ཤིན་ཧྭ་གསར་འགྱུར་ཁང་ཝུའུ་ཧན་ནས་ཟླ་7ཚེས་11ཉིན་གློག་འཕྲིན་འབྱོར་གསལ། ཀྲུང་དབྱང་གིས་ཧུའུ་པེའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་རྒྱབ་སྐྱོར་བྱེད་པའི་སྲིད་ཇུས་སྦབ་ཆ་གཅིག་གང་མགྱོགས་དོན་འཁྱོལ་བྱས་ནས་ཕན་འབྲས་ཐོན་པར་བྱེད་པར་སྐུལ་འདེད་གཏོང་ཆེད། ཉེ་ཆར་རྒྱལ་སྲིད་སྤྱི་ཁྱབ་ཁང་མཉམ་དུ་སྔོན་འགོག་དང་ཚོད་འཛིན་ལམ་སྲོལ་འབྲེལ་གཏུག་ཚོགས་ཆུང་གིས་འབྲེལ་ཡོད་སྡེ་ཚན་དང་མཐུན་སྦྱོར་ཧུར་ཐག་བྱས་ཤིང་། འདྲི་རྟོགས་བཞུགས་མོལ་དང་། བརྟག་དཔྱད་ཚོད་སྐོར། བརྙན་ལམ་སྦྲེལ་མཐུད། ས་གནས་ས་ཐོག་ཏུ་ལས་སྒྲུབ་སོགས་རྣམ་པ་སྣ་ཚོགས་བརྒྱུད། ཧུའུ་པེའི་རིམས་ནད་རྗེས་ཀྱི་བསྐྱར་སྐྲུན་ལས་དོན་ལ་རྒྱབ་སྐྱོར་དང་། “བརྟན་པོ་དྲུག”གི་ལས་དོན་ལ་འདེགས་སྐྱོར། “འགན་ལེན་དྲུག”གི་ལས་འགན་དོན་འཁྱོལ་བཅས་བྱས་ཡོད།

མཉམ་འབྲེལ་འབྲེལ་གཏུག་ཚོགས་ཆུང་གི་མཐུན་སྦྱོར་ཧུར་ཐག་འོག རྒྱལ་ཁབ་འཕེལ་སྒྱུར་ཨུ་ལྷན་གྱིས་མ་དངུལ་སྒོར་དུང་ཕྱུར་18བཀོད་སྒྲིག་བྱས་ཏེ། ཧུའུ་པེ་ཞིང་ཆེན་གྱི་རྫོང་རིམ་པའི་སྨན་ཁང་52ལ་ཚ་རྒྱས་སྒོ་བསྟེན་སྨན་ཁང་དང་རིམས་ནད་སྐྱོབ་བཅོས་སོགས་ཀྱི་ཐད་སྤྱོད་པའི་ཁང་པ་སྐྲུན་རོགས་དང་སྒྲིག་ཆས་ཉོ་སྒྲུབ་བྱེད་རོགས་བྱས་པ་མ་ཟད། ད་དུང་རྒྱལ་ཁབ་ཀྱི་ས་ཁོངས་ནད་གཞི་ཆེ་རིགས་སྔོན་འགོག་ཚོད་འཛིན་དང་འགོག་བཅོས་རྟེན་གཞི་4སྐྲུན་རོགས་ཀྱང་བྱས་པ་དང་། བཟོ་འཕྲིན་པུས་རླངས་འཁོར་དང་། གློག་རྡུལ། 5G བཟོ་ལས་དྲ་སྦྲེལ་སོགས་ཐོན་ལས་རྣམ་གྲངས་ཆེ་རིགས་དང་རྨང་གཞིའི་སྒྲིག་ཆས་གསར་པ་འཛུགས་སྐྲུན་ལ་སྐུལ་འདེད་གཏོང་རྒྱུ་ཤུགས་རྒྱག་ས་དང་ཁེ་ལས་འབྲིང་གྲས་དང་། ཕྲན་ཚེགས་ཁེ་ལས་བཅས་ལ་དཀའ་ངལ་སེལ་རོགས་བྱ་རྒྱུ་གཙོ་གནད་དུ་བཟུང་བའི་ཁར། ཧུའུ་པེ་ཞིང་ཆེན་དང་མཉམ་འབྲེལ་ཐོག་དཀའ་ངལ་སེལ་ཐབས་ཞིབ་ཕྲའི་ཐོག་ཞིབ་འཇུག་བྱས་ཏེ། གནད་སྨིན་ཇུས་བསྟར་གྱིས་རིམས་ནད་རྗེས་སུ་དཔལ་འབྱོར་འཕེལ་རྒྱས་མྱུར་པོ་འགྲོ་རྒྱུར་རོགས་འདེགས་བྱས་པ། འགྲིམ་འགྲུལ་སྐྱེལ་འདྲེན་པུའུ་ཡིས་ཧུའུ་པེ་ཞིང་ཆེན་གྱིས་འགྲིམ་འགྲུལ་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་གྱི་ཚོད་ལྟའི་ལས་དོན་སྤེལ་བ་དང་ཆེད་དོན་འཆར་འགོད་དང་གཙོ་གནད་རྣམ་གྲངས་ལག་ལེན་བསྟར་བར་སྐུལ་འདེད་ཧུར་ཐག་བཏང་བ། སློབ་གསོ་པུས་ཧུའུ་པེ་ཞིང་ཆེན་དང་མཉམ་འབྲེལ་ཐོག“ལས་རིགས་སློབ་གསོའི་ནུས་པ་འཕེལ་ཐབས་དང་སྤུས་ཚད་མཐོར་གཏོང་གི་ཆེད་དམིགས་བྱ་སྤྱོད་འཆར་གཞི”ལག་བསྟར་བྱེད་འགོ་ཚུགས་པ་དང་ཆབས་ཅིག “1+X”ལས་རིགས་རྩལ་ནུས་རིམ་ལྡན་ལག་ཁྱེར་ལམ་ལུགས་ཀྱི་ཚོད་ལྟའི་ལས་དོན་དང་ཟུང་འབྲེལ་བྱས་ཏེ། ལས་རིགས་རྩལ་ནུས་གསོ་སྦྱོང་གཞི་རྒྱ་ཆེན་པོས་བྱས་ནས་མཐོ་སློབ་སློབ་ཐོན་སློབ་མ་དང་། དམག་ཁོངས་ནས་ཕྱིར་ལོག་པའི་དམག་མི། ཞིང་པ་ལས་མི། ལས་ཤོར་མི་སྣ་སོགས་ཀྱི་ཚོགས་སྤྱིའི་ལས་ཞུགས་ནུས་པ་ཆེ་རུ་བཏང་བ། དམངས་སྲིད་པུས་ཀྲུང་དབྱང་ནོར་སྲིད་ཀྱི་ཁ་གསབ་རོགས་དངུལ་སྒོར་དུང་ཕྱུར་83.6བཏང་སྟེ་ཧུའུ་པེ་ཞིང་ཆེན་གྱི་དཀའ་ངལ་ཡོད་པའི་མང་ཚོགས་དང་དམིགས་བསལ་ཁྱུ་ཚོགས་ཀྱི་མཐའ་སྐྱོང་འགན་ལེན་ལས་དོན་ལ་ནུས་ཤུགས་ཡོད་རྒུས་རྒྱབ་སྐྱོར་བྱས་པ། རིག་གནས་དང་ཡུལ་སྐོར་པུས་ཧུའུ་པེ་ཞིང་ཆེན་ལ་ཡུལ་སྐོར་ལ་བརྟེན་ནས་དམངས་ལ་ཕན་པ་འདོགས་པ་དང་ཁེ་ལས་ལ་རོགས་སྐྱོར་བྱས་ནས་ལས་གནས་བརྟན་པོ་ཡོང་བ་བྱེད་པའི་བྱེད་ཐབས་རབ་དང་རིམ་པ་བཏོན་ནས་རིག་གནས་ཡུལ་སྐོར་ཁྲོམ་རའི་འཛད་སྤྱོད་ཀྱི་མི་མངོན་པའི་ནུས་པ་འཕེལ་ཐབས་བྱས་པ། རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱིས་ཧུའུ་པེ་ཞིང་ཆེན་ལ་སྲིད་ཇུས་དང་གོ་སྐབས་སྦབ་ཆ་གཅིག་ལ་དམ་འཛིན་ནན་པོ་བྱས་ནས་སྤྱི་པའི་འཕྲོད་བསྟེན་གྱི་སྔོན་འགོག་དང་། ཚོད་འཛིན། འགོག་བཅོས་བཅས་ཀྱི་ནུས་པ་གང་མགྱོགས་ཆེ་རུ་གཏོང་བར་མཛུབ་ཁྲིད་བྱས་པ་སོགས་རེད།