ཉིན་ཤས་གོང་། ཤིན་ཧྭ་གསར་འགྱུར་ཁང་གི་གསར་འགོད་པའི་ཡིག་ཐོག་བཅར་འདྲི་དང་ལེན་བྱེད་སྐབས་ཤིས་མོན་ཙི་ཀྲུང་ཧྭ་ཁུལ་གྱི་ཙུང་ཚའེ་དང་དབུ་བཞུགས་ལག་བསྟར་དཔོན་གཅིག་ལྕོགས་ཧོར་མན་གྱིས། ཏོག་གསར་རིམས་ནད་ཀྱི་ཉམས་ཉེན་དང་དེའི་ཤུགས་རྐྱེན་ལ་ཇི་ལྟར་ཁ་གཏད་གཅོག་རྒྱུ་ནི་དུས་རབས་ཀྱི་ཞིབ་འཇུག་བྱ་གཞི་གལ་ཆེན་ཞིག་ཏུ་གྱུར་ཡོད་ལ་རྒྱལ་སྤྱིའི་མཉམ་ལས་ནི་རིམས་ནད་ལས་རྣམ་པར་རྒྱལ་བའི་ཐབས་ལམ་ཉག་གཅིག་དེ་ཡིན་ཞེས་བརྗོད་པ་རེད།
“འདས་ཟིན་པའི་ཟླ་བ་ཁ་ཤས་རིང་། རིམས་ནད་གོ་ལ་ཧྲིལ་པོར་མཆེད་ནས་འཛམ་གླིང་གི་དཔལ་འབྱོར་ལ་སྔར་བྱུང་མྱོང་མེད་པའི་འགྲན་སློང་ཆེན་པོ་འཕྲད་ཡོད། དེའི་ཕྱིར་ང་ཚོས་སྔོན་ཆད་ཀྱི་དུས་སྐབས་གང་ལས་ཀྱང་ཕྱར་བ་གྲུ་འདེགས་བྱེད་ཤུགས་ཆེ་རུ་བཏང་སྟེ་གོ་ལ་ཧྲིལ་པོའི་དཔལ་འབྱོར་གོ་རིམ་ལྡན་པའི་ངང་སླར་གསོ་ཡོང་བར་སྐུལ་འདེད་གཏོང་དགོས”ཞེས་ཧོར་མན་གྱིས་བརྗོད།
ཟླ་བ་ཁ་ཤས་རིང་། ཤིས་མོན་ཙིས་ཀྲུང་གོས་རིམས་འགོག་ཆེད་བྱ་སྤྱོད་ཧུར་ཐག་སྤེལ་པར་རམ་འདེགས་བྱས་ནས་ཁེ་ལས་ཀྱི་སྤྱི་ཚོགས་འགན་འཁྲི་འཁུར་ཡོད། ཧོར་མན་གྱིས། མིག་སྔར་ཀྲུང་གོར་ཡོད་པའི་ཤིས་མོན་ཙིའི་བཟོ་གྲྭ་ཁྱོན་ཡོངས་ནས་ཐོན་སྐྱེད་སླར་གསོ་བྱས་པ་དང་། ཁོང་ཚོས་སྤྱོད་མཁན་དང་མཉམ་ལས་རོགས་ཟླར་གཉེར་སྐྱོང་གི་གསོན་ཤུགས་སླར་གསོ་ཐུབ་རྒྱུར་ནུས་ཤུགས་ཡོད་རྒུས་རྒྱབ་སྐྱོར་བྱས་ཏེ“ཤིས་མོན་ཙིས་ཀྲུང་གོ་དང་སྐྱིད་སྡུག་མཉམ་མྱོང་བྱ་རྒྱུ་རེད”ཅེས་བརྗོད།
ཧོར་མན་གྱིས། སྤྱིར་ན་མིག་སྔར་འཛམ་གླིང་དཔལ་འབྱོར་ལ་རིམས་ནད་ཀྱི་ཤུགས་རྐྱེན་ཐེབས་ཚད་ད་དུང་སྔོན་དཔག་བྱེད་ཐབས་བྲལ་ནའང་། རིམས་ནད་འཇགས་རྗེས་ཀྱི“རྒྱུན་རྣམ་གསར་པ”བསུ་ཆེད་གྲ་སྒྲིག་ཡག་པོ་བྱེད་དགོས་པ་དང་། དེའི་ནང་སྔར་བས་གྲངས་འཛིན་ཅན་གྱི་གཞོགས་འདེགས་བྱེད་ཐབས་དང་གོ་ལ་ཧྲིལ་པོའི་དཔལ་འབྱོར་བཀོད་པ་བསྐྱར་འཛུགས་ཚུད་ཡོད་ཅེས་བརྗོད།
ཁོང་གིས་སྤྱིར་ན་རིམས་ནད་ལས་ཀྲུང་གོའི་དཔལ་འབྱོར་ལ་འགྲན་སློང་ཆེན་པོ་འཕྲད་ནའང་། ཀྲུང་གོའི་དཔལ་འབྱོར་ལ་མཉེན་ཆ་ཆེན་པོ་དང་འཕེལ་རྒྱས་ཀྱི་གཏིང་ཤུགས་ལྡན་པའི་ཡིད་ཆེས་ཡོད་པའི་ངོས་འཛིན་བྱས་ཤིང་། ཁོང་གིས། འཛམ་གླིང་གི་དཔལ་འབྱོར་དངོས་ཚན་ཆེ་གྲས་གཉིས་པ་ཡིན་པའི་ཀྲུང་གོར་རྒྱལ་ནང་གི་ཁྲོམ་རའི་དགོས་མཁོ་ཆེན་པོ་དང་ཐོན་ལས་ཀྱི་རིན་ཐང་འཁོར་འབྲེལ་འཐུས་ཚང་ལྡན་པར་བརྟེན། དེ་ལས་ཀྲུང་གོའི་དཔལ་འབྱོར་འཕེལ་རྒྱས་ཆེད་རྨང་གཞི་བརྟན་པོ་འདིང་ཐུབ་ཅེས་བརྗོད།
“དུས་ཐུང་གི་ངོས་ནས་བལྟས་ན། རྨང་གཞིའི་འཛུགས་སྐྲུན་གསར་པའི་མ་འཇོག་གིས་རིམས་ནད་འཇགས་རྗེས་ཀྱི་ཀྲུང་གོའི་དཔལ་འབྱོར་འཕར་ཆེད་སྒུལ་ཤུགས་གསར་པ་བསྣན་ནས་འབྲེལ་ཡོད་ཁེ་ལས་ལ་རེས་སྐོར་གསར་པའི་ཁྲོམ་རའི་གོ་སྐབས་ཡོད་པ་བྱ་རྒྱུ་རེད། ཕུགས་ཀྱི་ངོས་ནས་བལྟས་ན། 5Gདང་། མི་ཐབས་རིག་ནུས། བཟོ་ལས་དྲ་སྦྲེལ། གྲངས་གཞི་ཆེན་པོ་སོགས་གྲངས་འཛིན་ཅན་གྱི་ལག་རྩལ་ཁྱབ་ཁོངས་ཀྱི་གསར་གཏོད་ཀྱིས་ཀྲུང་གོའི་ཕྱོགས་སྒྱུར་རིམ་སྤོར་ལ་ལག་རྩལ་ནུས་པ་མཁོ་འདོན་བྱ་རྒྱུ་རེད”དེ་དག་ཚང་མ་ནི་ཀྲུང་གོས་སྔར་བས་རྒྱུན་མཐུད་དང་སྤུས་ཚད་མཐོ་བའི་འཕེལ་རྒྱས་དོན་གཉེར་བྱེད་པའི་ཡུན་རིང་གི་བསམ་འདུན་དང་གཅིག་མཐུན་ཡིན་ཞེས་ཧོར་མན་གྱིས་ངོས་འཛིན་བྱས་ཡོད།
ཤིས་མོན་ཙིའི་ཕྱི་རྒྱལ་གྱི་ཁྲོམ་ར་ཆེ་གྲས་གཉིས་པ་ཡིན་པའི་ཀྲུང་གོ་ནི་ཤིས་མོན་ཙིའི་ཞིབ་སྤེལ་རྟེན་གཞི་དང་ཤེས་ལྡན་པའི་ཡོང་ཁུངས་གལ་ཆེན་ཡིན། ཤིས་མོན་ཙིས་ཀྲུང་གོར་རང་ཡུལ་ཅན་གྱི་ཐོན་ལས་རིན་ཐང་འཁོར་འབྲེལ་བསྐྲུན་པ་དང་། ཞིབ་སྤེལ་ལྟེ་གནས་21དང་ལས་བཟོ་ཁྲི་3.5ལྷག་ཙམ་ཡོད། “ང་ཚོ་ཀྲུང་གོར་རྩ་བ་ཚུགས་ནས་ཀྲུང་གོའི་མཉམ་ལས་རོགས་ཟླ་བརྟན་པོ་དང་ཀྲུང་གོའི་དཔལ་འབྱོར་གྱི་མེད་དུ་མི་རུང་བའི་གྲུབ་ཆར་གྱུར་ཡོད”ཅེས་ཧོར་མན་གྱིས་བརྗོད།