ཤིན་ཧྭ་གསར་འགྱུར་ཁང་ལྷ་ས་ནས་ཟླ་5ཚེས་28ཉིན་གློག་འཕྲིན་འབྱོར་གསལ། བོད་དུ་སླེབས་ནས་ལོ་གཉིས་ཀྱི་རིང་རྫོང་ཡོངས་ཀྱི་ཤང(གྲོང་རྡལ)8ཀྱི་སྲིད་འཛིན་གྲོང་ཚོ་46ཆ་ཚང་ལ་བསྐྱོད་ཅིང་། དེའི་ནང་ནས་གཞུང་ལམ་ཤར་གཏོང་ཐུབ་མེད་པའི་གྲོང་ཚོ་17ལ་རྐང་ཐང་མར་བསྐྱོད་པ་དང་། “རང་བརྟེན་རྣམ་པའི”ཐོན་ལས་རྣམ་གྲངས་28བཏོད་དེ་མཐའ་མཚམས་ཀྱི་འབྱོར་འབྲིང་གྲོང་ཚོ་འཛུགས་སྐྲུན་ལ་སྐུལ་འདེད་ཤུགས་ཆེན་བཏང་བ། བོད་སྐྱོར་འཆར་གཞིའི་ཁོངས་སུ་མ་གཏོགས་པའི་མ་དངུལ་གཏོང་ཚད་འཆར་གཞིའི་དངུལ་གྲངས་ལས་ཐོག་མར་བརྒལ་བ་ལ་སོགས། ཧི་མ་ལ་ཡའི་རི་རྒྱུད་ཀྱི་རི་མཐོ་གཡང་གཟར་དུ་ཆགས་པའི་བོད་ལྗོངས་མེ་ཏོག་རྫོང་དུ་ཀོང་ཏུང་གི་བོད་སྐྱོར་ལས་དོན་ཚོགས་ཆུང་ཁག་བརྒྱད་པས་བྱ་གཞག་སྒྲུབ་སེམས་དང་འགན་འཁྲི་འཁུར་སེམས་ཐོག་ནས། བོད་སྐྱོར་གྱི་སྒྲིག་སྲོལ་ལམ་སྲོལ་གསར་གཏོད་དང་། ལྷག་བསམ་ཟོལ་མེད་ཀྱི་བརྩེ་སེམས་ཆེན་པོས་ས་གནས་དེ་གའི་ལས་བྱེད་མང་ཚོགས་དང་མཉམ་དུ་དུས་རབས་གསར་པའི་བདེ་སྐྱིད་དང་མཛེས་སྡུག་ལྡན་པའི་མེ་ཏོག་གསར་པ་བཏོད་པ་རེད།

སྒྲིག་སྲོལ་ལམ་སྲོལ་གསར་གཏོད་ཀྱིས་བོད་སྐྱོར་ལས་དོན་གྱི་ཟིན་ཐོ་གསར་པ་ཡང་ཡང་བཏོད་པ།

མེ་ཏོག་ནི་ཡར་ཀླུང་གཙང་པོའི་སྨད་རྒྱུད་དུ་ཆགས་ཤིང་། རི་མཐོ་ལ་གཡང་གཟར་བ་དང་འཕེལ་རྒྱས་ཀྱི་ཆུ་ཚད་བལྟོས་བཅས་ཀྱིས་རྗེས་སུ་ལུས་ཡོད། 2016ལོའི་ཟླ་7པར་ཀོང་ཏུང་གི་བོད་སྐྱོར་ལས་དོན་ཚོགས་ཆུང་མེ་ཏོག་ལ་འབྱོར་བའི་ཉིན་གཉིས་པར་གྲོང་ཚོ་དང་དུད་ཚང་དུ་གནས་ཚུལ་ཤེས་རྟོགས་བྱེད་འགོ་ཚུགས་ཡོད། ལོ་ཕྱེད་ལས་མ་སོང་བར་ལས་དོན་ཚོགས་ཆུང་གིས་རྫོང་ཡོངས་ཀྱི་སྲིད་འཛིན་གྲོང་ཚོ་ཚང་མར་བསྐྱོད་པ་དང་། དེ་ནི་ཁག་རིམ་བྱུང་ལས་དོན་ཚོགས་ཆུང་ཁྲོད་བྱུང་མྱོང་མེད་པ་ཞིག་རེད།

བརྟག་ཞིབ་ཀྱི་རྨང་གཞིའི་སྟེང་གསར་གཏོད་དང་འཚོལ་ཞིབ་རབ་དང་རིམ་པ་བྱེད་འགོ་ཚུགས་ཤིང་། ཁོང་ཚོས་བསྡུ་རུབ་བྱས་པའི་དཀའ་ངལ་དང་། གནད་དོན། དགོས་མཁོ་བཅས་སྐོར་གྱི་ཆ་འཕྲིན་400ལྷག་ཙམ་ལག་དེབ་བཟོས་པ་དང་། ཧྥོ་ཧྲན་དུ“མེ་ཏོག་རྫོང་ལ་ཁ་གཏད་རོགས་སྐྱོར་གྱི་ངོ་འཕྲད་གྲོས་མོལ་འདུ་ཚོགས”ཐེངས་དང་པོ་འཚོགས་པར་ལས་རིགས་ཁག་གིས་རྒྱབ་སྐྱོར་བྱས་པའི་མ་དངུལ་དང་དངོས་ཟོག་སྒོར་ཁྲི་600ཙམ་རག་ཡོད། ད་ཆ། བརྩོན་ལེན་བྱས་པའི་འཆར་གཞིའི་ཁོངས་སུ་མ་གཏོགས་པའི་མ་དངུལ་དང་དངོས་ཟོག་རིམ་རྩིས་བྱས་ན་སྒོར་དུང་ཕྱུར་1.6ཟིན་ནས་འཆར་གཞིའི་དངུལ་གྲངས་སྒོར་དུང་ཕྱུར་1.5ལས་བརྒལ་ཏེ་ཟིན་ཐོ་གསར་པ་བཏོད་པ་རེད།

ཕྱོགས་ཡོངས་ནས་ཁ་གཏད་རོགས་སྐྱོར་གྱི་ལམ་ལུགས་དང་ཕྱོགས་ཡོངས་ཀྱི་འབྲེལ་གཏུག་ལམ་ལུགས་ཀྱང་བཙུགས་ཏེ་ཧྥོ་ཧྲན་གྲོང་ཁྱེར་གྱི་ཐད་གཏོགས་སྡེ་ཚན་དང་། ཆུས་5ཡི་གྲོང་རྡལ་དང་ཁྲོམ་གཞུང་8ཀྱིས་མེ་ཏོག་རྫོང་གི་ཐད་གཏོགས་སྡེ་ཚན་དང་ཤང་གྲོང་8ལ་ཆ་སྒྲིག་རོགས་སྐྱོར་བྱ་རྒྱུར་སྐུལ་འདེད་བཏང་ཞིང་། ལས་དོན་ཚོགས་ཆུང་གི་ཚོགས་མི་8ཀྱིས་ཁུལ་དབྱེ་ནས་ཚན་པ་དང་ཤང་དང་གྲོང་རྡལ་ཁག་དང་འབྲེལ་བ་བྱས་ཏེ་རིམ་རྩིས་བྱས་ན་དཀའ་ངལ་དང་གནད་དོན་དངོས་130ལྷག་ཙམ་ཐག་གཅོད་བྱས་པར་མ་དངུལ་དང་དངོས་ཟོག་སྒོར་ཁྲི་2000ལྷག་ཙམ་བཏང་བ་རེད།

ཕུགས་ཕན་ཐོན་ལས་བཏོད་དེ་བོད་སྐྱོར་རྣམ་གྲངས་ཐད“རང་བརྟེན”གཙོ་བོར་འཛིན་པ།

“ཕྱུག་འགྱུར་ལག་རྩལ་བསླབས་ཚེ་གཞི་ནས་མེ་ཏོག་དེ་ཉིད་དབུལ་ཕོངས་རྗེས་ལུས་དང་སྒོ་རྒྱག་རྣམ་པ་ལས་རྦད་དེ་སྒྲོལ་ཐུབ”ཅེས་ལས་དོན་ཚོགས་ཆུང་གི་ཙུའུ་ཀྲང་མེ་ཏོག་རྫོང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཤེ་གོ་ཀའོ་ཡིས་བཤད།

“རྣམ་གྲངས་ནི་རྨང་གཞི་དང་ལྟེ་བ་ཡིན་པ་དང་། ཐོན་ལས་ནི‘རང་བརྟེན’གྱི་འགག་རྩ་ཡིན་པར”དམིགས་ཏེ་ལས་དོན་ཚོགས་ཆུང་གིས་བོད་སྐྱོར་མ་དངུལ་དག་རིགས་12ཀྱི་རྣམ་གྲངས་28ལ་དབྱེ་ནས་ཇ་ལོ་དང་། ཡུལ་སྐོར། ཤིང་འབྲས། སྔོ་ཚལ། སྨན་རྩྭ། ལག་རྩལ་སོགས་ཀྱི་ཐོན་ལས་རྣམ་གྲངས་ལ་གཙོ་གནད་ཐོག་བཏང་བས། མང་ཚོགས་སྔར་བས་མང་བས་ཤིང་འབྲས་སྤུས་ལེགས་དང་། ཐོན་མཐོའི་ཆུ་འབྲས། ཁྱད་ལྡན་སྔོ་ཚལ་བཅས་བཏབ་པ་མ་ཟད། སྲོལ་རྒྱུན་གྱི་ལག་ཤེས་བཟོ་རྩལ་ཀྱང་འཕེལ་རྒྱས་བཏང་བ་རེད།

མེ་ཏོག་གྲོང་ཚོར་སྡོད་པའི་མོན་པ་རིགས་ཀྱི་བུ་མོ་པད་མ་དབྱངས་ཅན་ནི་ཇ་ལོ་བཏབ་ནས་ཕན་པ་ཐོབ་མཁན་གྲས་ཤིག་རེད། ཁོ་མོས་ཇ་ལོ་འཐུ་བའི་དུས་ཚིགས་སུ་ཟླ་རེར་ཡོང་འབབ་སྒོར་2000ཙམ་རག་གི་འདུག་ཅེས་བཤད། མིག་སྔར་མེ་ཏོག་གི་ཇ་ལོ་འདེབས་ཁྱོན་མུའུ་7326ཟིན་གྱི་ཡོད་པ་རེད།

སེམས་ནུས་གང་ཡོད་བཏོན་ནས་བོད་སྐྱོར་ལས་ལ་གཞོལ་བ།

བོད་སྐྱོར་ལོ་3རིང་། ལས་དོན་ཚོགས་ཆུང་གིས་མེ་ཏོག་གི་ཤང(གྲོང་རྡལ)དང་གྲོང་ཚོ་ཡོངས་སུ་ཐེངས་གསུམ་བསྐྱོད་ཐུབ་རྒྱུའི་འཆར་གཞི་བཏིང་བར་ད་བར་ཐེངས་གཉིས་བསྐྱོད་ཟིན་པ་དང་། གྲོང་ཚོ་ཚང་མར་ཉུང་མཐར་ཡང་ཉིན་1བསྡད་དེ་འབྲེལ་གཏུག་སྤེལ་རེས་གཏིང་ཟབ་ཡོང་བའི་འགན་ལེན་བྱེད་པ། ཇ་ལོ་དང་། ཡུལ་སྐོར། ཤིང་འབྲས། སྔོ་ཚལ། སྨན་རྩྭ་སོགས་ཀྱི་ཐོན་ལས་གྲོང་གསེབ་ཚང་མར་ཁྱབ་པར་བྱེད་པ། བོད་སྐྱོར་རྣམ་གྲངས་28ལས་ཤང(གྲོང་རྡལ)8ལ་ཕན་པ་ཐོབ་པ་སོགས་རེད། རྫོང་སྲིད་གྲོས་ཀྱི་ཀྲུའུ་ཞི་གཞོན་པ་བཀྲ་ཤིས་མཚོ་མོས“ལས་དོན་ཚོགས་ཆུང་གིས་རྣམ་གྲངས་ལག་ལེན་བསྟར་རིམ་བཞིན་བརྟག་ཞིབ་དང་རིགས་པས་ཁུངས་སྐྱེལ་ཡང་སྐོར་བསྐྱར་སྐོར་བྱས་ཏེ་ཚན་རིག་དང་མཐུན་པའི་ངང་འཆར་འགོད་དང་ཕན་འབྲས་ཡུན་རིང་ཐོན་རྒྱུར་སྣང་ཆེན་བྱེད་ཀྱི་འདུག”ཅེས་བཤད།