ཚེས་20ཉིན་ནས་ཚེས་23ཉིན་བར་ཅི་ལིན་ཞིང་ཨུད་ཀྱི་རྒྱུན་ཨུ་རྒྱུན་ལས་ཧྲེང་ཀྲང་གཞོན་པ་ཝུའུ་ཅིང་ཕིང་གིས་སྣེ་ཁྲིད་གནང་བའི་ཅི་ལིན་ཞིང་ཆེན་ཏང་སྲིད་འཐུས་མི་ཚོགས་པ་བོད་དུ་ཕེབས་ནས་བརྟག་ཞིབ་གནང་བ་དང་འབྲེལ་རང་སྐྱོང་ལྗོངས་ཀྱི་འགོ་ཁྲིད་དང་བཞུགས་མོལ་གནང་ནས་ཁ་གཏད་བོད་སྐྱོར་གྱི་ཇུས་ཆེན་ལ་མཉམ་དུ་གྲོས་བསྡུར་གནང་བ་རེད།
ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ལྗོངས་སྲིད་གྲོས་ཏང་ཙུའུ་ཡི་ཧྲུའུ་ཅི་ཏིང་ཡེ་ཤན་དང་། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཀྲོང་ཡན། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཀྲང་ཡན་ཆིང་བཅས་སོ་སོ་བཞུགས་མོལ་ཚོགས་འདུར་ཕེབས་པ་དང་འབྲེལ་བརྟག་ཞིབ་གནང་སྐབས་ལྷན་དུ་ཕེབས་ཡོད་པ་རེད།
བཞུགས་མོལ་ཚོགས་འདུའི་ཐོག་ཝུའུ་ཅིང་ཕིང་གིས་ཅི་ལིན་ཞིང་ཆེན་གྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཐའ་སྐྱོང་བོད་བརྟན་གྱི་འཐབ་ཇུས་དགོངས་པ་གལ་ཆེན་དང་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པའི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ་ཅི་ལིན་གྱི་ཁྱད་ལྡན་བོད་སྐྱོར་ལས་དོན་བྱེད་ཐབས་རྒྱུན་ཆད་མེད་པར་རྒྱ་ཆེར་གཏོང་བ།
གནད་སྨིན་བོད་སྐྱོར་ལ་དམིགས་ནས་བོད་སྐྱོར་ལས་དོན་གྱི་རིམ་པ་དང་ཆུ་ཚད་མཐོ་རུ་གཏོང་བར་ཤུགས་སྣོན་དང་། དམངས་འཚོའི་བོད་སྐྱོར་ལ་དམིགས་ནས་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ལེན་པའི་ཞན་ཆ་གསབ་པར་ཤུགས་སྣོན། ཐོན་ལས་བོད་སྐྱོར་ལ་དམིགས་ནས་ཚོང་འགུགས་མ་འདྲེན་དང་རྣམ་གྲངས་འཛུགས་སྐྲུན་གྱི་སྟེགས་བུ་སྐྲུན་པར་ཤུགས་སྣོན། རིག་གནས་ཡུལ་སྐོར་གྱི་བོད་སྐྱོར་ལ་དམིགས་ནས་ས་གནས་གཉིས་ཀྱི་མཉམ་ལས་ཟབ་ཏུ་གཏོང་བར་ཤུགས་སྣོན། རིག་སྟོབས་བོད་སྐྱོར་ལ་དམིགས་ནས་ཕྱོགས་གཉིས་མཉམ་འགུལ་སྤེལ་རེས་ཟབ་ཏུ་གཏོང་བར་ཤུགས་སྣོན། བརྩེ་སེམས་བོད་སྐྱོར་ལ་དམིགས་ནས་མི་རིགས་མཐུན་སྒྲིལ་མཉམ་འདྲེས་ལ་སྐུལ་འདེད་གཏོང་བར་ཤུགས་སྣོན་བཅས་བརྒྱབ་ཡོད། ཅི་ལིན་ཞིང་ཆེན་གྱིས་སླད་ཕྱིན་ཁ་གཏད་བོད་སྐྱོར་ལས་དོན་ཆབ་སྲིད་ཀྱི་ལས་འགན་གལ་ཆེན་དུ་བརྩིས་ནས་ཚད་མཐོའི་ཆབ་སྲིད་ཀྱི་རང་རྟོགས་དང་། དེ་བས་ཟབ་པའི་མི་རིགས་ཀྱི་བརྩེ་སེམས། བློ་རྩ་བརྟན་པའི་འགན་འཁྲི་འཁུར་སེམས་བཅས་མཐའ་འཁྱོངས་བྱས་ཏེ་སྤུས་ཚད་མཐོ་པོའི་སྒོ་ནས་དུས་རབས་གསར་པའི་ཁ་གཏད་བོད་སྐྱོར་ལས་དོན་ཡག་པོ་བསྒྲུབས་ནས་ཏང་ཀྲུང་དབྱང་དང་ཞིང་ཆེན་དང་རང་སྐྱོང་ལྗོངས་གཉིས་ཀྱི་མི་དམངས་ལ་བློ་ཡིད་ཚིམ་པའི་རྒྱུགས་ལན་འབུལ་རྒྱུ་ཡིན་ཞེས་གསུངས།
ཏིང་ཡེ་ཤན་གྱིས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་དེ་བཞིན་ལྗོངས་ཡོངས་ཀྱི་མི་རིགས་ཁག་གི་མི་དམངས་བཅས་ཀྱི་ཚབ་ཞུས་ནས་འཐུས་མི་ཚོགས་པ་དང་བཅས་པ་བོད་དུ་ཕེབས་པར་དགའ་བསུ་ཞུས་པ་དང་ཅི་ལིན་ཞིང་ཆེན་གྱིས་དུས་ཡུན་རིང་པོའི་ནང་བོད་ཀྱི་ལས་དོན་ལ་ཐུགས་ཁུར་དང་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་ཤིང་། ཁོང་གིས་ཅི་ལིན་ཞིང་ཆེན་གྱིས་སྔ་བར་ཕྱི་གསུམ་དུ་བོད་ཀྱི་འཕེལ་རྒྱས་དང་ལྷག་པར་དུ་ཞིང་འབྲོག་ལས་དང་། སྨན་རྫས། དྭངས་གཙང་ནུས་རྒྱུ། ཡུལ་སྐོར་སོགས་ཁྱད་ལྡན་ཐོན་ལས་ཀྱི་མཉམ་ལས་ལ་ཤུགས་སྣོན་རྒྱག་པར་ཐུགས་ཁུར་དང་རྒྱབ་སྐྱོར་བྱས་ཏེ་ཐུན་མོང་འཕེལ་རྒྱས་ལ་སྐུལ་འདེད་གཏོང་རྒྱུའི་རེ་བ་ཡོད། ང་ཚོས“འདུ་ཤེས་བཞི”བརྟན་པོ་བཅངས་ནས་བོད་ཀྱི་ལས་དོན་སྐོར་གྱི་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་ཐབས་ཇུས་བཀོད་སྒྲིག་རབ་དང་རིམ་པ་མཐའ་གཅིག་ཏུ་ལག་བསྟར་བྱས་ཏེ་ཀྲུང་དབྱང་གི་ཐུགས་ཁུར་དང་རྒྱལ་ཡོངས་ཀྱི་རྒྱབ་སྐྱོར། རང་སྟོབས་རང་སྤེལ་དང་དཀའ་སྤྱད་འབད་འཐབ་དབར་གྱི་འབྲེལ་བ་ཐག་གཅོད་ཡང་དག་བྱས་ཏེ་གོ་སྐབས་དམ་འཛིན་དང་རང་འགུལ་སྦྲེལ་མཐུད་ཀྱིས་རོགས་སྐྱོར་གྱི་མ་དངུལ་ཡག་པོ་སྤྱོད་པ་དང་རྣམ་གྲངས་དོན་འཁྱོལ་ཡག་པོ་བྱ་རྒྱུ་ཡིན་ཞེས་གསུངས།
ཀྲོང་ཡན་གྱིས་གཞིས་རྩེ་གྲོང་ཨུད་དང་གྲོང་ཁྱེར་སྲིད་གཞུང་གིས་ཁ་གཏད་རོགས་སྐྱོར་གྱི་ལས་ཀའི་ཉམས་མྱོང་ཕྱོགས་སྡོམ་ནན་ཏན་བྱས་ཏེ་རྨང་གཞི་འདིང་བ་དང་། ཕུགས་ལ་ཕན་པ། དམངས་འཚོར་ཕན་པ་བཅས་ཀྱི་ལས་དོན་ལ་ཤུགས་སྣོན་བརྒྱབ་ནས་བོད་སྐྱོར་མ་དངུལ་སྐར་ལི་གཅིག་ལའང་དེ་བས་གཅེས་སྤྲས་བྱས་ཏེ་འཛུགས་སྐྲུན་རྣམ་གྲངས་འཛུགས་སྐྲུན་ཡག་པོ་དང་། དོ་དམ་ཡག་པོ། བེད་སྤྱོད་ཡག་པོ་བཅས་བྱེད་པ་དང་འབྲེལ། གཞིས་རྩེ་གྲོང་ཁྱེར་གྱི་མི་རིགས་ཁག་གི་ལས་བྱེད་མང་ཚོགས་ཀྱི་ཧུར་སེམས་དང་། རང་འགུལ། གསར་གཏོད་བཅས་སྐོང་འཐེན་གང་ལེགས་ཀྱིས་དུས་ཀྱིས་མི་མི་སྒུག་པ་དང་དུས་ཚོད་སྐར་ཆ་ཙམ་ཡང་བརྩོན་ལེན་བྱེད་པའི་སྙིང་སྟོབས་ལ་བརྟེན་ནས་གཞིས་རྩེའི་བྱ་གཞག་ཁག་ལ་གྲུབ་འབྲས་གསར་པ་ཐོབ་རྒྱུར་སྐུལ་འདེད་གཏོང་བ་དང་། གཞིས་རྩེའི་མི་རིགས་ཁག་གི་མི་དམངས་མང་ཚོགས་ལ་བདེ་སྐྱིད་སྐྲུན་དགོས་པའི་བླང་བྱ་བཏོན་གནང་བ་རེད།
ཝུའུ་ཅིང་ཕིང་གིས་ད་དུང་ཅི་ལིན་ཞིང་ཨུད་དང་ཞིང་ཆེན་སྲིད་གཞུང་གི་ཚབ་ཞུས་ཏེ་ཁག་སོ་སོར་བོད་རང་སྐྱོང་ལྗོངས་དང་གཞིས་རྩེ་གྲོང་ཁྱེར་གྱི་མཉམ་ལས་གྲོས་མཐུན་ལ་མིང་རྟགས་བཀོད་པ་དང་འབྲེལ་སྲུང་སྐར་གྱི་འདྲ་དཔེ་དང་། དཔེ་དེབ། སྨན་སྒམ་སོགས་དངོས་ཟོག་ཕུལ་བ་རེད།