སྐྱེད་སྲིང་འདུ་འགོད། ཁྲོམ་རའི་ལྟ་འདོམས་མཉམ་བཅོས་འདུ་འགོད།  ཚོང་དོན་འཁོར་རྒྱུག་སྐུལ་གཏོང་འདུ་འགོད”བཅས་འདུ་འགོད་ཆེན་པོ་དྲུག་སྒྲིག་འཛུགས་དང་ལག་བསྟར་ཡག་པོ་བྱས་ཏེ། ཞིང་འབྲོག་ཁུལ་གྱི་མཁོ་སྤྲོད“སྟབས་བདེ་མེད་པ་དང་། བདེ་འཇགས་མེད་པ། ཕན་པ་མེད་པ”བཅས་ཀྱི་གནད་དོན་རིམ་བཞིན་ཐག་གཅོད་བྱས་ཡོད། ཞིང་འབྲོག་པས་དྲ་ཐོག་ཚོང་དོན་ལས་བྱུང་བའི་ཕན་པ་ཤེས་རྟོགས་ཐུབ་པ་མ་ཟད། ཚོང་དོན་འཁོར་རྒྱུག་འཕེལ་རྒྱས་གཏོང་བའི་དོན་སྙིང་གལ་ཆེན་ལ་ངོས་འཛིན་གཏིང་ཟབ་ཐུབ་པར་བྱས་པས། སྔོ་ཚལ་དང་ཤིང་ཏོག་སོས་པ་ཟ་རྒྱུ་བྱུང་བ་དང་། བཟའ་བཅའི་གྲུབ་ཆ་ལེགས་སུ་ཕྱིན་པ། ལག་ཐོག་གི་ཐོན་རྫས་ཕྱིར་ཚོང་ཐུབ་པ་མ་ཟད། ཐ་ན་རིན་གོང་ཡང་མཐོ་པོ་རག་ནས་དྲ་ཐོག་ཚོང་དོན་དེ་ཉིད་དཔལ་མགོན་རྫོང་གི་ཞིང་འབྲོག་མང་ཚོགས་ཀྱི་རེ་འདུན་གསར་པ་ཞིག་ལ་གྱུར་ཡོད།

སྔོན་ཆད་དྲ་ཐོག་ཚོང་དོན་གྲོང་གསེབ་ཏུ་ཁྱབ་གདལ་གཏོང་བའི་ལས་དོན་སྤེལ་འགོ་འཛུགས་དུས་ལ་ཕྱིར་དྲན་བྱེད་སྐབས། ཉི་ཤར་གྱིས་འགྱུར་ལྡོག་ཆེན་པོ་བྱུང་ཡོད། “སྐབས་དེ་དུས་གྲོང་རྡལ་དུ་མི་མང་པོ་ཞིག་གིས་དྲ་ཐོག་ཚོང་དོན་ལ་རྒྱུས་མངའ་དེ་ཙམ་མེད་པ་དང་། ཐ་ན་དེར་ཡིད་ཆེས་ཀྱང་བྱེད་ཀྱི་མེད། འོན་ཀྱང་ད་ཆ་ཁོང་ཚོའི་འཚོ་བ་ནི་དྲ་ཐོག་ཚོང་དོན་དང་ཁ་འབྲལ་ཐབས་མེད”ཅེས་བརྗོད།

“ཚོང་དོན་འཁོར་རྒྱུག་གི་བྱ་གཞག་གོང་འཕེལ་ཆེན་པོ་བཏང་ནས་རྒྱ་ཆེའི་མང་ཚོགས་ཀྱི་བརྩོན་སེམས་འཕེལ་བ་དང་། 2018ལོ་ནས་བཟུང་། དཔལ་མགོན་རྫོང་གི་འབྲོག་པའི་དཔལ་འབྱོར་མཉམ་ལས་རྩ་འཛུགས་6གིས་སླར་ཡང་དཔལ་མགོན་ལང་ཆིན་ཚོང་དོན་ཚད་ཡོད་ཀུང་སི་བཙུགས་པ་དང་། སྔོ་ཚལ་བརྒྱ་ཟོག་སྡེབ་སྐྱེལ་ལྟེ་གནས་བསྐྲུན་ཁར་འབྲོག་ཁུལ་གྱི་ཟོག་འགྲེམས་སྡེབ་སྐྱེལ་མ་ལག་འཐུས་སྒོ་ཚང་དུ་བཏང་ཞིང་། མིག་སྔར། ཀུང་སི་དེ་རྫོང་དེའི་ཚོང་དོན་འཁོར་རྒྱུག་ཐོན་ལས་ཀྱི་སྣེ་ཁྲིད་ཁེ་ལས་སུ་གྱུར་ཡོད། ཕུར་བུ་གྲོང་རྡལ་གྱི་འབྲོག་ཁྱིམ་མཉམ་ལས་ཁང་སྤྲོ་སྐྱིད་ཁང་གིས་ཀྱང་འབད་བརྩོན་ཆེན་པོ་བྱས་ཏེ་ལྷ་སར་ཐོན་རྫས་ཕྱིར་ཚོང་ལྟེ་གནས་བཙུགས་ནས་ང་ཚོའི་རྫོང་གི་ཐོན་རྫས་ཕྱིར་ཚོང་ལ་ལས་སྟེགས་བསྐྲུན་པ་དང་། མང་ཚོགས་ཀྱིས་ཚོང་དོན་འཁོར་རྒྱུག་དྲ་ཚིགས་གཉེར་སྐྱོང་ཧུར་ཐག་བྱས་ནས་ཚོང་དོན་འཁོར་རྒྱུག་གི་དྲ་ཚིགས་65འཛུགས་པར་མང་ཚོགས་ཀྱི་རྒྱབ་སྐྱོར་ཆེན་པོ་ཐོབ་ཡོད”ཅེས་དཔལ་མགོན་རྫོང་ཚོང་དོན་ཅུས་ཀྱི་ཅུས་ཀྲང་དཀོན་མཆོག་ཆོས་སྒྲོན་གྱིས་གསར་འགོད་པར་བཤད།

དྲ་ཐོག་ཚོང་དོན་ཁྱབ་གདལ་སོང་བ་དང་བསྟུན་ནས་དཔལ་མགོན་རྫོང་གི་མི་སེར་གྱིས་སྔོན་ཆད་དངུལ་སྨར་སྤྲོད་པའི་འཛད་སྤྱོད་ཀྱི་འདུ་ཤེས་ལ་འགྱུར་ལྡོག་ཕྱིན་ནས་སྒུལ་བདེ་གཏོང་སྤྲོད་བྱེད་སྟངས་མི་སེམས་ལ་འཇགས་པ་དང་། དྲ་ཐོག་ཚོང་དོན་ལས་སྟེགས་ཀྱིས་འདེགས་སྐྱོར་བྱས་པའི་ཞིང་འབྲོག་ལས་ཀྱི་ཐོན་རྫས་དང་བཟོ་ལས་ཐོན་རྫས་ཕྱིར་འཚོང་བྱེད་རིང་ཞིང་འབྲོག་མང་ཚོགས་སྟབས་བདེ་དང་ཡོང་འབབ་རག་པ་དང་འབྱུང་འགྱུར་ལ་རེ་བས་ཁེངས་ཡོད།