ལྗོངས་ཡོངས་ཀྱི་བཟའ་བཏུང་ཞབས་ཞུའི་ལས་གཉེར་ཚན་པ་ལ།

ཏོག་དབྱིབས་ནད་དུག་གསར་པས་བསླངས་པའི་གློ་ཚད་རིམས་ནད་སྔོན་འགོག་ཚོད་འཛིན་བྱ་རྒྱུའི་སྐོར་གྱི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་དོན་བཀོད་སྒྲིག་སྔར་བས་ལག་བསྟར་དོན་འཁྱོལ་དང་། ནད་དུག་མཆེད་ལམ་ནུས་ལྡན་འགོག་པ། རིམས་ནད་མ་མཆེད་སྔོན་འགོག་བཅས་བྱ་ཆེད། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་འགོ་ནད་འགོག་བཅོས་བཅའ་ཁྲིམས》དང་། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཐོལ་བྱུང་དོན་རྐྱེན་ལ་ཁ་གཏད་གཅོག་པའི་བཅའ་ཁྲིམས》《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བཟའ་བཅའི་བདེ་འཇགས་བཅའ་ཁྲིམས》 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འཛད་སྤྱོད་པའི་ཁེ་དབང་སྲུང་སྐྱོང་བཅའ་ཁྲིམས》 《སྤྱི་པའི་འདུ་གནས་ཀྱི་འཕྲོད་བསྟེན་དོ་དམ་སྲོལ་ཡིག》སོགས་ཀྱི་འབྲེལ་ཡོད་གཏན་འབེབས་གཞིར་བཟུང་། ད་ལྟ་ལྗོངས་ཡོངས་ཀྱི་བཟའ་བཏུང་ཞབས་ཞུའི་ལས་གཉེར་ཚན་པར་ལས་གཉེར་བྱེད་སྒོའི་བརྡ་ཁྱབ་གཏོང་རྒྱུ་གཤམ་གསལ།

གཅིག བཟའ་བཏུང་ཞབས་ཞུའི་ལས་གཉེར་ཚན་པ་ཁག་གིས་མིག་སྔའི་རིམས་ནད་སྔོན་འགོག་ཚོད་འཛིན་ལས་དོན་གྱི་ཧ་ཅང་གལ་ཆེའི་རང་བཞིན་དང་འདུ་འཛོམས་མཉམ་ཟ་བྱས་ཚེ་རིམས་ནད་མཆེད་སྲིད་པའི་གནོད་འཚེ་ཚབས་ཆེན་ལ་ཚད་མཐོའི་མཐོང་ཆེན་བྱས་ཏེ། རིམས་ནད་འགོག་བཅོས་སོགས་སྡེ་ཚན་ལ་གཞོགས་འདེགས་ཧུར་ཐག་ཞུ་བ་དང་རིམས་ནད་སྔོན་འགོག་ཚོད་འཛིན་ཡག་པོ་བྱེད་དགོས་པའི་སྐོར་གྱི་བླང་བྱ་རབ་དང་རིམ་པར་ནན་པོ་གཞིགས་ཏེ་ངེས་པར་དུ་དོགས་ཡོད་ནད་དཔེ་གྲལ་བཤེར་དང་། འཛད་སྤྱོད་པར་ཚ་བ་ཡོད་མེད་ཀྱི་དྲན་སྐུལ་བྱེད་དགོས་པ་མ་ཟད། ཚ་བ་རྒྱས་པ་དང་གློ་རྒྱག་མཁན་རྣམས་ལ་ངེས་པར་དུ་དེ་ནས་བྲལ་དགོས་པའི་ཁ་ཏ་བསླབ་བྱ་བྱེད་དགོས་པ་དང་། སྒྲོག་ཙེ་ལྔའམ་ཡང་ན་མི་50ཡན་མཉམ་དུ་ཁ་ལག་བཟའ་བའི་རིགས་སྣེ་ལེན་ཞུ་མི་ཆོག

གཉིས། བཟའ་བཏུང་ཞབས་ཞུའི་ལས་གཉེར་ཚན་པས་རིམས་ནད་སྔོན་འགོག་ཚོད་འཛིན་གྱི་བླང་བྱར་ནན་པོ་གཞིགས་ཏེ། ཉིན་ལྟར་དུག་སེལ་གཤེར་ཁུ་84རྟགས་ཅན་དང་ཀོ་དབྱང་དབྱི་སོན་སོགས་གཏན་འཁེལ་བསྡུར་ཚད་གཞིར་བཟུང་དུག་སེལ་གཤེར་ཁུ་དང་བསྲེས་རྗེས་སྒྲོག་ཙེའི་ངོས་དང་ས་སྟེང་སོགས་སུ་དུག་སེལ་བྱེད་དགོས་པ་དང་། དུས་བཀག་ནང་སྒེའུ་ཁུང་ཕྱེ་ནས་རླུང་འགྲོ་ཡག་པོ་ཡོང་བ་བྱེད་དགོས་པ་མ་ཟད། ལྟོ་སྣོད་ལ་དུག་སེལ་ཚད་ལྡན་དང་ནན་པོ་བྱས་ཏེ་བདེ་འཇགས་དང་གཙང་སྦྲ་དོད་པའི་ལྟོ་སྣོད་མཁོ་འདོན་བྱེད་དགོས།

གསུམ། བཟའ་བཏུང་ཞབས་ཞུའི་ལས་གཉེར་ཚན་པས《བཟའ་བཏུང་ཞབས་ཞུའི་བཟའ་བཅའི་བདེ་འཇགས་བཀོལ་སྤྱོད་ཀྱི་ཚད་གཞི》ཡི་བླང་བྱར་ནན་པོ་གཞིགས་ཏེ་ཚོང་གཉེར་བྱེད་དགོས་པ་དང་། ཚོང་ཟོག་འཐེན་སྐབས་ཞིབ་བཤེར་ནན་པོ་དང་ལག་ཁྱེར་དང་འཛིན་ཤོག་ལེན་དགོས་པ། བྱ་རིགས་ཐོན་ཟོག་ལ་ངེས་པར་དུ་ནད་ཡམས་ཞིབ་བཤེར་ཚད་ལོན་པའི་དཔང་རྟགས་ཀྱི་མ་ཡིག་ལེན་དགོས། བདག་ཏུ་མ་བཟུང་བའི་སྲོག་ཆགས་དང་ཡོངས་ཁུངས་གསལ་པོ་མེད་པའི་སྲོག་ཆགས་གསོན་པོ་དང་འབྱུང་ཁུངས་སྲོག་ཆགས་ཡིན་པའི་ཟས་རིགས་མཐའ་དག་ཉོ་སྒྲུབ་དང་ཚོང་གཉེར་གཏན་ནས་བྱེད་མི་ཆོག་པ་དང་། ཚོང་གཉེར་བྱ་ཡུལ་དུ་སྲོག་ཆགས་སྡོམ་གསོས་རྒྱག་མི་ཆོག་པ་དང་བཤས་གཏོང་མི་ཆོག བདག་ཏུ་མ་བཟུང་བའི་སྲོག་ཆགས་དང་སྲོག་ཆགས་ནད་ཅན་ནམ་ཡང་ན་ངོ་བོ་འགྱུར་བའི་ཤ་རིགས་སོགས་དང་རེག་ཐུག་བྱེད་མི་རུང་། ལས་སྣོན་ཟས་རིགས་བཙོས་མ་ཚ་རྐྱང་བཟོ་དགོས་པ་དང་དྲོད་ཚད་ཧྲེ་ཧྲི་ཏུའུ་70ལས་མི་དམའ་བ་བྱེད་དགོས།

བཞི། བཟའ་བཏུང་ཞབས་ཞུའི་ཚན་པས་ཉིན་ལྟར་ལས་མིར་ཞོགས་པ་དང་ཉིན་དགུང་ཚ་བ་ཡོད་མེད་བརྟག་དཔྱད་ནན་པོ་བྱེད་དགོས་པ་དང་། ལས་མིར་རིམས་ནད་ཀྱི་དྲིལ་བསྒྲགས་སློབ་གསོའི་ལས་དོན་ཡག་པོ་སྒྲུབ་པ་དང་ལས་མིའི་བདེ་ཐང་ཡིག་ཚགས་ཡག་པོ་བཟོས་ཏེ་ལས་མིས་ཁ་རས་ཡག་པོ་བརྒྱབ་ནས་བཟའ་བཅའ་ལས་སྣོན་དང་ཞབས་ཞུའི་ལས་དོན་འགན་ལེན་བྱེད་དགོས་པ་དང་། ཁ་རས་དུས་ཚད་ཡོལ་ན་དུས་ཐོག་ཏུ་བརྗེ་བ་དང་ལས་ཀ་བྱེད་རིང་ལག་པ་ཡང་སེ་འཁྲུ་དགོས་པ། དབུགས་ལམ་གཉན་ཚད་ཀྱི་ནད་རྟགས(ཚ་བ་རྒྱས་པ་དང་། གློ་རྒྱག་པ། ཧབ་ཆི་རྒྱག་པ་སོགས)གང་རུང་ཡོད་པའི་མི་སྣ་དང་འབྲེལ་འདྲིས་བྱེད་མི་ཉན། གལ་སྲིད་ལས་མིར་ཚ་བ་རྒྱས་པ་དང་། ཆམ་པ་ཕོག་པ། ཧབ་ཆི་རྒྱག་པ་སོགས་དབུགས་ལམ་གཉན་ཚད་ཀྱི་ནད་རྟགས་ཡོད་པ་ཤེས་ཚེ་ལམ་སེང་ལས་མཚམས་བཞག་ནས་སྨན་ཁང་དུ་བསྐྱལ་དགོས།

ལྔ། བཟའ་བཏུང་ཞབས་ཞུའི་ལས་གཉེར་ཚན་པ་ཁག་གིས་རིམས་ནད་སྔོན་འགོག་ཚོད་འཛིན་བྱེད་རིང་ཚོང་ཤག་གིས་ཁ་ལག་མངགས་པ་ཕྱིར་ལོག་བྱས་ཚེ་ངེས་པར་དུ་ཆ་རྐྱེན་མེད་པར་དངུལ་སློག་དགོས།

《བརྡ་ཁྱབ》ཀྱི་བླང་བྱ་ལས་འགལ་རིགས་ལ་ལྗོངས་ཡོངས་ཀྱི་སྤྱི་ཚོགས་ལས་རིགས་ཁག་དང་མི་དམངས་མང་ཚོགས་ཚོས་དུས་ཐོག་ཏུ་ཐེར་འདོན་གོང་ཞུའི་ཁ་པར་12315རྒྱག་དགོས།

ཆེད་མངགས་བརྡ་ཁྱབ་འདི་བཏང་བ་ཡིན།

བོད་རང་སྐྱོང་ལྗོངས་ཁྲོམ་ར་ལྟ་སྐུལ་དོ་དམ་ཅུས།

2020ལོའི་ཟླ་1ཚེས་27ཉིན།