སྟོབས་ཤུགས་ཀྱི་གཏམ་རྒྱུད།
ནང་སའི་ཧུའུ་པའེ་ཞིང་ཆེན་དུ་ཏོག་དབྱིབས་ནད་ཡམས་ཐོན་རྗེས།
དུག་སྲིན་གཤེད་མར་ཁ་ཡ་མི་འདོད་བཞིན།།
བརྙན་འཕྲིན་སྐད་འཕྲིན་སྒོམ་སྒྲུབ་བགྱིས་པའི་ཚེ།།
ནད་འགོག་རྒྱལ་ཁའི་བྱེད་རྩོལ་དུ་མ་ཡིས།།
སྙན་ཚིག་འདི་སྐད་མྱུར་དུ་བྲིས་ཤིག་ཟེར།།
ནད་ཡམས་ཆག་སྒོ་ཕྲད་ཀྱང་མི་ཞུམ་པར།།
ཀུན་སེམས་གཅིག་སྒྲིལ་འགོག་རྒོལ་མཐོ་རླབས་ཀྱི།།
བརྗོད་བྱ་འདི་དག་མཆིས་པའི་སྐུལ་སློང་གིས།།
ཡིད་ལ་འཕྲོད་པའི་དོན་ངོ་འདི་སྐད་དོ།།
དལ་དལ་དཔྱིད་རླུང་ས་གཞིར་ལྡང་དང་ལྷན།།
ལྐོག་ལྐོག་སུད་སུད་ནད་དུག་གཤིན་རྗེ་གཤེད།།
ངར་ངར་ཚེ་སྲོག་བཅོམ་ལ་ཆས་པའི་ཚེ།།
བརྗིད་བརྗིད་ཕར་རྒོལ་གཡུལ་འགྱེད་གད་རྒྱངས་བསྒྲགས།།
མང་མང་ཀྲུང་ཧྭ་མི་རིགས་ལྔ་བཅུ་དྲུག།
རྡོག་རྡོག་མཐུན་ལམ་གོང་བུར་བསྒྲིལ་བའི་ཤུཊ།།
མཐོ་མཐོ་མཁའ་ནས་ཅིག་ཅར་ཐོག་ཕབ་ཀྱང་།།
འཕྲལ་འཕྲལ་མི་གཞོམ་འཇིག་རྟེན་འདི་ན་རྒྱལ།།
ཟབ་ཟབ་དགོངས་པ་ཡངས་པའི་གཙོ་འཛིན་གྱི།།
མཁས་མཁས་འཕྱུགས་མེད་བཀོད་ཇུས་ཐོག་ལས་མྱུར།།
འགོར་འགོར་དུས་འགྱངས་དབེན་པའི་དམངས་ཀྱི་དཔུང་།།
ངན་ངན་ཏོག་དབྱིབས་ནད་དུག་འཇོམ་པར་ཤར།།
མཐོ་རིམ་དཔོན་གྱིས་གཟིམ་ཆུང་མི་འགྲིམས་ཤིང་།།
ཉེན་ཁའི་མདུན་དུ་གཡོ་ཟོལ་ཕར་བསྐྲད་དེ།།
འབངས་ཀྱི་བདེ་སྡུག་སྙིང་ཁར་བཅངས་པ་ཡི།།
དཔོན་བཟང་རྒྱལ་ཁབ་འདི་ཡི་རྒྱན་ཆར་མཐོང་།།
གནམ་གྲུས་མཁའ་ལམ་གཅོད་པའི་སྒྲ་ལྡིར་ལྡིར།།
རི་ལིས་ས་ལམ་སྤྱད་པའི་སྐད་ཏོ་ཏོ།།
རླངས་འཁོར་བང་འགྲན་ངར་བའི་སྒྲ་འུར་འུར།།
ནད་དུག་རྨེག་མེད་གཏོང་བའི་གཏམ་སྙན་སྙན།།
དཀར་དཀར་དབུ་སྐྲས་ཁེབས་ཀྱང་བློ་སྟོབས་ཆེ།།
ཚན་རིག་མཁན་པོས་མཐུ་ནུས་རལ་གྲི་ཐོགས།།
སྲུབ་སྲུབ་གང་སར་གྲམ་པའི་ནད་འདྲེ་ཡི།།
བླ་སྲོག་བཀུམ་པའི་ཐབས་ཀྱི་སྒྱུ་སྤྲུལ་བསྟན།།
གཟུགས་ཕྲ་ལྐོག་གྱུར་ཏོག་དབྱིབས་འབུ་ཕྲ་ཡིས།།
རིན་ཆེན་སྲོག་ལུས་འཇོམ་རྩལ་འགོག་པའི་ཕྱིར།།
ཁ་བ་གངས་རིའི་གསོ་རིག་གཞུང་ནས་ཀྱང་།།
ནག་པོ་དགུ་སྦྱོར་ནད་འགོག་ཕུབ་ཆེན་ཕུབ།།
ལྗང་ལྗང་དམག་ཆས་བཀླུབས་པའི་བུ་ཕྲུག་དམག།
སྔོ་སྔོ་ནག་ནག་ཆས་ལྡན་ཉེན་རྟོག་པ།།
དཀར་དཀར་གོས་ཅན་ལྷ་རྗེའི་དཔུང་དང་བཅས།།
ནད་འབུ་གནོན་པའི་སྟོབས་ནུས་གླིང་འདིར་རྒྱལ།།
ཤོག་ཤོག་རྒྱུག་ཅེས་བཙན་སྐུལ་སྦྲང་སྐད་ཙམ།།
སྒྲོག་དགོས་མེད་པའི་དང་བླངས་མང་ཚོགས་ཀྱིས།།
གཅིག་རྗེས་གཉིས་སྙེག་ཉེར་མཁོའི་དངོས་ཟོག་དབོར།།
མི་ཁྲི་སེམས་གཅིག་འབངས་ཀྱི་ངར་ཤུགས་ངོམས།།
ཡས་ན་དགུང་ལོ་མཐོ་བའི་ཕ་མ་དང་།།
མས་ན་ལོ་ན་ཕྲ་བའི་བྱིས་པ་བཅས།།
ཁྱིམ་གྱི་འཁོར་ཐག་དུམ་བུར་བཅད་པ་ཡིས།།
ནད་བཅོས་སྨན་པའི་འགྲན་ཡ་སྲིད་འདིར་དབེན།།
ནད་ཀྱི་དོང་དུ་ལྷུངས་པའི་ཚེ་སྲོག་ཀུན།།
ལག་གི་རྩལ་དང་ངག་གི་བྱམས་བརྩེ་ཡིས།།
བསྐྱངས་ཏེ་དྲག་སྐྱེད་བྱུང་བའི་འཕྲིན་བཟང་པོ།།
ཆ་འཕྲིན་ཐོས་བཞིན་ཀུན་སེམས་ལྷོད་དུ་བབས།།
གྲོང་ཁྱེར་ཝུའུ་ཧན་སྲིན་འབུས་ཐུམ་གྱུར་ཀྱང་།།
དམར་དམར་ཏང་དར་ལྷབ་ཙམ་གཡོ་མ་ཐག།
མ་རུངས་དུག་སྲིན་གབ་ཁུང་མ་རྙེད་པར།།
རང་རང་སྲོག་མགོ་མ་ཐོན་སྨྲེ་ངག་འཆོར།།
དུག་སྲིན་འགའ་ཞིག་ཕྱོགས་མཐར་རྒྱུ་བ་ཡིས།།
གནས་གཞན་སྐྱེ་འགྲོའི་ཚེ་སྲོག་འཕྲོག་འདོད་ཀྱང་།།
སྔོན་འགོག་དུག་སེལ་ཁ་སྒོ་སྟེམ་པ་ཡིས།།
ངན་སེམས་ལམ་དུ་མ་ལྷོངས་རང་སར་ལྕེབས།།
འཕྲལ་འཕྲལ་མཁོ་བའི་སྨན་བཅོས་མཁར་རྫོང་ཞིག།
མགྱོགས་མགྱོགས་བསྐྲུན་ཏེ་གཡུལ་ལ་ཞུགས་པ་ནི།།
རྒྱལ་ཁབ་བརྒྱ་ཕྲག་བརྒལ་བའི་འཛམ་གླིང་འདིར།།
ཀྲུང་གོའི་སྟོབས་ཤུགས་ལན་གཅིག་ངོམས་དང་མཚུངས།།
ཤར་ཕྱོགས་སྟོབས་ལྡན་རྒྱལ་ཁབ་ཀྲུང་གོ་ཡི།།
མི་ཆོས་རིན་ཐང་བྲལ་བ་མཐོང་བཞིན་དུ།།
གླིང་ལྔ་མཚོ་བཞི་གང་སའི་རྒྱལ་ཁབ་ཀྱི།།
སྤྱི་ཚོགས་རིང་ལུགས་ལེགས་ཞེས་ཤིས་པ་བསྩོལ།།
ནད་ངན་གདུག་རྩུབ་མཆེ་བ་གཙིགས་གྱུར་ཀྱང་།།
གཉའ་རུས་མི་ཆག་ཀྲུང་ཧྭ་མི་རིགས་ཀྱི།།
ལག་གདང་དཔུང་སྦྲེལ་མི་དམངས་དམག་འཁྲུག་འདིས།།
ས་གཞི་རིལ་མོར་ངོ་མཚར་གཏམ་རྒྱུད་རྩོམ།།
སྤྱི་ལོ།2020ལོའི་ཟླ་2ཚེས་2ཉིན།