བསོད་ནམས་སྟོབས་རྒྱལ་ནི་གཞིས་རྩེ་གྲོང་ཁྱེར་ངམ་རིང་རྫོང་བསྟར་བརྒྱུད་ཤང་ལྷུན་སྡིང་གྲོང་ཚོའི་ཏང་ཀྲི་པུའི་ཧྲུའུ་ཅི་ཡིན། ཁོང་ལ་ཆ་རྒྱུས་ཡོད་མཁན་ཚོས་ཤེས་གསལ་ལྟར། གྲོང་ཚོའི་ཏང་ཀྲི་པུའི་ཧྲུའུ་ཅིའི་ལས་འགན་འཁུར་ནས་ལོ་24སོང་བའི་བསོད་ནམས་སྟོབས་རྒྱལ་གྱི་སེམས་སུ་ནམ་ཡང་འདོར་དུ་མི་རུང་བའི་དོན་ཆེན་ཞིག་ཡོད་པ་དེ་ནི་གྲོང་ཚོའི་མི་རིགས་མཐུན་སྒྲིལ་གྱི་ལས་དོན་ལ་དམ་འཛིན་ལྷོད་མེད་བྱ་རྒྱུ་དེ་ཡིན་པ་རེད།
མི་རིགས་མཐུན་སྒྲིལ་ནི་མི་རིགས་ཁག་གི་མི་དམངས་ཀྱི་སྲོག་རྩ་ཡིན།
“གཉིས་ལྡན་དུད་སྦྲེལ”དང“བཟང་པོ་ལྔའི་ཁྱིམ་ཚང”སོགས་མང་ཚོགས་རང་བཞིན་གྱི་དཔྱད་བསྡུར་བྱེད་སྒོ་གོ་སྐབས་སུ་བརྩིས་ནས་ཁོང་གིས་མི་རིགས་མཐུན་སྒྲིལ་གྱི་ལས་དོན་ཧུར་ཐག་སྤེལ་ཞིང་། གྲོང་ཚོའི་ལས་བྱེད་པས་ཚོགས་ཆུང་འགན་གཙང་ལེན་པ་དང་ཚོགས་ཆུང་གིས་དུད་ཚང་འགན་གཙང་ལེན་པའི་བྱེད་ཐབས་སྤྱད་དེ། གྲོང་ཚོའི“ཨུ་ལྷན་གཉིས”ཚན་ཁག་སྲོག་ཤིང་དུ་བྱས་པ་དང་གྲོང་ཚོའི“གཉིས་ལྡན་དུད་སྦྲེལ”སྤྱི་མི་རྨང་གཞིར་བྱས་ནས་གནད་དོན་ཐག་གཅོད་མཐར་ཕྱིན་པ་བྱེད་པ་དང་། སྤྱི་ཚོགས་ཀྱི་གནས་ཚུལ་དང་མི་དམངས་ཀྱི་བསམ་འདུན་གོང་རིམ་ལ་ཞུ་བའི་སྤྱི་ཚོགས་ཞབས་ཞུའི་དོ་དམ་མ་ལག་ཅིག་ཆགས་ཡོད་པ་རེད།
ཁོང་གིས་སྣེ་ཁྲིད་དེ་མི་རིགས་སྲིད་ཇུས་སློབ་སྦྱོང་བྱས་ཤིང་། མི་སྒེར་གྱི་བློ་སྦྱོང་ལ་ཤུགས་སྣོན་བརྒྱབ་སྟེ་སྔོན་ལ་རང་གིས་རྟོགས་པ་དང་ཕྱིས་སུ་གཞན་གྱིས་རྟོགས་རྒྱུའི་འགན་ལེན་བྱས་པ་དང་། མི་རིགས་མཐུན་སྒྲིལ་གྱི་སློབ་གསོར་ཤུགས་སྣོན་བརྒྱབ་སྟེ་ཁོང་གིས་རྒྱུན་མཐུད་རང་བཞིན་གྱི་སློབ་གསོ་དང་གཅིག་སྡུད་སློབ་གསོ་ཟུང་འབྲེལ་བྱ་རྒྱུ་མཐའ་འཁྱོངས་བྱས་ནས་འཕྲེད་འགེལ་སྦྱར་ཡིག་འགེལ་བ་དང་། སྦྱར་ཡིག་སྦྱོར་བ། ནག་པང་ཚགས་པར་གཉེར་བ། དཔེ་མཚོན་གཏོད་པ། རླུང་འཕྲིན་ཉན་པ། རིག་རྩལ་གཉེར་བ། གཏམ་བཤད་སྤེལ་བ་བཅས་ཀྱི་ཐོག་ནས་སློབ་གསོའི་ནང་དོན་ཕུན་སུམ་ཚོགས་སུ་བཏང་སྟེ་ལོ་ལྟར་ནང་དོན་གསར་པ་དང་། ལོ་ལྟར་བྱ་ཐབས་གསར་པ། ལོ་ལྟར་ཕན་འབྲས་གསར་པ་བཅས་བརྩོན་ལེན་བྱས་པ་རེད།
ཏང་ལོ་27གྱི་རིང་ཁོང་གིས་གསར་བརྗེའི་ཐོག་མའི་བསམ་འདུན་ཐོག་མཐའ་བར་གསུམ་དུ་བརྟན་པོར་སྲུང་ཤིང་། “མི་རིགས་མཐུན་སྒྲིལ་གྱི་ལས་དོན་ནི་གྲོང་ཚོའི་དོན་ཆེན་ཞིག་ཡིན་པས། དུས་རྒྱུན་ཏུ་ཕུགས་ལ་ཕན་པའི་དོན་ལ་ཤུགས་རྒྱག་པ་དང་ཞིབ་ཕྲར་དམ་འཛིན། དམ་འཛིན་ཏན་ཏིག་བཅས་བྱས་ཚེ། ང་ཚོས་གཞི་ནས་གྲོང་ཚོའི་འཕེལ་རྒྱས་དང་ཡར་ཐོན་གྱི་རྨང་གཞི་བརྟན་དུ་གཏོང་ཐུབ”ཅེས་བསོད་ནམས་སྟོབས་རྒྱལ་གྱིས་བཤད།