འདི་ནི་ཧྲང་ཧའེ་གྲོང་ཁྱེར་བོད་སྐྱོར་སྨན་བཅོས་རུ་ཁག་ཁག་བརྒྱད་པའི་རིགས་གཅིག་མཁས་ཅན་ལུང་ཙེ་ཝུན(གཡས)གྱིས་གཞིས་རྩེ་མི་དམངས་སྨན་ཁང་དུ་ཕོ་སྐྲན་གཤགས་བཅོས་བྱེད་སྟངས་སློབ་བཞིན་པ།

2016ལོའི་ཟླ་6པར། ཧྲང་ཧའེ་གྲོང་ཁྱེར་གྱི་བོད་སྐྱོར་རུ་ཁག་ཁག་བརྒྱད་པས་ལས་འགན་སྒྲུབ་སེམས་དང་འགན་སེམས་ཆེན་པོ་བཅངས་ནས་ཧྲང་ཧའེ་ནས་གང་ལྗོངས་ས་མཐོར་ཡོང་སྟེ་རེས་སྐོར་གསར་པའི་ཁ་གཏད་བོད་སྐྱོར་ལས་དོན་སྤེལ་འགོ་ཚུགས་ཡོད།

བོད་དུ་སླེབས་ནས་ལོ་གཉིས་སོང་རིང་། ཧྲང་ཧའེ་གྲོང་ཁྱེར་གྱིས་ཁྱོན་རྣམ་གྲངས་231བཀོད་སྒྲིག་བྱས་པར་མ་དངུལ་སྒོར་དུང་ཕྱུང་11.1བཏང་སྟེ་དབུལ་སྒྲོལ་དང་། སློབ་གསོ། སྨན་བཅོས་བཅས་ཀྱི་ལས་དོན་ཕྱོགས་ཡོངས་ནས་སྤེལ་འགོ་ཚུགས་པ་དང་། ཇོ་མོ་གླང་མའི་འདབས་སུ་ཧྲང་ཧའེ་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་བརྒྱད་པས་ཐོག་མཐའ་བར་གསུམ་དུ“བོད་སྐྱོར་གྱི་ཐེངས་ཤིག་བྱས་ཕྱིན་ཡུལ་ཕྱོགས་ཤིག་ལ་བདེ་སྐྱིད་བསྐྲུན་རྒྱུའི”བླ་ན་མེད་པའི་འགན་འཁྲི་བློ་ལ་བརྟན་པོར་ངེས་པ་དང་། བྱ་སྤྱོད་ངོ་མར་བརྟེན་ནས་མྱང་ཆུའི་ས་གཞི་གཤིན་པོར་མང་ཚོགས་དང་མཉམ་དུ“བོད་རྒྱ་ཁྱིམ་ཚང་གཅིག་ལྟར་མཐུན་སྒྲིལ་ཟབ་པའི”སྤུན་ཟླའི་བརྩེ་སེམས་ཀྱི་ལེའུ་བརྩམས་ཡོད།

བརྟག་ཞིབ་སྔོན་ལ་བྱས་ནས་གཞིས་རྩེ་གྲོང་ཁྱེར་གྱི་གནས་ཚུལ་གསལ་རྟོགས་བྱས —— “རྒྱུས་མངའ་མེད་པ”ནས“ཆ་རྒྱུས་ཡོད་པ”བར།

“བོད་སྐྱོར་བྱེད་དོན་གང་ཡིན་པ་དང་། བོད་དུ་སྡོད་རིང་གང་བྱེད་པ། བོད་ནས་ཁ་འབྲལ་དུས་གང་ཞིག་འཇོག་པ”དེ་དག་ནི་ཧྲང་ཧའེ་གྲོང་ཁྱེར་གྱི་ཁག་བརྒྱད་པའི་བོད་སྐྱོར་ལས་བྱེད་པས་སྔར་ནས་བསམ་གཞིག་བྱས་པའི་གནད་དོན་ཞིག་རེད།

བོད་དུ་སླེབས་རྗེས་བོད་སྐྱོར་ལས་དོན་རུ་ཁག་ཁག་བརྒྱད་པས“བརྟག་ཞིབ”བྱེད་པའི་ལས་ཀའི་བྱ་ཐབས་གཙོ་བོ་འདིར་དམ་འཛིན་ལྷོད་མེད་བྱས་ནས་དེ་མ་ཉིད་དུ་གཞི་རིམ་དུ་བརྟག་ཞིབ་བྱེད་པར་བསྐྱོད་དེ་གཞིས་རྩེ་གྲོང་ཁྱེར་གྱི་དོན་དངོས་གནས་ཚུལ་དང་དགོས་མཁོ་ཤེས་རྟོགས་བྱས་པ་རེད། དཔེར་ན། གྲོ་མོའི་ཚོགས་ཆུང་གིས་ཟླ་གཅིག་རིང་བརྟག་ཞིབ་ཏུ་བསྐྱོད་པའི་ལམ་ཐག་སྤྱི་ལེ་1000ལྷག་ཙམ་ཟིན་པ་དང་། དེའི་རིང་ཞིང་འབྲོག་པའི་དགོས་མཁོ་ཤེས་རྟོགས་བྱས་ཡོད། ལྷ་རྩེའི་ཚོགས་ཆུང་གིས་ས་ཆ་དངོས་སུ་འཚམས་འདྲིར་བསྐྱོད་ནས་རྫོང་དེའི་ས་ཚིགས་100ལྷག་ཙམ་ལ་ས་གནས་ས་ཐོག་ཏུ་བརྟག་ཞིབ་བྱས་ཡོད།

བརྟག་ཞིབ་བྱས་པ་བརྒྱུད་གནས་ཚུལ་ཁོང་དུ་ཆུད་པ་དང་ཁ་ཕྱོགས་གཏན་འཁེལ་བྱས་ཤིང་། བསམ་ཕྱོགས་གསལ་པོ་བཟོས་པ་རེད།

བརྟག་ཞིབ་བྱས་པའི་རྨང་གཞིའི་ཐོག་ཧྲང་ཧའེ་གྲོང་ཁྱེར་གྱི་བོད་སྐྱོར་རུ་ཁག་ཁག་བརྒྱད་པས་རྒྱལ་ཁབ་ཀྱི་བླང་བྱ་དང་། གཞིས་རྩེ་གྲོང་ཁྱེར་གྱི་དགོས་མཁོ། ཧྲང་ཧའེ་ཡི་ནུས་པས་ལྕོགས་ཚོད་བཅས་ཀྱི་རྩ་དོན་ལ་གཞིགས་ནས་དཔལ་འབྱོར་བོད་སྐྱོར་དང་། སློབ་གསོའི་བོད་སྐྱོར། སྨན་བཅོས་བོད་སྐྱོར། ལས་ཞུགས་བོད་སྐྱོར། ཚན་རྩལ་བོད་སྐྱོར། ལས་བྱེད་ཤེས་ལྡན་པའི་བོད་སྐྱོར་བཅས་ཀྱི་བསམ་ཕྱོགས་ཤིག་གྲུབ་ཡོད། དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ལེན་པའི་དམིགས་ཚད་གཏན་འཁེལ་དང་། རིག་གནས་དང་ཡུལ་སྐོར་གྱི་ཐོན་ལས་ཆེན་པོ་གཉིས་ཀྱི་འཕེལ་རྒྱས་ལ་རྒྱབ་སྐྱོར། སློབ་གསོ་དང་འཕྲོད་བསྟེན་གྱི་སྤྱི་ཚོགས་བྱ་གཞག་ཆེན་པོ་གཉིས་ཀྱི་འཕེལ་རྒྱས་ཆུ་ཚད་མཐོར་གཏོང་། ཇོ་མོ་གླང་མ་གསར་སྤེལ་སྒོ་དབྱེའི་ཚོད་ལྟའི་ཁུལ་མགྱོགས་མྱུར་སྐྲུན་པ་བཅས་ཀྱི་“1221”ལོ་གསུམ་གྱི་བོད་སྐྱོར་ལས་དོན་གྱི་གཙོ་གནད་བཏོན་ཡོད།

གནད་སྨིན་ཇུས་འདོན་བྱས་ནས་གཞིས་རྩེ་གྲོང་ཁྱེར་གྱི་དབུལ་སྒྲོལ་འགག་སྒྲོལ་ལ་རོགས་རམ་བྱས་པ།——“གཞན་བརྟེན་རོགས་སྐྱོར”ནས“རང་བརྟེན་རོགས་སྐྱོར”བར།

གཞིས་རྩེ་ནི་བོད་ཀྱི་དབུལ་སྒྲོལ་འགག་སྒྲོལ་གྱི་འཐབ་ས་ཆེན་པོ་གསུམ་གྱི་གྲས་ཤིག་རེད།

བོད་སྐྱོར་དཔུང་ཁག་གི་ངོས་ནས་བརྗོད་ཚེ་གཞིས་རྩེ་གྲོང་ཁྱེར་གྱི་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ལེན་རྒྱུ་ནི་མིག་སྔའི“ལས་འགན་ཨང་དང་པོ”རེད།

དམིགས་ཚད་དེར་གཞིགས་ནས་ཧྲང་ཧའེ་གྲོང་ཁྱེར་གྱི་བོད་སྐྱོར་རུ་ཁག་ཁག་བརྒྱད་པས་འཆར་འགོད་ཞིབ་ཚགས་དང་། གནད་སྨིན་གཏན་འཁེལ། གནད་སྨིན་ཇུས་འདོན། གནད་སྨིན་ཤུགས་འདོན་བཅས་བྱས་ཡོད།

ཐོན་ལས་སྔོན་ལ་འཕེལ་རྒྱས་གཏོང་བར་ཐོན་ལས་ལ་དམ་འཛིན་དང་། འཕེལ་རྒྱས། སྟོབས་ཆེར་གཏོང་བ་བཅས་ནི་དབུལ་སྒྲོལ་གྱི“འགག་རྩའི་ཐབས་ཕྱོགས”ཤིག་རེད་ལ། ཧྲང་ཧའེ་གྲོང་ཁྱེར་གྱི་བོད་སྐྱོར་རུ་ཁག་ཁག་བརྒྱད་པའི“བྱེད་ཐབས་དང་པོ”དེའང་རེད།

ལོ་གཉིས་རིང་། ཧྲང་ཧའེ་གྲོང་ཁྱེར་གྱི་བོད་སྐྱོར་རུ་ཁག་ཁག་བརྒྱད་པས“བྱས་རྗེས་ཡག་པོ་འཇོག་པ་དང་། བསྔགས་བརྗོད་བཟང་པོ་ཐོབ་པ། ཉམས་མྱོང་བཟང་པོ་འཇོག་པ”བཅས་ཀྱི་ལས་ཀའི་ཚད་གཞིར་གཞིགས་པ་དང་། རྣམ་གྲངས“ཐོན་ལས་སྦྲེལ་ཐག་ཆགས་པ་དང་། རང་བརྟེན་གྱི་བྱེད་ནུས་ཆགས་རྒྱུར”བརྩོན་ལེན་བྱེད་པ། གཞིས་རྩེ་གྲོང་ཁྱེར་དུ“སྒྲིག་བཀོད་འཛུགས་སྐྲུན”ནས“ཐོན་ལས་འཛུགས་སྐྱོང”གི་ཕྱོགས་སྒྱུར་ལ་སྐུལ་འདེད་གཏོང་བ་བཅས་བྱས་ཏེ“རང་བརྟེན་བྱེད་ནུས”ནུས་ཤུགས་ཡོད་རྒུས་ཆེ་རུ་བཏང་ཡོད།

གོང་གསལ་དེ་དག་གཙོ་ཁྲིད་དུ་བྱས་ནས་ལོ་གཉིས་རིང་བོད་སྐྱོར་རུ་ཁག་ཁག་བརྒྱད་པས་བྱ་ཐབས་སྣ་ཚོགས་རབ་དང་རིམ་པ་བཏོན་ཡོད།

རྒྱལ་རྩེར་ཁྱོན་མ་དངུལ་སྒོར་ཁྲི་7563བཏང་ནས་བོད་སྐྱོར་རྣམ་གྲངས་ཁག་31ལག་ལེན་བསྟར་ཏེ་ཐོན་ལས་གཉིས་གཙོ་བོར་བཟུང་ཡོད་པ་སྟེ། རོང་ས་དམར་པོའི་དེང་རབས་ཞིང་ལས་ཚན་རྩལ་དཔེ་སྟོན་གླིང་གིས་ལྟེ་བར་བྱེད་པ་དང་། ཤང་གྲོང་དང་། གྲོང་ཚོ། གྲོང་ལྷན་བཅས་ལ་ཁྱབ་པའི་དེང་རབས་ཞིང་འབྲོག་ལས་དང་དེ་བཞིན་རྫོང་རིའི་མཁར་རྫོང་དང་། ལྕགས་རིའི་ཉེ་འདབས་གྱི་ཁྲོམ་གཞུང་རྙིང་པས་ལྟེ་བར་བྱེད་པ། ཕ་ལྷ་གཞིས་ཀ་དང་རྩེ་ཆེན་འདམ་རའི་རིག་གནས་ཡུལ་སྐོར་ལས་རིགས་ཁྱབ་འགྱེད་དུ་བྱེད་པ་བཅས་ཀྱིས་དབུལ་སྒྲོལ་འགག་སྒྲོལ་གྱི་སྒུལ་ཤུགས་དང་པོ་ཧུར་ཐག་བཏོད་ཡོད།

དིང་རིར་ཁྱོན་མ་དངུལ་སྒོར་ཁྲི་10983བཏང་ནས་བོད་སྐྱོར་རྣམ་གྲངས་ཁག་27ལག་ལེན་བསྟར་ཏེ་དིང་རི་རྫོང་གི་ས་མཐོའི་རིགས་ལྡན་ཞིང་ལས་གླིང་རྣམ་གྲངས་གཙོ་གནད་དུ་བཏོད་པ་སྟེ། ཞིང་ལས་ལྟ་སྐོར་དང་། ཇོ་མོ་གླང་མར་ཡུལ་སྐོར། ཞག་སྡོད་དང་བཟའ་འཐུང་སོགས་གཞི་གཅིག་ཏུ་འདུས་པའི་དེང་རབས་ཞིང་ལས་འཕེལ་རྒྱས་བཏང་བ་དང་འབྲེལ་དིང་རི་རྫོང་གི་ལྷོ་གཞས་ཡུལ་སྐོར་རིག་གནས་ལ་རྒྱབ་སྐྱོར་གྱི་རྣམ་གྲངས་ལག་ལེན་ཤུགས་ཆེན་བསྟར་ཡོད།

ས་སྐྱར་ཁྱོན་མ་དངུལ་སྒོར་ཁྲི་13354བཏང་ནས་བོད་སྐྱོར་རྣམ་གྲངས་ཁག་25ལག་ལེན་བསྟར་ཏེ་དགེ་སྡིངས་གྲོང་རྡལ་གྱི་ཨར་འདམ་བཟོ་གྲྭ་དང་དགེ་སྡིངས་གྲོང་རྡལ་ཁྲོམ་མདའ་གྲོང་ཚོའི་གྲོང་གསེབ་གསར་པ་འཛུགས་སྐྲུན་དང་ས་སྐྱ་རྫོང་མངོན་མིན་རིག་གནས་ཤུལ་བཞག་སྲུང་སྐྱོང་གསར་སྤེལ་སོགས་ཀྱི་ལས་དོན་ནུས་ཤུགས་ཡོད་རྒུས་བསྒྲུབས་ཡོད།

“ཧྲང་ཧའེ་བོད་སྐྱོར་མ་དངུལ་གྱི་80%ཡན་དམངས་འཚོའི་འདུ་འགོད་ལ་བཏང་བ་དང་། 30%ཡན་གནད་སྨིན་དབུལ་སྐྱོར་གྱི་ལས་དོན་ལ་ཐད་ཀར་སྤྱད་ཡོད། ལོ་གཉིས་རིང་ང་ཚོ་བོད་སྐྱོར་རུ་ཁག་ཁག་བརྒྱད་པས་གནད་སྨིན་དབུལ་སྐྱོར་བྱ་ཐབས་ཆེན་པོ་དྲུག་འཚོལ་ཞིབ་ཐུབ་པ་སྟེ། ལེ་ལག་ཚང་བའི་དབུལ་སྐྱོར་དང་། ཁེ་ཕན་བགོ་འགྲེམས་དབུལ་སྐྱོར། གསར་གཏོད་ལས་ཞུགས་དབུལ་སྐྱོར། རྩལ་ནུས་གསོ་སྐྱོང་དབུལ་སྐྱོར། དངུལ་རྩའི་འགྱོགས་མདའི་དབུལ་སྐྱོར། སློབ་གསོ་སྨན་བཅོས་དབུལ་སྐྱོར་བཅས་ཀྱིས་གཞིས་རྩེ་གྲོང་ཁྱེར་གྱི་དབུལ་སྒྲོལ་འགག་སྒྲོལ་ལ་སྟོབས་ཤུགས་ཆེན་པོ་ཞིག་བསྣན་ཡོད”ཅེས་ཧྲང་ཧའེ་གྲོང་ཁྱེར་གྱི་བོད་སྐྱོར་རུ་ཁག་ཁག་བརྒྱད་པའི་ལས་བྱེད་པའི་སྤྱི་ཁྱབ་རུ་དཔོན་ཉི་ཅུན་ནན་གྱིས་བཤད་བྱུང་།

གསར་གཏོད་རྒྱ་ཆེར་བཏང་ནས་གཞིས་རྩེ་གྲོང་ཁྱེར་གྱི་ཞན་ཆ་ཆེན་པོ་གཉིས་ལ་དམ་འཛིན་བྱས་པ།——“ཚོད་ལྟ་ཡང་ཡང་བྱེད་པ”ནས“ཧྲང་ཧའེ་ཡི་བྱ་ཐབས”བར།

དུས་ཡུན་རིང་པོའི་ནང་སློབ་གསོ་དང་འཕྲོད་བསྟེན་ནི་གཞིས་རྩེ་གྲོང་ཁྱེར་གྱི་འཕེལ་རྒྱས་ཀྱི་ཞན་ཆ་ཞིག་ཡིན་ཞིང་། གཞིས་རྩེ་གྲོང་ཁྱེར་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་ཐུབ་པའི་རྒྱལ་ཁ་ཕུ་ཐག་གཅོད་པར་སློབ་གསོ་དང་འཕྲོད་བསྟེན་འཕེལ་རྒྱས་ཆེན་པོ་གཏོང་རྒྱུ་ནི་ནར་འགྱངས་ཡུད་ཙམ་ཡང་བྱ་མི་རུང་བ་ཞིག་རེད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“བོད་རིགས་ས་ཁུལ་གྱི་རྣམ་པར་འགྱུར་ལྡོག་གཏོང་བར་རྩ་བ་སློབ་གསོར་རྟེན་དགོས”ཞེས་ནན་བཤད་གནང་ཡོད།

2017ལོར་སྐར་གྲངས་ཚད་གཞི་ཐོག་མ་100%ཟིན་པ་དང་། གཙོ་གནད་དངོས་གཞིའི་ཚན་ཁག་དང་དངོས་གཞིའི་ཚན་ཁག་གི་སྐར་གྲངས་ལོན་ཚད་རང་སྐྱོང་ལྗོངས་ཀྱི་ཨང་དང་པོར་སླེབས་པ་དང་། འབྲིང་རྒྱུགས་བརྟན་པོའི་ངང་རང་སྐྱོང་ལྗོངས་ཀྱི་ཨང་དང་པོར་སླེབས་ཡོད།

དེ་ནི་ལོ་གཉིས་རིང་ཁག་གཉིས་ཀྱི་བོད་སྐྱོར་དགེ་རྒན་74ཡིས་གཞིས་རྩེ་གྲོང་ཁྱེར་ཧྲང་ཧའེ་ཚོད་ལྟའི་སློབ་གྲྭར་རྒྱུགས་ལན་སྤྲད་པ་ཞིག་རེད།

ཚོད་ལྟ་ཡང་ཡང་བྱས་ནས་ལས་དོན་སྤེལ་འགོ་ཚུགས་ཡོད།

གཞིས་རྩེའི་སློབ་གསོའི་རྨང་གཞིའི་ཕྱོགས་མང་པོ་ཧྲང་ཧའེ་ཡི་སློབ་གསོ་དང་མི་འདྲ་བས། སློབ་གསོའི་བོད་སྐྱོར་བྱེད་པར་གཞན་དཔེ་འདྲ་བཤུས་བྱ་མི་རུང་བར་གཞིས་རྩེའི་ཁྱད་ཆོས་ལྡན་པའི་སློབ་གསོའི་ལམ་དུ་སྐྱོད་དགོས་ཀྱི་ཡོད། འདི་ནི་ཧྲང་ཧའེ་སློབ་གསོའི་བོད་སྐྱོར་ཤེས་ལྡན་པས་ངེས་པར་དུ་ཐག་གཅོད་བྱེད་དགོས་ངེས་ཀྱི་གནད་དོན་ཞིག་རེད།

དེའི་ཐད་ཧྲང་ཧའེ་ཡི་སློབ་གསོའི་བོད་སྐྱོར་རུ་ཁག་གིས་རྒྱུན་ཆད་མེད་པར་འཚོལ་ཞིབ་དང་རྒྱུན་ཆད་མེད་པར་ཕྱོགས་སྡོམ་བྱས་ཡོད།

ཏང་འཛུགས་སྐྱོང་ཚད་ལྡན་ཅན་གྱི་འཛུགས་སྐྱོང་རྣམ་གྲངས་ལག་ལེན་བསྟར་བ་དང་། “ཉེར་མཁོའི་སློབ་ཚན”གྱི་སློབ་གསོའི་དབུལ་སྐྱོར་འདུ་ཤེས་གསར་གཏོད་བྱས་པ། གཞོན་སྐྱེས་དགེ་རྒན་དང་། བྱང་ཆུབ་པའི་དགེ་རྒན། རྐང་འཛིན་པའི་དགེ་རྒན། རིག་གཞུང་ཚན་ཁག་གི་སྣེ་ཁྲིད་པ། སྐད་གྲགས་ལྡན་པའི་དགེ་རྒན་གསོ་སྦྱོང་ལམ་སྲོལ་བཅས་ཆགས་པར་བྱས་པ། རང་གཤིས་ཅན་གྱི་སློབ་གྲྭའི་སློབ་ཚན་བཀོད་སྒྲིག་བྱས་པ། བྱང་ཚད་སློབ་གསོའི་སྐུལ་འདེད་ལྟེ་གནས་བཙུགས་པ། བློ་གྲོས་སློབ་གྲྭ“1+3+X”འཛུགས་སྐྱོང་གི་འཆར་གཞི་བཏོན་པ། “1+5+X”རྒྱང་ཁྲིད་མཉམ་སྒུལ་ལས་སྟེགས་བསྐྲུན་པ། སློབ་གྲྭའི་མཁྲེགས་ཆས་འཛུགས་སྐྲུན་ལ་སྐུལ་འདེད་ཧུར་ཐག་བཏང་བ་སོགས་ཀྱི་ལས་དོན་སྣ་ཚོགས་བསྒྲུབས་ཡོད།

ཧྲང་ཧའེ་སློབ་གསོའི་བོད་སྐྱོར་ཁག་གིས་འཚོལ་ཞིབ་བྱེད་ཞོར་མདུན་སྐྱོད་བྱེད་བཞིན་ཡོད།

བྱེད་སྟངས་བཟང་པོ་དང་ཉམས་མྱོང་བཟང་པོ་དེ་དག་གིས་གཞིས་རྩེའི་སློབ་གསོའི་བྱ་གཞག་ལ་ངོ་མཚར་ཆེ་བའི་ལེའུ་གསར་པ་མུ་མཐུད་གཏོད་ངེས་ཡིན་པའི་ཡིད་ཆེས་ཡོད།

སྨན་བཅོས་བོད་སྐྱོར་གྱིས“ཧྲང་ཧའེ་ཡི་བྱ་ཐབས”ནུས་ཤུགས་ཡོད་རྒུས་བཏོད་ཡོད།

ལྷོ་འདབས་སུ་ས་ཁྱོན་ཆེ་བའི་གཞིས་རྩེ་གྲོང་ཁྱེར་མི་དམངས་སྨན་ཁང་གསར་པ་གནས་ཡོད་པ་དང་། འདི་ནི་བོད་རང་སྐྱོང་ལྗོངས་ཀྱིས་མ་དངུལ་མང་ཤོས་བཏང་བ་དང་། སྤྱིའི་འཆར་འགོད་ལུགས་དང་མཐུན་ཤོས། མཁྲེགས་ཆས་སྒྲིག་བཀོད་སྔོན་ཐོན་ཆེ་ཤོས་བཅས་ཀྱི་སྨན་ཁང་གྲས་ཤིག་ཡིན་ལ་ཧྲང་ཧའེ་ཡི་སྨན་བཅོས་བོད་སྐྱོར་གྱི་མངོན་གསལ་དོད་ཤོས་ཀྱི་མཚོན་རྟགས་ཤིག་ཀྱང་རེད།

ཧྲང་ཧའེ་སྨན་བཅོས་བོད་སྐྱོར་རུ་ཁག་ངོས་ནས་བརྗོད་ན། སྨན་ཁང་གསར་པའི་སྔོན་ཐོན་གྱི་མཁྲེགས་ཆས་ནི“ཕྱི་ཚུལ་གྱི་རྣམ་པ”ཙམ་ཁོ་ན་མ་ཡིན་པར། “ཕྱི་ཚུལ་གྱི་རྣམ་པ”དགོས་ལ“ནང་ཁུལ་གྱི་སྒྲིག་ཆས”ཆ་ཚང་པོ་དེ་བས་ཡོད་དགོས།

གཞིས་རྩེ་གྲོང་ཁྱེར་གྱི་སྨན་བཅོས་འཕྲོད་བསྟེན་གྱི་ལག་རྩལ་ཆུ་ཚད་མཐོ་རུ་གཏོང་བར་དམིགས་ནས། ཧྲང་ཧའེ་གྲོང་ཁྱེར་གྱིས་གཞིས་རྩེ་མི་དམངས་སྨན་ཁང“ཀ་པ་རིམ་གསུམ”གྱི་ལྟེ་བའི་ལས་དོན་དེར་གཞིགས་ཏེ་ཕྱོགས་ཡོངས་ནས་ནུས་ཤུགས་ཡོད་རྒུས་སྨན་ཁང་ནང་ཁུལ་སྒྲིག་བཀོད་འཛུགས་སྐྲུན་དང་ཕྱོགས་བསྡུས་སྟོབས་ཤུགས་ཆེར་གཏོང་ལ་གཙོ་གནད་དམིགས་ཏེ་ཚོགས་སྒྲིག་རྣམ་པའི་སྨན་བཅོས་བོད་སྐོར་གྱི“ཧྲང་ཧའེ་ཡི་བྱ་ཐབས”ཞིབ་ཚགས་ངང་བཏོད་ཡོད།

འདིར་ལྷག་པར་གླེང་དགོས་པ་ཞིག་ནི། ཧྲང་ཧའེ་ཡིས་སྨན་ཁང་གིས་ཚན་ཁག་འགན་གཙང་བླངས་ནས་སྨན་བཅོས་བོད་སྐྱོར་གྱི་སྤུས་རྟགས་བཏོད་པ་དེ་རེད།

སྨན་ཁང་གིས་ཚན་ཁག་འགན་གཙང་ལེན་པར་དམིགས་ནས་ཧྲང་ཧའེ་ཡི་སྨན་ཁང་10ཡིས་གཞིས་རྩེ་མི་དམངས་སྨན་ཁང་དང“སྨན་ཁང་གིས་ཚན་ཁག་འགན་གཙང་ལེན་པའི”མཉམ་ལས་གྲོས་མཐུན་ཡི་གེར་དངོས་སུ་མིང་རྟགས་བཀོད་དེ་ཚན་ཁག་9ལ་ཁག་སོ་སོར་ཁ་གཏད་རོགས་སྐྱོར་བྱས་པ་དང་། “ཧྲང་ཧའེ(གཞིས་རྩེ)ནད་ཐོག་གསོ་རིག་ནད་བརྟག་སྨན་བཅོས་ལྟེ་གནས”ནུས་ཤུགས་ཡོད་རྒུས་བཏོད་དེ་བོད་ལྗོངས་ནུབ་རྒྱུད་ཀྱི་གསོ་རིག་མཐོ་ས་བསྐྲུན་པ། བོད་ཀྱི་གསོ་རིག་ཚན་རིག་ཡོན་ཧྲེའི་རིགས་གཅིག་མཁས་ཅན་གྱི་ལས་དོན་ས་ཚིགས་ཐོག་མ་ཧུར་ཐག་བསྐྲུན་ནས་སྨན་ཁང“བོད་ལྗོངས་ནུབ་རྒྱུད་ཀྱི་སྨན་བཅོས་ལྟེ་གནས”སུ་བསྐྲུན་པའི་དམིགས་ཚད་ལ་སྐུལ་འདེད་ཤུགས་ཆེན་བཏང་བ། སྨན་ཁང་གི་རྒྱང་ཁྲིད་བརྙན་དཔར་ནད་བརྟག་སྨན་བཅོས་ལྟེ་གནས་དངོས་སུ་སྤྱད་དེ་སྨན་བཅོས་མཉམ་འབྲེལ་སྒྲིག་གཞི་གསར་པ་འཛུགས་རྒྱུའི་འཚོལ་ཞིབ་བྱས་པ་སོགས་ལས་དོན་འབོར་ཆེན་བསྒྲུབས་ཡོད།

དེ་དང་ཆབས་ཅིག་ཀ་པ་རིམ་གསུམ་གཏོད་པ་སྣེ་ཁྲིད་དུ་བྱས་ནས་བོད་སྐྱོར་ཚོགས་པས་ད་དུང་མི་སྣའི་གྲུབ་ཆ་དང་། རྩ་འཛུགས་ཀྱི་གྲུབ་ཆ། སྨན་བཅོས་ཞབས་འདེགས། ཚན་ཞིབ་སློབ་ཁྲིད། སྨན་ཁང་དོ་དམ་སོགས་ཀྱི་ཐད་ཤུགས་ཆེན་པོ་བརྒྱབ་ཡོད། དཔེར་ན། ཧྲང་ཧའེ་ཡི་ཀ་པ་རིམ་གསུམ་སྨན་ཁང་23ནས་སྨན་བཅོས་རྐང་འཛིན་པ་62བོད་དུ་སྨན་བཅོས་བོད་སྐྱོར་ལ་མངགས་པ་དང་། སྒྲིག་སྲོལ་ལམ་ལུགས་150དང་ཆེད་དོན་འཕེལ་རྒྱས་འཆར་འགོད་71བཟོས་པ་དང་འབྲེལ་ལས་རྗེས་དཔྱད་ཞིབ་ཀྱི་ཇུས་གཞི་སྒྱུར་བཅོས་ཧུར་ཐག་བྱས་ཡོད། “གཅིག་གཏད་གཅིག”དང“གཅིག་གཏད་མང་པོའི”བྱ་ཐབས་ལ་བརྟེན་ནས་དགེ་རྒན་དང་དགེ་ཕྲུག་རྣམ་པའི་གསོ་སྦྱོང་བྱས་པས་ས་ཆ་དེ་གའི་སྨན་དོན་པས་ནད་ཐོག་སྨན་བཅོས་ཀྱི་ལག་རྩལ་གསར་པ་ཁོང་དུ་ཆུད་ཡོད།

གཞིས་རྩེ་གྲོང་ཁྱེར་མི་དམངས་སྨན་ཁང་གི་ཡོན་ཀྲང་མིག་དམར་རྡོ་རྗེས་སྨན་ཁང་གི“ཀ་པ་རིམ་གསུམ”བདེ་བླག་ངང་བཏོད་པ་དེ་ཧྲང་ཧའེ་ཡི་ཚོགས་སྒྲིག་རྣམ་པའི་བོད་སྐྱོར་སྨན་བཅོས་རུ་ཁག་དང་ཁ་འབྲལ་ཐབས་མེད། ཚོགས་སྒྲིག་རྣམ་པའི་བོད་སྐྱོར་ཤེས་ལྡན་མི་སྣ་ཁག་གསུམ་ཚང་མ་ནི་ཧྲང་ཧའེ་ཡི་ཀ་པ་རིམ་གསུམ་གྱི་སྨན་ཁང་ནས་ཡིན་པ་དང་། ཚང་མས་ཐོག་མཐར་བར་གསུམ་དུ་སྨན་ཁང་འཕེལ་རྒྱས་དང་། མང་ཚོགས་ཀྱི་བདེ་ཐང་ལ་བསམ་བློ་བཏང་ནས་ཀ་པ་རིམ་གསུམ་ཤེས་ལྡན་མི་སྣའི་བྱང་ཚད་མཐོར་གཏོང་འདུ་འགོད་ལག་ལེན་ཤུགས་ཆེན་བསྟར་བ་དང་། གཞན་བརྟེན་ནས་རང་བརྟེན་དུ་བསྒྱུར་ཏེ་སྨན་ཁང་ལ་འདེགས་སྐྱོར་ཤུགས་ཆེན་བྱས་ཡོད་ཅེས་ངོ་སྤྲོད་བྱས་བྱུང་།