2019ལོའི་ཟླ་7ཚེས་15ཉིན། ཧྥུའུ་ཅན་ཞིང་ཆེན་གྱི་ཁག་དགུ་པའི་བོད་སྐྱོར་ལས་དོན་རུ་ཁག་བོད་ཤར་རྒྱུད་དུ་བསྐྱོད་ནས་ཁག་བརྒྱད་པའི་བོད་སྐྱོར་ལས་དོན་རུ་ཁག་གི་ལག་ནས་བོད་སྐྱོར་རྒྱུག་མཐུད་དབྱུག་པ་བླངས་པ་རེད། བོད་དུ་སླེབས་ནས་ལོ་གཅིག་སོང་ཚུན། བོད་སྐྱོར་རུ་མི་ཡོངས་ཀྱིས་རང་རང་གི་ལས་གནས་ཀྱི་འགན་འཁྲིར་གཞི་ཚུགས་ཏེ་མི་རེས་ཆ་སྙོམས་དྭ་ཕྲུག་དབུལ་པོ་1དང་ཁྱིམ་ཚང་དབུལ་པོ་1ཡན་ལ་རོགས་སྐྱོར་བྱས་ཏེ་ཆབ་མདོའི་དབུལ་སྒྲོལ་འགག་སྒྲོལ་ལས་དོན་ལ་ཕྱོགས་ཡོངས་ནས་ཞུགས་པ་རེད། རིམ་རྩིས་བྱས་ན། མིག་སྔའི་བར། ཧྥུའུ་ཅན་གྱི་བོད་སྐྱོར་མ་དངུལ་གྱིས་དབུལ་སྐྱོར་དམངས་འཚོའི་ཁྱབ་ཁོངས་སུ་སྒོར་དུང་ཕྱུར་7.7བཏང་ནས་སློབ་གསོ་དང་། འཕྲོད་བསྟེན། གྲོང་གསེབ་གསར་པ་འཛུགས་སྐྲུན་སོགས་དམངས་འཚོ་ལེགས་གཏོང་དང་དབུལ་སྒྲོལ་འགག་སྒྲོལ་གྱི་རྣམ་གྲངས་འབོར་ཆེན་ལག་ལེན་བསྟར་བ་དང་། ཁ་གཏད་རོགས་སྐྱོར་བྱ་ཡུལ་གྱི་རྫོང་བཞི་འདི་ལོ་དབུལ་པོ་གཅིག་ཀྱང་མེད་པར་གྱུར་ནས་བོད་རང་སྐྱོང་ལྗོངས་དང་མཉམ་དུ་དབུལ་པོ་དབུལ་རྐྱང་གཞི་རྩའི་ཆ་ནས་མེད་པར་བཟོས་པ་རེད། 2019ལོའི་ལོ་འཁོར་གྱི་ཆབ་མདོ་གྲོང་ཁྱེར་གྱི་དབུལ་སྒྲོལ་འགག་སྒྲོལ་གྱི་ཕན་འབྲས་དཔྱད་ཞིབ་ཁྲོད། ཧྥུའུ་ཅན་གྱིས་ཁ་གཏད་རོགས་སྐྲུན་བྱས་པའི་དཔའ་ཤོད་རྫོང་དང་མཛོ་སྒང་རྫོང“ཕྱོགས་བསྡུས་གདེང་འཇོག་ལེགས་པའི་རྫོང་དང་ཆུས”ལ་བདམས་པ་དང་། ལྷོ་རོང་རྫོང་ལ་ལས་ཞུགས་གཞན་སྒྱུར་གྱི་ཕན་འབྲས་མངོན་གསལ་དོད་པའི་བྱ་དགའ་ཐོབ་པ། དཔལ་འབར་རྫོང“དབུལ་སྒྲོལ་འགག་སྒྲོལ་སྲ་བརྟན་དང་རིམ་སྤོར་གྱི་ཕན་འབྲས་མངོན་གསལ་དོད་པའི་རྫོང་དང་ཆུས”ལ་བདམས་པ་རེད།

འདི་ནི་ཧྥུའུ་ཅན་ཞིང་ཆེན་གྱིས་ཁ་གཏད་རོགས་སྐྱོར་བྱས་པའི་མཛོ་སྒང་རྫོང་གི་ཡུལ་ལྗོངས་ཡིན་པ།

འདི་ནི་ཧྥུའུ་ཅན་ཞིང་ཆེན་གྱིས་ཁ་གཏད་རོགས་སྐྱོར་བྱས་པའི་མཛོ་སྒང་ཀྲུང་ལིན་ཁ་མུའུ་ཁྲི་ཡི་སྐྱེ་ལྡན་རྒུན་འབྲུམ་འདེབས་འཛུགས་རྟེན་གཞིའི་རྣམ་གྲངས་ལ་ཕན་འབྲས་རགས་ཙམ་ཐོན་པ།

འདི་ནི་ཁག་དགུ་པའི་བོད་སྐྱོར་ལས་བྱེད་པ་དང་ཤེས་ལྡན་མི་སྣའི་སྤྱི་ཁྱབ་རུ་སྣེ་ཁྲིད་མཁན(གཡོན་གྱི་བཞི་པ)གྱིས་ཐང་གའི་ཚོན་རིས་ལག་རྩལ་གསོ་སྦྱོང་འཛིན་གྲྭའི་ལས་དོན་ལ་བརྟག་ཞིབ་དང་མཛུབ་ཁྲིད་བྱེད་བཞིན་པ།

འདི་ནི་ཧྥུའུ་ཅན་ཞིང་ཆེན་གྱི་ཁག་དགུ་པའི་བོད་སྐྱོར་ལས་དོན་རུ་ཁག་གི་སྨན་བཅོས་འཕྲོད་བསྟེན་ཚོགས་པས་ཀྲུང་གོ་གསར་པ་དབུ་བརྙེས་ནས་ལོ་ངོ་70འཁོར་བར་རྟེན་འབྲེལ་ཞུ་བཞིན་པ།

སྨན་བཅོས་བོད་སྐྱོར་ལ་རྣམ་པ་གསར་པ་མངོན་པ།

“ལོ་ལྔ་ཚན་བཅུ་གསུམ་པའི”རིང་། ཧྥུའུ་ཅན་གྱིས་སྨན་བཅོས་འཕྲོད་བསྟེན་བྱ་གཞག་ལ་ཁྱོན་བོད་སྐྱོར་མ་དངུལ་སྒོར་དུང་ཕྱུར་3.8བཏང་ནས་ཁ་གཏད་རོགས་སྐྲུན་གྱི“2+4+2”ཀྱི་འཕྲོད་བསྟེན་རྣམ་གྲངས་གལ་ཆེན་སྔ་རྗེས་སུ་བསྐྲུན་པ་དང་འབྲེལ། བེད་སྤྱོད་གཏོང་འགོ་ཚུགས་ནས“བདེ་ཐང་ཆབ་མདོ”བསྐྲུན་རྒྱུར་རྨང་གཞི་བརྟན་པོ་བཏིང་བ་རེད། གྲོང་གསེབ་ཏུ་སྨན་བཅོས་ཤེས་ལྡན་མི་སྣ་དཀོན་པ་དང་ཞབས་འདེགས་ནུས་པ་ཞན་པའི་གནད་དོན་ལ་དམིགས་ནས་ཧྥུ་ཅན་སན་མིང་སྨན་བཅོས་སྒྱུར་བཅོས་ཀྱི་ཉམས་མྱོང་ནང་འདྲེན་བྱས་ཏེ། ཤང་དང་གྲོང་རྡལ་གྱི་འཕྲོད་བསྟེན་ཁང་དུ་འགྲན་རྩོད་ཡོད་པའི་ལས་གནས་བསྐོ་གཞག་བྱ་རྒྱུར་སྐུལ་འདེད་བཏང་སྟེ། “གཅིག་གྱུར་དྲུག”གི་རྩ་དོན་ལྟར། རྫོང་དང་ཤང་གཞི་གཅིག་ཅན་དུ་འགྱུར་རྒྱུར་ཕྱོགས་ཡོངས་ནས་སྐུལ་འདེད་བཏང་བ་རེད། ཆབ་མདོའི་འཕྲོད་བསྟེན་དང་བདེ་ཐང་འཕེལ་རྒྱས་ཀྱི་ཤེས་ལྡན་མི་སྣའི་ཞན་ཆར་དམིགས་ནས། གངས་ལྗོངས་ས་མཐོར་ནམ་ཡང་གནས་ཐུབ་པའི་ཆུ་ཚད་མཐོ་བའི་སྨན་བཅོས་ཚོགས་པ་བཙུཌ་པ་རེད། ལྷག་པར་དུ་ད་ཐེངས་ཀྱི་ཏོག་གསར་གློ་ཚད་རིམས་ནད་སྔོན་འགོག་དང་ཚོད་འཛིན་གྱི་ལས་དོན་སྤེལ་རིང་། ཧྥུའུ་ཅན་གྱི་བོད་སྐྱོར་སྨན་བཅོས་རུ་ཁག་ས་མཐོའི་འཐབ་་སར་བསྐྱོད་དེ་དམག་འཐབ་བྱེད་ཐུབ་པ་དང་། གདོང་མཆོང་བྱེད་ཕོད་པ། རྒྱལ་ཁ་ལེན་ཐུབ་པ་བཅས་ཀྱི་ཉམས་འགྱུར་གང་ལེགས་མངོན་པ་རེད།

ཧྥུའུ་ཅན་གྱི་བོད་སྐྱོར་ལས་དོན་རུ་ཁག་གིས་གྲུམ་བུ་ཚིགས་ཆེན་གྱི་ནད་སོགས་བོད་ཀྱི་ཡུལ་ནད་ཕོག་མཁན་བརྒྱ་ལྷག་ཙམ་ལ་སྨན་རིན་མི་དགོས་པར་སྨན་བཅོས་བྱས་པར། ཀྲུང་དབྱང་འཐབ་ཕྱོགས་གཅིག་གྱུར་པུའི་ཁས་ལེན་ཐོབ་ནས་ཁྱབ་གདལ་བཏང་བ་མ་ཟད། འདི་ལོ་ལྗོངས་ཡོངས་སུ་ནད་ཀྱིས་རྐྱེན་པས་དབུལ་པོར་འགྱུར་མཁན་མེད་པའི་དཔེ་མཚོན་དུ་གྱུར་ཡོད།

སློབ་གསོ་དང་རིག་གནས་ཀྱི་བོད་སྐྱོར་ཆུ་ཚད་གསར་པར་སླེབས་པ།

2019ལོ་ནས་བཟུང་། ཧྥུའུ་ཅན་ཞིང་ཆེན་གྱིས་སྔ་རྗེས་སུ་བོད་སྐྱོར་དགེ་རྒན་150ཁག་ཐེངས་བཞི་ལ་བགོས་ནས་སློབ་གྲྭའི་འོས་འགན་སློབ་གསོའི་དུས་མཚམས་ཀྱི་གྲངས་ཉུང་མི་རིགས་སློབ་མའི་རྒྱལ་ཁབ་ཀྱི་སྤྱི་སྤྱོད་སྐད་ཡིག་སློབ་ཁྲིད་ཁྱབ་ཚད་100%ཟིན་པར་ཁ་གཏད་རོགས་སྐྱོར་བྱས་པ་དང་། “སྔོ་ལྗང་ལས་གྲྭ”ལག་ལེན་ཧུར་ཐག་བསྟར་ནས་ལོ་ཧྲིལ་པོར་ས་གནས་དེ་གའི་ན་གཞོན་དགེ་རྒན་མི་ཐེངས་128ལ་རོགས་རམ་བྱས་པ་དང་ཆབ་མདོའི་དགེ་རྒན་མི་ཐེངས་252ཧྥུའུ་ཅན་དུ་གསོ་སྦྱོང་ལ་མངགས་པ། རིགས་གཅིག་མཁས་ཅན་གདན་དྲངས་ནས་ཆབ་མདོའི་དགེ་རྒན་མི་ཐེངས་2170ལྷག་ཙམ་གསོ་སྦྱོང་བྱས་པ། སྒོར་ཁྲི་686བཏང་ནས་སྤྲིན་ཚོམ་སློབ་ཁང་དང་། VRསློབ་ཁྲིད་སོགས་ཆ་འཕྲིན་ཅན་གྱི་སློབ་ཁྲིད་རྣམ་གྲངས་11བསྐྲུན་པ། རྒྱང་རིང་སློབ་ཁྲིད་དང་། ཆ་འཕྲིན་ཅན་གྱི་ཤེས་ལྡན་མི་སྣ་གསོ་སྦྱོང་། སློབ་ཁྲིད་དྲ་བའི་ཐོན་ཁུངས་མཉམ་སྤྱོད་བཅས་བྱས་ནས་སློབ་གསོའི་ཐད་གཞན་སྐུལ་ནས་རང་འགུལ་དུ་འགྱུར་བར་བྱས་པ་རེད། སྤྱི་ཕན་སློབ་སྐྱོར་གྱི་བྱེད་སྒོ་སྤེལ་ནས་ཆབ་མདོའི་སློབ་མར་དངུལ་དང་དངོས་པོ་ཞལ་འདེབས་བརྒྱབ་པར་མི་དམངས་ཤོག་སྒོར་ལ་ཕབ་ན་སྒོར་ཁྲི་1262ཟིན་པ་དང་སློབ་མ་དབུལ་པོ་མི་ཐེངས་8390ལ་རོགས་སྐྱོར་བྱས་པ་རེད།

གཞི་རིམ་མང་ཚོགས་ཀྱི་རིག་གནས་འཚོ་བའི་དགོས་མཁོ་སྐོང་ཆེད། ཧྥུའུ་ཅན་ཞིང་ཆེན་གྱི་བོད་སྐྱོར་ལས་དོན་རུ་ཁག་དང་ཆབ་མདོ་གྲོང་ཨུད་དྲིལ་བསྒྲགས་པུའུ་སོགས་ཚན་པས། “གཤམ་སྤེལ་ལྔའི”བྱེད་སྒོ་བསྟུད་མར་སྒྲིག་འཛུགས་བྱས་ཏེ་ས་གནས་དེ་གའི་མི་སེར་ལ་རིག་རྩལ་འཁྲབ་སྟོན་དང་འཚམས་འདྲིའི་དངོས་པོ་སྤྲད་པ་རེད། 2019ལོའི་ཟླ་11པར། ཧྥུའུ་ཅན་བོད་སྐྱོར་ལས་དོན་རུ་ཁག་གིས་ཆབ་མདོ་གྲོང་ཁྱེར་རིག་གནས་ཅུས་དང་མཉམ་དུ་ཆབ་མདོའི་ཚོགས་པ་སྒྲིག་འཛུགས་བྱས་ཏེ། བོད་རང་སྐྱོང་ལྗོངས་ཀྱི་སྐབས་བཅུ་གཉིས་པའི་མཚོ་འགག་ངོགས་གཉིས(ཞ་མོན)རིག་གནས་དངོས་མང་སྟོན་ཚོགས་ལ་ཞུགས་པ་རེད། དེ་དང་དུས་མཚུངས། ཧྥུའུ་ཅན་གྱི་ཞིང་པའི་ཚོན་རྩིའི་རི་མོའི་སྒྱུ་རྩལ་གྱི་གནད་སྨིན་དབུལ་སྐྱོར་བྱེད་སྟངས་ཆབ་མདོར་ཁྱབ་གདལ་བཏང་ནས། ཐང་གའི་ཚོན་རིས་བརྩམས་ཆོས་རྒྱལ་སྤྱིའི་གར་སྟེགས་ལ་ཐེངས་དང་པོར་བསྐྱོད་པ་དང་། “ནང་འདྲེན་དངོས་མང་སྟོན་ཚོགས”ལ་འགྲེམ་སྟོན་བྱས་པ་རེད། ཉེ་དུས། 2020ལོའི་རིག་གནས་དང་རང་བྱུང་ཤུལ་བཞག་ཉིན་མོའི་རིམ་སྤེལ་བྱེད་སྒོ་ཆེད་མངགས་སྒྲིག་འཛུཌ་བྱས་ཏེ། “ཧྥུའུ་ཅན་གྱི་མངོན་མིན་རིག་གནས་ཤུལ་བཞག་མེ་ཏོག་ས་མཐོར་བཞད”ཅེས་པའི་ཐང་ག་དང་ཚོན་རིས་མཚམས་ཆོས་ས་མཚམས་སྒྲོལ་ནས་ཐད་གཏོང་བྱས་པར་ལྟ་མཁན་དང་བསྔགས་བརྗོད་བྱེད་མཁན་དྲ་གྲོགས་མི་ཐེངས་ཁྲི་40ལྷག་ཙམ་ཟིན་པ་རེད།

ཐོན་ལས་བོད་སྐྱོར་ལ་ཚད་བརྒལ་གསར་པ་བྱུང་བ།

“ལོ་ལྔ་ཚན་བཅུ་གསུམ་པའི”རིང་། རིམ་རྩིས་བྱས་ན། ཧྥུའུ་ཅན་གྱིས་ཆབ་མདོར་བོད་སྐྱོར་མ་དངུལ་སྒོར་དུང་ཕྱུར་11.3བཏང་བ་རེད། ན་ནིང་ནས་བཟུང་། ཚོང་འགུགས་ཡན་ལག་རུ་ཆུང་མང་པོ་མངགས་ནས་ཧྥུའུ་ཅན་ཙེ་ཅིན་གཏེར་ལས་དང་། ཧའེ་ལའོ་ཨར་འདམ། ཧྥུའུ་ཅན་མཁོ་སྤྲོད། ཞ་ཧྲང་ཚོགས་པ། ཨན་ཐཱ་ཚོགས་པ། ཕན་ཕན་ཚོགས་པ། ཧྥུའུ་ཀྲོའུ་ཡུང་ཧུའེ་སོགས་གྲགས་ཅན་ཁེ་ལས་དང་མཉམ་ལས་གྲོས་མོལ་བྱས་པ་དང་། སྔ་རྗེས་སུ་ཙེ་ཅིན་གཏེར་ལས་དང་བོད་ཀྱི་ཅུས་ལུང་ཟངས་ལས་ལས་རིགས་ལ་གཞོགས་འདེགས་བྱས་ནས་ཁྱོན་སྒོར་དུང་ཕྱུར་38.83ཟིན་པའི་རྐང་དབང་ནང་བཤུག་གི་གྲོས་མཐུན་བཞག་པ་རེད། མ་དངུལ་སྒོར་དུང་ཕྱུར་10བཏང་བའི་ཧའེ་ལའོ་དུང་དཀར་ཨར་འདམ་དང་། མ་དངུལ་སྒོར་དུང་ཕྱུར་3བཏང་བའི་མཛོ་སྒང་གི་ཁྲེང་གུང་རྒུན་འབྲུམ་ཨ་རག་དམར་པོའི་ཨར་ཁང་། མ་དངུལ་སྒོར་དུང་ཕྱུར་6བཏང་བའི་ཆོན་ལོ་དབུལ་སྐྱོར་ཐོན་ལས་གླིང་སོགས་རྣམ་གྲངས་གལ་ཆེན་ནང་འདྲེན་བྱས་པ་རེད།

ཧྥུའུ་ཅན་བོད་སྐྱོར་ལས་དོན་རུ་ཁག་གིས་གནད་དོན་ཐག་གཅོད་བྱ་རྒྱུ་ཕྱོགས་སྟོན་དུ་བྱས་ཏེ། “ཚོགས་ཆུང”སྣ་ཚོགས་གསར་དུ་བཙུགས་ནས་བོད་སྐྱོར་འབྲེལ་གཏུག་གི་ཆེད་དོན་ལམ་ལུགས་ལག་ལེན་བསྟར་བ་དང་། རིག་སྟོབས་བོད་སྐྱོར་དང་ཆེད་རྩལ་བོད་སྐྱོར་གྱི་ལེགས་ཆ་ཡག་པོ་བཏོན་ཏེ་ས་གནས་དེ་གའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་བཏང་བ་རེད། མིག་སྔར། “ཚོགས་ཆུང”20ལྷག་ཙམ་ཡོད་པ་དེ་དག་གིས་གངས་ལྗོངས་ས་མཐོར་བྱས་རྗེས་གསར་པ་རྒྱུན་ཆད་མེད་པར་བཞག་ནས“ཧྥུའུ་ཅན་གྱི་ཉམས་མྱོང”དང“ཧྥུའུ་ཅན་གྱི་རྣམ་པ”བཏོད་པ་རེད། བོད་ཕག་ཐོན་ལས་ཚོགས་ཆུང་གིས་འཁྱགས་ཕྲེང་སྐྱེལ་འདྲེན་དང་། བཤས་གཏོང་ལས་སྣོན་སོགས་ཀྱི་དཀའ་གནད་བསལ་བ་དང་དུས་མཚུངས། ཧྥུའུ་ཅན་མཁོ་ཚོང་ཚོགས་པ་དང་ཞ་ཧྲང་ཚོགས་པ་སོགས་གཞུང་ཁོངས་ཁེ་ལས་ཀྱི་ལས་སྟེགས་ཀྱི་ལེགས་ཆར་བརྟེན་ནས། ཧྥུའུ་ཅན་དང་ཆབ་མདོའི་དབར་གྱི་ཐོན་སྐྱེད་དང་ཕྱིར་ཚོང་གི་འབྲེལ་མཐུད་འགལ་རྐྱེན་བསལ་ནས། 2020ལོའི་དཔྱིད་གསར་དུས་ཆེན་སྐབས་སུ་ཆབ་མདོའི་བོད་ཕག་གི་ཐོན་རྫས་ཁག་དང་པོ་ཞ་མོན་དང་ཧྥུའུ་ཀྲོའུ་སོགས་གྲོང་ཁྱེར་གྱི་གཙོ་རྒྱུན་ཁྲོམ་རར་བཏོན་པ་རེད།  (པར་རིས་དང་ནང་དོན་ཚང་མ་ཧྥུའུ་ཅན་ཞིང་ཆེན་གྱི་ཁག་དགུ་པའི་བོད་སྐྱོར་ལས་དོན་རུ་ཁག་གིས་མཁོ་འདོན་བྱས)