ཚེས་17ཉིན་གྱི་སྔ་དྲོར། བོད་རང་སྐྱོང་ལྗོངས་ལྷ་ས་གྲོང་ཁྱེར་མི་དམངས་སྨན་ཁང་དུ་ཁ་ཉིན་པུས་ཚིགས་བརྗེ་བའི་གཤགས་བཅོས་བྱས་མ་ཐག་པའི་དགའ་མཚོས“ང་རྒྱུན་གཏན་ལྟར་གོམ་པ་སྤོ་ཐུབ་ཀྱི་རེད་བསམ་པ་གཏན་ནས་མ་བྱུང་། ཏང་དང་སྲིད་གཞུང་དང་སྨན་པར་ཐུགས་རྗེ་ཆེ་ཞུ་རྒྱུ་ཡིན”ཞེས་པེ་ཅིང་བོད་སྐྱོར་སྨན་བཅོས་རིགས་གཅིག་མཁས་ཅན་གྱི་ལག་ནས་འཇུས་ཏེ་དགའ་ཚོར་ཆེན་པོས་བཤད།

ལོ་48ལ་སླེབས་པའི་དགའ་མཚོ་ནི་བོད་རང་སྐྱོང་ལྗོངས་འདམ་གཞུང་རྫོང་གི་འབྲོག་པ་ཡིན་པ་དང་དུས་ཡུན་རིང་པོར་ས་བབ་མཐོ་ཚད་སྨི་4200ཡི་ས་མཐོའི་རྩྭ་ཐང་དུ་སྡོད་ཀྱི་ཡོད། ལོ་20ཡི་གོང་དགའ་མཚོ་དང་བཟའ་ཟླ་ཁ་བྲལ་བས་རང་ཉིད་གཅིག་པུས་བུ་གཉིས་དང་རྒན་རྒོན་གསོ་དགོས་ཀྱི་ཡོད། ཁྱིམ་གྱི་བཟའ་མི་བུ་ཕྲུག་ཚང་མའི་འཚོ་བར་འགན་འཁུར་དགོས་ལ། ཁྱིམ་གྱི་ནོར་ལུག་ཡང་འཚོ་དགོས་པ་མ་ཟད། ད་དུང་རྒྱུན་དུ་གླ་པ་བརྒྱུགས་ནས་ཁྱིམ་གྱི་འཚོ་བའི་ཁ་གསབ་ཀྱང་འཚོལ་དགོས་ཀྱི་ཡོད། དཀའ་ལས་ཁ་དྲགས་པ་དང་དུས་ཡུན་རིང་པོ་ས་མཐོའི་གྲང་ངར་ཆེ་བའི་ཁོར་ཡུག་ཏུ་འཚོ་བ་བསྐྱལ་བའི་རྐྱེན་གྱིས་དགའ་མཚོ་ལོ་30ལའང་མ་སླེབས་གོང་པུས་ཚིགས་ཀྱི་ནད་ཕོག་ཡོད། ལོ་ཆེ་རུ་ཕྱིན་པ་དང་ཆབས་ཅིག་དགའ་མཚོའི་རྐང་པ་གཡས་པའི་པུས་ཚིགས་ཀྱི་ནད་ལྕི་རུ་ཕྱིན་ཏེ་འགྲོ་སྐྱོད་མ་ཐུབ་པར་གྱུར།

འདི་ལོའི་ཟླ་7པར་པེ་ཅིང་གྲོང་ཁྱེར་འཕྲོད་བསྟེན་འཆར་བཙའ་ཨུ་ལྷན་དང་སྨན་ཁང་དོ་དམ་ཅུས་ཀྱིས་ལྷ་ས་གྲོང་ཁྱེར་མི་དམངས་སྲིད་གཞུང་དང《བདེ་ཐང་གནད་སྨིན་དབུལ་སྐྱོར་གྱི་འཐབ་ཇུས་མཉམ་ལས་སྒྲོམ་གཞིའི་གྲོས་མཐུན》ལ་མིང་རྟགས་བཀོད་པ་རེད། དེ་རྗེས་པེ་ཅིང་གྲོང་ཁྱེར་སྨན་ཁང་དོ་དམ་ཅུས་དང་། པེ་ཅིང་བོད་སྐྱོར་བཀོད་འདོམས་པུའུ། ལྷ་ས་གྲོང་ཁྱེར་འཕྲོད་བསྟེན་འཆར་བཙའ་ཨུ་ལྷན་བཅས་ཀྱིས་རིགས་གཅིག་མཁས་ཅན་སྒྲིག་འཛུགས་བྱས་ཏེ་ལྷ་སར་བདེ་ཐང་གནད་སྨིན་དབུལ་སྐྱོར་ཁག་དང་པོ་ལྷ་སར“འོད་སྣང་བྱ་སྤྱོད”དང“པུས་གཅེས་བྱ་སྤྱོད”སོགས་ས་མཐོའི་རང་བཞིན་གྱི་ནད་རིགས་འདེམས་སྒྲུག་དང་། གཤགས་བཅོས། འོས་འགན་སྨན་བཅོས་བྱེད་སྒོ་སྤེལ་ནས་སྐྱ་འགྲིབ་དང་པུས་ཚིགས་ནད་ཕོག་མཁན་ཁྱོན་མི་758འདེམས་སྒྲུག་བྱས་པར་མིག་ནད་ཕོག་མཁན་371དང་པུས་ཚིགས་ནད་ཕོག་མཁན་387ཡོད་པ་དང་མི་500ལྷག་ཙམ་ལ་འོས་འགན་སྨན་བཅོས་བྱས་པ་རེད། རིགས་གཅིག་མཁས་ཅན་གྱིས་ལྷ་ས་གྲོང་ཁྱེར་མི་དམངས་སྨན་ཁང་དུ་གཤགས་བཅོས་བྱེད་པར་འཚམ་པའི་ཡིག་ཚགས་དང་གཱ་བཟོས་པའི་དུད་ཚང་དང་མ་མཐའི་འཚོ་བ་འགན་ལེན་དུད་ཚང་གི་ནད་པ་13ལ་སྐྱ་འགྲིབ་གཤགས་བཅོས་བྱས་པ་རེད། དེ་དང་ཆབས་ཅིག་གཤགས་བཅོས་ཀྱི་ཆ་རྐྱེན་དང་འཚམ་པའི་ནད་པ་ཁག་དབྱེ་ནས་པུས་ཚིགས་བརྗེ་བའི་གཤགས་བཅོས་བྱེད་ཀྱི་ཡོད།

ལྷ་ས་གྲོང་ཁྱེར་མི་དམངས་སྨན་ཁང་གི་ཡོའན་ཀྲང་པེ་ཅིང་གི“ཚོགས་སྒྲིག་རྣམ་པའི”བོད་སྐྱོར་སྨན་བཅོས་རུ་ཁག་གི་རུ་དཔོན་ཏིང་མིང་ཀྲུའོ་ཡིས་ད་ཐེངས་པུས་ཚིགས་ཀྱི་ནད་ཕོག་པའི་ཡིག་ཚགས་དང་གཱ་བཟོས་པའི་དུད་ཚང་དབུལ་པོའི་ནད་པ་50ལྷག་ཙམ་བདམས་ནས་སྨན་ཁང་གིས་ཁོ་ཚོར་འབྲེལ་ཡོད་ཀྱི་ཡིག་ཚགས་དཔྱད་གཞི་བཟོས་ཡོད། བདེ་ཐང་དབུལ་སྐྱོར་ལས་དོན་གྱི་འཆར་གཞི་གཞིར་བཟུང་པེ་ཅིང་བོད་སྐྱོར་བཀོད་འདོམས་པུས་མ་དངུལ་བཏང་ནས་ཡིག་ཚགས་དང་གཱ་བཟོས་པའི་དུད་ཚང་དབུལ་པོའི་གཤགས་བཅོས་བྱེད་པར་འཚམ་པའི་ནད་པར་རིན་མེད་ངང་སྨན་བཅོས་བྱ་རྒྱུ་རེད་ཅེས་བཤད།