མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་གྲོང་ཁྱེར་གཏོད་པའི་ལས་དོན་སྤེལ་ཚུན། ཆབ་མདོ་གྲོང་ཁྱེར་གྱིས་མི་རིགས་མཐུན་སྒྲིལ་ཡར་ཐོན་བྱེད་སྒོ་ལས་ཁུངས་དང་། སློབ་གྲྭ ཤང་གྲོང་། དགོན་སྡེ་སོགས་སུ“སྤེལ་བ་དགུའི”བྱེད་སྒོར་བརྟེན་ནས་དྲིལ་བསྒྲགས་ཡིག་ཆ་སྤྲོད་པ་དང་། གཅིག་སྡུད་ཐོག་སྒྲོག་འགྲེལ་བྱེད་པ། ངོ་ཐུག་གདོང་འཕྲད་ངང་སྒྲོག་འགྲེལ་སོགས་ཀྱི་བྱེད་ཐབས་སྤྱད་དེ་མི་རིགས་མཐུན་སྒྲིལ་དྲིལ་བསྒྲགས་ཀྱི“མཐའ་མའི་འགག་གནད”ཤར་གཏོང་ཐུབ་པ་བྱས་ཏེ་གྲོང་ཁྱེར་ཡོངས་ཀྱི་མི་རིགས་ཁག་གི་མི་དམངས་ཀྱིས་མཐུན་སྒྲིལ་ལ་དེ་བས་གཅེས་སྤྲས་དང་། མཐུན་སྒྲིལ་ལ་རང་འགུལ་ངང་སྲུང་སྐྱོང་། མཐུན་སྒྲིལ་ལ་མུ་མཐུད་ཤུགས་སྣོན་བཅས་ལ་ཁྲིད་སྟོན་བྱས་ཡོད།
ཆབ་མདོ་གྲོང་ཁྱེར་མི་རིགས་མཐུན་སྒྲིལ་ཡར་ཐོན་གཏོད་པའི་འགོ་ཁྲིད་ཚོགས་ཆུང་གཞུང་ལས་ཁང་གིས་ཆབ་མདོ་གྲོང་ཁྱེར་ལས་རིགས་ལག་རྩལ་སློབ་གྲྭས་སྤེལ་བའི“རྩལ་ནུས་སྦྱོང་བརྡར་ཆེ་མོ་དང་མཐུན་སྒྲིལ་ལ་བརྟེན་ནས་འཕེལ་རྒྱས་གཏོང་བ”ཞེས་པའི་བརྗོད་དོན་གཙོ་བོའི་བྱེད་སྒོ་གོ་སྐབས་སུ་བྱས་ནས་ཇ་རྟའི་ཐང་ཆེན་དུ་ཆབ་མདོ་གྲོང་ཁྱེར་གྱི་མི་རིགས་མཐུན་སྒྲིལ་ཡར་ཐོན་གྱི་གཏོད་འདེམས་གཞུང་ལས་ཁང་གི་སྐད་འཕྲིན་སྤྱི་རྟགས་ཁྱབ་གདལ་བཏང་བ་དང་། གྲོང་མི་ཚོར་མི་རིགས་མཐུན་སྒྲིལ་གྱི་སྲིད་ཇུས་དང་བཅའ་ཁྲིམས་ཁྲིམས་སྲོལ་སོགས་ཀྱི་ཤེས་བྱའི་དྲིལ་བསྒྲགས་དཔྱད་ཡིག་1000ཙམ་སྤྲད་ནས་མི་རིགས་མཐུན་སྒྲིལ་གྱི་བཅའ་ཁྲིམས་དང་སྲིད་ཇུས་སྐོར་དྲིལ་བསྒྲགས་རྒྱ་ཆེར་བྱས་པ་རེད།
ཆབ་མདོ་གྲོང་ཁྱེར་གྱི་དགོན་སྡེ་དོ་དམ་ཨུ་ལྷན་ཁག་གིས་བྱེད་ཐབས་སྣ་མང་ལ་བརྟེན་ནས་མི་རིགས་མཐུན་སྒྲིལ་ཡར་ཐོན་གྱི་ཤེས་བྱ་དྲིལ་བསྒྲགས་བྱེད་པ་གྲྭ་བཙུན་གྱི་རྒྱུན་གཏན་འཚོ་བ་དང་སྒོམ་སྒྲུབ་ཁྲོད་ཁྱབ་པར་བྱས་པ་སྟེ། བྱམས་པ་གླིང་དགོན་པའི་དགོན་སྡེ་དོ་དམ་ཨུ་ལྷན་གྱིས་དགོན་སྡེ་དོ་དམ་ཨུ་ལྷན་གྱི་ལས་སྒོའི་ཁང་པ་དང་དགོན་པའི་མངོན་གསལ་དོད་སར་བོད་རྒྱ་ཡིག་རིགས་གཉིས་ཀྱི་མི་རིགས་མཐུན་སྒྲིལ་ཡར་ཐོན་གྱི་དྲིལ་བསྒྲགས་ཡི་གེ་སྦྱར་བ་དང་། དཔལ་འབར་རྫོང་དགོན་སྡེ་དོ་དམ་ཨུ་ལྷན་གྱི་ལས་དོན་མི་སྣས་དུས་ཚོད་གཏན་འཁེལ་གྱིས་དགོན་སྡེའི་བླ་མ་སྐྱེས་ཆེན་དམ་པ་དང་དགོན་སྡེའི་གྲྭ་བཙུན་དང་བཞུགས་མོལ་བྱས་ཏེ་ངོ་ཐུག་གདོང་འཕྲད་ངང་མི་རིགས་མཐུན་སྒྲིལ་གྱི་ཤེས་བྱ་སྒྲོག་འགྲེལ་བྱས་པ། མཛོ་སྒང་རྫོང་ཐུབ་དགའ་དགོན་གྱིས་མི་རིགས་མཐུན་སྒྲིལ་དྲིལ་བསྒྲགས་ཀྱི་འགྲེམས་པང་བཟོས་པ་དང་ཁག་བགོས་ནས་དགོན་སྡེའི་གྲྭ་བཙུན་རྣམས་ལ་མི་རིགས་མཐུན་སྒྲིལ་གྱི་ཤེས་བྱ་གསལ་འགྲེལ་བྱས་པ། འཇོ་མདའ་རྫོང་འདན་ཁོག་ཤང་ཡུག་ཁུལ་གྱི་དགོན་སྡེའི་ལས་དོན་འགོ་ཁྲིད་ཚོགས་ཆུང་གིས་ཁོངས་གཏོགས་ཁུལ་གྱི་དགོན་སྡེ་དོ་དམ་ཨུ་ལྷན་གྱི་ལས་དོན་མི་སྣ་དང་གྲྭ་བཙུན་སྒྲིག་འཛུགས་བྱས་ནས་མི་རིགས་མཐུན་སྒྲིལ་གྱི་ཁྲིམས་སྐྱོང་དྲིལ་བསྒྲགས་བྱེད་སྒོ་སྤེལ་ཏེ་དགོན་སྡེར་བཅའ་སྡོད་ལས་དོན་མི་སྣ་དང་དགོན་སྡེའི་གྲྭ་བཙུན་གྱི་ཁྲིམས་སྐྱོང་གི་འདུ་ཤེས་དང་བཅའ་ཁྲིམས་ཀྱི་འདུ་ཤེས་ཟབ་ཏུ་བཏང་བ་བཅས་རེད།
བྲག་གཡབ་རྫོང་གཏོད་འདེམས་གཞུང་ལས་ཁང་གིས་མི་རིགས་མཐུན་སྒྲིལ་གྱི་བཅའ་ཁྲིམས་དང་སྲིད་ཇུས་དྲིལ་བསྒྲགས་ལ་ཤུགས་སྣོན་རྒྱག་རྒྱུའི་བཀོད་སྒྲིག་ལ་གཞིགས་ཏེ་རྫོང་ཨུད་འཐབ་ཕྱོགས་གཅིག་གྱུར་པུས་སྣེ་ཁྲིད་པ་དང་འབྲེལ་ཡོད་ཚན་པ་ཁག་དང་མཉམ་འབྲེལ་བྱས་ནས་བྱམས་མདུན་གྲོང་རྡལ་དང་། གཙང་གསར་ཤང་སོགས་ཤང་གྲོང་ཁག་ཏུ་བསྐྱོད་དེ། “མི་རིགས་མཐུན་སྒྲིལ་ལ་ཤུགས་སྣོན་བརྒྱབ་ནས་མཛེས་སྡུག་ལྡན་པའི་བོད་ལྗོངས་འཛུགས་སྐྲུན་བྱེད་དགོས”ཞེས་པའི་བཅའ་ཁྲིམས་ཁྲིམས་སྲོལ་སྲིད་ཇུས་ཀྱི་དྲིལ་བསྒྲགས་སློབ་གསོའི་བྱེད་སྒོ་སྤེལ་བ་དང་། ཤང་གྲོང་གི་ལས་བྱེད་པ་དང་། ཞིང་འབྲོག་མང་ཚོགས། དགོན་སྡེའི་གྲྭ་བཙུན་ཁྱོན་མི་600ཙམ་ལ《རྩ་ཁྲིམས》དང《མི་རིགས་ས་ཁོངས་རང་སྐྱོང་བཅའ་ཁྲིམས》སོགས་ཀྱི་བཅའ་ཁྲིམས་དང་ཁྲིམས་སྲོལ་དྲིལ་བསྒྲགས་བྱས་ཏེ་མི་རིགས་མཐུན་སྒྲིལ་གྱི་བཅའ་ཁྲིམས་དང་སྲིད་ཇུས་སྐོར་གྱི་ཤེས་བྱ་ཁྱབ་གདལ་བཏང་བ་རེད།