འདི་ནི་གཟེངས་བསྟོད་བྱ་ཡུལ་ཡིན་པ།

ཉེ་ཆར་གཉའ་ནང་རྫོང་གིས“2017ལོ་འཁོར་གྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་ལ་གཟེངས་བསྟོད་བྱེད་པའི་ཚོགས་ཆེན”འཚོགས་ཏེ་ཟུར་མཚོ་ཤང་ཏང་ཨུད་དང་སྲིད་གཞུང་སོགས་དཔེ་བཟང་མཉམ་སྡེབ་10དང་ལི་ཅེ་སོགས་དཔེ་བཟང་མི་སྒེར་30ལ་གཟེངས་བསྟོད་བྱས་པ་རེད།

ཉེ་བའི་ལོ་ཤས་རིང་གཉའ་ནང་རྫོང་གིས་མི་རིགས་མཐུན་སྒྲིལ་ལ་ཤུགས་སྣོན་རྒྱག་པ་ཐོག་མཐའ་བར་གསུམ་དུ་དཔལ་འབྱོར་འཕེལ་རྒྱས་མགྱོགས་སུ་གཏོང་བ་དང་སྤྱི་ཚོགས་ཞི་མཐུན་སྲུང་སྐྱོང་བྱེད་པའི་རྨང་གཞིའི་ལས་དོན་ལ་བརྩིས་པས། རྫོང་ཡོངས་སུ་སྤྱི་ཚོགས་བདེ་འཇགས་དང་། དཔལ་འབྱོར་འཕེལ་རྒྱས། དཔུང་སྡེ་དང་ས་གནས་འཆམ་མཐུན། མཐའ་མཚམས་བརྟན་ལྷིང་། མི་རིགས་ཁག་གི་མི་དམངས་བདེ་སྡོད་ལས་བརྩོན་བཅས་ཀྱི་དུས་བབ་བཟང་པོ་མངོན་ནས་སྔ་རྗེས་སུ“རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་མཉམ་སྡེབ”དང“རྒྱལ་ཡོངས་ཀྱི་གཉིས་བཀུར་དཔེ་བཟང་རྫོང” “རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་མཉམ་སྡེབ”སོགས་ཀྱི་གཟི་བརྗིད་མཚན་སྙན་ཐོབ་པ་དང་། མི་ཐེངས་20ལ་རང་སྐྱོང་ལྗོངས་དང་གྲོང་ཁྱེར་རིམ་པའི“མི་རིགས་མཐུན་སྒྲིལ་གྱི་དཔེ་བཟང་མི་སྒེར”གྱི་མཚན་སྙན་ཐོབ་པ། ལྷག་དོན་དུ“4·25”ཡི་ས་ཡོམ་བརྒྱབ་རྗེས་གཉའ་ནང་རྫོང་གི་ལས་རིགས་ཁག་དང་ལས་གནས་ཁག་ཏུ་དཀའ་ངལ་ལ་མི་སྐྲག་པ་དང་ཐེངས་མང་ཕམ་ཡང་ཡིད་ཐང་མི་ཆད་པའི་སྔོན་ཐོན་མི་སྒེར་མང་དག་ཅིག་ཐོན་ཡོད།

མི་རིགས་མཐུན་སྒྲིལ་ཡར་ཐོན་གཏོད་པའི་ལས་དོན་སྐས་རིམ་གསར་པ་ཞིག་ཏུ་སྐུལ་འདེད་གཏོང་ཆེད། ལོ་འགོར་གཉའ་ནང་རྫོང་གིས་མི་རིགས་མཐུན་སྒྲིལ་གཏོད་པའི་གཞུང་ལས་ཁང་བཙུགས་པ་མ་ཟད། རྫོང་ཨུད་དང་རྫོང་སྲིད་གཞུང་གི་འགོ་ཁྲིད་གཙོ་བོས་ཙུའུ་ཀྲང་དང་། རྫོང་ཨུད་ཀྱི་རྒྱུན་ཨུ་དང་། སྲིད་གཞུང་གི་རྫོང་དཔོན་གཞོན་པ། དེ་བཞིན་ཤང་གྲོང་ཁག་དང་། རྫོང་ཐད་གཏོགས་སྡེ་ཚན། གཉའ་ནང་དུ་བཅའ་སྡོད་ཚན་པ་ཁག་བཅས་ཀྱིས་ཁོངས་མི་བྱས་པའི་ལས་དོན་གྱི་ཆེད་དམིགས་ཚན་ཁག་བཙུགས་ཏེ་རིམ་པ་གཅིག་གིས་རིམ་པ་གཅིག་ལ་དམ་འཛིན་དང་རིམ་པ་བཞིན་དོན་འཁྱོལ་བྱེད་པའི་ལས་ཀའི་རྣམ་པ་ཆགས་པར་བྱས་པ་རེད།

གོམ་སྟབས་རྗེས་མར་གཉའ་ནང་རྫོང་གིས་མི་རིགས་མཐུན་སྒྲིལ་སློབ་གསོའི་རྣམ་པ་དང་དྲིལ་བསྒྲགས་ཀྱི་གཞི་རྟེན་གསར་པ་བཏོད་དེ“སྣང་ཆེན་བཞི་དང་དགའ་ཞེན་བཞིའི”བརྗོད་དོན་གཙོ་བོའི་སློབ་གསོ་ལག་ལེན་བྱེད་སྒོ་དང་ཟུང་འབྲེལ་གྱིས་བཞུགས་མོལ་ཚོགས་འདུ་འཚོགས་པ་དང་། སྐོར་སྐྱོད་སྒྲོག་འགྲེལ་བྱེད་པ། རིག་རྩལ་འཁྲབ་སྟོན་བྱེད་པ་སོགས་རྣམ་པ་སྣ་ཚོགས་བརྒྱུད་ཀྲུང་གོ་གུང་ཁྲན་ཏང་གི་བྱས་རྗེས་རླབས་པོ་ཆེ་དྲིལ་བསྒྲགས་ཤུགས་ཆེན་བྱས་ཏེ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་གྱི་གཉའ་ནང་རྫོང་གི་དཔལ་འབྱོར་དང་། ཆབ་སྲིད། རིག་གནས། སྤྱི་ཚོགས་བཅས་འཛུགས་སྐྲུན་དང་དེ་བཞིན་ཏང་འཛུགས་སྐྱོང་ལ་ཐོབ་པའི་གྲུབ་འབྲས་གང་ལེགས་མངོན་པར་བྱས་ནས་སྤྱི་ཚོགས་ཡོངས་སུ་སྔོན་ཐོན་ལ་སློབ་སྦྱོང་དང་། སྔོན་ཐོན་གྱི་རྗེས་སུ་འབྲང་བ། མཐུན་སྒྲིལ་ལ་སྐུལ་མ་གཏོང་བ། འཕེལ་རྒྱས་དོན་གཉེར་བཅས་ཀྱི་རྣམ་པ་ཟབ་མོ་ཆགས་པ་བྱས་ཐོག་ཏང་གི་ཚོགས་ཆེན་བཅུ་དགུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་བཞིན་ཡོད།