ཉེ་ཆར། གསར་འགོད་པས་ཧྲང་ཧའེ་གྲོང་ཁྱེར་གྱི་བོད་སྐྱོར་ལས་བྱེད་པ་ཁག་བརྒྱད་པའི་འབྲེལ་གཏུག་ཚོགས་ཆུང་ནས་ཤེས་རྟོགས་བྱུང་བ་ལྟར་ན། ཧྲང་ཧའེ་གྲོང་ཁྱེར་གྱི་བོད་སྐྱོར་ལས་བྱེད་པ་ཁག་བརྒྱད་པ་2016ལོའི་ཟླ་6པར་བོད་དུ་བསྐྱོད་ཚུན་ཏང་ཀྲུང་དབྱང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་གཏིང་ཟབ་བྱས་པ་མ་ཟད། ཀྲུང་དབྱང་གི་བླང་བྱ་དང་། གཞིས་རྩེའི་དགོས་མཁོ། ཧྲང་ཧའེ་ཡི་འཇོན་ནུས་བཅས་ཀྱི་རྩ་དོན་མཐའ་འཁྱོངས་བྱས་ནས་མེས་རྒྱལ་གཅིག་གྱུར་སྲུང་སྐྱོང་དང་མི་རིགས་མཐུན་སྒྲིལ་ལ་ཤུགས་སྣོན་རྒྱག་རྒྱུ་དེ་བོད་སྐྱོར་གྱི་དམིགས་ས་དང་ཤུགས་རྒྱག་སར་བརྩིས་ཏེ་དམངས་འཚོ་ལེགས་གཏོང་དང་མི་སེམས་གཅིག་སྒྲིལ་དེ་བོད་སྐྱོར་གྱི་འགོ་འཛུགས་ས་དང་དོན་ལ་བབས་སར་བྱས་ཤིང་། གཞིས་རྩེར་རོགས་རམ་བྱས་ནས་དབུལ་སྒྲོལ་འགག་སྒྲོལ་ལ་རྒྱལ་ཁ་ལེན་རྒྱུ་དེ་བོད་སྐྱོར་གྱི་དོན་དག་གལ་ཆེན་དུ་བརྩི་བ་དང་། ལས་འགན་དང་འགན་འཁྲི་གཙང་སྒྲུབ་དང་སྟོབས་ཤུགས་ཡོད་རྒུ་རྩལ་སྤྲུགས་ཀྱིས་གནད་སྨིན་དབུལ་སྐྱོར་དང་ཚོགས་སྒྲིག་རྣམ་པའི་སློབ་གསོ་ཤེས་ལྡན་པའི་བོད་སྐྱོར་སོགས་གཙོ་གནད་ལས་དོན་ལ་སྐུལ་སྤེལ་བཏང་ནས་གཞིས་རྩེ་འཕེལ་རྒྱས་མྱུར་པོ་དང་ཡུན་རིང་བདེ་འཁོད་ཡོང་བར་སྐུལ་མ་གཏོང་ཆེད་ལེགས་སྐྱེས་ཕུལ་ཡོད་པ་རེད།

ཤེས་རྟོགས་བྱུང་བ་ལྟར་ན། ཀྲུང་དབྱང་གི་བླང་བྱ་དང་ཧྲང་ཧའེ་གྲོང་ཁྱེར་གྱི་བཀོད་སྒྲིག་ལྟར་བོད་སྐྱོར་ལས་བྱེད་པ་ཁག་བརྒྱད་པའི་རྣམ་གྲངས་ཀྱིས་དབུལ་སྒྲོལ་འགག་སྒྲོལ་གྱི་ལྟེ་བའི་ལས་འགན་ལ་ཐོག་མཐའ་བར་གསུམ་དུ་དམ་པོར་དམིགས་པ་དང་། སློབ་གསོ་དང་། འཕྲོད་བསྟེན། ལས་ཞུགས་སོགས་དམངས་འཚོའི་རོགས་སྐྱོར་བྱེད་ཤུགས་ཆེ་རུ་བཏང་ཁར་རིག་གནས་ཡུལ་སྐོར་ལས་རིགས་དང་། ས་མཐོའི་ཁྱད་ལྡན་ཞིང་འབྲོག་ལས་གོང་འཕེལ་ལ་རོགས་སྐྱོར་ཤུགས་ཆེན་བྱས་ཤིང་། མིག་སྔར་བོད་སྐྱོར་རྣམ་གྲངས་231བཀོད་སྒྲིག་བྱས་པར་མ་དངུལ་བསྡོམས་འབོར་སྒོར་དུང་ཕྱུར་11.1ཙམ་བཏང་ཡོད།