ཀའོ་ཅ་དབྱི་ནི་ལྷ་ས་མངའ་རིས་ཧོ་པེ་ཆ་ཚང་སློབ་འབྲིང་གི་བོད་སྐྱོར་དགེ་རྒན་ཞིག་རེད། སློབ་ཚན་ཚོགས་ཐེངས་དང་པོར་ཁོང་གིས་ལས་རོགས་ཀྱིས་ཕ་ཡུལ་ནས་འཁྱེར་ཡོང་བའི་ཅོག་ལེ་སྒམ་ཆུང་གཉིས་འཁྱེར་ཞིང་ཕྲུ་གུ་ཚོར“ང་ཚོ་ཚང་མ་ཕ་ཡུལ་དང་ཁ་བྲལ་ནས་འདི་གར་ཡོང་བ་ཤ་སྟག་ཡིན། ཁྱེད་ཚོ་མཐོང་དུས་རང་ཉིད་ཀྱི་ཕྲུ་གུ་མཐོང་བའི་ཚོར་སྣང་ཞིག་འདུག ང་ཚོ་ཚང་མས་འདི་ནས་འགོ་གསར་པ་འཛུགས་དགོས། སློབ་གཉེར་ལམ་བུའི་ཁྲོད་ང་ནི་ཁྱེད་ཚོའི་དགེ་རྒན་ཡིན་པ་དང་། རྣམ་ཀུན་འཚོ་བའི་ཁྲོད་ང་ནི་ཁྱེད་ཚོའི་གཉེན་ཉེ་ཡིན”ཞེས་བཤད།
ཕྲུ་གུ་ཚོ་ངོ་ཚ་སྨིན་པས་ཐོག་མར་ཅོག་ལེ་ལེན་མ་ཕོད། འོན་ཏེ་ཕྲུ་གུ་ཚོར་སློབ་ཚན་གྱི་ཁོར་ཡུག་སྐྱིད་སྣང་དོད་པོ་ཞིག་ཡོང་ཆེད། ཀའོ་ཅ་དབྱིས་ཕྲུ་གུ་ཚོར་སློབ་ཚན་ལ་་རྔན་པ་ཟ་རུ་བཅུག དེ་ལྟར་རྔན་པ་ཟ་བཞིན་དུ་ཕྲུ་གུ་ཚོའང་ག་ལེར་ལྷོད་ལ་བབས།
ཀའོ་ཅ་དབྱིས། ངས་ཕྲུ་གུ་ཚོར་རེ་བས་ཁེངས་པའི་འབྱུང་འགྱུར་ཞིག་བཏོད་དེ་གཞན་དང་མི་འདྲ་བའི་འཚོ་བ་སྐྱིད་པོ་ཞིག་སྐྱེལ་ཐུབ་པའི་རེ་བ་བྱེད་ཀྱི་ཡོད། མ་གཞི་སོས་དལ་བག་ཕེབས་ཀྱི་འཚོ་བ་ཞིག་བསྐྱལ་ནའང་ཆོག་མོད། འོན་ཀྱང་འཛམ་གླིང་གི་ངོ་མཚར་ལ་གཞོན་ནུ་ལོ་ཆུང་ཚོས་དེ་བས་མྱོང་ལེན་དང་མཉམ་སྤྱོད་བྱེད་དགོས། འདི་གའི་ཕྲུ་གུ་ཚོའི་མིག་ཟུང་ལས་གཞན་དང་མི་འདྲ་བའི་ལྷན་སྐྱེས་ཀྱི་བརྩེ་བ་ཞིག་མཐོང་རྒྱུ་འདུག་ལ། ཁོ་ཚོས་ང་ལ་ལྟ་རིམ་བཞིན་གད་མོ་འཚེར་འཚེར་བྱེད་པས་སེམས་ལ་སྙིང་རྗེ་ཞིག་ཀྱང་ངང་གིས་སྐྱེ་གི་འདུག རང་བྱུང་ཁོར་ཡུག་ཞན་པའི་ཁར་རྨང་གཞིའི་སློབ་གསོའི་ཆ་རྐྱེན་འཛོམས་པོ་མེད་པས། ནང་སའི་ཕྲུ་གུ་དང་བསྡུར་ན་སློབ་སྦྱོང་ཐད་དཀའ་ངལ་མི་ཉུང་བ་ཞིག་ཡོད་མོད། འོན་ཀྱང་ཁོ་ཚོའི་གྲུང་ཤ་དོད་པའི་མིག་ཟུང་ལས་སློབ་སྦྱོང་ལ་སྔར་བཞིན་བརྩོན་པ་བརྒྱ་དང་འབད་པ་སྟོང་བྱས་ཏེ། རང་ཉིད་ཀྱི་འབྱུང་འགྱུར་དེ་བས་བཀྲག་མདངས་ལྡན་པ་ཞིག་ཡོང་བ་བྱེད་འདོད་ཡོད་པ་མཐོང་བྱུང་ཞེས་བཤད།
ཐམས་ཅད་འགོ་ཚུགས་མ་ཐག་ཡིན། ངས་སླད་ཕྱིན་འཚོ་བའི་ཐད་བྱམས་སྐྱོང་དང་སློབ་སྦྱོང་ཐད་ནན་པོ་བྱ་རྒྱུ་སློབ་ཁྲིད་ཀྱི་ཚད་གཞིར་བཟུང་སྟེ། ཕྲུ་གུ་ཚོ་དང་མཉམ་དུ་ཡངས་པའི་དག་ཞིང་འདིར་བརྩོན་འགྲུས་ཀྱི་རྟ་ཕོར་བཅིབས་ཏེ་མཉམ་སྐྱོད་བྱ་རྒྱུ་ཡིན་ཞེས་ཀའོ་ཅ་དབྱི་ཡིས་བཤད།