ལྷོ་ཁ་གོང་དཀར་རྫོང་དགོན་སྟོད་གྲོང་ཚོ་ནི་ཞིང་ཆེན་ལམ་101ལྷོ་རྒྱུད་ཀྱི་སྤྱི་ལེ་3ཙམ་གྱི་སར་གནས་པ་དང་ས་བབ་མཐོ་ཚད་སྨི་3550ཟིན་པ་དང་གྲོང་ཚོ་དེ་ཡོངས་སུ་དུད་ཚང་296དང་མི་1349ཡོད་པའི་ནང་མི་རིགས་མཐུན་སྒྲིལ་གྱི་ཁྱིམ་ཚང་21ཡོད། “ཕན་ཚུན་དགའ་གཅེས་ངང་རྒྱ་བོད་ཁྱིམ་ཚང་གཅིག་ཏུ་གནས་ནས་གངས་ལྗོངས་ས་མཐོའི་ཐོག་གི་ཇ་དང་ཚྭ་ལྟ་བུའི་འབྲེལ་བ་ཡིན་པ”ནི་དགོན་སྟོད་གྲོང་ཚོའི་མི་རིགས་མཐུན་སྒྲིལ་དང་འཆམ་མཐུན་མཉམ་གནས་ཀྱི་མཚོན་ཚུལ་ཡག་ཤོས་ཤིག་ཡིན་པས་མཐུན་སྒྲིལ་གྱི་མེ་ཏོག་དེ་གར་རབ་ཏུ་བཞད་ནས་ཡིད་དབང་འཕྲོག་པ་ཞིག་ཡོད།

འདི་ལོ་ལོ་33ལ་སླེབས་པའི་ཁྲ་ཁོག་ནི་གཤིས་རྒྱུད་བཟང་བའི་བོད་རིགས་བུ་མོ་ཞིག་ཡིན་པ་དང་། 2007ལོར་རང་ཉིད་ཀྱི་མི་ཚེའི་དོན་ཆེན་མང་པོ་བསྒྲུབས་པ་སྟེ་དགའ་རོགས་སྒྲིག་པ་དང་། གཉེན་སྒྲིག་བྱེད་པ། ཕྲུ་གུ་སྐྱེ་བ་སོགས་བྱས་ནས་ད་ཆ་ཁྱིམ་ཚང་གི་འཚོ་བ་ཧ་ཅང་སྐྱིད་པོ་ཞིག་སྐྱེལ་བཞིན་ཡོད་པ་དང་། བཟའ་ཟླས་ཁོ་མོར་བྱམས་སྐྱོང་ཆེན་པོ་བྱེད་པ་མ་ཟད། ཕྲུ་གུའང་ཁ་ལ་ཉན་པོ་ཡོདཁྲ་ཁོག་གིས་ང་ནི“བདེ་སྐྱིད་ལྡན་པ”ཞིག་ཡིན་ཞེས་བཤད།

རང་ཉིད་ཀྱི་བཟའ་ཟླ་ལི་ཅུན་གྱི་སྐོར་གླེང་སྐབས་ཁྲ་ཁོག་གིས་དགའ་ཚོར་ཆེན་པོའི་ངང“ང་ཚོ་ནི་ལྷ་སར་གླ་པ་བྱེད་སྐབས་ཕན་ཚུན་ངོ་ཤེས་བྱུང་། ཁོང་ལས་ལ་བརྩོན་ཞིང་དོ་ནན་ཆེ་བ་དང་ཀུན་སྤྱོད་ལེགས་ལ་སེམས་པ་བཟང་བ། ང་ལ་ཧ་ཅང་ཡག་པོ་བྱེད་ཀྱི་འདུག”ཅེས་བཤད།

གཉེན་སྒྲིག་ཐད་གཉེན་ཉེ་ཚོས་བཀག་འགོག་བྱས་ཡོད་མེད་སྐོར་གླེང་སྐབས་ཁྲ་ཁོག་གིས་འཛུམ་དམུལ་དམུལ་ངང“བསམ་འཆར་མི་མཐུན་པ་བྱུང་ཡོད་ཀྱང་ཚང་མ་ངའི་གཅེན་མོ་རྒན་པས‘ཐག་བཅད་ཡོད’ཅེས་བཤད།

ཁྲ་ཁོག་གི་གཅེན་མོ་རྒན་པ་ཟླ་བ་སྒྲོལ་མས་གསར་འགོད་པར་ཕ་མ་གཉིས་སྔ་ས་ནས་ཚེ་ལས་འདས་པས་གཅུང་མོར་བཟའ་ཟླ་ཡག་པོ་ཞིག་སྔོན་མ་ནས་འཚོལ་འདོད་ཡོད། “དེ་གོང་ངས་གཅུང་མོར་དགའ་རོགས་ས་ཆ་གང་ནས་ཡིན་མིན་ལ་མ་བལྟོས་པར་ཁ་ཞེ་གཉིས་མེད་ཀྱིས་སོ་སོར་དགའ་པོ་བྱེད་མཁན་ཞིག་ཐུག་ན་ངོ་རྒོལ་བྱེད་ཀྱི་མིན”ཞེས་ཤོད་མྱོང་ཡོད། “སྐབས་དེ་དུས་ཁྲ་ཁོག་གིས་ལི་ཅུན་ཁྱིམ་དུ་ཁྲིད་དེ་ལྟ་རུ་བཅུག་བྱུང་། ལི་ཅུན་གྱིས་སྒོ་འཛུལ་མ་ཐག་ང་ལ་བ་ཕྱུགས་ཀྱི་ལྟོ་སྟེར་རོགས་དང་། ཁ་ལག་བཟོ་རོགས། ཕྲུ་གུར་རྩེད་མོ་རྩེ་རོགས་སོགས་བྱས་བྱུང་བས་ཁོང་ནི་སེམས་བཟང་ལ་དོ་དོ་ནན་ནན་གྱི་གཞོན་ནུ་ཞིག་ཡིན་པ་མཐོང་བྱུང་ཞེས་ཟླ་བ་སྒྲོལ་མས་ཕྱིར་དྲན་བྱས་ནས་བཤད།

གཉེན་སྒྲིག་བྱས་རྗེས་ལི་ཅུན་གྱིས་བོད་སྐད་སྦྱངས་པ་དང་ཁྲ་ཁོག་གིས་རྒྱ་སྐད་སྦྱངས་ནས་བཟའ་ཚོ་གཉིས་པོས་ཡུལ་སྲོལ་གོམས་གཤིས་དང་འཚོ་བ་སྐྱེལ་སྟངས་ཐད་ཕན་ཚུན་བསམ་ཤེས་བྱས་ཏེ་འཚོ་བ་སྐྱིད་པོ་ཞིག་སྐྱེལ་བཞིན་ཡོད།

2016ལོའི་ལོ་མཇུག་ཏུ་ཁྲ་ཁོག་བཟའ་ཚོ་གཉིས་ཀྱིས་གླ་པ་བྱས་ནས་བསགས་པའི་དངུལ་ནས་ཁག་གཅིག་བེད་སྤྱད་དེ་གྲོང་ཚོའི་ནང་བོད་བཟོའི་ཐོག་ཁང་སྨི་ངོས་གྲུ་400ལྷག་ཙམ་ཞིག་བརྒྱབ་ཡོད། 2017ལོའི་ཟླ་4པར་ཟླ་བ་སྒྲོལ་མའི་ཁང་པ་གསར་པ་རྒྱག་སྐབས་ལི་ཅུན་གྱིས་ལས་ཀ་བཞག་ནས་ཁང་པ་རྒྱག་རྒྱུའི་ལས་ལ་བྲེལ་བས་གྲོང་ཚོའི་ནང་གི་མི་ཚང་མས་རྒྱ་རིགས་ཀྱི་མག་པ་ལི་ཅུན་ལ་མཐེ་བོང་བསྒྲེངས་ནས་བསྔགས་བརྗོད་བྱས་ཡོད།

1998ལོར་དགོན་སྟོད་གྲོང་ཚོར་རྒྱ་རིགས་ཀྱི་མག་པ་ཨང་དང་པོ་སྔ་ས་ནས་བྱུང་ཡོད། འདི་ལོ་50ལྷག་ཙམ་ལ་སླེབས་པའི་པ་སངས་ནི་དགོན་སྟོད་གྲོང་ཚོའི་ཀྲི་པུའུ་ཧྲུའུ་ཅི་གཞོན་པ་ཡིན་པ་དང་། ཁོང་གིས་གསར་འགོད་པར་སྐབས་དེར་ཕྱིར་གླ་པར་ཕྱིན་པའི་བུ་མོ་དབྱངས་ཅན་གྱིས་རྒྱ་རིགས་ཀྱི་གཞོན་ནུ་གཅིག་ཁྲིད་འདུག ཁོང་གཉིས་པོས་ཕྱོགས་གཉིས་པོའི་ཕ་མར་གོ་སྐོན་བློ་འགུག་བྱས་རྗེས་གཉེན་སྒྲིག་བྱས་ནས་འཚོ་བ་སྐྱིད་པོ་ཞིག་སྐྱེལ་བཞིན་ཡོད་ཅེས་བརྗོད་བྱུང་།

“གཞོན་ནུ་དེར་ལོ་ཆུང་དུས་ང་ཚོས་ཁོང་ལ་ཞའོ་ལིའུ་ཞེས་འབོད་པ་དང་རྗེས་སུ་ལའོ་ལིའུ་ཞེས་འབོད་ཀྱི་ཡོད། ལོ་ཤས་གོང་ཁོང་གིས་བཟའ་ཟླ་ཁྲིད་དེ་ནང་སར་ཕྲུ་གྲུར་ལྟ་བར་ཕྱིན་སོང”ཞེས་པ་སངས་ཀྱིས་སྤོབས་སེམས་དང་བཅས་དེ་ལྟར་བཤད། ཁོང་གིས“དེ་རྗེས་གྲོང་ཚོའི་ནང་མི་རིགས་མཐུན་སྒྲིལ་གྱི་ཁྱིམ་ཚང་རིམ་བཞིན་མང་དུ་ཕྱིན་ཡོད། ང་ཚོའི་གྲོང་ཚོའང་ཉེ་རིང་གང་སར་སྐད་གྲགས་ཆོད་པའི་མི་རིགས་མཐུན་སྒྲིལ་གྱི་གྲོང་ཚོ་ཞིག་ཏུ་གྱུར་ཡོད”ཅེས་བཤད།

གོང་དཀར་རྫོང་མི་རིགས་ཆོས་དོན་ཅུས་ཀྱི་ཅུས་ཀྲང་གཞོན་པ་ཆོས་རྒྱལ་གྱིས“མི་རིགས་མི་འདྲ་བའི་གཞོན་ནུ་གཉེན་སྒྲིག་བྱས་རྗེས་བཟའ་ཚང་འཆམ་མཐུན་དང་། ཁྱིམ་ཚང་གི་ཁོར་ཡུག ཁྱིམ་མཚེས་དབར་གྱི་འབྲེལ་བ་བཅས་ཚང་མ་ཧ་ཅང་ཡག་པོ་ཡོད་པ་མ་ཟད། ལྷག་པར་དུ་དཀའ་སྤྱད་ངལ་རྩོལ་གྱིས་ཕྱུག་འགྱུར་དང་གྲོང་ཚོའི་རྣམ་པ་བཅོས་སྒྲིག་བྱ་རྒྱུ་སོགས་ཀྱི་ཐད་སྣེ་ཁྲིད་ཀྱི་ནུས་པ་ཡག་པོ་ཐོན་པ་ང་ཚོས་རྟོགས་བྱུང་། ཟླ་7པར་རྫོང་གིས་དགོན་སྟོད་གྲོང་ཚོར་གཞོན་ནུའི་མཉམ་སྤྲོའི་ཚོགས་འདུ་ཞིག་འཚོག་རྩིས་ཡོད་པས་གཉེན་སྒྲིག་བྱས་མེད་པའི་གཞོན་ནུ་ཚོ་དེའི་ནང་ཞུགས་རྒྱུར་དགའ་བསུ་ཞུ་རྒྱུ་ཡིན”ཞེས་བཤད།