ཉེ་ཆར། མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་སྐུ་ཚབ་ཀྲང་ཅུན་གྱིས་མཉམ་འབྲེལ་རྒྱལ་ཚོགས་རྒྱུན་མཐུད་འཕེལ་རྒྱས་ཀྱི་རིམ་མཐོའི་ཆབ་སྲིད་གླེང་སྟེགས་ཀྱི་པུའུ་ཀྲང་རིམ་པའི་ཚོགས་འདུའི་སྤྱིར་བཏང་རང་བཞིན་གྱི་རྩོད་གླེང་ཐོག་གཏམ་བཤད་སྤེལ་ཏེ། རྒྱལ་སྤྱིའི་སྤྱི་ཚོགས་ཀྱིས་བྱ་སྤྱོད་སྤེལ་ནས་ཐུན་མོང་ཐོག་འཕེལ་རྒྱས་མངོན་འགྱུར་ཡོང་བ་བྱེད་དགོས་པའི་འབོད་སྐུལ་བྱས་པ་རེད།

ཀྲང་ཅུན་གྱིས། མིག་སྔར་འཛམ་གླིང་ལ་ལོ་བརྒྱའི་ནང་ཐོན་མྱོང་མེད་པའི་འགྱུར་ལྡོག་ཆེན་པོ་འཕྲད་བཞིན་ཡོད། ལོ་བརྒྱའི་ནང་ཐོན་མྱོང་མེད་པའི་རིམས་ནད་ཚབས་ཆེན་དེས་མིའི་རིགས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་རྡབ་རྡེག་དྲག་པོ་བཏང་བས་གོ་ལ་ཧྲིལ་པོའི་རང་བཞིན་གྱི་ཉམས་ཉེན་དེར་མཉམ་དུ་ཁ་གཏད་གཅོག་པ་ནི་གདམ་ག་འབའ་ཞིག་དེ་རེད། རྙོག་འཛིང་ཆེ་ལ་ཛ་དྲག་པའི་དུས་བབ་ཀྱི་མདུན་དུ་ཐུན་མོང་འཕེལ་རྒྱས་མངོན་འགྱུར་ཡོང་བ་བྱ་རྒྱུ་དེ་ད་ལྟ་ལྟར་ཁ་ཚ་དགོས་གཏུགས་སུ་འགྱུར་མྱོང་མེད་ལ། 2030ལོའི་རྒྱུན་མཐུད་འཕེལ་རྒྱས་ཀྱི་གྲོས་རིམ་མགྱོགས་མྱུར་དོན་འཁྱོལ་བྱ་རྒྱུ་དེའང་ད་ལྟ་ལྟར་གལ་ཆེན་དུ་འགྱུར་མྱོང་མེད་ཅེས་བརྗོད་པ་རེད།

ཀྲང་ཅུན་གྱིས། ཕྱོགས་ཁག་གིས“རྒྱུན་མཐུད་འཕེལ་རྒྱས་ཀྱི་དམིགས་ཚད་ཀྱི་ལོ་བཅུའི་བྱ་སྤྱོད”ཀྱི་འགོ་ཚུགས་ལོ་དེ་གོ་སྐབས་སུ་བྱས་ནས་ཡིད་ཆེས་དང་ཆོད་སེམས་བརྟན་དུ་གཏོང་བ་དང་བྱ་སྤྱོད་སྤེལ་ཤུགས་ཆེ་རུ་བཏང་ནས་ཏོག་གསར་རིམས་ནད་ལ་འགོག་རྒོལ་ནུས་ལྡན་བྱེད་པ་དང་། རྒྱུན་མཐུད་ཐུབ་པ་དང་བསྟུན་མཁས་རང་བཞིན་གྱི་དཔལ་འབྱོར་སླར་གསོ་དང་འཕར་རྒྱུར་སྐུལ་འདེད་གཏོང་བ། 2030ལོའི་གྲོས་རིམ་མགྱོགས་མྱུར་དོན་འཁྱོལ་ཐུབ་པ་བཅས་བྱེད་དགོས་པའི་འབོད་སྐུལ་བྱས་པ་རེད།

གཞན་ཡང་། ཁོང་གིས་གཅིག་ནས་མཐུན་སྒྲིལ་མཉམ་ལས་ལ་ཤུགས་སྣོན་བརྒྱབ་སྟེ་དུས་སྐབས་ཀྱི་དཀའ་ངལ་མཉམ་དུ་ཁྱད་བསད་བྱེད་དགོས་པ་དང་། གཉིས་ནས་འཕེལ་རྒྱས་གོང་དུ་བཀུར་རྒྱུ་མཐའ་འཁྱོངས་བྱས་ཏེ་གཙོ་གནད་ཁྱབ་ཁོངས་འབུར་དུ་ཐོན་པ་བྱེད་དགོས། གསུམ་ནས་སྒོ་དབྱེ་བསྟུན་མཁས་མཐའ་འཁྱོངས་བྱས་ཏེ་མཉམ་ལས་གཉིས་ཁེ་མངོན་འགྱུར་བྱེད་དགོས། བཞི་ནས་ཐུན་མོང་འཕེལ་རྒྱས་ལ་དམིགས་ཏེ་རོགས་ཟླའི་འབྲེལ་བར་ཤུགས་སྣོན་རྒྱག་དགོས་ཞེས་བརྗོད་པ་རེད།

ཀྲང་ཅུན་གྱིས། ཀྲུང་གོས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་པ་ཐོག་མཐའ་བར་གསུམ་དུ་ལག་ལེན་བསྟར་ནས་2030ལོའི་གྲོས་རིམ་དོན་འཁྱོལ་ལ་ཕྱོགས་ཡོངས་ནས་སྐུལ་འདེད་བཏང་བ་མ་ཟད། ད་དུང་ཕན་འབྲས་ཀྱང་གལ་ཆེན་ཐོབ་ཡོད། ཀྲུང་གོས་2020ལོར་ད་ལྟ་ལག་བསྟར་བྱེད་བཞིན་པའི་ཚད་གཞིའི་འོག་གྲོང་གསེབ་ཀྱི་མི་འབོར་དབུལ་པོ་ཚང་མ་དབུལ་སྒྲོལ་ཐུབ་པ་བྱས་ཏེ། ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་ནས་དབུལ་པོ་ཉུང་གཏོང་གི་རྒྱུན་མཐུད་འཕེལ་རྒྱས་དམིགས་ཚད་ཀྱི་ལོ་10སྔ་སྣུར་དུ་མངོན་འགྱུར་ཐུབ་རྒྱུ་རེད། གློ་བུར་དུ་རིམས་ནད་ཀྱི་ཤུགས་རྐྱེན་ཐེབས་པའི་དབང་གིས་ཀྲུང་གོས་རིན་འདོད་གང་རུང་གཏོང་དགོས་བྱུང་ཡང་མི་དམངས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་སྲུང་སྐྱོང་བྱས་ནས་རིམས་འགོག་ཐད་འཐབ་ཇུས་ཀྱི་གྲུབ་འབྲས་གལ་ཆེན་ཐོབ་ཡོད། རིམས་ནད་སྔོན་འགོག་དང་ཚོད་འཛིན་ནུས་ལྡན་ཐུབ་རྗེས། ཀྲུང་གོས་ལས་འགོ་བསྐྱར་འཛུགས་དང་ཐོན་སྐྱེད་སླར་གསོ་ཧུར་ཐག་བྱས་ཏེ་རིམས་ནད་ཀྱི་ཤུགས་རྐྱེན་དམའ་རུ་གཏོང་གང་ཐུབ་བྱ་རྒྱུ་དང་དུས་བཀག་ལྟར་དབུལ་པོ་ཉུང་གཏོང་གི་དམིགས་ཚད་མངོན་འགྱུར་བྱ་རྒྱུར་སྐུལ་འདེད་ཀྱང་གཏོང་རྒྱུ་རེད། ཀྲུང་གོའི་དཔལ་འབྱོར་བརྟན་པོའི་ངང་སླར་གསོ་ཐུབ་རྗེས་འཛམ་གླིང་གི་དཔལ་འབྱོར་ལ་མུ་མཐུད་ནས་སྒུལ་ཤུགས་གསར་པ་སྣོན་རྒྱུ་དང་རྒྱལ་ཁབ་ཁག་གི་འཕེལ་རྒྱས་ལ་གོ་སྐབས་གཏོད་རྒྱུ་རེད་ཅེས་བརྗོད་པ་རེད།

ཀྲང་ཅུན་གྱིས། ཀྲུང་གོས་རྒྱལ་སྤྱིའི་རིམས་འགོག་མཉམ་ལས་ཧུར་ཐག་བྱས་ཏེ་རྒྱལ་ཁབ་ཁག་གིས་རིམས་ནད་ཀྱི་ཤུགས་རྐྱེན་ལ་ཁ་གཏད་ནུས་ལྡན་གཅོག་རྒྱུར་རོགས་རམ་བྱས་ཡོད་ལ། དཔལ་འབྱོར་སླར་གསོ་བྱེད་པའི་འཕེལ་རིམ་ཡང་མགྱོགས་སུ་བཏང་ཡོད། ཀྲུང་གོ་ཕྱོགས་ཀྱིས་གོ་ལ་ཧྲིལ་པོའི་རིམས་འགོག་མཉམ་ལས་ལ་སྐུལ་འདེད་གཏོང་བའི་གྲོས་འགོ་དང་བྱ་ཐབས་རབ་དང་རིམ་པ་བཏོན་ཡོད། དེའི་ཁྲོད་ལོ་གཉིས་ནང་ཨ་སྒོར་དུང་ཕྱུར་20ཟིན་པའི་རྒྱལ་སྤྱིའི་རོགས་སྐྱོར་བྱེད་པ་དང་། ཀྲུང་གོས་ཞིབ་བཟོ་བྱས་པའི་ཏོག་གསར་རིམས་འགོག་སྨན་ཁབ་དེ་གོ་ལ་ཧྲིལ་པོའི་སྤྱི་པའི་ཐོན་རྫས་སུ་བརྩི་རྒྱུ། རྒྱལ་ཁབ་ཉི་ཤུ་ཚོགས་པའི་ཁོངས་མིར“རྒྱལ་ཁབ་དབུལ་ཤོས་ཀྱི་དངུལ་བུན་འཇལ་སྤྲོད་གནས་སྐབས་ནར་འགྱངས་བྱེད་པའི་གྲོས་འགོ”དོན་འཁྱོལ་ཧུར་ཐག་བྱས་ཏེ་འབྲེལ་ཡོད་ཨ་ཧྥེ་རི་ཁའི་རྒྱལ་ཁབ་ལ་བཏང་བའི་2020ལོའི་ལོ་མཇུག་ཏུ་དུས་བཀག་ཐིམ་པའི་ཀྲུང་གོའི་སྐྱེད་མེད་དངུལ་བུན་རྩ་ཆག་གཏོང་བ་སོགས་ཚུད་ཡོད། ཀྲུང་གོས་བྱ་སྤྱོད་དངོས་ཀྱི་ཐོག་ནས་འགན་འཁུར་བ་དང་དགེ་མཚན་ལྡན་པའི་ནུས་པ་མངོན་པར་བྱས་ཡོད་ཅེས་བརྗོད་པ་རེད།