2020ལོའི་ཟླ་1ཚེས་11ཉིན། རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཅིག་པའི་ཚོགས་འདུ་ཐེངས་གསུམ་པའི་ཐོག་ཚང་མས་བརྡས་ཐག་བཅད་ནས་གྲོས་འཆམ་བྱུང་བའི《བོད་རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་གཏོད་བྱེད་རྒྱུའི་སྲོལ་ཡིག》(གཤམ་ལ《སྲོལ་ཡིག》ཅེས་བསྡུ་རྒྱུ)དེ་2020ལོའི་ཟླ་5ཚེས་1ཉིན་ནས་བཟུང་དངོས་སུ་ལག་བསྟར་བྱེད་འགོ་ཚུགས་པ་རེད།

《སྲོལ་ཡིག》ནང་ཁྲིམས་སྐྱོང་གི་བསམ་བློ་དེ་རང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་ལས་དོན་གྱི་ཕྱོགས་ཚང་མར་ཁྱབ་པར་བྱས་ནས་བོད་ཀྱི་མི་རིགས་མཐུན་སྒྲིལ་ཡར་ཐོན་བྱ་གཞག་སྐྱོན་བྲལ་ངང་འཕེལ་རྒྱས་ཡོང་བར་ཁྲིམས་སྐྱོང་གི་དཔེ་མཚོན་དང་ལག་བསྟར་གྱི་ཐབས་ལམ་ཞིག་མཁོ་འདོན་བྱས་ཡོད།

མི་རིགས་ཀྱི་ལས་དོན་ཁྲིམས་བཞིན་སྐྱོང་རྒྱུ་ནི་ཁྲིམས་བཞིན་རྒྱལ་ཁབ་ཕྱོགས་ཡོངས་ནས་སྐྱོང་བའི་ནང་དོན་གལ་ཆེན་ཞིག་དང་། ཀྲུང་གོའི་ཁྱད་ཆོས་ལྡན་པའི་མི་རིགས་ཀྱི་གནད་དོན་ཐག་གཅོད་བྱེད་པའི་ཡང་དག་འགྲོ་ལམ་ཐོག་བསྐྱོད་རྒྱུ་མཐའ་འཁྱོངས་བྱེད་པའི་འགག་རྩའི་ལྷུ་ཚིགས་ཤིག ཏང་དང་རྒྱལ་ཁབ་ཀྱི་མི་རིགས་ལས་དོན་སྒྲུབ་པའི་གཞི་རྩའི་ཉམས་མྱོང་བཅས་ཡིན་པ་རེད།

《སྲོལ་ཡིག》བཏོན་རྗེས་རང་སྐྱོང་ལྗོངས་ཀྱི་ཐད་གཏོགས་ཚན་པ་ཁག་དང་། ས་ཁུལ་དང་གྲོང་ཁྱེར་7གྱིས《སྲོལ་ཡིག》སློབ་སྦྱོང་དང་། དྲིལ་བསྒྲགས། ལག་བསྟར་བཅས་ལ་མཐོང་ཆེན་བྱས་ནས། རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་གིས་སློབ་སྦྱོང་ཚོགས་འདུ་འཚོགས་པ་དང་། རིཌ་གཅིག་མཁས་ཅན་གདན་དྲངས་ནས་ཟུར་ཁྲིད་སྙན་ཞུ་བྱེད་པ་སོཌ་ཀྱི་རྣམ་པར་བརྟེན་ནས། གཅིག་སྡུད་ངང《སྲོལ་ཡིག》སློབ་སྦྱོང་བྱས་པས《སྲོལ་ཡིག》དེ་ས་གནས་ཁག་དང་སྡེ་ཚན་ཁག་ལ་ལག་བསྟར་དོན་འཁྱོལ་ཡོང་བར་སྐུལ་འདེད་བཏང་ཡོད།

“《སྲོལ་ཡིག》བཏོན་ནས་ལག་བསྟར་བྱས་པ་ནི་རང་ལྗོངས་ཀྱི་ལས་བྱེད་པ་དང་མང་ཚོགས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མི་རིགས་ཀྱི་ལས་དོན་དང་། མཐའ་སྐྱོང་བོད་བརྟན་སྐོར་གྱི་རྣམ་བཤད་གལ་ཆེན་དང‘བོད་ལྗོངས་འདི་ཉིད་མི་རིགས་མཐུན་སྒྲིལ་ལ་སྐུལ་འདེད་གཏོང་བའི་དཔེ་མཚོན’‘མི་རིགས་མཐུན་སྒྲིལ་ལ་ཤུགས་སྣོན་བརྒྱབ་ནས་མཛེས་སྡུག་ལྡན་པའི་བོད་ལྗོངས་འཛུགས་སྐྲུན་བྱེད་དགོས་པའི’མཛུབ་སྟོན་གལ་ཆེན་གྱི་བྱ་ཐབས་འགངས་ཆེན་ཞིག་ཡིན་ལ། རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་དགུ་པའི‘རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་སྟོན་ཁུལ་གཏོད་པའི་ལས་དོན’གྱི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་བྱེད་པའི་ཞིབ་ཕྲའི་བྱ་སྤྱོད་ཅིག་ཀྱང་ཡིན། 《སྲོལ་ཡིག》བཟོས་ནས་བཏོན་པ་དེ་དུས་བབ་དང་མཐུན་པ་ཞིག་ཡིན་པས། དོན་སྙིང་གལ་ཆེན་ལྡན་ཡོད་ལ། རང་ལྗོངས་ཀྱིས་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་གཏོད་བྱེད་པའི་ཁྲིམས་ལུགས་ཀྱི་གཞི་འཛིན་ས་ཞིག་ཀྱང་ཡིན་སྟབས། དེ་རང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་ལས་དོན་གྱི་ངོས་ནས་བརྗོད་ན་ལམ་ཚད་རྡོ་རིང་གི་དོན་སྙིང་ལྡན་ཡོད”ཅེས་རང་སྐྱོང་ལྗོངས་ཏང་ཨུད་འཐབ་ཕྱོགས་གཅིག་གྱུར་པུའི་པུའུ་ཀྲང་གཞོན་པ་ལྗོངས་མི་རིགས་ལས་དོན་ཨུ་ལྷན་གྱི་ཏང་ཙུའི་ཧྲུའུ་ཅི་ཟླ་བས་དེ་ལྟར་བཤད།

“མི་རིགས་མཐུན་སྒྲིལ་ལ་ཤུགས་སྣོན་རྒྱག་པ་དེ་གྲངས་ཉུང་མི་རིགས་ཀྱི་མི་དམངས་ཀྱི་རྩ་བའི་ཁེ་ཕན་སྲུང་སྐྱོང་བྱ་རྒྱུར་ཕན་པ་ཡོད། 《སྲོལ་ཡིག》གིས་ཁྲིམས་ལུགས་ཀྱི་ཐོག་ནས་མི་རིགས་མཐུན་སྒྲིལ་བྱ་གཞག་རང་ལྗོངས་སུ་འཕེལ་རྒྱས་ཡག་པོ་ཡོང་བར་འགན་ལེན་བྱས་ཡོད”ཅེས་ལྷོ་ཁ་གྲོང་ཁྱེར་སྣེ་གདོང་ཆུས་འཐབ་ཕྱོགས་གཅིག་གྱུར་པུའི་ལས་བྱེད་པ་རྒན་གྲས་པད་མས་བཤད།

ཟླ་3ཚེས་26ནས་ཟླ་4ཚེས་3ཉིན་བར། ལྷོ་ཁ་གྲོང་ཁྱེར་སྣེ་གདོང་ཆུས་ཨུད་འཐབ་ཕྱོགས་གཅིག་གྱུར་པུའུ་དང་། ཆུས་གཏོད་འདེམས་གཞུང་དོན་ཁང་གིས་མཉམ་དུ་སྒྲིག་འཛུགས་བྱས་པའི་སྒྲོག་འགྲེལ་ཚོགས་པ་ཆུས་ཡོངས་ཀྱི་ཤང་5དང་། གྲོང་རྡལ1 ཁྲོམ་གཞུང་དོན་གཅོད་ཁྲུའུ་1གི་གྲོང་ལྷན(སྡེ་ཁུལ)ལ་བསྐྱོད་དེ། 《བོད་རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་གཏོད་བྱེད་རྒྱུའི་སྲོལ་ཡིག》གཅིག་སྡུད་ཐོག་སྒྲོག་འགྲེལ་བྱས་པ་རེད། སྒྲོག་འགྲེལ་ཚོགས་འདུར་འཐབ་ཕྱོགས་གཅིག་གྱུར་པུའི་ལས་བྱེད་པ་རྒན་གྲས་པད་མས་གོ་བདེ་ལ་ཤེས་སླ་བའི་ཐོག་ནས《སྲོལ་ཡིག》བཏོན་པའི་གལ་ཆེའི་རང་བཞིན་དང་། དགོས་ངེས་རང་བཞིན། དེ་བཞིན་མི་རིགས་མཐུན་སྒྲིལ་ཡར་ཐོན་ལས་དོན་གྱི་རྩ་བའི་རྩ་དོན་དང་སྤྱིའི་དམིགས་ཚད་སོགས་ཀྱི་ནང་དོན་ཐད་འགྲེལ་བཤད་ཞིབ་ཕྲ་བརྒྱབ་པས། ཚང་མས《སྲོལ་ཡིག》གི་སྙིང་དོན་གཙོ་བོར་གོ་བ་དང་ཤེས་རྟོགས་གཏིང་ཟབ་བྱུང་བ་རེད། མིག་སྔའི་བར་སྣེ་གདོང་ཆུས་ཀྱིས་སྒྲོག་འགྲེལ་ཐེངས་47བྱས་པར་མང་ཚོགས་མི་ཐེངས་12000ཞུགས་ཡོད་པ་དང་བོད་རྒྱ་སྐད་གཉིས་ཀྱི《སྲོལ་ཡིག》དེབ་5000དང་ལོ་ཐོ་9735སྤྲད་ཡོད་པ་རེད།

“ཟངས་རི་རྫོང་གིས《སྲོལ་ཡིག》སློབ་སྦྱོང་བྱ་རྒྱུ་དེ་རིམ་ཁག་ཏང་ཨུད་དང་སྲིད་གཞུང་གི་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་གིས་ངེས་པར་དུ་སློབ་སྦྱོང་བྱེད་པའི་ནང་དོན་གལ་ཆེན་ནང་བཅུག་ནས་རྫོང་ཡོངས་ཀྱི་མི་ཚང་མས《སྲོལ་ཡིག》སློབ་སྦྱོང་དང་། མི་ཚང་མས《སྲོལ་ཡིག》སྒྲོག་འགྲེལ། མི་ཚང་མས《སྲོལ་ཡིག》ལག་ལེན་བསྟར་བའི་རྣམ་པ་ཟབ་མོ་ཞིག་ཆགས་ཏེ་དུས་མཚམས་རང་བཞིན་གྱི་ཕན་འབྲས་ཐོན་ཡོད”ཅེས་ལྷོ་ཁ་གྲོང་ཁྱེར་ཟངས་རི་རྫོང་དམངས་སྲིད་ཅུས་ཀྱི་ཅུས་ཀྲང་བྱམས་པས་བཤད།