ཀོང་ཏུང་ཞིང་ཆེན་གྱི་ཁག་དགུ་པའི་བོད་སྐྱོར་ལས་དོན་སྤེལ་བ་ནས་བཟུང་། བྲག་ཡིབ་ཆུས་ཀྱི་བོད་སྐྱོར་ལས་དོན་ཚོགས་ཆུང་གིས་ཀོང་བོད་ས་ཆ་གཉིས་ཀྱི་ཏང་ཨུད་དང་སྲིད་གཞུང་གི་བོད་སྐྱོར་ལས་དོན་གྱི་བཀོད་སྒྲིག་ལག་བསྟར་དོན་འཁྱོལ་ཧུར་ཐག་བྱས་ཏེ་ཐོན་ལས་དབུལ་སྐྱོར་དང་། དམངས་འཚོ་བོད་སྐྱོར། ཆ་སྒྲིག་རོགས་སྐུལ་བཅས་མངོན་གསལ་དོད་པོ་ཡོང་བར་བྱས་ནས། བྲག་ཡིབ་ཆུས་ལ་དབུལ་སྒྲོལ་འགག་སྒྲོལ་གྱི་གྲུབ་འབྲས་བརྟན་གཏོང་དང་དབུལ་སྒྲོལ་འགག་སྒྲོལ་དམག་འཐབ་ལ་ཕྱོགས་ཡོངས་ནས་རྒྱལ་ཁ་ལེན་ཆེད་སྒུལ་ཤུགས་ཆེན་པོ་བསྣན་ཡོད།
ཐོན་ལས་དབུལ་སྐྱོར་གྱིས་མང་ཚོགས་འབབ་འཕར་གྱི་ཐབས་ལམ་གསར་པ་རྒྱ་སྐྱེད་བཏང་ཞིང་། རྣམ་གྲངས་ལ་བརྟེན་ནས་ཐོན་ལས་སྐུལ་ཁྲིད་བྱས་པ་དང་། རྣམ་གྲངས་ཀྱི་མ་དངུལ་དེ་གཞི་རིམ་དུ་ཕྱོགས་པ་དང་ཞིང་འབྲོག་པར་ཕྱོགས་ནས་ས་གནས་ཀྱི་ཐོན་ཁུངས་ལེགས་ཆ་དེ་འཕེལ་རྒྱས་ཀྱི་ལེགས་ཆ་དང་དམངས་ཕྱུག་གི་ལེགས་ཆར་བསྒྱུར་ནས་བྲག་ཡིབ་ཆུས་ཀྱི་དབུལ་སྒྲོལ་གྱི“རང་བརྟེན”ནུས་པ་ཆེ་རུ་བཏང་བ་རེད། དྲིལ་བསྒྲགས་ལས་སྟེགས་ཧུར་ཐག་ངང་བཏོད་པ་དང་ཏུང་ཝན་གྱི་ལེགས་ཆའི་ཐོན་ཁུངས་གང་ལེགས་སྤྱད་པ་མ་ཟད། ཀྲུང་གོའི(ཏུང་ཝན)རྒྱལ་སྤྱིའི་ཁྲེན་ཞང་རིག་གནས་ཐོན་ལས་དངོས་མང་སྟོན་ཚོགས་སྐབས་བཅུ་པ་གོ་སྐབས་སུ་བྱས་ནས་བྲག་ཡིབ་ཆུས་ཀྱི་ཁེ་ལས་6གིས་གཟིམ་སྤོས་དང་། བོད་ཕག ཀུ་ཤུ། ཀོ་ཤ་སོགས་ཉིང་ཁྲིའི་ཐོན་རྫས་གྲགས་ཅན་སྣ་ཁ་བཅུ་ལྷག་འཁྱེར་ནས་ཏུང་ཝན་དུ་འགྲེམས་འཚོང་བྱས་པར་ཉོ་ཚོང་བྱེད་ཚད་སྒོར་ཁྲི་110ཡི་གན་འཇོག་བྱས་པས། བྲག་ཡིབ་ཀྱི་ཁྱད་ལྡན་ཞིང་འབྲོག་ཐོན་ཟོག་སྔར་བས་ལེགས་པའི་སྒོ་ནས་ཏུང་ཝན་སོགས་ནང་སའི་ཁྲོམ་རར་ཕྱོགས་པར་རྨང་གཞི་བརྟན་པོ་བཏིང་བ་རེད།
ཆ་སྒྲིག་རོགས་སྐུལ་གྱིས་དབུལ་སྐྱོར་མཉམ་སྐུལ་གྱི་ཐབས་ལམ་གསར་པ་བཏོད་ཅིང་། བོད་སྐྱོར་ལས་བྱེད་པས“གཅིག་གཏད་གཅིག”གི་རོགས་སྐྱོར་བྱས་ཏེ། ཞིང་འབྲོག་མང་ཚོགས་དབུལ་པོ་རོགས་སྐྱོར་བྱ་ཡུལ་དུ་བྱེད་པ་དང་དཀའ་ངལ་ཡོད་པའི་མང་ཚོགས་དབུལ་སྒྲོལ་ཕྱུག་འགྱུར་ཡོང་རྒྱུ་གཙོ་གནད་དུ་བྱས་ཏེ། ཐོན་སྐྱེད་དང་འཚོ་བའི་ཐད་ཀྱི་དཀའ་ངལ་སེལ་རོགས་བྱས་པ་རེད། ཁ་གཏད་ཚན་པས“གནས་ཀྱིས་གནས་ལ་དམིགས་པའི”རོགས་སྐྱོར་ལ་བརྟེན་ནས་བྲག་ཡིབ་ཆུས་ཀྱི་བོད་སྐྱོར་ལས་དོན་ཚོགས་ཆུང་གིས་འབྲེལ་ཟམ་གྱི་ནུས་པ་གང་ལེགས་བཏོན་ཏེ། ཏུང་ཝན་དང་བྲག་ཡིབ་ས་ཆ་གཉིས་ཀྱི་ཁ་གཏད་ཚན་པར་སྤེལ་རེས་འབྲེལ་འདྲིས་མཉམ་འདྲེས་ཀྱི་རྣམ་པ་ཡག་པོ་ཞིག་མངོན་རྒྱུར་རམ་འདེགས་བྱས་པ་རེད།
དམངས་འཚོ་ལེགས་སུ་བཏང་ནས་བདེ་སྐྱིད་འཚོ་བའི་རྒྱང་སྐྱོད་ལམ་བུ་བཏོད་ཅིང་། བྲག་ཡིབ་ཆུས་ཀྱི་བོད་སྐྱོར་ལས་དོན་ཚོགས་ཆུང་གིས་རྨང་གཞི་བརྟན་གཏོང་མངོན་གསལ་དོད་པོ་ཡོང་བར་བྱས་ནས། གཞི་རིམ་གྱི་རྨང་གཞི་དང་ཏང་འཛུགས་སྐྱོང་ལས་དོན་དེ་ནང་དོན་གལ་ཆེན་དུ་བརྩིས་ནས་དམ་འཛིན་བྱེད་རྒྱུ་མཐའ་འཁྱོངས་བྱས་པ་མ་ཟད། གཞི་རིམ་རྩ་འཛུགས་ཀྱི་སྲིད་དབང་བརྟན་གཏོང་དེ་འཇུག་གཞིར་བྱས་ནས་མ་དངུལ་སྒོར་ཁྲི་4000བཏང་ནས་འབྱོར་འབྲིང་དཔེ་སྟོན་གྲོང་ཚོ་8བསྐྲུན་པ་དང་། གཞི་རིམ་ཏང་རྩ་འཛུགས་ལ་ལས་སྒྲུབ་ཆ་རྐྱེན་ལེགས་སུ་གཏོང་རོགས་བྱས་ནས་གཞི་རིམ་ཏང་འཛུགས་སྐྱོང་ལ་སྲ་ཞིང་བརྟན་པའི་དམག་འཐབ་མཁར་རྫོང་ཞིག་ཀྱང་བསྐྲུན་པ་རེད།