2020ལོ་ནི་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ཕུ་ཐག་གཅོད་པའི་ལོ་ཞིག་ཡིན་ཞིང་། “དབུལ་སྒྲོལ་འགག་སྒྲོལ”འདི་ལོའི་རྒྱལ་ཡོངས་ཚོགས་འདུ་གཉིས་ཀྱི་གླེང་གཞི་གཙོ་བོར་གྱུར་ཡོད། རང་ལྗོངས་ཀྱི་མི་རིགས་ཁག་གི་མང་ཚོགས་ཚོས་བརྙན་འཕྲིན་དང་། རླུང་འཕྲིན། དྲ་རྒྱ་སོགས་ནས་འབྲེལ་ཡོད་གནས་ཚུལ་སྤེལ་གཏོང་ལ་རྒྱུས་མངའ་ལོན་ཐབས་བྱས་པ་རེད།

བོད་ལྗོངས་ལས་རིགས་ལག་རྩལ་སློབ་གླིང་གི་ཏང་ཨུད་ཀྱི་ཧྲུའུ་ཅི་སློབ་སྤྱི་གཞོན་པ་དབྱང་ཧྭ་ཡིས་གསར་འགོད་པར“ངེད་ཚོའི་སློབ་གྲྭ་བོད་ཀྱི་མཐོ་རིམ་ལས་རིགས་ལག་རྩལ་སློབ་གླིང་འབའ་ཞིག་ཡིན། རྒྱལ་ཁབ་ལ་ཚད་མཐུན་རྒྱུན་འཛིན་བ་གསོ་སྐྱོང་གི་འགན་འཁྲི་ཁུར་ནས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ལག་རྩལ་དང་རྩལ་ནུས་རྣམ་པའི་ཤེས་ལྡན་མི་སྣ་སྐྱོང་བའི་འགན་འཁྲི་ལྕི་མོ་འཁུར་བཞིན་ཡོད། ཚེས་22ཉིན་རྒྱལ་ཡོངས་མི་དམངས་འཐུས་ཚོགས་སྐབས་བཅུ་གསུམ་པའི་ཚོགས་འདུ་ཐེངས་གསུམ་པའི་འགོ་ཚུགས་མཛད་སྒོའི་ཐོག་ཙུང་ལི་ལི་ཁེ་ཆང་གིས་སྲིད་གཞུང་གི་ལས་དོན་སྙན་སྒྲོན་གནང་སྐབས། འདི་ལོ་དང་སང་ལོའི་ལས་རིགས་རྩལ་ནུས་གསོ་སྦྱོང་ལ་མི་ཁྲི་3500ཡན་ཟིན་པ་དང་། མཐོ་རིམ་ལས་རིགས་སློབ་གླིང་ལ་མི་ཁྲི་200མང་བ་བསྡུས་ནས་ངལ་རྩོལ་བ་དེ་བས་མང་བས་རྩལ་ནུས་ཁོང་དུ་ཆུད་པ་དང་ལས་ཞུགས་ཐུབ་པར་བྱེད་དགོས་ཞེས་གསུངས་པ་རེད། གོམ་སྟབས་རྗེས་མར་ང་ཚོས་ལས་དོན་གྱི་ཁ་ཕྱོགས་སྔར་བས་ཁ་གསལ་དུ་བཏང་ནས་ལས་རིགས་ཀྱི་འགན་འཁྲི་ལྕི་མོ་ཕྲག་ཏུ་ཁུར་ཏེ། རང་འཁྲིའི་ལས་དོན་ཡག་པོ་སྒྲུབ་པའི་རྨང་གཞིའི་ཐོག་ཞིང་འབྲོག་པར་ལས་ཞུགས་གསོ་སྦྱོང་བྱེད་ཤུགས་དང་སློབ་བསྡུ་བྱེད་ཤུགས་སྔར་བས་ཆེ་རུ་གཏོང་བ་དང་། ཐོན་ལས་རོགས་སྐྱོར་དང་རྩལ་ནུས་གསོ་སྦྱོང་བྱེད་ཤུགས་ཆེ་རུ་གཏོང་བ། ཤེས་ལྡན་མི་སྣ་གསོ་སྐྱོང་གི་སྤུས་ཚད་ལེགས་སུ་གཏོང་བ་བཅས་བྱས་ཏེ་དབུལ་སྒྲོལ་འགག་སྒྲོལ་གྱི་ལས་དོན་ལ་གནད་སྨིན་སྦྲེལ་མཐུད་བྱེད་དགོས”ཞེས་གསར་འགོད་པར་བརྗོད་བྱུང་།