ལྷ་ས་མངའ་རིས་མཐོ་རིམ་སློབ་འབྲིང་དུ་བཅའ་སྡོད་བྱས་པའི་ལོ་གསུམ་རིང་། ཧྲའན་ཤིས་ཞིང་ཆེན་བོད་སྐྱོར་ལས་བྱེད་ཤེས་ལྡན་པ་ཁག་དགུ་པ་དང་ཚོགས་སྒྲིག་རྣམ་པའི་སློབ་གསོའི་བོད་སྐྱོར་དཔུང་ཁག་ཁག་གཉིས་པས་ལྷ་ས་མངའ་རིས་སློབ་འབྲིང་གི་སློབ་མར་ལྷད་མེད་ཀྱི་བརྩེ་སེམས་ཟབ་མོ་བཅངས་པ་དང་། མངོན་གསལ་དོད་པའི་ཆབ་སྲིད་ཀྱི་ཚུགས་གནས་དང་། རྩེར་སོན་གྱི་ཆེད་ལས་བྱང་ཚད། སྒེར་སེམས་མེད་པའི་ལེགས་སྐྱེས་ཀྱི་སྙིང་སྟོབས་བཅས་ལ་བརྟེན་ནས་གངས་ལྗོངས་ས་མཐོར་ཧྲའན་ཤིས་ཀྱི་བོད་སྐྱོར་བའི་ངོ་མཚར་གཏམ་རྒྱུད་བརྩམས་པ་རེད།
དགེ་རྒན་ཀུན་སྤྱོད་བཟང་། གཞན་ཕན་སྤྲོ་སེམས་ཆེ།
ཀྲའོ་ཅང་ཧྲེ་ནི་ཧྲའན་ཤིས་ཞིང་ཆེན་གྱི་ཚོགས་སྒྲིག་རྣམ་པའི་སློབ་གསོའི་བོད་སྐྱོར་དཔུང་ཁག་ཁག་གཉིས་པའི་རུ་དཔོན་རེད་ལ། ལྷ་ས་མངའ་རིས་མཐོ་རིམ་སློབ་འབྲིང་གི་སློབ་སྤྱི་ཡང་རེད། ལས་ཀའི་ཐད། ཁོང་གིས་བོད་སྐྱོར་དགེ་རྒན་ཚོར་རེ་བ་ཆེན་པོ་དང་སྒྲིག་ཁྲིམས་ཀྱི་བླང་བྱ་ནན་པོ་བཏོན་ནས་ཁྲལ་སེལ་སླ་བཅོས་གཏན་ནས་བྱེད་ཀྱི་མེད། འཚོ་བའི་ཐད། ཁོང་གིས་དུས་རྒྱུན་དུ་བོད་སྐྱོར་དགེ་རྒན་གྱི་འཚོ་བ་དང་སེམས་ཁམས་ལ་དོ་ཁུར་བྱས་ཏེ། ལས་ཐག་བཅད་རྗེས་བོད་སྐྱོར་དགེ་རྒན་དང་མཉམ་དུ་སློབ་གྲྭའི་ཉེ་འཁོར་དུ་འཆམ་འཆམ་དུ་བསྐྱོད་ནས་བསམ་ཚུལ་བརྗེ་རེས་བྱེད་ཀྱི་ཡོད། ལྷ་ས་མངའ་རིས་མཐོ་རིམ་སློབ་འབྲིང་དུ་སླེབས་རྗེས། ཀྲའོ་ཅང་ཧྲེ་ཡིས་རང་ཉིད་ཀྱི་ནུས་པར་བརྟེན་ནས་སློབ་གྲྭར་དགེ་སྒྲུབ་ཐེབས་རྩ་ཁག་གཅིག་འབྲེལ་གཏུག་བྱས་ཏེ་་སློབ་གྲྭའི་སྒྲིག་བཀོད་འཐུས་སྒོ་ཚང་དུ་བཏང་ནས་དགེ་སློབ་ཀྱི་སློབ་གསོའི་ཁོར་ཡུག་ལེགས་སུ་བཏང་བ་དང་། སྤྱི་ཚོགས་ཀྱི་ཁྱབ་ཁོངས་ཁག་ཏུ་གྲུབ་འབྲས་ངེས་ཅན་ཡོད་པའི་མི་སྣ་སློབ་གྲྭར་འཆད་ཁྲིད་བྱེད་པར་གདན་དྲངས་ནས་སློབ་མའི་མིག་རྒྱང་རིང་རུ་གཏོང་རོགས་བྱས་པ། སློབ་གྲྭའི་སློབ་ཚན་གྱི་མ་ལག་ལ་སྒྱུར་བཅོས་བྱས་ནས་ཉི་འོད་ལུས་རྩལ་དུས་ཚོད་དང་ཚོགས་པའི་བྱེད་སྒོ་གསར་དུ་བཙུགས་བྱས་ནས། རང་སྐྱོང་ལྗོངས་ཀྱི་དཔེ་སྟོན་སློབ་གྲྭའི་ཚད་གཞི་དང་དེ་བས་འཚམ་པར་བྱས་ཏེ་སློབ་མའི་བྱང་ཚད་གོང་འཕེལ་ལ་སྐུལ་འདེད་བཏང་བ་རེད།
ལས་སྒོ་བྱང་ཞིང་ཆུབ། ཉམས་མྱོང་སྤེལ་རེས་བཟང་།
ལྷ་ས་མངའ་རིས་མཐོ་རིམ་སློབ་འབྲིང་གི་དགེ་རྒན་ཚོས་སློབ་ཚན་ཐུང་ངུའི་ཇུས་འགོད་འདུ་ཤེས་དང་ལག་རྩལ་དེ་བས་ཤེས་རྟོཌ་དང་ཁོང་དུ་ཆུད་པར་བྱས་ནས་སློབ་གྲྭའི་སློབ་གསོ་ཆ་འཕྲིན་ཅན་གྱི་འཕེལ་རྒྱས་མགྱོཌ་སུ་གཏོང་ཆེད། ཆབ་སྲིད་སློབ་གསོ་ཞིབ་འཇུག་ཚོཌ་ཆུང་གི་དགེ་རྒན་ལི་ཁྲེན་ཀོང་གིས་སློབ་ཚན་ཐུང་ངུ་བཟོ་སྒྲིག་ཐད་ས་ཆ་དངོས་སུ་གསོ་སྦྱོང་དང་མཛུབ་ཁྲིད་བྱས་པ་རེད།
སློབ་ཚན་ཐུང་ངུའི་བཟོ་སྒྲིག་གི་གསོ་སྦྱོང་ཐད། ལི་ཁྲེན་ཀོང་གིས་སྔོན་ལ་ལས་རོགས་ཚོར་སློབ་ཚན་ཐུང་ངུའི་བཟོ་སྒྲིག་མཉེན་ཆས་ངོ་སྤྲོད་བྱས་པ་དང་འབྲེལ་རང་ཉིད་ཀྱི་བརྩམས་ཆོས་ལ་བརྟེན་ནས་སློབ་ཚན་ཐུང་ངུ་དཔེ་གསར་དང་སྲོལ་རྒྱུན་གྱི་བརྙན་ཤེལ་ཕབ་ལེན་དབར་གྱི་ཁྱད་པར་བཏོན་ནས། ཁོང་ཚོས་སློབ་ཚན་ཐུང་ངུའི“ཐུང་ལ་སྤུས་དག་པའི་སློབ་ཁྲིད་དུམ་བུ”གསལ་པོར་རྟོགས་ཐུབ་པ་བྱས་ཤིང་། དེ་རྗེས་ལི་ཁྲེན་ཀོང་གིས་སློབ་ཚན་ཐུང་ངུའི་བཟོ་སྒྲིག་གི་བརྒྱུད་རིམ་འགྲེལ་བཤད་བརྒྱབ་པ་དང་འབྲེལ། སློབ་ཚན་ཐུང་ངུ་བཟོ་སྒྲིག་བྱེད་སྟངས་དམར་ཁྲིད་བྱས་ནས་དགེ་རྒན་ཚང་མས་སློབ་ཚན་ཐུང་ངུའི་བཟོ་སྒྲིག་གི་བརྒྱུད་རིམ་དང་ཐབས་ཤེས་ཁོང་དུ་ཆུད་པར་བྱས་པ་དང་སྦྲགས། སློབ་ཚན་ཐུང་ངུའི“ཐུང་ཡང་སྤུས་དག་པའི”དམིགས་བསལ་གྱི་ཁྱད་ཆོས་ཤེས་རྟོགས་ཐུབ་པ་བྱས་པ་རེད།
སློབ་མ་བྱམས་ཀྱིས་བསྐྱངས། བཀའ་དྲིན་རྫོགས་མཐའ་མེད།
2019ལོའི་ཟླ་11ཚེས་30ཉིན་གྱི་ཕྱི་དྲོ། ལྷ་ས་མངའ་རིས་མཐོ་རིམ་སློབ་འབྲིང་གི་ལུས་རྩལ་ཐང་དུ་དགེ་སློབ་ཚང་མ་མཉམ་དུ་འཛོམས་ནས་གཅེས་སེམས་མཚོན་པའི་དགུན་དུས་སློབ་གོས་སྤྲོད་པའི་མཛད་སྒོར་ཞུགས་པ་རེད། དགུན་དུས་སློབ་གོས་དེ་སློབ་སྤྱི་ཀྲའོ་ཅང་ཧྲེ་དང་ཧྲའན་ཤིས་ཞིང་ཆེན་བོད་སྐྱོར་ལས་དོན་རུ་ཁག་ཁག་དགུ་པའི་འགོ་ཁྲིད་ཀྱིས་ཤིས་པུའུ་རིག་གནས་སློབ་གསོ་གསོ་སྦྱོང་ལྟེ་གནས་དང་། ཤིས་ཨན་ཧྥང་ཀྲེང་མཐོ་རྒྱུགས་གསབ་སྦྱོང་སློབ་གྲྭ། ཤིས་ཨན་ཞུའེ་ཏ་སློབ་གསོ། ཤིས་ཨན་ཝུའུ་ཅང་སློབ་གསོ། ཤིས་ཨན་ཅུན་ཧན་སློབ་གསོ་སོགས་དམངས་གཉེར་སློབ་གསོའི་སྒྲིག་གཞི་དང་འབྲེལ་བ་བྱས་ཏེ་ཞལ་འདེབས་བརྒྱབ་པའི་མ་དངུལ་གྱིས་ཉོས་པ་ཞིག་ཡིན་ཞིང་། ཁྱོན་བསྡོམས་དྲོད་སྲུང་གཉིས་སྦྱར་གྱོན་གོས་དང་དྲོད་སྲུང་ནང་སྦྱར་ཁག་1500ཉོས་ནས་སློབ་མ་ཚོར་དྲོ་སྣང་སྦྱིན་ཡོད། དགུན་དུས་སློབ་གོས་རག་པའི་སློབ་མ་ཚོ་དགའ་ཚོར་ཆེན་པོ་བྱུང་ཞིང་། སློབ་མའི་འཐུས་མི་སྐལ་བཟང་ཟླ་བས་སློབ་མ་ཡོངས་ཀྱི་ཚབ་བྱས་ཏེ་གཏམ་བཤད་སྤེལ་ནས་ཐག་རིང་གི་སེམས་བཟང་མི་སྣར་གུས་བཀུར་དང་ཐུགས་རྗེ་ཆེ་ཞུ་ལུགས་མཚོན་པར་བྱས་པ་རེད། སློབ་མ་ཚོས་ཁོང་ཚོའི་བཀའ་དྲིན་མ་བརྗེད་པར་སློབ་སྦྱོང་ཡག་པོ་བྱས་ནས་རང་ཉིད་ཀྱི་ལས་དབང་ལ་འགྱུར་ལྡོག་གཏོང་བ་དང་། སྤྱི་ཚོགས་ལ་ཕན་པའི་མི་ཞིག་བྱས་ནས་སྤྱི་ཚོགས་དང་། རིམ་ཁག་འགོ་ཁྲིད། སེམས་བཟང་མི་སྣ་བཅས་ལ་དྲིན་ལན་འཇལ་རྒྱུ་ཡིན་ཞེས་གཅིག་རྗེས་གཉིས་མཐུད་ངང་བཤད་པ་རེད།