ཉེ་ཆར། ལྷ་ས་གྲོང་ཁྱེར་ལྷུན་གྲུབ་རྫོང་བྱང་ཁ་ཤང་བྱང་ཁ་གྲོང་ཚོར་བཅའ་སྡོད་ལས་བྱེད་པས་གྲོང་ཚོའི་མང་ཚོགས་ཡོངས་ཀྱི་མངགས་བཅོལ་ལྟར་སུའུ་ཀྲོའུ་ཡི་བོད་སྐྱོར་ལས་བྱེད་པ་ཁག་བརྒྱད་པར“སུའུ་ཀྲོའུ་ལྷུན་གྲུབ་ཁྱིམ་ཚང་གཅིག་ལྟར་བརྩེ། ཤང་གྲོང་དར་རྒྱས་མི་སེམས་བདེ་བར་སྐྲུན”ཞེས་བཀོད་པའི་དར་གོས་ཕུལ་ཏེ་ཉེ་བའི་ལོ་ཤས་རིང་གྲོང་ཚོ་ཡོངས་ཀྱིས་བོད་སྐྱོར་ལས་བྱེད་པར་ཐུགས་རྗེ་ཆེ་ཞུ་སེམས་མཚོན་པར་བྱས་པ་རེད།
བྱང་ཁ་ཤང་ཏང་ཨུད་ཀྱི་ཧྲུའུ་ཅི་གཞོན་པ་དང་ཤང་ཀྲང་རྡོ་རྗེ་ཚེ་རིང་གིས་ཉེ་བའི་ལོ་ཤས་རིང་། སུའུ་ཀྲོའུ་ཡི་བོད་སྐྱོར་ལས་བྱེད་པ་ཁག་བརྒྱད་པའི་སེམས་ཁུར་དང་རོགས་རམ་འོག་བྱང་ཁ་ཤང་གིས་སྔ་རྗེས་སུ་བོད་སྐྱོར་མ་དངུལ་ཁྲི་3000དང་ལེན་གྱིས་གྲོང་ཚོའི་རྣམ་པ་མཛེས་བཟོའི་རྣམ་གྲངས་དང་། བྱང་ཁ་ཤང་གི་འཕྲོད་བསྟེན་ཁང་ཚད་གཞི་ཅན་གྱི་འཛུགས་སྐྲུན་རྣམ་གྲངས། ལྷུན་གྲུབ་ཞིང་རའི་ཤུལ་རྙིང་སྲུང་སྐྱོང་རང་བཞིན་གྱི་གསར་སྤེལ་རྣམ་གྲངས་བཅས་ལག་ལེན་བསྟར་ཡོད། མིག་སྔར་བྱང་ཁ་གྲོང་ཚོའི་ལམ་ཨ་མ་ཡོངས་ལ་ཨར་འདམ་བཏིང་བ་དང་། རྒྱ་ཆེ་རུ་དང་སྔོ་ལྗང་ཅན་དུ་བཏང་བ་མ་ཟད། ལུས་སྦྱོང་བྱ་ཡུལ་དང་། རིག་གནས་ཐང་ཆེན། གྲལ་སྟར་འགྲིག་པའི་ཚོང་ལས་ཁང་པ་བཅས་གང་དགོས་ཅི་འཛོམས་བསྐྲུན་ཡོད། བྱང་ཁ་གྲོང་ཚོར་གནས་པའི་ལྷུན་གྲུབ་ཞིང་རའི་ཤུལ་རྙིང་སྒྱུར་བཀོད་བྱས་པ་བརྒྱུད་རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞི་དང་། ཏང་ཡོན་གྱི་ཏང་གཤིས་སློབ་གསོའི་རྟེན་གཞི། མི་རིགས་མཐུན་སྒྲིལ་གྱི་སློབ་གསོའི་རྟེན་གཞི། གསར་བརྗེའི་རིག་གནས་ཡུལ་སྐོར་རྟེན་གཞི་བཅས་གཞི་གཅིག་ཅན་གྱི་དམིགས་བསལ་ཁྱད་ཆོས་ལྡན་པའི་སློབ་གསོ་དང་ཡུལ་སྐོར་ཐོན་ལས་ཤིག་ཏུ་གྱུར་ནས་ཡུལ་དེ་གའི་མང་ཚོགས་20ལྷག་ཙམ་གྱི་ལས་ཞུཌ་ཀྱི་གནད་དོན་ཐད་ཀར་ཐག་གཅོད་ཐུབ་ཡོད།