ཤིན་ཧྭ་གསར་འགྱུར་ཁང་གྲོང་ཁྱེར་ཨ་ཁ་ར་ནས་གློག་འཕྲིན་འབྱོར་གསལ། ཉེ་ཆར། ཀྲུང་ཧྭ་རྒྱལ་ཡོངས་སྤྱི་ཁྱབ་བཟོ་ཚོགས་ཀྱིས་ཨ་ཧྥེ་རི་ཁའི་བཟོ་ཚོགས་གཅིག་གྱུར་རྩ་འཛུགས་ལ་རོགས་སྐྱོར་བྱས་པའི་རིམས་འགོག་དངོས་ཟོག་དང་གཞུང་ལས་སྒྲིག་ཆས་ཞལ་འདེབས་རྒྱག་པའི་མཛད་སྒོ་ཀག་ནར་བཅའ་སྡོད་ཀྲུང་གོའི་གཞུང་ཚབ་ཆེ་མོ་ཁང་དུ་གཉེར་བ་རེད།
ཨ་ཧྥེ་རི་ཁའི་བཟོ་ཚོགས་གཅིག་གྱུར་རྩ་འཛུགས་ཀྱི་སྤྱི་ཁྱབ་ཧྲུའུ་ཅི་ཨར་ཀྲ་ཅི·མའེ་ཙུའུ་ཏེས། ཞལ་འདེབས་རྒྱག་པའི་མཛད་སྒོའི་ཐོག་ཀྲུང་གོ་ཕྱོགས་ལ་ཐུགས་རྗེ་ཆེ་ཞུས་ཤིང་། ཁོང་གིས་ཨ་ཧྥེ་རི་ཁ་དེ་ཏོག་གསར་གློ་ཚད་རིམས་ནད་དང་འཐབ་རྩོད་བྱེད་པའི་དཀའ་ཚེགས་ཆེ་བའི་དུས་སྐབས་སུ་གནས་ཡོད། ཀྲུང་གོ་ཕྱོགས་ཀྱིས་ད་ཐེངས་རོགས་སྐྱོར་བྱས་པ་དེས་ཨ་ཧྥེ་རི་ཁའི་བཟོ་ཚོགས་གཅིག་གྱུར་རྩ་འཛུགས་ཀྱི་ཁ་ཚ་དགོས་གཏུག་གི་གནད་དོན་ཐག་གཅོད་ཐུབ་ལ། རིམས་ནད་ཐོན་རིང་ཨ་ཧྥེ་རི་ཁའི་བཟོ་པའི་ཁེ་དབང་སྲུང་སྐྱོང་ཆེད་ལེགས་སྐྱེས་ཆེན་པོའང་ཕུལ་ཡོད་ཅེས་བརྗོད་པ་རེད།
ཀག་ནར་བཅའ་སྡོད་ཀྲུང་གོའི་གཞུང་ཚབ་ཆེ་མོ་ཁང་གི་གནས་སྐབས་ལས་ཚབ་ཀྲུའུ་ཅིང་གིས། ཨ་ཧྥེ་རི་ཁའི་བཟོ་ཚོགས་གཅིག་གྱུར་རྩ་འཛུགས་ཀྱིས་དུས་ཡུན་རིང་པོའི་ནང་ཀྲུང་གོ་ཕྱོགས་དང་མཛའ་གྲོགས་ཟབ་ལ་མཉམ་ལས་ཀྱི་འབྲེལ་བ་ཡག་པོ་རྒྱུན་འཁྱོངས་བྱས་པས། ཀྲུང་གོ་ཕྱོགས་ཀྱིས་སྲོལ་རྒྱུན་གྱི་མཛའ་གྲོགས་དེར་གཅེས་འཛིན་བྱས་ནས་ཨ་ཧྥེ་རི་ཁའི་བཟོ་ཚོགས་རྩ་འཛུགས་དང་བཟོ་པའི་རིམས་འགོག་ལ་རྒྱབ་སྐྱོར་བརྟན་པོ་བྱེད་རྒྱུ་ཡིན་ཞེས་བརྗོད་པ་རེད།
ཤེས་རྟོགས་བྱུང་བར་གཞིགས་ན། ད་ཐེངས་ཞལ་འདེབས་བརྒྱབ་པའི་དངོས་ཟོག་ནང་སྤྱོད་གཅིག་མའི་ཕྱི་ནད་ཚན་ཁག་གི་སྨན་བཅོས་ཁ་རས་དང་། ལག་འཁྲུ་འདག་གཤེར་དང་དེ་བཞིན་པར་སློག་འཕྲུལ་ཆས་དང་ལག་ཁྱེར་གློག་ཀླད་སོགས་གཞུང་ལས་སྒྲིག་ཆས་ཚུད་ཡོད་པ་རེད།