“ཕྱུག་པོ་ཆགས་འདོད་ན་སྔོན་ལ་ལམ་བཟོ་དགོས་པ་དང་། འཕེལ་རྒྱས་གཏོང་དགོས་ན་སྔོན་ལ་མཐུན་སྒྲིལ་བྱེད་དགོས”ཞེས་པ་ནི་ཆབ་མདོའི་གཞུང་ལམ་ཡན་ལག་ཅུས་ཀྱི་ཆབ་མདོའི་བདག་སྐྱོང་དུམ་བུའི་རྒྱ་ཆེའི་ལས་བཟོས་ལོ་མང་རིང་ཤེས་རྟོགས་ཐུབ་པའི་གནས་ལུགས་ཤིག་རེད།

ཆབ་མདོའི་གཞུང་ལམ་བདག་སྐྱོང་དུམ་བུ་ནི་གཙང་གསུམ་འབབ་རྒྱུད་ཀྱི་ཆབ་མདོ་གྲོང་ཁྱེར་གྱི་ས་མཚམས་སུ་གནས་པ་དང་། བདག་སྐྱོང་ལས་ཁུལ་9བཙུགས་ཏེ་རྒྱལ་ལམ་214ལམ་ཐིག་ཆབ་མདོ་ནས་སྤང་མདའ་བར་གྱི་གཞུང་ལམ་དང་། 317ལམ་ཐིག་ཐོ་པ་ནས་ཆབ་མདོ་བར་གྱི་གཞུང་ལམ། 349ལམ་ཐིག་གཉན་ལྷ་རི་བོའི་ཕུག་ལམ་ནས་བྲག་གཡབ་བར་གྱི་གཞུང་ལམ་བཅས་ཁྱོན་སྤྱི་ལེ་313.482ཀྱི་བདག་སྐྱོང་དང་ཤར་གཏོང་ཡོང་བའི་འགན་ལེན་ལས་འགན་ཁུར་ཡོད།

ཆབ་མདོའི་གཞུང་ལམ་བདག་སྐྱོང་དུམ་བུ་ནི་འགྲིམ་འགྲུལ་ཤར་གཏོང་ཐུབ་པའི་འགན་ལེན་གལ་ཆེན་ཞིག་རེད་ལ་བོད་རྒྱ་ཁྱིམ་ཚང་ཆེ་མོ་ཞིག་དེ་བས་ཀྱང་རེད། མིག་སྔར་ཆབ་མདོའི་གཞུང་ལམ་བདག་སྐྱོང་དུམ་བུའི་ཁོངས་སུ་ལས་བཟོ་731ཡོད་པ་དེའི་ནང་བོད་རིགས་528ཡོད་པ་དེས་72%བཟུང་བ་དང་། རྒྱ་རིགས་203ཡོད་པ་དེས་28%བཟུང་ཡོད།

བོད་རྒྱ་ཁྱིམ་ཚང་ཆེ་མོ་དེའི་ནང་ཚང་མས་ཕན་ཚུན་བརྩི་འཇོག་དང་། འཆམ་མཐུན་མཉམ་གནས། གཅེན་གཅུང་ལྟར་བརྩེ་བ། འཕེལ་རྒྱས་མཉམ་གཉེར་བཅས་བྱེད་ཀྱི་ཡོད། གཏམ་བཟང་དང་དཀའ་ངལ་ཡོད་ཚེ་ཚང་མས་ཕན་ཚུན་བཀྲ་ཤིས་བདེ་ལེགས་ཞུ་བ་དང་རོགས་རམ་བྱེད་རེས་བྱེད་ཀྱི་ཡོད། འགལ་ཟླ་དང་རྩོད་གཞི་ཐོན་སྐབས་ཚང་མས་ཕན་ཚུན་བཟོད་བསྲན་དང་། བསམ་ཤེས་བཅས་བྱས་ཏེ་བདག་སྐྱོང་དུམ་བུ་ཡོངས་སུ“མཐུན་སྒྲིལ་ལ་བརྟེན་ནས་འཕེལ་རྒྱས་ལ་སྐུལ་འདེད་གཏོང་བ་དང་། འཕེལ་རྒྱས་ལ་བརྟེན་ནས་མཐུན་སྒྲིལ་སྲུང་སྐྱོང་བྱེད་པའི་རྣམ་པ་བཟང་པོ་ཞིག་ཆགས་ཡོད”

ལོ་ལྟར་སྤེལ་བའི་མི་རིགས་མཐུན་སྒྲིལ་གྱི་སློབ་གསོའི་བྱེད་སྒོའི་ཁྲོད་ཆབ་མདོའི་གཞུང་ལམ་བདག་སྐྱོང་དུམ་བུས་ཟླ་བར་བརྟེན་ནས་ལོར་སྐུལ་འདེད་བཏང་སྟེ“དམ་འཛིན་གསུམ”ཐུབ་པ་བྱས་པ་སྟེ། གཅིག་ནས་འཆར་འགོད་ལ་དམ་འཛིན་བྱས་ཏེ་ལམ་ལུགས་དང་བྱེད་ཐབས་བཟོ་བ་དང་། གཉིས་ནས་དོན་འཁྱོལ་ལ་དམ་འཛིན་བྱས་ཏེ་ཞིབ་བཤེར་ལ་སྐུལ་ལྕག་བྱེད་པ། གསུམ་ནས་འགོ་ཁྲིད་ལས་བྱེད་པའི་དཔེ་སྟོན་ནུས་པར་དམ་འཛིན་བྱེད་པ་བཅས་རེད།

“དམ་འཛིན་གསུམ”ལག་ལེན་བསྟར་མ་ཐག་ཆབ་མདོའི་གཞུང་ལམ་བདག་སྐྱོང་དུམ་བུའི་ཀྲི་པུའི“ཚན་ཁག་གཅིག་གི་མིས”རང་ངོས་ནས་འགོ་བཙུགས་ཏེ་མར་ཁེ་སི་རིང་ལུགས་ཀྱི་མི་རིགས་ཀྱི་རིགས་པའི་གཞུང་ལུགས་དང་ཏང་གི་མི་རིགས་སྲིད་ཇུས་ལམ་ལུགས་སློབ་སྦྱོང་མཐའ་འཁྱོངས་བྱེད་པ་དང་དམངས་གཙོའི་འཚོ་བའི་ཚོགས་འདུའི་ལམ་ལུགས་མཐའ་འཁྱོངས་བྱས་ཏེ་བདག་སྐྱོང་དུམ་བུའི་ཚན་ཁག་གི་ཁོངས་མིས་ཏང་གི་མི་རིགས་སྲིད་ཇུས་ལག་བསྟར་དོན་འཁྱོལ་བྱེད་པ་དང་མི་རིགས་མཐུན་སྒྲིལ་ལ་ཤུགས་སྣོན་རྒྱག་པའི་ཐད་ཀྱི་གནད་དོན་ལ་རྟག་ཏུ་ཞིབ་བཤེར་བྱེད་པ་དང་འབྲེལ་སྐྱོན་བརྗོད་དང་རང་སྐྱོན་རང་བརྗོད་བྱས་པ་རེད།

དུས་རྒྱུན་འཚོ་བའི་ཁྲོད་ཆབ་མདོའི་གཞུང་ལམ་བདག་སྐྱོང་དུམ་བུའི་འགོ་ཁྲིད་ཀྱིས་རྟག་ཏུ་ཚན་པའི་ལས་ཐོག་ལས་བཟོ་དང་དེ་བཞིན་ལས་འཁྱུར་ངལ་གསོ་རྒྱག་མཁན་སྒྲིག་འཛུགས་བྱས་ནས་སྙིང་གཏམ་ཤོད་པ་དང་གྲོས་མོལ་བྱས་ཏེ་དུས་ཐོག་ཏུ་མི་རིགས་ཐད་ཀྱི་བརྟན་ལྷིང་མིན་པའི་རྒྱུ་རྐྱེན་ཤེས་རྟོགས་དང་གྲལ་བཤེར་བྱེད་པ་དང་། དུས་ཐོག་ཏུ་མི་རིགས་དང་འབྲེལ་བ་ཡོད་པའི་འགལ་ཟླ་དང་རྩོད་གཞི་ཐག་གཅོད་ཡག་པོ་བྱས་ཏེ་འབྱུང་རྩ་ནས་མེད་པ་བཟོས་པ་རེད།

བདག་སྐྱོང་ལས་ཁུལ་གྱི་མཁྲེགས་ཆས་སྒྲིག་བཀོད་ལེགས་སུ་བཏང་བ་མ་ཟད། ད་དུང་ཆ་སྒྲིག་རོགས་སྐྱོར་དང་། འཚམས་འདྲིར་བསྐྱོད་པ། ཞལ་འདེབས་རྒྱག་པ་སོགས་གཅེས་སེམས་འབུལ་བའི་བྱེད་སྒོ་རབ་དང་རིམ་པ་སྤེལ་ནས་དུམ་བུ་ཡོངས་ཀྱི་དཀའ་ངལ་ཡོད་པའི་ལས་བཟོར་ཁྱིམ་ཚང་ཆེ་མོའི་དྲོ་སྐྱིད་ཚོར་བ་བྱས་ཡོད། 2016ལོ་ནས་བཟུང་། ཆབ་མདོའི་གཞུང་ལམ་བདག་སྐྱོང་དུམ་བུས་བསྡོམས་དུད་ཚང་15ལ་འཚམས་འདྲི་བྱས་པར་ཁྱོན་སྒོར་4504རི་བའི་འཚམས་འདྲིའི་དངོས་པོ་སྤྲད་པ་རེད།

ལམ་སྐྱོང་བཟོ་པ་ཚང་མས“ལམ་སྐྱོང་རྒྱུ་དེ་བྱ་གཞག་ཏུ་བརྩི་བ་དང་ཏའོ་པན་ཁྱིམ་དུ་བརྩི་ཡི་ཡོད” ཁོང་ཚོས་སེམས་ཤུགས་དང་རྔུལ་ཆུར་བརྟེན་ནས་གཞུང་ལམ་རྦད་དེ་ཤར་གཏོང་ཐུབ་པའི་འགན་ལེན་བྱེད་པ་དང་ལང་ཚོ་དང་རྔུལ་ཆུར་བརྟེན་ནས་མི་རིགས་མཐུན་སྒྲིལ་གྱི་གླུ་དབྱངས་བརྩམས་པས་མི་རིགས་མཐུན་སྒྲིལ་གྱི་བརྩེ་སེམས་དེ་མི་རིགས་ཁག་གི་ལས་བཟོའི་དབར་མཚོན་པ་མ་ཟད་གཞུང་ལམ་གྱི་སྦྲེལ་ཐག་དེ་བརྒྱུད་སྤྱི་ཚོགས་ཡོངས་སུ་ཁོང་ཚོའི་མི་རིགས་མཐུན་སྒྲིལ་གྱི་བྱམས་སེམས་ཆེན་པོ་མཚོན་པར་བྱས་པ་རེད།

ཀྱག་ཀྱོག་གི་ལམ་བུ་རེ་རེར་ཆབ་མདོའི་གཞུང་ལམ་བདག་སྐྱོང་དུམ་བུའི་འབད་བརྩོན་ལྷོད་མེད་ཀྱི་ལོ་རྒྱུས་ཀྱི་ལམ་ཚད་བཀོད་པ་དང་།

ཤར་གཏོང་ཐུབ་པའི་ལམ་བུ་རེ་རེས་ཆབ་མདོའི་གཞུང་ལམ་བདག་སྐྱོང་དུམ་བུས་དམངས་ལ་བཅངས་པའི་བརྩེ་སེམས་ཟབ་མོ་མཚོན་ཡོད།

དེ་དག་ཚང་མ་ཆབ་མདོའི་གཞུང་ལམ་བདག་སྐྱོང་དུམ་བུའི་ལས་བཟོ་མི་རེ་ངོ་རེས་མཐུན་སྒྲིལ་རྡོག་རྩ་གཅིག་སྒྲིལ་དང་ཐུན་མོང་ཐོག་འཕེལ་རྒྱས་དོན་གཉེར་བྱེད་པའི་ཁྲོད་མངོན་པའི་རྣམ་པ་བཟང་པོ་ཞིག་ཡིན།