ཚང་མས་ཤེས་གསལ་ལྟར། 《ཨ་མ་གཅིག་གི་བུ་མོ》དང་། 《པེ་ཅིང་གསེར་གྱི་རི》《རྩྭ་ཐང་ཐོག་མི་ནུབ་པའི་ཉི་མ་ཤར》སོགས་ཉན་སྤྲོ་བའི་གླུ་གཞས་རྙིང་པ་དེ་དག་གིས་མི་རབས་ཁ་ཤས་ལ་ཤུགས་རྐྱེན་དང་སེམས་འགུལ་ཐེབས་ཡོད། ལོ་འདི་དག་རིང་དཔེ་དེབ་དང་། གློག་བརྙན། གླུ་གཞས། ལེ་ཚན་བཅས་ཕུལ་བྱུང་མི་ཉུང་བ་འགའ་བྱུང་ཡོད་ཀྱང་སྤྱིའི་ཆ་ནས་བརྗོད་ན་ད་དུང་ཡང་འདང་གི་མེད།
དེང་སྐབས། སྨྱན་སྦྱོར་གྱི་ལག་རྩལ་འཕེལ་རྒྱས་མྱུར་པོ་འགྲོ་བ་དང་བསྟུན་ནས་མི་རྣམས་ཀྱི་ཆ་འཕྲིན་དང་ལེན་བྱེད་སྟངས་ལ་ཡང་འགྱུར་ལྡོག་ཆེན་པོ་འགྲོ་བཞིན་ཡོད་པ་སྟེ།དཔེར་ན། རྒན་རྒོན་ཚོ་རླུང་འཕྲིན་ཉན་པ་དང་། བརྙན་འཕྲིན་ལྟ་བ། ཚགས་པར་ཀློག་རྒྱུ་བཅས་ལ་དགའ་བ་དང་། གཞོན་ནུ་ཚོ་དཔོད་ཆུང་དང་། སྐད་འཕྲིན། གློག་བརྙན་ཐུང་གྲས་བཅས་ལ་དགའ་བ། ཡང་གྲོགས་པོ་ཆུང་ཆུང་ཚོ་འགུལ་རིས་དང་། ཀོ་ཕིག རོལ་རྩེད་བཅས་ལ་དགའ་པོ་ཡོད་པས། སྨྱུག་འཛིན་པའི་བསམ་པར། ཚོགས་པ་མི་འདྲ་བའི་ཆ་འཕྲིན་དང་ལེན་བྱེད་པའི་གོམས་གཤིས་ལ་གཞིགས་ཏེ། དྲ་རྒྱའི་དུས་རབས་ཀྱི་དྲིལ་བསྒྲགས་ལས་ཀའི་འཕེལ་ཕྱོགས་གསར་པ་དང་བསྟུན་ནས་ལྟ་འདོད་ལ་ཉན་སྤྲོ་བའི་སྲོག་ཤིང་འདིར་དམ་འཛིན་བྱེད་པ་དང་། མི་ཆོས་ཅན་གྱི་འདུ་ཤེས་འཛུགས་པ། མང་ཚོགས་ཅན་དུ་འགྱུར་བའི་བྱ་ཐབས་སྤྱོད་པ། དངོས་ཚན་ཅན་གྱི་གཞི་རྟེན་གཏོད་པ་བཅས་ཀྱི་ཐོག་ནས་མི་རིགས་མཐུན་སྒྲིལ་གྱི་དྲིལ་བསྒྲགས་སློབ་གསོའི་གསར་གཏོད་འཕེལ་རྒྱས་ལ་སྐུལ་འདེད་གཏོང་དགོས།
མི་རིགས་མཐུན་སྒྲིལ་གྱི་དྲིལ་བསྒྲགས་སློབ་གསོར་སྐུལ་འདེད་གཏོང་བར་མི་ཆོས་ཅན་གྱི་དྲིལ་བསྒྲགས་འདུ་ཤེས་འཛུགས་དགོས། སྲོལ་རྒྱུན་གྱི་བསམ་གཞིགས་བྱེད་སྟངས་དང་ཁེར་རྐྱང་གི“ཞིང་ཆུ་འདྲེན་སྟངས”ཀྱི་དྲིལ་བསྒྲགས་སློབ་གསོར་འགྱུར་ལྡོག་བཏང་སྟེ། མི་མི་འདྲ་བའི་ཁྱད་ཆོས་ལ་དམིགས་ནས “ཐིགས་ཆུ་གཏོང་བའི”དྲིལ་བསྒྲགས་སློབ་གསོ་མང་ཙམ་སྤེལ་དགོས་ཤིང་། བརྒྱུད་རིམ་འདིའི་ཁྲོད་ས་གནས་མི་འདྲ་བའི་དཔལ་འབྱོར་དང་རིག་གནས་འཕེལ་རྒྱས་ཀྱི་ཆུ་ཚད་དང་། ལྷག་པར་དུ་མི་རིགས་མི་འདྲ་བའི་སེམས་ཁམས་ཀྱི་ཁྱད་ཆོས་ལ་བསམ་གཞིགས་གང་ལེགས་བྱས་ནས་ས་གནས་དེ་གའི་མང་ཚོགས་ཀྱིས་དང་ལེན་བྱེད་ཐུབ་པ་དང་དང་ལེན་བྱེད་འདོད་པའི་བྱེད་ཐབས་སྤྱད་དེ་དྲིལ་བསྒྲགས་སློབ་གསོའི་བྱེད་སྒོ་སྤེལ་དགོས། དྲིལ་བསྒྲགས་ཀྱི་བརྗོད་བྱ་གཙོ་བོ་ནས་འབོད་ཚིག་གི་ཁ་བྱང་བར་དང་། ནང་དོན་དངོས་ནས་མཚོན་སྟངས་བར་གྲངས་ཉུང་མི་རིགས་ཀྱི་ཡུལ་སྲོལ་གོམས་གཤིས་དང་ཆོས་ལུགས་དད་མོས་ལ་བརྩི་འཇོག་ཏན་ཏིག་བྱེད་པ། མི་རིགས་ཁག་གིས་ཐུན་མོང་ཐོག་ཀྲུང་ཧྭ་མི་རིགས་དང་། ཀྲུང་ཧྭའི་རིག་གནས། ཀྲུང་གོའི་མངའ་ཁོངས་བཅས་གསར་གཏོད་བྱེད་པའི་ལོ་རྒྱུས་མང་ཙམ་གླེང་བ། གྲངས་ཉུང་མི་རིགས་ཀྱིས་མཐའ་མཚམས་སྲ་བརྟན་དང་། མེས་རྒྱལ་སྲུང་སྐྱོབ། མཐའ་མཚམས་བརྟན་སྲུང་བཅས་ཀྱི་ཆེད་དུ་ལེགས་སྐྱེས་གལ་ཆེན་འབུལ་བའི་སྐོར་མང་ཙམ་གླེང་བ་བཅས་ཀྱི་ཐོག་ནས་གྲངས་ཉུང་མི་རིགས་ཀྱི་སྤོབས་སེམས་དང་གཟི་བརྗིད་ལྡན་པའི་བསམ་པ་ཇེ་ཆེར་གཏོང་དགོས།
མི་རིགས་མཐུན་སྒྲིལ་གྱི་དྲིལ་བསྒྲགས་སློབ་གསོར་སྐུལ་འདེད་གཏོང་བར་མང་ཚོགས་ཅན་གྱི་དྲིལ་བསྒྲགས་བྱེད་སྟངས་མང་ཙམ་སྤྱོད་དགོས། སྤྱི་ཚོགས་ཆ་འཕྲིན་ཅན་ལ་རྒྱུན་མཐུད་སྐུལ་སྤེལ་གཏོང་བའི་གནས་བབ་གསར་པ་དང་བསྟུན་ནས་ལག་རྩལ་གསར་པ་དང་སྨྱན་སྦྱོར་གསར་པ་བེད་སྤྱོད་གང་ལེགས་བྱས་ཏེ། ཐབས་ལམ་མང་བ་དང་ཕྱོགས་ཡོངས་ནས་དྲིལ་བསྒྲགས་སློབ་གསོ་དང་གསར་འཛུགས་བྱེད་སྒོ་སྤེལ་བ། སྨྱན་སྦྱོར་དུས་རབས་ཀྱི་ཆ་འཕྲིན་འབོར་ཆེན་གྱི་ཁྱབ་སྤེལ་རྣམ་པ་ཁོང་དུ་གང་ལེགས་ཆུད་པ་བཅས་བྱས་ཏེ། དྲིལ་བསྒྲགས་འགྲེམས་པང་རེ་རེ་བཞིན་རྩ་གཉིས་ཨང་རྟགས་སུ་བསྒྱུར་བ་བྱས་ནས་སྐད་འཕྲིན་དང་དཔོད་ཆུང་སོགས་ཀྱི་ཡོ་བྱད་མང་ཙམ་སྤྱད་དེ། མི་རིགས་མཐུན་སྒྲིལ་དེ་ཆ་འཕྲིན་གྱི་མཐའ་སྣེ་རེ་རེར་སླེབས་པ་བྱེད་པ། གཞོན་ནུ་ལོ་ཆུང་ལ་ཀྲུང་ཧྭ་མི་རིགས་ཀྱི་མཐུན་སྒྲིལ་མཛའ་གཅུགས་ཀྱི་སྲོལ་རྒྱུན་བཟང་པོ་དང་མི་རིགས་ཀྱི་ཤེས་བྱའི་ཐད་སློབ་གསོ་བརྒྱབ་སྟེ་མི་རིགས་མཐུན་སྒྲིལ་ཡར་ཐོན་གྱི་སྲོལ་རྒྱུན་བཟང་པོ་མི་རབས་ནས་མི་རབས་བར་རྒྱུན་འཛིན་བྱ་དགོས།
མི་རིགས་མཐུན་སྒྲིལ་གྱི་དྲིལ་བསྒྲགས་སློབ་གསོར་སྐུལ་འདེད་གཏོང་བར་དངོས་ཚན་ཅན་གྱི་དྲིལ་བསྒྲགས་གཞི་རྟེན་ཤུགས་ཆེན་གཏོད་དགོས། སློབ་གསོའི་ཐོན་ཁུངས་གཞི་རིམ་དང་། སྡེ་ཁུལ། མང་ཚོགས་དཀྱུས་མ་བཅས་སུ་ཕྱོགས་ནས། དཔེ་སྟོན་གྱི་ནུས་པ་ཐོན་ཐུབ་པའི་སྡེ་ཁུལ་དང་། གྲོང་གསེབ། ཚན་པ། སློབ་གྲྭ དགོན་སྡེ་སོགས་འབོར་ཆེན་ཞིག་བཏོད་དེ་གསར་གཏོད་བྱེད་སྒོ་གཏིང་ཟབ་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས་པ་དང་། ཚད་འབེབས་ཆོག་པ་དང་དཔྱད་ཞིབ་ཆོག་པའི་དམིགས་ཚད་བཟོ་བ། མི་རིགས་མཐུན་སྒྲིལ་ལ་སྲུང་སྐྱོང་དང་སྐུལ་འདེད་གཏོང་བའི་སྒྲིག་སྲོལ་ལམ་ལུགས་འཛུགས་དགོས་པ། རྒྱལ་དམངས་ཀྱི་སློབ་གསོ་དང་། ལས་བྱེད་པའི་སློབ་གསོ། སྤྱི་ཚོགས་ཀྱི་སློབ་གསོ་བཅས་ཚང་མ་མི་རིགས་མཐུན་སྒྲིལ་གྱི་སློབ་གསོའི་ནང་དོན་དུ་འཇུག་དགོས་པ། མི་རིགས་ཀྱི་རིག་གཞུང་དང་། མི་རིགས་ཀྱི་སྲིད་ཇུས། མི་རིགས་ཀྱི་ཤེས་བྱ་བཅས་དཔེ་དེབ་དང་། སློབ་གྲྭ སློབ་ཁང་དུ་འདྲེན་པ་བཅས་ཀྱི་ཐོག་ནས་སྤྱི་ཚོགས་ཡོངས་ཀྱིས་མི་རིགས་མཐུན་སྒྲིལ་ལ་སྲུང་སྐྱོང་བྱེད་པའི་རྣམ་པ་ཟབ་མོ་ཞིག་གཏོད་དགོས། (བོད་རང་སྐྱོང་ལྗོངས་དྲ་འཕྲིན་གཞུང་ལས་ཁང་། སྤེན་པ་བདེ་སྐྱིད)