ཧུའུ་པེ་ཞིང་ཆེན་ཝུའུ་ཧན་གྲོང་ཁྱེར་དུ་ཏོག་དབྱིབས་ནད་དུག་གསར་པས་བསླངས་པའི་གློ་ཚད་རིམས་ནད་ཐོན་པ་ནས་བཟུང་། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཚད་མཐོའི་མཐོང་ཆེན་གནང་སྟེ་བྱ་ཐབས་སྣ་མང་སྤྱད་པ་དང་མཉམ་དུ་སྔོན་འགོག་དང་མཉམ་དུ་ཚོད་འཛིན་བྱས་པས། མིག་སྔར། རང་ལྗོངས་ཀྱི་མང་ཚོགས་བློ་ཁ་བརྟན་པོ་ཡོད་པ་དང་འཚོ་བ་རྒྱུན་གཏན་ལྟར་ཡོད་པ་རེད།
ལྷ་ས་གྲོང་ཁྱེར་ཁྲེང་ཀོན་ཆུས་ཀརྨ་དགོན་གསར་ཁྲོམ་གཞུང་དོན་གཅོད་ཁང་གི་གཅིག་འཛུགས་སྡེ་ཁུལ་དུ། གསར་འགོད་པས་སྨན་སྤྱོད་ཁ་རས་བརྒྱབ་པ་དང་དུག་སེལ་ཡོ་བྱད་འཁྱེར་བའི་སྡེ་ཁུལ་ལས་དོན་མི་སྣས་སྒོ་འགྲམ་དུ་ཕར་འགྲོ་ཚུར་འོང་གི་རླངས་འཁོར་དང་མི་སྣར་ཞིབ་བཤེར་དང་དུག་སེལ་ནན་ཏན་བྱེད་བཞིན་པ་མཐོང་བྱུང་། གཅིག་འཛུགས་སྡེ་ཁུལ་གྱི་གད་སྙིགས་རིགས་དབྱེ་ལྟ་སྐུལ་མཛུབ་སྟོན་པ་འཇམ་དཔལ་ངག་དབང་གིས་གསར་འགོད་པར། སྡེ་ཁུལ་ལས་དོན་པས་མངོན་གསལ་དོད་སར་དྲིལ་བསྒྲགས་སྤྱི་བསྒྲགས་མང་པོ་སྦྱར་ནས་རིམས་ནད་འགོག་བཅོས་ཀྱི་གནས་ཚུལ་བརྡ་ཁྱབ་བཏང་བ་དང་། ད་ཆ་གྲོང་མི་རྣམས་བློ་བདེ་བག་ཕེབས་ཡིན་པ་དང་འཚོ་བ་རྒྱུན་གཏན་བཞིན་ཡིན་ཞེས་བརྗོད་ཅིང་། ཁོང་གིས“ང་ཚོས་ད་དུང་དུད་ཚང་ཚང་མར་སྔོན་འགོག་ཤེས་བྱ་དྲིལ་བསྒྲགས་བྱས་ནས་ཁོ་ཚོར་ལག་པ་མང་ཙམ་འཁྲུ་བ་དང་། རླུང་འགྲོ་ཡག་ཏུ་གཏོང་བ། ཁ་རས་རྒྱག་པ་སོགས་བྱེད་དགོས་ལུགས་བཤད་པ་མ་ཟད། སྡེ་ཁུལ་ཨུ་ལྷན་གྱིས་ད་དུང་སྒྲིག་འཛུགས་བྱས་ནས་ཁ་རས་ཉོས་ཏེ་གྲོང་མིར་སྤྲད་ཡོད”ཅེས་བརྗོད་པ་རེད།
གཅིག་འཛུགས་སྡེ་ཁུལ་གྱི་ཚོགས་ཆུང་དང་པོའི་སྒོ་རྟགས་74ཡི་གྲོང་མི་ཚེ་སྒྲོལ་གྱིས་གསར་འགོད་པར། ད་ཆ་འཚོ་བའི་མཁོ་ཆས་ཀྱི་རིན་གོང་བརྟན་པོ་འདུག་ལ་ཉོ་ཡང་བདེ་པོ་འདུག དོན་དག་མེད་ཚེ་ཕྱིར་འགྲོ་གི་མེད། ལག་ཐོགས་ཁ་པར་དང་བརྙན་འཕྲིན་ནས་རིམས་ནད་འགོག་བཅོས་ཀྱི་ཤེས་བྱ་ཉན་གྱི་ཡོད་པ་དང་ཏོག་དབྱིབས་ནད་དུག་གསར་པས་བསླངས་པའི་གློ་ཚད་ལ་དམིགས་བསལ་ཕན་ནུས་ལྡན་པའི་སྨན་ཞིབ་བཟོ་བྱེད་བཞིན་པའི་གནས་ཚུལ་ཐོས་སྐབས་བློ་བདེ་པོ་འདུག་ཅེས་བཤད་ཅིང་། ཁོང་གིས“མེས་རྒྱལ་ད་ཆ་སྟོབས་འབྱོར་མངའ་ཐང་རྒྱས་པས་རིམས་ནད་ལས་རྣམ་པར་རྒྱལ་ངེས་པའི་ཡིད་ཆེས་ང་ཚོར་ཡོད”ཅེས་བརྗོད་པ་རེད།