ཚེས་30ཉིན་གྱི་ཕྱི་དྲོ་གསར་འགོད་པར་རང་སྐྱོང་ལྗོངས་མི་དམངས་སྨན་ཁང་སྒོ་བསྟེན་སྨན་ཁང་གི་མདུན་ནས་ལས་སྒྲུབ་མི་སྣས་མཚན་མོ་དེ་རང་དུ་དུས་ཚོད་དམ་འཛིན་ངང་ཚ་བ་རྒྱས་པར་ལྟ་སའི་སྟབས་བདེའི་སྒོ་བསྟེན་སྨན་ཁང་གི་གྲལ་བཤེར་ཁང་པ་མང་པོ་བསྐྲུན་ཟིན་ཉེར་ཡོད་པ་མཐོང་བྱུང་། གསར་འགོད་པས་ཤེས་རྟོགས་བྱུང་གསལ། རིམས་ནད་སྔོན་འགོག་ཚོད་འཛིན་བྱ་ཆེད་རང་སྐྱོང་ལྗོངས་མི་དམངས་སྨན་ཁང་དང་། མི་དམངས་སྨན་ཁང་གཉིས་པ། སྨན་རྩིས་ཁང་སོགས་གནས་གཏན་འཁེལ་གྱི་ཚ་བ་རྒྱས་པའི་སྒོ་བསྟེན་སྨན་བཅོས་སྒྲིག་གཞིས་ཟླ་1ཚེས་30ཉིན་གྱི་ཐོ་རེངས་ནས་མཚན་ཤས་བསྟུད་མར་ལས་ཀ་བྱེད་འགོ་བཙུགས་པ་དང་དེའི་དམིགས་ཡུལ་ནི་རང་ལྗོངས་ཀྱི་ཏོག་དབྱིབས་ནད་དུག་གསར་པས་བསླངས་པའི་གློ་ཚད་རིམས་ནད་སྨན་བཅོས་སྐྱོབ་བཅོས་ཀྱི་གནས་གཏན་འཁེལ་གྱི་སྨན་ཁང་དང་གནས་གཏན་འཁེལ་གྱི་ཚ་བ་རྒྱས་པའི་སྒོ་བསྟེན་སྨན་ཁང་གི་གཞི་ཁྱོན་རྒྱ་ཆེར་གཏོང་རྒྱུ་དེ་རེད།
གསར་འགོད་པར་ཤེས་རྟོགས་བྱུང་གསལ། ཏོག་དབྱིབས་ནད་དུག་གསར་པས་བསླངས་པའི་གློ་ཚད་རིམས་ནད་ལ་འགོག་རྒོལ་བྱ་ཆེད་རང་སྐྱོང་ལྗོངས་ཀྱིས་རང་སྐྱོང་ལྗོངས་མི་དམངས་སྨན་ཁང་གསུམ་པ་རང་སྐྱོང་ལྗོངས་ཀྱི་གནས་གཏན་འཁེལ་གྱི་སྨན་ཁང་དང་། ལྗོངས་མི་དམངས་སྨན་ཁང་དང་། སྨན་རྩིས་ཁང་། མི་དམངས་སྨན་ཁང་གཉིས་པ། ལྷ་ས་གྲོང་ཁྱེར་མི་དམངས་སྨན་ཁང་བཅས་ཀྱི་ཚ་བ་རྒྱས་པའི་སྒོ་བསྟེན་སྨན་ཁང་གནས་གཏན་འཁེལ་གྱི་ཚ་བ་རྒྱས་པའི་སྒོ་བསྟེན་སྨན་ཁང་དུ་སྔ་ས་ནས་གཏན་འཁེལ་བྱས་ཡོད། དེ་དང་ཕྱོགས་མཚུངས་ཧུའུ་པེ་ཞིང་ཆེན་ཝུའུ་ཧན་གྲོང་ཁྱེར་དུ་ཏོག་དབྱིབས་ནད་དུག་གསར་པས་བསླངས་པའི་གློ་ཚད་རིམས་ནད་ཐོན་ཚུན། རིམས་ནད་སྔོན་འགོག་དང་ཚོད་འཛིན་བྱ་ཆེད་བོད་ཀྱི་རྒྱ་ཆེའི་སྨན་དོན་མི་སྣས་འཕྲལ་མ་ཉིད་དུ་རང་འགུལ་ངང་དཔྱིད་གསར་དུས་ཆེན་མ་བཏང་བར་གང་མྱུར་ལས་གནས་སུ་ཕྱིར་ལོག་བྱས་ཏེ་ལྗོངས་ཡོངས་ཀྱི་སྔོན་འགོག་ཚོད་འཛིན་གྱི་ལས་དོན་ལ་ཞུགས་ཡོད། རང་སྐྱོང་ལྗོངས་འཕྲོད་བསྟེན་བདེ་ཐང་ཨུ་ལྷན་གྱི་འགོ་ཁྲིད་རང་སྐྱོང་ལྗོངས་མི་དམངས་སྨན་ཁང་དང་། སྨན་རྩིས་ཁང་། མི་དམངས་སྨན་ཁང་གཉིས་པ། མི་དམངས་སྨན་ཁང་གསུམ་པ། ལྷ་ས་གྲོང་ཁྱེར་མི་དམངས་སྨན་ཁང་བཅས་སུ་ཐེངས་མང་བསྐྱོད་དེ་སྨན་དོན་མི་སྣའི་ལས་གནས་བརྟན་སྲུང་དང་། དངོས་ཟོག་གྲབས་གསོག ཚ་བ་རྒྱས་པའི་སྒོ་བསྟེན་སྨན་བཅོས་ཀྱི་གོ་རིམ། མི་སྒེར་གྱི་འགོག་སྲུང་། ནད་རྟགས་གཏན་འཁེལ་བྱུང་བའི་ནད་པ་སྐྱོབ་བཅོས་དང་སྨན་དོན་མི་སྣའི་རྒྱབ་ཕྱོགས་འགན་ལེན་སོགས་ཀྱི་ལས་དོན་ཐད་མཛུབ་ཁྲིད་བྱས་ཡོད།
ཉིན་ཤས་བསྟུད་མར་རང་སྐྱོང་ལྗོངས་འཕྲོད་བསྟེན་བདེ་ཐང་ཨུ་ལྷན་དང་། རང་སྐྱོང་ལྗོངས་མི་དམངས་སྨན་ཁང་གསུམ་པ། ལྷ་ས་གྲོང་ཁྱེར་མི་དམངས་སྨན་ཁང་སོགས་སྡེ་ཚན་དང་སྨན་བཅོས་སྒྲིག་གཞིས་བསྟུད་མར་བརྡ་ཐོ་གཏོང་བ་དང་། སྤྱི་བསྒྲགས་སྤེལ་བ། གསལ་བཤད་ཡི་གེ་གཏོང་བ་སོགས་ཀྱི་སྒོ་ནས་ཕྱོགས་མང་པོ་ནས་སྤྱི་དམངས་ཀྱི་འདུ་ཤེས་ཟབ་ཏུ་གཏོང་བ་དང་ནད་དུག་ལ་མཉམ་དུ་འགོག་རྒོལ་བྱེད་ཀྱི་ཡོད་པ་རེད།
རང་སྐྱོང་ལྗོངས་འཕྲོད་བསྟེན་བདེ་ཐང་ཨུ་ལྷན་གྱི་གཞུང་ཕྱོགས་དྲ་ཚིགས་ཐོག་ཤ་ཚའི་དྲན་སྐུལ་ཡི་གེ་བཏང་ནས་ཕྱོགས་ཁག་ནས་དུས་ཚོད་དེའི་རིང་བོད་དུ་ཡོང་མི་རུང་བའི་འབོད་སྐུལ་བྱས་ཡོད། རང་སྐྱོང་ལྗོངས་མི་དམངས་སྨན་ཁང་གསུམ་པས་སྤྱི་བསྒྲགས་སྤེལ་ནས་རང་སྐྱོང་ལྗོངས་མི་དམངས་སྨན་ཁང་གསུམ་པ་འདི་ཉིད་ཏོག་དབྱིབས་ནད་དུག་གསར་པས་བསླངས་པའི་གློ་ཚད་རིམས་ནད་སྨན་བཅོས་སྐྱོབ་བཅོས་ཀྱི་གནས་གཏན་འཁེལ་གྱི་སྨན་ཁང་ལ་གཏན་འཁེལ་བྱས་ཏེ་2020ལོའི་ཟླ་1ཚེས་31ཉིན་ནས་བཟུང་ཏོག་དབྱིབས་ནད་དུག་གསར་པས་བསླངས་པའི་གློ་ཚད་ཕུད་པའི་ནད་རིགས་གཞན་དག་སྨན་བཅོས་བྱེད་མཚམས་འཇོག་རྒྱུ་དང་འབྲེལ། སྒོ་བསྟེན་སྨན་ཁང་གནས་སྐབས་མཚམས་འཇོག་བྱས་ཡོད། སྨན་ཁང་གི་ཚ་བ་རྒྱས་པའི་སྒོ་བསྟེན་སྨན་ཁང་2020ལོའི་ཟླ་1ཚེས་30ཉིན་ནས་བཟུང་གི་ཆུ་ཚོད་24རིང་འཁོར་སྐྱོད་བྱེད་ཀྱི་ཡོད་པ་རེད།
ཏོག་དབྱིབས་ནད་དུག་གསར་པས་བསླངས་པའི་གློ་ཚད་རིམས་ནད་སྔོན་འགོག་ཚོད་འཛིན་གྱི་ལས་དོན་ཡག་པོ་སྒྲུབ་པ་དང་སྨན་ཁང་ནས་གཅིག་ལ་གཅིག་འགོས་ཀྱི་འགོ་ནད་མཆེད་པའི་ཉེན་ཁ་ཚད་གཞི་ཆེ་ཤོས་ཀྱི་སྒོ་ནས་ཆུང་དུ་གཏོང་ཆེད། ལྷ་ས་གྲོང་ཁྱེར་མི་དམངས་སྨན་ཁང་གིས་དུས་ཐོག་ཏུ་གསལ་བཤད་ཡི་གེ་བཏང་ཡོད་པ་སྟེ། 1.ཚ་བ་རྒྱས་པའི་ནད་པ་ཚ་བ་རྒྱས་པའི་སྒོ་བསྟེན་སྨན་ཁང་དུ་སྨན་བཅོས་བྱེད་པར་འགྲོ་དགོས་པ་དང་། 2.སྨན་ཁང་དུ་སྨན་བཅོས་བྱེད་པར་ཡོང་མཁན་ནད་པ་དང་དེའི་ནང་མིས་སྨན་ཁང་དུ་ཡོང་བའི་དུས་ཚོད་དེའི་རིང་ཁ་རས་རྒྱག་དགོས་པ་མ་ཟད། ནད་པ་དང་ནད་གཡོག་ཚང་མ་སྒོ་བསྟེན་སྨན་ཁང་དང་དོས་དྲག་ཐོག་བརྩེགས་ཁང་ཆེན་ནང་མ་འཛུལ་གོང་ཚང་མས་ཚ་བ་ལྟ་རྒྱུ་དང་ལེན་བྱེད་དགོས་པ། 3.སྒོ་བསྟེན་སྨན་ཁང་དང་དོས་དྲག་ཁང་དུ་སྨན་བཅོས་བྱེད་པར་ཡོང་མཁན་ནད་པ་དང་དེའི་ནད་གཡོག་གིས་ངེས་པར་དུ་ཁ་རས་རྒྱག་པ་དང་སྨན་པ་བསྟེན་པར་འགྲོ་སྐབས་ནད་གཡོག་གཅིག་ལས་མི་གཏོང་རྒྱུ། 4.ཉེ་བའི་གཟའ་འཁོར་གཉིས་རིང་ནང་ས་ནས་བོད་དུ་ཡོང་བའི་ཚ་བ་རྒྱས་པའི་མི་སྣ་དག་གིས་རང་འགུལ་ངང་ཚ་བ་རྒྱས་པའི་སྒོ་བསྟེན་སྨན་བཅོས་ཁང་དུ་གྲལ་བཤེར་དང་ལེན་བྱེད་དགོས་པ་བཅས་རེད།
ཟླ་1ཚེས་31ཉིན་གསར་འགོད་པར་ལྷ་སའི་སྨན་ཁང་མང་པོ་ཞིག་ནས་སྨན་དོན་མི་སྣས་རྒྱལ་སྒོར་འཛུལ་སའི་འགྲམ་དུ་སྨན་ཁང་དུ་ཡོང་མཁན་མི་ཚང་མར་ཚ་བ་ལྟ་བཞིན་ཡོད་པ་མཐོང་བྱུང་། སྨན་ཁང་གི་ཚ་བ་རྒྱས་པའི་སྒོ་བསྟེན་སྨན་ཁང་གི་གཞི་ཁྱོན་ཆེ་རུ་གཏོང་བ་ཕུད་གསར་འགོད་པས་ཧྲེན་ལི་དུས་རབས་ཐང་ཆེན་སོགས་སྤྱི་པའི་འདུ་གནས་ཁག་གཅིག་ཏུ་ཚ་བ་རྒྱས་ཡོད་མེད་ལྟ་མཁན་ལས་དོན་པ་ཆེད་མངགས་བཀོད་སྒྲིག་བྱས་ཏེ་སྒོར་འཛུལ་སའི་མཚམས་སུ་དགོས་མཁོ་ཡོད་པའི་མི་ལ་ཞབས་འདེགས་ཞུ་བཞིན་ཡོད་པ་མཐོང་བྱུང་།