ཚེས་12ཉིན་ཧུའུ་པེ་ཞིང་ཆེན་དུ་ཐོལ་བྱུང་སྤྱི་པའི་འཕྲོད་བསྟེན་དོན་རྐྱེན་གྱི་འཕྲལ་སྡོམ་བརྡ་ལན་རིམ་པ་གཉིས་པ་ནས་གསུམ་པར་བཅག་པའི་མཚམས་འདིར་རྒྱལ་སྲིད་སྤྱི་ཁྱབ་ཁང་མཉམ་དུ་སྔོན་འགོག་དང་ཚོད་འཛིན་ལམ་སྲོལ་འབྲེལ་གཏུག་ཚོགས་ཆུང་གི་ཙུའུ་ཀྲང་རྒྱལ་སྲིད་སྤྱི་ཁྱབ་ཁང་གི་དྲུང་ཆེ་གཞོན་པ་ཏིང་ཤང་དབྱང་དང་འབྲེལ་གཏུག་ཚོགས་ཆུང་གི་ཙུའུ་ཀྲང་གཞོན་པ་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་ཀྲུའུ་རེན་གཞོན་པ་ཡུས་ཞུའེ་ཅུན་གྱིས་རུ་སྣེ་ཁྲིད་ནས་ཧུའུ་པེ་ཞིང་ཆེན་རྟེན་རྫས་བཤམས་མཛོད་ཁང་སོགས་སུ་རྒྱུན་རྣམ་ཅན་གྱི་སྔོན་འགོག་དང་ཚོད་འཛིན་བྱ་ཐབས་དོན་འཁྱོལ་བྱས་ཚུལ་ལ་ཞིབ་བཤེར་དང་ལྟ་སྐུལ་མཛུབ་ཁྲིད་གནང་བ་དང་རིག་གནས་ཡུལ་སྐོར་ལས་རིགས་ལས་འགོ་བསྐྱར་འཛུགས་དང་ཐོན་སྐྱེད་སླར་གསོའི་ལས་དོན་ལ་མཛུབ་ཁྲིད་དང་སྐུལ་འདེད་བཏང་གནང་བ་རེད།
འབྲེལ་གཏུག་ཚོགས་ཆུང་གིས་ས་གནས་ས་ཐོག་ཏུ་གཟུགས་པོའི་དྲོད་ཚད་ཐོ་འགོད་དང་ལོགས་འཇོག་ལྟ་ཞིབ་ཁུལ་སོགས་སྔོན་འགོག་དང་ཚོད་འཛིན་གྱི་ལྷུ་ཚིགས་གལ་ཆེན་ལ་ཞིབ་བཤེར་ཞིབ་ཕྲ་གནང་བ་མ་ཟད། ཡུལ་སྐོར་བའི་སྔོན་མངགས་དོ་དམ་དང་། འགོག་སྲུང་དངོས་ཟོག་གསོག་ཉར། འཕྲལ་སྡོམ་སྔོན་ཇུས་ནང་སྦྱོང་སོགས་རྒྱུན་རྣམ་ཅན་གྱི་སྔོན་འགོག་དང་ཚོད་འཛིན་བྱ་ཐབས་དོན་འཁྱོལ་བྱས་ཚུལ་ཤེས་རྟོགས་ཞིབ་ཕྲ་གནང་ནས་སྔོན་འགོག་དང་ཚོད་འཛིན་གྱི་ལམ་ལུགས་ཁག་དོན་འཁྱོལ་ཡག་པོ་བྱེད་པ་དང་། ལྟ་སྐོར་ལམ་ཐིག་ལེགས་སྒྲིག་བྱེད་པ། ཡུལ་སྐོར་བར་དྲིལ་བསྒྲགས་དང་ཁྲིད་སྟོན་ལ་ཤུགས་སྣོན་བརྒྱབ་ནས་མི་སྣ་བསྡུ་འཛོམས་བྱ་རྒྱུ་གཏན་འགོག་བྱེད་དགོས་པའི་བླང་བྱ་བཏོན་པ་རེད།
འབྲེལ་གཏུག་ཚོགས་ཆུང་གིས་འཕྲལ་སྡོམ་བརྡ་ལན་རིམ་པ་དམའ་རུ་བཏང་བ་དེ་ལྷོད་གཡེང་བྱེད་རུང་བ་ཞིག་རྩ་བ་ནས་མིན་པར་རྒྱུན་རྣམ་ཅན་གྱི་རིམས་ནད་སྔོན་འགོག་དང་ཚོད་འཛིན་ཐད་བླང་བྱ་དེ་བས་མཐོ་བ་བཏོན་ཡོད། རིག་གནས་ཡུལ་སྐོར་ཁུལ་དུ་མི་འགྲོ་མཁན་མང་བ་དང་བསྡུ་འཛོམས་ཆེ་བས་རིམས་ནད་སྔོན་འགོག་དང་ཚོད་འཛིན་གྱི་ལས་འགན་སྔར་བཞིན་ལྕི་པོ་ཡོད། ལྷག་དོན་དུ་ཐོན་སྐྱེད་དང་འཚོ་བ་རིམ་བཞིན་སླར་གསོ་དང་ལྔ་པའི་ཚེས་ལྔའི་དུས་ཆེན་འཆར་ལ་ཉེ་བའི་མཚམས་དེར་རྟེན་རྫས་བཤམས་མཛོད་ཁང་དང་མཛེས་ལྗོངས་ཁུལ་སོགས་རིག་གནས་ཡུལ་སྐོར་ཁུལ་དུ་མི་འགྲོ་མཁན་མང་བ་དང་སྔོན་འགོག་དང་ཚོད་འཛིན་གྱི་གནོན་ཤུགས་ཆེན་པོ་འཕྲད་རྒྱུ་ཡིན་པས་སྔོན་འགོག་དང་ཚོད་འཛིན་བྱེད་པར་ཐོག་མཐའ་བར་གསུམ་དུ་རིག་པ་ལྕགས་སྐུད་བཞིན་སྒྲིམ་ནས་ཁྲིམས་ལྟར་སྔོན་འགོག་དང་ཚོད་འཛིན་དང་། ཚན་རིག་དང་མཐུན་པའི་སྔོན་འགོག་ཚོད་འཛིན། གནད་འཁེལ་ངང་སྔོན་འགོག་དང་ཚོད་འཛིན་བཅས་བྱ་རྒྱུ་མཐའ་འཁྱོངས་ཀྱིས་སྔོན་འགོག་ཚོད་འཛིན་གྱི་ཐབས་ཇུས་དང་འབྲེལ་ཡོད་བྱ་ཐབས་ཁག་བགོས་ནས་སྐུལ་འདེད་གཏོང་བ་དང་འབྲེལ་གནས་ཚུལ་གཞིར་བཟུང་ལེགས་སྒྲིག་བྱས་ཏེ་ཁ་གཏད་ནུས་ལྡན་གཅོག་ཐུབ་པའི་འགན་ལེན་བྱེད་དགོས་པ་མ་ཟད། སྔོན་འགོག་དང་ཚོད་འཛིན་བྱེད་དྲགས་པའི་གནས་ཚུལ་མི་ཐོན་པ་བྱེད་དགོས་པ་བསྟན་པ་རེད།
འབྲེལ་གཏུག་ཚོགས་ཆུང་གིས། ཧུའུ་པེ་ཞིང་ཆེན་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལག་བསྟར་གཏིང་ཟབ་བྱེད་པ་དང་རིམས་ནད་སྔོན་འགོག་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལས་དོན་ལ་སྤྱི་འདོམས་སྐུལ་འདེད་གཏོང་རྒྱུའི་སྐོར་གྱི་ཀྲུང་དབྱང་གི་བཀོད་སྒྲིག་དོན་འཁྱོལ་དང་རིག་གནས་ཡུལ་སྐོར་ལས་རིགས་ཀྱི་ཁྱད་ཆོས་ལ་དམིགས་ཏེ“ཚད་བཀག་དང་། སྔོན་མངགས། འཚང་གཡོལ”དང་འབྲེལ་གཏུག་ཚོགས་ཆུང་གིས་མཛུབ་ཁྲིད་བྱས་ནས་བཟོས་པའི“རེའུ་མིག་གཉིས་དང་ཞིབ་བཤེར་གསུམ”གྱི་བླང་བྱ་གཞིར་བཟུང་། སྒོ་དབྱེ་མ་བྱས་གོང་གི་ཚོད་སྐོར་རེའུ་མིག་དང་སྒོ་དབྱེ་བྱས་རྗེས་ཀྱི་ཞིབ་བཤེར་རེའུ་མིག་ཡག་པོ་རྒྱོང་བ་དང་ཚན་པའི་རང་བཤེར་དང་། ས་ཁོངས་ཞིབ་བཤེར། གོང་རིམ་གྱི་འཐེན་བཤེར་བཅས་ལ་ཤུགས་སྣོན་བརྒྱབ་སྟེ། རིག་གནས་ཡུལ་སྐོར་ལས་རིགས་ཀྱི་ལྟ་སྡོམ་དང་རིག་གནས་ཡུལ་སྐོར་ཚན་པ་ཁག་གི་བྱེད་པོའི་འགན་འཁྲི་ནན་དཀྲིས་བྱས་ཏེ་འགོག་སྲུང་གི་ཕྱོགས་སྟོན་ཡོད་པ་དང་། སྔོན་འགོག་ཚོད་འཛིན་དང་དོ་དམ་ལམ་ལུགས་དང་འགན་འཁུར་བ་ཡོད་པ། སྔོན་འགོག་ཚོད་འཛིན་གྱི་དངོས་ཟོག་དང་སྒྲིག་ཆས་ཡོད་པ། སྨན་དོན་མི་སྣའམ་ཡང་ན་སྨན་བཅོས་སྒྲིག་གཞིའི་རྒྱབ་སྐྱོར་ཡོད་པ། ལོགས་འཇོག་བཀོད་སྒྲིག་ཡོད་པ་སོགས“ཡོད་པ་ལྔའི”སྔོན་འགོག་དང་ཚོད་འཛིན་བྱ་ཐབས་དོན་འཁྱོལ་ཡག་པོ་བྱེད་དགོས་པའི་བླང་བྱ་བཏོན་པ་རེད།