2020ལོའི་ཟླ་6ཚེས་11ཉིན། ཀྲུང་གོ་སྤྱི་ཚོགས་ཚན་རིག་ཁང་མར་ཁེ་སི་རིང་ལུགས་ཞིབ་འཇུག་ཁང་དང་སྤྱི་ཚོགས་ཚན་རིག་ཚད་ལྡན་ཡིག་ཆ་དཔེ་སྐྲུན་ཁང་སོགས་ཀྱིས་མཉམ་འབྲེལ་ཐོག《སྤྱི་པའི་ཞབས་ཞུའི་རྒྱབ་ཤ་སྔོན་པོའི་དེབ། ཀྲུང་གོའི་གྲོང་ཁྱེར་གྱི་གཞི་རྩའི་སྤྱི་པའི་ཞབས་ཞུའི་ནུས་པའི་གདེང་འཇོག(2019)》ཡོངས་བསྒྲགས་བྱས་པ་དང་། དྲ་རྒྱའི་འདྲི་ཤོག་14345སྤྱད་དེ་དཔྱད་གཞི་ཚོགས་ཆུང་གིས་རྒྱལ་ཡོངས་ཀྱི་གྲོང་ཁྱེར་གཙོ་བོ་38ཀྱི་གཞི་རྩའི་སྤྱི་པའི་ཞབས་ཞུའི་ནུས་པར་ཕྱོགས་ཡོངས་ནས་གདེང་འཇོག་དང་ཞིབ་འཇུག་གཏིང་ཟབ་བྱས་པ་རེད།

ཀྲུང་གོ་སྤྱི་ཚོགས་ཚན་རིག་ཁང་སྤྱི་པའི་ཞབས་ཞུའི་རྒྱབ་ཤ་སྔོན་པོའི་དེབ་ཀྱི་དཔྱད་གཞི་ཚོགས་ཆུང་གིས་ངོ་སྤྲོད་བྱས་དོན། གྲོང་ཁྱེར་གྱི་གཞི་རྩའི་སྤྱི་པའི་ཞབས་ཞུའི་བློ་ཡིད་ཚིམས་ཚད་ལ་གདེང་འཇོག་བྱེད་པའི་དམིགས་ཚད་མ་ལག་ནང་གཞི་རྩའི་རྒྱུ་རྐྱེན་ཆེ་གྲས་བཅུ་ཡོད་པ་དང་དེ་དག་ནི་སྤྱི་པའི་འགྲིམ་འགྲུལ་དང་། སྤྱི་པའི་བདེ་འཇགས། སྤྱི་པའི་སྡོད་ཁང་། རྨང་གཞིའི་སློབ་གསོ། སྤྱི་ཚོགས་འགན་བཅོལ་དང་ལས་ཞུགས། སྤྱི་པའི་ཆ་འཕྲིན་ཅན་གྱི་ཞབས་ཞུ། སྨན་བཅོས་འཕྲོད་བསྟེན། གྲོང་ཁྱེར་གྱི་ཁོར་ཡུག རིག་གནས་ལུས་རྩལ། གཞུང་ལས་ཞབས་ཞུ་བཅས་ཡིན་པ་རེད།

དྲ་རྒྱའི་འདྲི་ཤོག་བརྟག་དཔྱད་ཀྱི་གྲངས་གཞིར་ཚན་རིག་དང་མཐུན་པའི་རྩིས་བརྒྱབ་པ་བརྒྱུད་དཔྱད་གཞི་ཚོགས་ཆུང་གིས་ཤེས་རྟོགས་བྱུང་བར། 2019ལོ་འཁོར་གྱི་སྤྱི་པའི་ཞབས་ཞུར་བློ་ཡིད་ཚིམས་ཚད་ཀྱི་བང་རིམ་གྱི་མདུན་གྲལ་བཅུའི་གྲོང་ཁྱེར་ནི་ཀྲུའུ་ཧའེ་དང་། ལྷ་ས། ཟི་ལིང་། ཞ་མོན། ལན་ཀྲོའུ། ཉིང་པོ། ཀུའེ་དབྱང་། ཧྲན་ཐོའུ། ཧང་ཀྲོའུ། ཏ་ལེན་བཅས་ཡིན་པ་དང་། དེ་དག་ཁྲོད་ནས་སྐར་གྲངས་མཐོ་ཤོས་ཀྱི་གྲོང་ཁྱེར་ནི་ཀྲུའུ་ཧའེ་ཡིན་ཞིང་། སྐར་གྲངས་69.81ཡིན་པ་རེད།

ལྷ་སའི་སྐར་གྲངས་རྒྱལ་ཡོངས་ཀྱི་ཨང་གཉིས་པར་སླེབས་ཡོད།

གྲོང་མིས་ཁྲེང་ཀོན་ཆུས་སྤྱི་གླིང་དཔེ་དེབ་ཁང་དུ་དེབ་ལྟ་བཞིན་པ།

ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་བདེ་ཆེན་གྲོང་ཚོའི་ཨུ་ལྷན་གྱི་གཟུགས་པོ་སྦྱོང་བརྡར་ཁང་ནང་ཕྲུ་གུ་རྩེད་མོ་རྩེ་བཞིན་པ།

ལྷ་སའི་གྲོང་མི་དང་ཡུལ་སྐོར་བས་རྫོང་རྒྱབ་ཀླུ་ཁང་དུ་གྲུ་གཟིངས་གཏོང་བཞིན་པ།

ལྷ་ས་གྲོང་ཁྱེར་ལྷོ་སྐོར་ལམ་གྱི་ལྷོ་རི་སྤྱི་གླིང་གི་ལམ་དུམ་བུ་ཡིན་པ།

འགྲིམ་འགྲུལ། ས་རྡོའི་ལམ་བུ་བདེ་སྐྱིད་ཀྱི་ལམ་བུར་གྱུར་པ།

སྔོན་ཆད་ཀརྨ་དགོན་གསར་སྡེ་ཁུལ་གྱི་སྐོར་གླེང་སྐབས་ཚང་མས་ཀོང་དོང་མང་བའི་ས་རྡོའི་ལམ་བུ་དང་འཚང་ཁ་ཆེ་བའི་འགྲིམ་འགྲུལ་གྱིས་ཉེ་འཁོར་མང་ཚོགས་ཀྱི་འགྲོ་སྐྱོད་ལ་རྙོག་དྲ་ཆེན་པོ་བཟོས་པ་ཡིད་ལ་འཁོར་སྲིད། ཉེ་བའི་ལོ་ཤས་རིང་། ལྷ་ས་གྲོང་ཨུད་དང་གྲོང་ཁྱེར་སྲིད་གཞུང་གི་ཚད་མཐོའི་མཐོང་ཆེན་འོག ཀརྨ་དགོན་གསར་གྱི་ལམ་བུ་དེ་སྔའི“ས་རྡོའི་ལམ་བུ”ནས་ད་ཆའི་ཨར་འདམ་གཞུང་ལམ་དང“བདེ་སྐྱིད་ལམ་བུར”གྱུར་ཡོད། ད་ཆ་རླངས་འཁོར་འཇོག་སའི་རྣམ་གྲངས་སྐྲུན་ཟིན་པ་དང་བསྟུན་ནས་ཀརྨ་དགོན་གསར་ཉེ་འགྲམ་གྱི་གྲོང་མིའི་འགྲོ་སྐྱོད་སྔར་བས་སྟབས་བདེ་རུ་ཕྱིན་ཡོད། ལམ་བུ་ཆུང་ངུ་དེ་ཇེ་ལེགས་ཇེ་ཡངས་སུ་ཕྱིན་པ་ལས་ལྷ་ས་གྲོང་ཁྱེར་གྱི་འགྱུར་ལྡོག་ཆེན་པོ་མཚོན་ཐུབ།

རླངས་འཁོར་འཇོག་སའི་རྣམ་གྲངས་བསྐྲུན་ཟིན་པ་དེས་ཀརྨ་དགོན་གསར་ལམ་དུ་རླངས་འཁོར་འཇོག་ས་མི་འདང་བའི་སྣང་ཚུལ་ཞི་ལྷོད་དུ་ཕྱིན་ནས་གྲོང་མིའི་འགྲོ་སྐྱོད་ལ་སྟབས་བདེ་ཆེན་པོ་བསྐྲུན་ཡོད་ལ། ལྷ་ས་གྲོང་ཁྱེར་གྱི་དཔལ་འབྱོར་དར་རྒྱས་དང་འཕེལ་རྒྱས་ལ་སྐུལ་འདེད་དེ་བས་ཀྱང་ཐེབས་ཡོད། ཁྲོམ་གཞུང་གི་འགྱུར་ལྡོག་ལས་དུས་རབས་ཀྱི་འཕོ་འགྱུར་མཚོན་གྱི་ཡོད་ལ། གྲོང་མིའི་བསམ་བློར་ཡང་འགྱུར་ལྡོག་ཕྱིན་ཡོད། དེ་ལས་མི་རྣམས་ཀྱིས་འདི་གར་བདེ་སྡོད་ལས་བརྩོན་བྱེད་པའི་འདུན་པ་བཟང་པོ་མངོན་ཐུབ་པ་དང་། འབྱུང་འགྱུར་གྱི་བདེ་སྐྱིད་ལྡན་པའི་འཚོ་བར་ཚང་མས་རེ་སྒུག་ཆེན་པོ་བྱེད་པ་མཚོན་ཐུབ།

ལྷ་སའི་ལྟེ་བའི་གྲོང་ཁུལ་དུ་བསྐྱོད་སྐབས། མི་རྣམས་ཀྱིས་གྲོང་ཁྱེར་འདིར་སྤྱི་པའི་སྒྲིག་ཆས་ཆ་ཚང་བ་དང་ཁོར་ཡུག་མཛེས་པ་མ་ཟད། བོད་མི་རིགས་ཀྱི་དམིགས་བསལ་ཁྱད་ཆོས་ལྡན་པ་ལས་གཞན་དང་མི་འདྲ་བའི་ཉམས་འགྱུར་ལྡན་ཡོད་པ་ཤེས་ཐུབ།

རིག་གནས། རིག་གནས་འཚོ་བས་མི་སེར་གྱི་བསམ་པའི་དཔལ་ཡོན་ ཕུན་སུམ་ཚོགས་པོར་གྱུར་པ།

ལྷ་ས་གྲོང་ཁྱེར་ཁྲེང་ཀོན་ཆུས་སུ་མི་ཀུན་གྱིས་ཤེས་པའི་དམངས་ཁྲོད་སྒྱུ་རྩལ་ཚོགས་པ་ཞིག་ཡོད་པ་དེ་ནི་ཉང་བྲན་དམངས་ཁྲོད་སྒྱུ་རྩལ་ཚོགས་པ་རེད། ཁོང་ཚོས་ལྷ་མོ་རྒྱུན་འཛིན་དང་འཕེལ་རྒྱས་གཏོང་རྒྱུ་དེ་རང་ཉིད་ཀྱི་ལས་འགན་ལ་བརྩིས་ཏེ་རྒྱུན་འཛིན་བྱས་པའི་སྐྱོར་མོ་ལུང་ལྷ་མོར་གསར་གཏོད་བྱས་ནས་ལྷ་མོའི་ཤུགས་རྐྱེན་ཐེབས་ནུས་སྔར་བས་ཆེ་རུ་བཏང་བ་མ་ཟད། ད་དུང་ལྷ་མོ་འཁྲབ་སྟོན་གྱི་སྒྱུ་རྩལ་པ་མང་པོ་གསོ་སྐྱོང་བྱས་ནས་ལྷ་མོའི་བྱ་གཞག་ཟམ་མི་ཆད་པར་འཕེལ་རྒྱས་འགྲོ་རྒྱུར་སྐུལ་འདེད་བཏང་ཡོད།

སྤྱི་པའི་རིག་གནས་ཞབས་ཞུའི་ཆུ་ཚད་མཐོ་རུ་ཕྱིན་པ་དེ་ནི་རྩེ་རིམ་ཇུས་འགོད་ལ་ཤུགས་སྣོན་བརྒྱབ་པ་དང་ཁ་འབྲལ་ཐབས་མེད། ལྷ་ས་གྲོང་ཁྱེར་རྒྱལ་ཁབ་ཀྱི་སྤྱི་པའི་རིག་གནས་ཞབས་ཞུའི་མ་ལག་དཔེ་སྟོན་ཁུལ་གཏོད་འཛུགས་ཀྱི་གྲོང་ཁྱེར་ཁག་གསུམ་པར་གཏན་འཁེལ་བྱས་རྗེས་འཕྲལ་དུ་གཏོད་འཛུགས་ལས་དོན་འགོ་ཁྲིད་ཚོགས་ཆུང་བཙུགས་པ་དང་། 《ལྷ་ས་གྲོང་ཁྱེར་གྱི་ཁག་གསུམ་པའི་རྒྱལ་ཁབ་ཀྱི་སྤྱི་པའི་རིག་གནས་ཞབས་ཞུའི་མ་ལག་དཔེ་སྟོན་ཁུལ་གཏོད་འཛུགས་ཀྱི་འཆར་འགོད(2015ནས་2017ལོ་བར)》དང《དེང་རབས་ཀྱི་སྤྱི་པའི་རིག་གནས་ཞབས་ཞུའི་མ་ལག་འཛུགས་རྒྱུའི་སྐོར་གྱི་ལག་བསྟར་བསམ་འཆར》《གཞི་རྩའི་སྤྱི་པའི་རིག་གནས་ཞབས་ཞུའི་ལག་བསྟར་ཚད་གཞི》སོགས་བཟོས་ཏེ་སྒྲིག་བཀོད་འཛུགས་སྐྲུན་དང་། མ་དངུལ་གཏོང་བ། དཔུང་ཁག་འཕེལ་རྒྱས། བྱེད་སྒོ་སྤེལ་ཚུལ། ལམ་སྲོལ་འཛུགས་སྐྱོང་སོགས་ཐད་ནས་འགན་ལེན་བྱས་པས། སྲིད་གཞུང་གིས་འགན་འཁུར་བ་དང་། སྡེ་ཚན་གྱིས་སྣེ་ཁྲིད་པ། རྫོང་དང་ཆུས་ཀྱིས་གཞོཌ་འདེགས་བྱེད་པ། ཁུར་མཉམ་ལེན་དང་དོན་སྤྱི་སྒྲུབ། མཐུན་སྦྱོར་སྐུལ་འདེད་གཏོང་བ་བཅས་ཀྱི་ལས་ཀའི་རྣམ་པ་ཞིག་གྲུབ་ཡོད།

མིག་སྔར་གྲོང་ཁྱེར་ཡོངས་སུ་རིམ་ཁག་རིག་གནས་ཁང(ས་ཚིགས)75དང་། རྟེན་རྫས་བཤམས་མཛོད་ཁང་སྣ་ཚོགས་6 ཞིང(འབྲོག)དུད། སྡེ་ཁུལ། དགོན་སྡེ་བཅས་སུ་དཔེ་དེབ་ཁང་459བསྐྲུན་ཟིན་ནས་གྲོང་ཁྱེར་དང་། རྫོང་། ཤང་བཅས་རིམ་གསུམ་གྱི་སྤྱི་པའི་རིག་གནས་སྒྲིག་བཀོད་དྲ་རྒྱ་ཁྱོན་ཡོངས་ལ་ཁྱབ་ཡོད། རིག་གནས་འཚོ་བ་མྱོང་རོལ་ཡག་པོ་བྱ་རྒྱུ་བྱུང་བ་དེ་གྲོང་ཁྱེར་ཡོངས་ཀྱི་མི་སེར་གྱི་བདེ་སྐྱིད་སྟོན་གྲངས་གལ་ཆེ་ཤོས་ཤིག་ཏུ་གྱུར་ཡོད།

སློབ་གསོ། དེང་རབས་ཀྱི་སློབ་གསོའི་མ་ལག་ཕྱོགས་ཡོངས་ལ་ཁྱབ་པ།

ལྷ་ས་གྲོང་ཁྱེར་གྱིས་སློབ་གསོ་ནི་ཐོག་མཐའ་བར་གསུམ་དུ་སྔོན་དུ་འཕེལ་རྒྱས་གཏོང་བའི་འཐབ་ཇུས་ཀྱི་གནས་བབ་ཏུ་འཇོག་གི་ཡོད། 2012ལོར་སློབ་གསོ་སྒྱུར་བཅོས་དང་འཕེལ་རྒྱས་མགྱོགས་པོ་གཏོང་རྒྱུ་བརྗོད་དོན་གཙོ་བོར་བྱེད་པའི“གྲོང་ཨུད་ཀྱི་ཡིག་ཨང་དང་པོ”བཏོན་པ་དང་2014ལོར་སློབ་གསོ་དར་རྒྱས་དང་སློབ་ཁྲིད་ཀྱི་སྤུས་ཚད་མཐོ་རུ་གཏོང་རྒྱུ་བརྗོད་དོན་གཙོ་བོར་བྱེད་པའི“གྲོང་ཨུད་ཀྱི་ཡིག་ཨང་གཉིས་པ”བཏོན་ནས་སློབ་གསོ་སྒྱུར་བཅོས་ལས་དོན་འཕེལ་རྒྱས་གཏིང་ཟབ་བཏང་བས་སློབ་གསོ་དང་སློབ་ཁྲིད་ལས་དོན་གྱི་སྤུས་ཚད་མངོན་གསལ་དོད་པོས་མཐོ་རུ་ཕྱིན་ཡོད། གྲོང་ཁྱེར་ཡོངས་ལ་སློབ་ཞུགས་གོང་གི་སློབ་གསོ་དང་། རྨང་གཞིའི་སློབ་གསོ། ལས་རིགས་སློབ་གསོ། མཐོ་རིམ་སློབ་གསོ། དར་མའི་སློབ་གསོ། དམིཌ་བསལ་སློབ་གསོ་སོགས་ཚུད་པའི་ཅུང་འཐུས་སྒོ་ཚང་བའི་དེང་རབས་སློབ་གསོའི་མ་ལག་ཡོད་པ་དང་དེས་མི་དམངས་མང་ཚོགས་ཀྱི་རིམ་པ་མང་བ་དང་། རྣམ་པ་མང་བ། སྤུས་ཚད་མཐོ་བ་བཅས་ཀྱི་སློབ་གསོའི་དགོས་མཁོ་སྐོང་ཐུབ་ཀྱི་ཡོད་པ་རེད།

དེ་དང་དུས་མཚུངས་ལྷ་ས་གྲོང་ཁྱེར་གྱིས་སློབ་གསོ་དེ་སྤྱི་ཚོཌ་དྲང་སྙོམས་ཀྱི་རྨང་གཞིར་བརྩི་བ་དང་ལྷ་ས་འཕེལ་རྒྱས་གཏོང་བའི་རེ་བར་བརྩིས་ཏེ། སློབ་གསོ་དོ་སྙོམས་ཅན་དང་ཚད་ལྡན་ཅན་ངང་འཕེལ་རྒྱས་འགྲོ་རྒྱུར་ཕྱོཌ་ཡོངས་ནས་སྐུལ་འདེད་བཏང་ནས་སློབ་གྲྭ་སྣ་ཚོགས་118གསར་སྐྲུན་བསྐྱར་བསྐྲུན་བྱས་པ་རེད། སློབ་གསོའི་སྤུས་ཚད་མཐོ་རུ་གཏོང་རྒྱུར་དེ་བས་སྣང་ཆེན་བྱེད་པ་དང་། སློབ་གསོ་ཤེས་ལྡན་པའི་ཚོཌ་སྒྲིག་རྣམ་པའི་བོད་སྐྱོར་ལས་དོན་ལ་སྐུལ་འདེད་ཏན་ཏིག་གཏོང་བ། དགེ་རྒན་དང་སློབ་གསོ་དར་རྒྱས་ཀྱི་འཆར་གཞི་ལག་བསྟར་ཤུཌ་ཆེན་བྱེད་པ། གྲོང་གསེབ་དགེ་རྒན་ལ་རྒྱབ་སྐྱོར་བྱེད་པའི་འཆར་གཞིར་ཕྱོགས་ཡོངས་ནས་སྐུལ་འདེད་གཏོང་བ། ཕུལ་བྱུང་དགེ་རྒན་དང་ཚོགས་པར་མུ་མཐུད་བྱ་དགའ་ཆེན་པོ་སྤྲོད་པ་བཅས་བྱས་ཡོད་པ་རེད།

སྨན་བཅོས། བདེ་ཐང་ལྷ་ས་འཛུགས་སྐྲུན་བྱེད་པར་སྐུལ་འདེད་བརྟན་པོ་བཏང་བ།

གྲོང་ཁྱེར་གྱི་གཞི་རྩའི་སྤྱི་པའི་ཞབས་ཞུའི་བློ་ཡིད་ཚིམས་ཚད་ལ་གདེང་འཇོག་བྱེད་པའི་དམིགས་ཚད་མ་ལག་གི་གཞི་རྩའི་རྒྱུ་རྐྱེན་བཅུའི་གྲས་ཤིག་ཡིན་པའི་སྨན་བཅོས་འཕྲོད་བསྟེན་ལ་དམིགས་ཏེ། ལྷ་ས་གྲོང་ཁྱེར་གྱིས་བདེ་ཐང་ལྷ་ས་འཛུགས་སྐྲུན་ཐད་ཐོག་མཐའ་བར་གསུམ་དུ་སྐུལ་འདེད་ཧུར་ཐག་བཏང་བ་དང་། སྨན་བཅོས་འཕྲོད་བསྟེན་མ་ལག་རྒྱུན་ཆད་མེད་པར་འཐུས་ཚང་དུ་གཏོང་རྒྱུར་སྐུལ་འདེད་བཏང་བ། སྨན་བཅོས་ཞབས་ཞུ་རྒྱུན་ཆད་མེད་པར་མཐོ་རུ་བཏང་ནས་རྒྱལ་ཁབ་ཀྱི་འཕྲོད་བསྟེན་གྲོང་ཁྱེར་གཏོད་འཛུགས་ཀྱི་བསྐྱར་ཞིབ་བདེ་བླག་ངང་ལེགས་གྲུབ་བྱུང་བ་རེད།

ལོ་མང་རིང་ལྷ་ས་གྲོང་ཁྱེར་གྱིས་གཞུང་བཙུགས་སྨན་ཁང་འཕེལ་རྒྱས་གཏོང་རྒྱུར་སྐུལ་འདེད་བཏང་ནས་ཚོགས་སྒྲིག་རྣམ་པའི་བོད་སྐྱོར་སྨན་བཅོས་ཤེས་ལྡན་པའི་ལེགས་ཆའི་ནུས་པ་འདོན་སྤེལ་གང་ལེགས་བྱས་པ་མ་ཟད། གཙོ་གནད་རིག་ཚན་ནུས་ཤུགས་ཡོད་རྒུས་གཏོད་པ་དང་། ཚན་ཞིབ་ཀྱི་ཞན་ཆ་གསབ་པ། “བརྒྱུད་རོགས་ཁྲིད”གསུམ་ཧུར་ཐག་བཅས་བྱས་པས་སྨན་བཅོས་རྩལ་ནུས་དང་ཆུ་ཚད་སྤྱིར་ན་མཐོ་རུ་ཕྱིན་པ་དང་ལྷ་ས་གྲོང་ཁྱེར་མི་དམངས་སྨན་ཁང“ཀ་པ་རིམ་པ་གསུམ་པའི”སྨན་བཅོས་དཔྱད་འདེམས་བདེ་བླག་ངང་ལེགས་གྲུབ་བྱུང་བ་རེད། ལྷ་ས་གྲོང་ཁྱེར་ལྟེ་བའི་སྨན་ཁང་གི་འཛུགས་སྐྲུན་བདེ་བླག་ངང་ལེགས་གྲུབ་ཡོང་བར་སྐུལ་འདེད་བཏང་སྟེ། གཞུང་བཙུགས་སྨན་ཁང་ནས་སྨན་རྫས་བྲིན་ཚོང་བྱེད་སྐབས་སྨན་རྫས་ཐོག་མར་ཉོ་སྐབས་ཀྱི་རིན་གོང་དང་ཁྱད་པར་མེད་པར་བྱ་རྒྱུ་མངོན་འགྱུར་བྱུང་ཡོད།

ད་ཆ་ལྷ་སའི་གྲོང་ཁྱེར་དང་གྲོང་གསེབ་ཏུ་བོད་ལུགས་སྨན་བཅོས་དང་། ཕྱི་ལུགས་སྨན་བཅོས། ཀྲུང་ལུགས་སྨན་བཅོས་བཅས་ཟུང་འབྲེལ་གྱི་སྤྱི་པའི་སྨན་བཅོས་འཕྲོད་བསྟེན་ཞབས་ཞུའི་མ་ལག་གང་སར་ཡོད་ལ། ཤང་གྲོང་གི་སྨན་ཁང་དང་གྲོང་ཚོ་རིམ་པའི་འཕྲོད་བསྟེན་ཁང་ཡང་གང་སར་ཁྱབ་ཡོད། ཞིང་འབྲོག་ཁུལ་གྱི་སྨན་བཅོས་ལམ་ལུཌ་གྲོང་ཁྱེར་ཡོངས་ཀྱི་ཞིང་འབྲོག་པར་ཁྱབ་ཡོད་པ་རེད།