གྲོང་ཚོ་རིམ་པའི་སྨན་བཅོས་འཕྲོད་བསྟེན་ཞབས་ཞུའི་ལས་དོན་ཕྱོགས་ཡོངས་ནས་ཡག་པོ་བསྒྲུབས་ཏེ་དམངས་ཕན་སྲིད་ཇུས་དོན་ཐོག་ཏུ་འཁྱོལ་བ་དང་གྲོང་མིའི་བདེ་ཐང་འཚོ་བའི་ཆུ་ཚད་སྔར་བས་མཐོ་རུ་གཏོང་ཆེད། ཉེ་ཆར། འདམ་གཞུང་རྫོང་ཡངས་པ་ཅན་གྲོང་རྡལ་ཚྭ་ཆུ་ཐང་གྲོང་ཚོར་བཅའ་སྡོད་ལྷ་ས་གྲོང་ཁྱེར་མི་དམངས་སྨན་ཁང་གི་ལས་དོན་རུ་ཁག་གི་མཐུན་སྦྱོར་ཧུར་ཐག་འོག་པེ་ཅིང་གི་ཚོགས་སྒྲིག་རྣམ་པའི་བོད་སྐྱོར་སྨན་བཅོས་རུ་ཁག་གིས་ཚྭ་ཆུ་ཐང་གྲོང་ཚོར་འོས་འགན་སྨན་བཅོས་དང་བློ་འདྲིའི་བྱེད་སྒོ་སྤེལ་བ་རེད།
བྱེད་སྒོ་སྤེལ་རིང་། སྨན་བཅོས་རུ་མིས་ངང་རྒྱུད་རིང་པོས་ཚང་མར་བདེ་ཐང་སྐོར་གྱི་དྲི་བ་སྣ་ཚོགས་ལ་ལན་བརྒྱབ་པ་དང་། མང་ཚོགས་ལ་རྩ་བརྟག་པ་དང་ཁྲག་ཤེད་བལྟས་པ་མ་ཟད་ཁྲག་ཤེད་མཐོ་བའི་མི་སྣར་བདེ་ཐང་གི་མཛུབ་ཁྲིད་ཞིབ་ཕྲ་བྱས་པས་མང་ཚོགས་ཀྱི་དགའ་བསུ་ཆེན་པོ་ཐོབ་ཡོད། འདམ་གཞུང་རྫོང་ཡངས་པ་ཅན་གྲོང་རྡལ་ཚྭ་ཆུ་ཐང་གྲོང་ཚོར་བཅའ་སྡོད་ལྷ་ས་གྲོང་ཁྱེར་མི་དམངས་སྨན་ཁང་གི་ལས་དོན་རུ་མི་དང“ཨུ་ལྷན་གཉིས”ཚན་ཁག་གི་ཁོངས་མིས་ད་ཐེངས་ཀྱི་བྱེད་སྒོར་ཧུར་ཐག་ཞུགས་ནས་གྲོང་མིར་སྨན་བཅོས་ཀྱི་རྒྱུན་ཤེས་དྲིལ་བསྒྲགས་དང་སྨན་རྫས་སྤྲོད་རོགས་སོགས་བྱས་པ་རེད།
གཞན་ཡང་ལྷ་ས་གྲོང་ཁྱེར་མི་དམངས་སྨན་ཁང་གི་འབྲེལ་ཡོད་འགན་འཁུར་བས་གྲོང་སྡོད་ལས་དོན་རུ་ཁག་གི་རུ་མིའི་བསྐྱོད་རོགས་འོག་མང་ཚོགས་དབུལ་པོའི་དུད་ཚང་གཉིས་ལ་བལྟས་པ་དང་ཁོང་ཚོའི་ནད་གཞི་དྲག་སྐྱེད་དང་སྨན་བཅོས་འགྲོ་སོང་རྩིས་ཞུ་སོགས་ཀྱི་གནས་ཚུལ་སྐད་ཆ་དྲིས་རྗེས་ཁོང་ཚོར་སྤྲོ་སྣང་དོད་པོས་འཚོ་བ་སྐྱེལ་དགོས་པའི་ལྕག་སྐུལ་བཏང་བ་མ་ཟད། འཚམས་འདྲིའི་དངུལ་ཡང་སྤྲད་པ་རེད།