ཉིན་ཤས་གོང“སྣང་ཆེན་བཞི་དང་དགའ་ཞེན་བཞིའི”བརྗོད་དོན་གཙོ་བོའི་སློབ་གསོ་ལག་ལེན་བྱེད་སྒོ་དང་ལྷག་པར་དུ“མཐུན་སྒྲིལ་ལ་སྣང་ཆེན་གྱིས་མེས་རྒྱལ་ལ་དགའ་ཞེན་བྱ་རྒྱུའི”སྐོར་གྱི་དངོས་ཡོད་དོན་སྙིང་ལ་དམིགས་ནས་གསར་འགོད་པས་རང་སྐྱོང་ལྗོངས་སྤྱི་ཚོགས་ཚན་རིག་ཁང་གི་ཡོན་ཀྲང་གཞོན་པ་དང་། མར་ཁེ་སི་རིང་ལུཌ་ཀྱི་རིཌ་པའི་གཞུང་ལུགས་ཞིབ་འཇུག་སུའོ་ཡི་སུའོ་ཀྲང་། ཞིབ་འཇུག་པ་བཅས་ཡིན་པའི་ཝང་ཁྲུན་ཧོན་ལ་བཅར་འདྲི་ཞུས་པ་ཡིན།
“ད་ཐེངས་ལྗོངས་ཡོངས་ཀྱི་ཁྱབ་ཁོངས་སུ‘སྣང་ཆེན་བཞི་དང་དགའ་ཞེན་བཞིའི’བྱེད་སྒོ་སྤེལ་ནས་ཏང་གི་ཚོགས་ཆེན་བཅུ་དགུ་པར་བསུ་བ་ཞུ་བའི་བརྗོད་དོན་གཙོ་བོའི་སློབ་གསོའི་བྱེད་སྒོ་སྤེལ་བ་དེ་ནི་རང་སྐྱོང་ལྗོངས་ཀྱི་ཏང་གི་འཐུས་མི་ཚོགས་ཆེན་ཐེངས་དགུ་པའི་དགོངས་དོན་ལག་བསྟར་དོན་འཁྱོལ་བྱེད་པའི་བྱེད་ཐབས་གལ་ཆེན་ཞིག་ཡིན་པ་དང‘མཐུན་སྒྲིལ་ལ་སྣང་ཆེན་གྱིས་མེས་རྒྱལ་ལ་དགའ་ཞེན་བྱ་རྒྱུ’དེ་ལྷུ་ཚིགས་གལ་ཆེན་དུ་བརྩིས་པ་དེ་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ངོས་ནས་བརྗོད་ན་གལ་འགངས་ཆེ་བའི་དངོས་ཡོད་ཀྱི་དོན་སྙིང་ལྡན་ཡོད”ཝང་ཁྲུན་ཧོན་གྱིས“སྣང་ཆེན་བཞི་དང་དགའ་ཞེན་བཞིའི”བརྗོད་དོན་གཙོ་བོའི་སློབ་གསོ་ལག་ལེན་བྱེད་སྒོ་སྤེལ་བ་དེ་ནི་ལྗོངས་ཡོངས་ཀྱི་མི་རིགས་ཁག་གི་མང་ཚོགས་ཚོས་ཡང་དག་པའི་མེས་རྒྱལ་གྱི་ལྟ་བ་དང་།མི་རིགས་ཀྱི་ལྟ་བ། ཆོས་ལུགས་ཀྱི་ལྟ་བ། རིག་གནས་ཀྱི་ལྟ་བ་བཅས་བརྟན་པོ་བཙུགས་ཏེ་མི་རིགས་ཁག་ཐུན་མོང་ཐོག་མཐུན་སྒྲིལ་འབད་འཐབ་དང་ཐུན་མོང་ཐོག་གྲ་རྒྱས་འཕེལ་རྒྱས་འགྲོ་རྒྱུ་མཐའ་འཁྱོངས་དང་། ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་ཆེ་རུ་གཏོང་བ། མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྐུལ་འདེད་གཏོང་བ་བཅས་བྱས་ཏེ“མཐུན་སྒྲིལ་བརྟན་ལྷིང་ནི་བདེ་སྐྱིད་དང་ཁ་ཕྲལ་ཟང་ཟིང་ནི་ཆག་སྒོ་ཡིན་པའི”གནས་ལུགས་རྟོགས་ཐུབ་པ་དང་རང་གི་མིག་འབྲས་ལ་གཅེས་སྤྲས་བྱེད་པ་བཞིན་མི་རིགས་མཐུན་སྒྲིལ་ལ་གཅེས་སྤྲས་དང་རང་གི་སྲོག་ལ་གཅེས་སྤྲས་བྱེད་པ་བཞིན་མི་རིགས་མཐུན་སྒྲིལ་ལ་གཅེས་སྤྲས་བྱས་ཏེ་མི་རིགས་མཐུན་སྒྲིལ་སྲུང་སྐྱོང་བྱེད་མཁན་དང་། སྐུལ་འདེད་གཏོང་མཁན། ལག་ལེན་བྱེད་མཁན་བཅས་བྱེད་དགོས་པའི་ངོས་འཛིན་གནང་བ་རེད།
ཝང་ཁྲུན་ཧོན་གྱིས་མིག་སྔར་ཏཱ་ལ་སྐྱེ་ཕྲེང་བཅུ་བཞི་པའི་རུ་ཚོགས་ཀྱི་ཁ་ཕྲལ་གཏོར་བཤིག་གི་བྱེད་སྤྱོད་ནི་བོད་ཀྱི་སྤྱི་ཚོགས་ཞི་མཐུན་བརྟན་ལྷིང་ལ་ཤུགས་རྐྱེན་བཟོ་མཁན་གྱི་རྒྱུ་རྐྱེན་གཙོ་བོ་ཡིན། “མཐུན་སྒྲིལ་ལ་སྣང་ཆེན་གྱིས་མེས་རྒྱལ་ལ་དགའ་ཞེན་བྱེད་པའི”སློབ་གསོ་སྤེལ་རྒྱུ་དེ་ལྗོངས་ཡོངས་ཀྱི་ཞིང་འབྲོག་མང་ཚོགས་དང་། གཞོན་ནུ་ལོ་ཆུང་གི་སློབ་མ། དགོན་སྡེའི་གྲྭ་བཙུན་བཅས་ཀྱིས་རང་རྒྱལ་ནི་མི་རིགས་མང་བའི་ཁྱིམ་ཚང་ཆེ་མོ་ཞིག་ཡིན་པ་དང་། བོད་ནི་གནའ་སྔ་མོ་ནས་བཟུང་མེས་རྒྱལ་གྱི་ཁ་འབྲལ་ཐབས་མེད་པའི་ཆ་ཤས་ཤིག་ཡིན་པ། བོད་ཀྱི་མི་རིགས་ཁག་གི་མང་ཚོགས་ནི་ཀྲུང་ཧྭ་མི་རིགས་ཀྱི་གྲུབ་ཆ་གལ་ཆེན་ཞིག་ཡིན་པ་བཅས་ཤེས་རྟོགས་ཐུབ་རྒྱུར་ཕན་ཐོགས་ཡོད། བསམ་བློའི་ཐོག་ནས་ཡང་དག་པའི་འདུ་ཤེས་བརྟན་པོ་འཛུགས་པ་དང་ཡང་དག་པའི་འདུ་ཤེས་ཐོག་ནས་ཏཱ་ལའི་རུ་ཚོགས་ཀྱི་བསམ་བློའི་སིམ་འཛུལ་མཐའ་གཅིག་ཏུ་འགོག་སྟེ་རང་རྟོགས་ངང་མེས་རྒྱལ་གཅིག་གྱུར་སྲུང་སྐྱོང་དང་། མི་རིགས་ཁ་ཕྲལ་གཏོང་རྒྱུར་ངོ་རྒོལ། སྤྱི་ཚོགས་བརྟན་ལྷིང་སྲུང་སྐྱོང་བཅས་བྱེད་དགོས་ཞེས་བསྟན་གནང་བ་རེད།
ཝང་ཁྲུན་ཧོན་གྱིས“མཐུན་སྒྲིལ་ལ་སྣང་ཆེན་གྱིས་མེས་རྒྱལ་ལ་དགའ་ཞེན་བྱ་རྒྱུའི”སློབ་གསོ་གལ་ཆེའི་ལས་དོན་དུ་བརྩི་བ་དེ་ཞིང་འབྲོག་མང་ཚོགས་དང་། གཞོན་ནུ་ལོ་ཆུང་གི་སློབ་མ། དགོན་སྡེའི་གྲྭ་བཙུན་བཅས་ཀྱིས་མེས་རྒྱལ་གྱི་ལོ་རྒྱུས་དང་ད་ལྟའི་གནས་ཚུལ་དེ་བས་ཤེས་རྟོགས་ཐུབ་རྒྱུ་དང་ཀྲུང་གོ་ནི་གཅིག་གྱུར་གྱི་མི་རིགས་མང་བའི་རྒྱལ་ཁབ་གཅིག་དང་བོད་ནི་གནའ་སྔ་མོ་ནས་བཟུང་མེས་རྒྱལ་གྱི་ཁ་འབྲལ་ཐབས་མེད་པའི་ཆ་ཤས་ཤིག་ཡིན་པའི་གནས་ལུགས་རྟོགས་རྒྱུ་དང་། ཀྲུང་ཧྭ་མི་རིགས་གྲུབ་པའི་བརྒྱུད་རིམ་ནང་བོད་རིགས་ནི་ཀྲུང་ཧྭ་མི་རིགས་ཀྱི་གྲུབ་ཆ་གལ་ཆེན་ཡིན་པའི་གནས་ལུགས་སྔར་བས་རྟོགས་རྒྱུ། མི་རིགས་མཐུན་སྒྲིལ་ནི་ཀྲུང་ཧྭ་མི་རིགས་ཀྱི་སྲོག་རྩ་ཡིན་པའི་གནས་ལུགས་གསལ་པོ་རྟོགས་པ་བྱས་ནས་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་འཛུགས་རྒྱུ་བཅས་ལ་ཕན་ཐོགས་ཡོད། སློབ་གསོའི་བྱེད་སྒོ་བརྒྱུད་ཏང་གི་མི་རིགས་ཆོས་ལུགས་སྲིད་ཇུས་ཤེས་རྟོགས་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཤེས་རྟོགས། ཀྲུང་གོ་གུང་ཁྲན་ཏང་དང་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལ་བཅངས་པའི་མོས་སེམས་སྔར་བས་ཆེ་རུ་གཏོང་བ་བཅས་བྱས་ཏེ་རྒྱུན་ཆད་མེད་པར་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་འགྲོ་ལམ་གྱི་གདེང་ཚོད་དང་། ལམ་ལུགས་ཀྱི་གདེང་ཚོད། རིགས་པའི་གཞུང་ལུགས་ཀྱི་གདེང་ཚོད། རིག་གནས་ཀྱི་གདེང་ཚོད་བཅས་ལ་ཤུགས་སྣོན་རྒྱག་དགོས་ཞེས་གསུངས་པ་རེད།
ཝང་ཁྲུན་ཧོན་གྱིས་མེས་རྒྱལ་ལ་དགའ་ཞེན་བྱ་རྒྱུ་དེ་མཐུན་སྒྲིལ་ལ་སྣང་ཆེན་བྱེད་པའི་སྔོན་འགྲོ་ཡིན་པ་དང་མཐུན་སྒྲིལ་ལ་སྣང་ཆེན་བྱ་རྒྱུ་དེ་མེས་རྒྱལ་ལ་དགའ་ཞེན་བྱེད་པའི་ལྡོག་མེད་ཀྱི་བླང་བྱ་ཡིན་པས་དེ་གཉིས་ཕན་ཚུན་ཁ་འབྲལ་ཐབས་མེད། མི་རིགས་མཐུན་སྒྲིལ་ལ་ཤུགས་སྣོན་རྒྱག་པ་དང་མེས་རྒྱལ་གཅིག་གྱུར་སྲུང་སྐྱོང་བྱ་རྒྱུ་དེ་མི་རིགས་ཁག་གི་ལས་བྱེད་མང་ཚོགས་ཀྱི་སློབ་སྦྱོང་དང་། འཚོ་བ། ལས་དོན་བཅས་ནང་ཁྱབ་པ་བྱེད་པ་དང་བོད་འདི་ཉིད་མི་རིགས་མཐུན་སྒྲིལ་གྱི་དཔེ་མཚོན་དུ་བསྐྲུན་རྒྱུ་དང“མི་རིགས་མཐུན་སྒྲིལ་ལ་ཤུགས་སྣོན་བརྒྱབ་སྟེ་མཛེས་སྡུག་ལྡན་པའི་བོད་ལྗོངས་བསྐྲུན་རྒྱུའི”སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་ལ་གཞིགས་ནས“མཐུན་སྒྲིལ་ལ་སྣང་ཆེན་གྱིས་མེས་རྒྱལ་ལ་དགའ་ཞེན་བྱ་རྒྱུ”དེ་རླབས་ཆེན་མེས་རྒྱལ་དང་སྤྱི་ཚོགས་རིང་ལུགས་ཀྱི་བོད་གསར་འཛུགས་སྐྲུན་བྱེད་པའི་རླབས་ཆེན་ལག་ལེན་དང་ལས་དོན་དངོས་ནང་མངོན་པ་བྱས་ཏེ་རླབས་ཆེན་མེས་རྒྱལ་འཛུགས་སྐྲུན་ཡག་པོ་བྱས་ནས་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་གྱི་བོད་ཀྱི་ལེའུ་མངོན་འགྱུར་བྱ་རྒྱུར་སྟོབས་ཤུགས་གསར་པ་གཅིག་སྡུད་བྱས་ནས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་མྱུར་པོ་དང་ཡུན་རིང་བདེ་འཁོད་ཡོང་རྒྱུར་སྐུལ་འདེད་གཏོང་དགོས་ཞེས་གསུངས་པ་རེད།