ལོ་24ཡི་རིང་། ཁག་དང་ཁག་བྱས་པའི་བོད་སྐྱོར་ལས་དོན་པས་ཏང་ཀྲུང་དབྱང་གི་མངགས་བཅོལ་ཟབ་མོ་དང་རྒྱལ་ཡོངས་མི་དམངས་ཀྱི་བརྩེ་བ་ཟབ་མོ་བློ་ལ་བཅངས་ནས་ཁྱིམ་ཆུང་དོར་ནས་ཁྱིམ་ཆེན་བསྐྱངས་ཏེ་ས་བབ་མཐོ་ཞིང་གྲང་ངར་ཆེ་ལ་གསོ་རླུང་དཀོན་པ་དང་ཁོར་ཡུག་དཀའ་ཚེགས་ཆེ་བའི་གངས་ལྗོངས་ས་མཐོར“ཕུགས་བསམ་བཅངས་ནས་ཡོང་། བྱས་རྗེས་བཞག་སྟེ་ལོག་པའི”དད་སེམས་བརྟན་པོ་བརྟན་སྲུང་བྱེད་པ་དང“བོད་སྐྱོད་པ་རྒན་གྲས་ཀྱི་སྙིང་སྟོངས”རྒྱུན་འཛིན་དང་དར་སྤེལ་བཏང་སྟེ། བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཆེད་འཛད་མཐའ་མེད་པའི་སྒུལ་ཤུགས་མཁོ་འདོན་བྱས་པར་འོད་སྟོང་འབར་བའི་གྲུབ་འབྲས་ཐོབ་ཡོད།
དུས་སྐབས་གསར་པའི་བོད་སྐྱོར་ཤེས་ལྡན་པར་འཕེལ་རྒྱས་ལ་སྐུལ་འདེད་གཏོང་བ་དང་ཐུན་མོང་ཐོག་མཐུན་སྒྲིལ་འབད་འཐབ་བྱེད་པ་སོགས་ལ་འཇོན་ཐང་མངོན་གསལ་དོད་པོ་ཡོད་པ་མ་ཟད། སྤྱི་ཚོགས་འཕེལ་རྒྱས་ཀྱི་དུས་བབ་དང་ཟུང་འབྲེལ་གྱིས་བོད་སྐྱོར་ལས་དོན་གྱི་བསམ་ཕྱོགས་གསར་པ་དང་དར་སྲོལ་གསར་པ་རྒྱུན་ཆད་མེད་པར་བཏོན་ཡོད་པ་རེད།
དང་ཐོག“གཞན་བརྟེན”དང“རང་བརྟེན”གལ་ཆེ་མཉམ་དུ་འཛིན་རྒྱུ་མཐའ་འཁྱོངས་བྱེད་པའི་ཐད་ནས་མངོན་ཞིང་། མ་དངུལ་དང་རྣམ་གྲངས་སོགས་གཏོང་བའི“གཞན་བརྟེན”རོགས་སྐྱོར་བྱེད་སྟངས་ཧུར་ཐག་སྤྱད་དེ་ཁ་ཚ་དགོས་གཏུགས་ཀྱི་དམངས་འཚོའི་གནད་དོན་དངོས་ནུས་ཤུགས་ཡོད་རྒུས་ཐག་གཅོད་བྱས་པ་དང་ཆབས་ཅིག བོད་རིགས་ས་ཁུལ་གྱི་ཁྱད་ལྡན་ལེགས་ལྡན་ཐོན་ཁུངས་སྔོག་འདོན་ཤུགས་ཆེན་བྱེད་པ་དང་། ཁྱད་ལྡན་ཐོན་ལས་གླིང་གསར་སྤེལ་ཧུར་ཐག་བྱེད་པ། ས་གནས་དེ་གའི་དོ་དམ་དང་ལག་རྩལ་ཤེས་ལྡན་པ་གསོ་སྐྱོང་བྱེད་པ། “རང་བརྟེན”རྣམ་པའི་རོགས་སྐྱོར་ལག་བསྟར་བྱེད་པ་བཅས་ཀྱི་ཐོག་ནས་བོད་རིགས་ས་ཁུལ་གྱི་ནང་གནས་འཕེལ་རྒྱས་གཏོང་ནུས་ཆེ་རུ་ཤུགས་ཆེན་བཏང་ཡོད།
དེ་རྗེས“སློབ་གསོའི་བོད་སྐྱོར”གྱི་འདུ་ཤེས་གསར་པ་ནང་འདྲེན་བྱེད་པར“ནང་དུ་གདན་འདྲེན་པའི”ལས་དོན་སྤེལ་དགོས་ལ“ཕྱིར་སྐྱོད་པའི”ལས་དོན་ཡང་སྤེལ་དགོས། སྔོན་ཆད་བོད་སྐྱོར་ཤེས་ལྡན་པས་བོད་ལྗོངས་ས་ཁུལ་གྱི་འཕེལ་རྒྱས་ལ་རིག་སྟོབས་ཀྱི་རྒྱབ་སྐྱོར་རྒྱུན་ཆད་མེད་པར་བྱེད་པ་དང་། ད་ཆ་བོད་རིགས་ས་ཁུལ་གྱི་ཕུལ་བྱུང་གཞུང་ཞབས་པ་དང་། དགེ་རྒན། ལག་རྩལ་ཤེས་ལྡན་པ་སོགས་ནང་སར་བསྐྱོད་དེ་སྔོན་ཐོན་གྱི་ཤེས་བྱ་དང་ལག་རྩལ་སློབ་སྦྱོང་བྱས་ནས་སོ་སོའི་ཆུ་ཚད་མཐོ་རུ་བཏང་སྟེ་ལས་གནས་སུ་ལོག་རྗེས་བོད་ཀྱི་སྤྱི་ཚོགས་འཕེལ་རྒྱས་ཀྱི་སྟོབས་ཤུགས་གསར་པ་ཞིག་ལ་གྱུར་དང་འགྱུར་མུས་ཡིན།
བོད་སྐྱོར་གྱི་བསམ་བློ་གསར་པ་དེ་ད་དུང་འདུ་ཤེས་གསར་གཏོད་ཐད་ནས་མངོན་ཞིང་། སྤྱི་ཚོགས་བྱ་འཕུར་བ་ལྟར་འཕེལ་རྒྱས་འགྲོ་བའི་རྒྱབ་ལྗོངས་ཆེན་པོའི་འོག་དུས་རབས་ཀྱི་རླབས་རྒྱུན་གྱི་རྗེས་སུ་བསྙེགས་ཏེ་དུས་བསྟུན་མདུན་སྐྱོད་བྱས་ན་གཞི་ནས་སྤྱི་ཚོགས་ཀྱི་དཔལ་འབྱོར་དང་། ཆབ་སྲིད། མི་རིགས་མཐུན་སྒྲིལ་བཅས་ཕྱོགས་ཁག་གི་འཕེལ་རྒྱས་དང་བརྟན་ལྷིང་རྒྱུན་འཁྱོངས་ཐུབ་ཡོད།
བོད་སྐྱོར་ལས་དོན་ནི་དུས་ཡུན་རིང་ལ་དཀའ་ཚེགས་ཆེ་བའི་ལས་འགན་ཞིག་རེད། འབྱུང་འགྱུར་བོད་སྐྱོར་བ་མི་རབས་མང་པོས་ས་གནས་དེ་གའི་མི་དམངས་དང་བདེ་སྡུག་མཉམ་མྱོང་དང་གཅིག་སེམས་གཅིག་སྦྲེལ་གྱིས་འབད་བརྩོན་ལྷོད་མེད་བྱས་ནས་བོད་སྐྱོར་ལས་ཀའི་རྣམ་པ་གསར་པ་ཞིག་གཏོད་དགོས་པ་དང་བོད་འཕེལ་རྒྱས་མྱུར་པོ་དང་ཡུན་རིང་བདེ་འཁོད་ཆེད་ལེགས་སྐྱེས་གསར་པ་འབུལ་རྒྱུར་སྐུལ་འདེད་བཏང་ནས་གངས་ལྗོངས་ས་མཐོར་དེ་བས་འོད་སྟོང་འཕྲོ་བའི་ལེའུ་གསར་པ་ཞིག་རྩོམ་དགོས།