ཉིང་ཁྲི་གྲོང་ཁྱེར་བྲག་ཡིབ་གྲོང་རྡལ་གནས་གཞི་གྲོང་ཚོའི་ཀྲུའུ་རེན་ཐུབ་བསྟན་གྱིས་མི་རིགས་མཐུན་སྒྲིལ་ལས་དོན་གྱི་སྤྲོ་སེམས་དང་ཆོད་སེམས་ལ་བརྟེན་ནས་མང་ཚོགས་ལ་ལས་དོན་དངོས་དང་བྱ་བ་བཟང་པོ་སྒྲུབ་པ་དང་ཏན་ཏན་ཏིག་ཏིག་གི་ལས་ཀའི་སྤྱོད་ཚུལ་ལ་བརྟེན་ནས་རྒྱ་ཆེའི་མང་ཚོགས་ཀྱི་དགའ་བསུ་ཐོབ་པའི་མི་རིགས་མཐུན་སྒྲིལ་གྱི་དཔེ་བཟང་ལས་བྱེད་པ་ཞིག་ཏུ་གྱུར་ཡོད།
ལས་ཀ་དང་སློབ་སྦྱོང་ངམ་ཡང་ན་འཚོ་བའི་ཐད་གང་ཡིན་རུང་ཐུབ་བསྟན་གྱིས་དུས་རྟག་ཏུ་མང་ཚོགས་ལ་སེམས་ཁུར་བྱས་ནས་ལག་ལེན་དངོས་ནས་སྣེ་ཁྲིད་མིག་དཔེ་སྟོན་གྱི་ཡོད། གྲོང་ཚོའི་ཀྲུའུ་རེན་ཡིན་པའི་ངོས་ནས་ཁོང་གིས“གྲོང་ཚོའི་ཨུ་ལྷན་གཉིས”ཀྱི་ཚན་ཁག་འཛུགས་སྐྱོང་དང་མི་རིགས་མཐུན་སྒྲིལ་དང་བརྟན་ལྷིང་གི་ལས་དོན་གཙོ་བོར་འཇོག་རྒྱུ་མཐའ་འཁྱོངས་བྱས་ནས་རྟག་ཏུ“གྲོང་ཚོའི་ཨུ་ལྷན་གཉིས”ཚན་ཁག་དང་འབྲེལ་གཏུག་སྤེལ་རེས་བྱས་ཏེ་ཕན་ཚུན་ཡིད་ཆེས་དང་། ཕན་ཚུན་རྒྱབ་སྐྱོར། མཐུན་སྒྲིལ་རྡོག་རྩ་གཅིག་སྒྲིལ་བཅས་ཀྱི་ལས་ཀའི་རྣམ་པ་ཞིག་བཏོད་ཡོད། ཁོང་གིས་གྲོང་ཚོའི་ལས་བྱེད་པས་སློབ་སྦྱོང་ཡག་པོ་བྱེད་པ་དང་། ལས་ཀ་ཏན་ཏིག་བྱེད་པ། སྤྱོད་ཚུལ་བབ་ཆགས་པ། གཞན་དང་བསྟུན་མཁས་པ་བཅས་བྱེད་དགོས་ཞེས་རྟག་ཏུ་ཤོད་ཀྱི་ཡོད།
ཐུབ་བསྟན་གྱིས་སྒྲིག་སྲོལ་ལམ་ལུགས་ཁག་ཧུར་ཐག་ངང་འཐུས་སྒོ་ཚང་དུ་བཏང་བ་དང་དོན་ལ་དམིགས་པ་མ་གཏོགས་མི་ལ་མ་དམིགས་པ་དང་། ལས་དོན་སྒྲུབ་པར་ལམ་ལུགས་ལ་བརྟེན་པ། གཏམ་སྤྱོད་གཅིག་མཐུན། སྤྱོད་གཙང་རང་འདོམས། སྲིད་གཙང་དངོས་སྒྲུབ། སྒེར་གྱི་ཐོབ་ཤོར་ལ་མ་རྩོད་པ། ཐབས་བརྒྱ་ཇུས་སྟོང་གིས་མི་དམངས་མང་ཚོགས་ལ་ཞབས་འདེགས་ཞུས་ནས་བློ་ཁ་ཕྱོགས་ཤུགས་དང་། འབོད་སྐུལ་བྱེད་ཤུགས། གོང་བུ་འགྲིལ་ཤུགས་བཅས་ལྡན་པའི“གྲོང་ཚོའི་ཨུ་ལྷན་གཉིས”ཀྱི་ཚན་ཁག་གི་དཔུང་ཁག་ཅིག་བཏོད་པས་གནས་གཞི་གྲོང་ཚོ་ཡོངས་སུ་དམངས་གཙོའི་དོ་དམ་གྱི་ཁོར་ཡུག་བཟང་པོར་གྱུར་ཡོད།
དཔལ་འབྱོར་འཕེལ་རྒྱས་བྱུང་ཚེ་གཞི་ནས་དབུལ་སྒྲོལ་ཕྱུག་འགྱུར་བྱེད་ཐུབ་པ་དང་འབྱོར་འབྲིང་སྤྱི་ཚོགས་ཀྱི་འཚོ་བར་རོལ་ཐུབ། གྲོང་ཚོའི་སྣེ་ཁྲིད་པ་ཞིག་ཡིན་པའི་ཐུབ་བསྟན་གྱིས་སེམས་རྩ་འཁོལ་བ་དང་འབད་བརྩོན་ལ་བརྟེན་ནས་གནས་གཞི་གྲོང་ཚོའི་ཞིང་འབྲོག་པའི་འབབ་འཕར་ཆེད་དུ་ལེགས་སྐྱེས་ཧུར་ཐག་ཕུལ་ཡོད། ཁོང་གིས་ཐོག་མཐའ་བར་གསུམ་དུ་མང་ཚོགས་ཨང་དང་པོར་བཞག་པ་དང་གྲོང་ཚོ་ཡོངས་ཀྱི་དངོས་ཡོད་གནས་ཚུལ་དང་ཟུང་འབྲེལ་བྱས་ཏེ་འཕེལ་རྒྱས་ཀྱི་ཐབས་ཇུས་ཞིབ་འཇུག་བྱེད་པ་དང་། བསམ་ཕྱོགས་རྒྱ་ཆེ་རུ་གཏོང་བ། ནུས་ཤུགས་ཡོད་རྒུས་གྲོང་ཚོའི་ཁྱད་ལྡན་ཐོན་ལས་འཕེལ་རྒྱས་ཡོང་བར་རོགས་སྐྱོར་བྱེད་པ། གནས་གཞི་གྲོང་ཚོའི་ཏང་ཡོན་གྱི་ལས་གཏོད་དང་ཕྱུགས་རིགས་གསོ་ཚགས་རྟེན་གཞི་འཛུགས་སྐྱོང་མུ་མཐུད་ནས་འཐུས་སྒོ་ཚང་དུ་བཏང་སྟེ་ཕྱུགས་རིགས་གསོ་ཚགས་དང་དྲོད་ཁང་ཆེ་མོ་དེ་གྲོང་ཚོ་ཡོངས་ཀྱི་འཕེལ་རྒྱས་ཐོན་ལས་གཙོ་བོར་བརྩིས་པར་དཔལ་འབྱོར་གྱི་ཕན་འབྲས་ཡག་པོ་བྱུང་ཡོད་པ་རེད།