ཨ་རིའི་རིམས་ནད་ཚོད་འཛིན་དང་སྔོན་འགོག་ལྟེ་གནས་ཀྱི་དྲ་ཚིགས་ཐོག་ཚེས་11ཉིན་ཡོངས་བསྒྲགས་བྱས་པའི་གྲངས་གཞི་གསར་ཤོས་ལས་མངོན་པར་གཞིགས་ན། འདས་ཟིན་པའི་ཆུ་ཚོད་24ཡི་རིང་ཨ་རི་ཡོངས་སུ་གཏན་འཁེལ་བྱུང་བའི་ནད་དཔེ་66281གསར་དུ་འཕར་ནས་སླར་ཡང་རིམས་ནད་ཐོན་ཚུན་ཉིན་གཅིག་ལ་གསར་དུ་འཕར་བའི་ནད་དཔེའི་གྲངས་འབོར་མང་ཤོས་ཟིན་ཡོད། རིམ་རྩིས་བྱས་ན་ནད་དཔེ་3173212གཏན་འཁེལ་བྱུང་བ་དང་། གྲོངས་པའི་ནད་དཔེ་གསར་འཕར་བྱུང་ཚད་811ཟིན་པ། རིམ་རྩིས་བྱས་ན་མི་133666གྲོངས་པ་རེད།

ཉིན་དེར་ཁ་ལུའོ་ལའེ་ནཱ་ཀྲོའུ་ལྷོ་མ་དང་། ཁ་ལུའོ་ལའེ་ནཱ་ཀྲོའུ་བྱང་མ། ཨུ་ལེ་ཀང་ཀྲོའུ། ཨ་ཁེན་སེ་ཀྲོའུ། ཞ་ཝེ་དབྱི་ཀྲོའུ། ཨ་ལ་སི་ཅ་ཀྲོའུ་སོགས་ས་ཁུལ་དུ་གསར་དུ་འཕར་བའི་ནད་དཔེའི་གྲངས་འབོར་གྱི་ཟིན་ཐོ་གསར་པ་བཏོད་ཡོད། ཉེ་ཆར། ཨ་རིའི་ནུབ་རྒྱུད་དང་ལྷོ་རྒྱུད་ས་ཁུལ་གཉིས་རིམས་ནད་ཀྱི་གནོད་འཚེ་ཚབས་ཆེན་ཕོག་ཁུལ་གསར་པར་གྱུར་ཡོད།

ཨ་རིའི་ཤར་རྒྱུད་ཀྱི་དུས་ཚོད་ཚེས་11ཉིན་གྱི་དགོང་མོ་བར་ཨ་རིར་རིམ་རྩིས་བྱས་ན་གཏན་འཁེལ་བྱུང་བའི་ནད་དཔེ་ཁྲི་324.2ལས་བརྒལ་བ་དང་རིམ་རྩིས་བྱས་ན་གྲོངས་པའི་ནད་དཔེ་ཁྲི་13.4ལས་བརྒལ་ཡོད།