ཤིན་ཧྭ་གསར་འགྱུར་ཁང་ཟི་ལིང་ནས་ཟླ་1ཚེས་1ཉིན་གློག་འཕྲིན་འབྱོར་གསལ།　ཚེས་1ཉིན“ང་ཚོས་མཚོ་སྔོན་པོར་སྲུང་སྐྱོང་བྱེད་པའི་བྱ་སྤྱོད་སྤེལ”ཞེས་པ་བརྗོད་བྱར་བྱས་པའི་2017ལོའི་མཚོ་སྔོན་པོར་རྐང་ཐང་མར་བསྐྱོད་ནས་ལོ་གསར་བསུ་བའི་བྱེད་སྒོ་མཚོ་སྔོན་པོའི་ནུ་ལྕེ་མཛེས་ལྗོངས་ཁུལ་དུ་སྤེལ་བ་རེད།

“ཡུལ་བྱེས་བྱེད་སྒོའི་ནང་རྟག་ཏུ་ཞུགས་མཁན་ཚང་མར་སྣོད་བཅུད་སྲུང་སྐྱོང་བྱེད་པའི་འདུ་ཤེས་ཡོད།　དེ་རིང་ངས་འགྱིག་དམ་དང་ཐ་མག་རོ་ཏོ་ཁག་གཅིག་བསྒྲུགས་པ་ཡིན”ཞེས་ལོ་51ལ་སླེབས་པའི་མཱ་ཞའོ་ཅུན་རྐང་ཐང་མར་བསྐྱོད་པའི་བྱེད་སྒོའི་ནང་ཞུགས་ནས་ལོ་བདུན་བརྒྱད་སོང་ཞིང་།　དེ་རིང་ལན་ཀྲོའུ་ནས་ཐོན་ཏེ་བྱེད་སྒོར་ཞུགས་པའི་ཁོང་གིས་ཁོར་ཡུག་སྲུང་སྐྱོང་བྱས་ནས་རང་ཉིད་ཀྱི་སྤྲོ་བ་འཕེལ་བའི་བྱེད་སྟངས་དེ་ནི་ལོ་གསར་གྱི་ཉིན་དང་པོའི་དོན་སྙིང་ཆེ་ཤོས་ཡིན་པའི་ངོས་འཛིན་བྱེད་ཀྱི་ཡོད།

མཚོ་སྔོན་པོའི་མཛེས་ལྗོངས་ཁུལ་སྲུང་སྐྱོང་བེད་སྤྱོད་དང་དོ་དམ་ཅུས་ཀྱི་འབྲེལ་ཡོད་འགན་འཁུར་བས་བྱེད་སྒོ་དེ་2012ལོ་ནས་བཟུང་སྐབས་ལྔ་གཉེར་བ་དང་འདི་ལོར་རྐང་ཐང་མར་བསྐྱོད་རྒྱུར་དགའ་པོ་ཡོད་མཁན་4000ཙམ་ཞུགས་ཡོད།　བྱེད་སྒོ་དེ་གཉེར་བའི་དམིགས་ཡུལ་ནི་ཡུལ་བྱེས་བྱེད་སྒོ་དང་མཚོ་སྔོན་པོའི་དགུན་དུས་ཡུལ་སྐོར་ཟུང་འབྲེལ་དམ་ཟབ་བྱས་ཏེ།　རྐང་ཐང་མར་བསྐྱོད་དེ་བདེ་ཐང་གི་འདུ་ཤེས་མངོན་པར་བྱས་ཁར་ཐཱན་ཉུང་ཁོར་ཡུག་སྲུང་སྐྱོང་གི་སྣོད་བཅུད་ཡུལ་སྐོར་དང་སྣོད་བཅུད་ཤེས་དཔལ་གྱི་འདུ་ཤེས་བརྒྱུད་བསྒྲགས་བྱ་ཆེད་ཡིན་ཞེས་ངོ་སྤྲོད་བྱས་པ་རེད།

གཞན་ཡང་།　མཚོ་སྔོན་པོའི་མཛེས་ལྗོངས་ཁུལ་གྱིས་བྱེད་སྒོ་ཁག་རིམ་པར་སྤེལ་རྒྱུ་ཡིན་ཞིང་།　ངང་པ་གཅིག་རྗེས་གཉིས་མཐུད་ངང་དགུན་སྒྲོལ་ལ་ཡོང་བ་དང་སྦྲགས་མཛེས་ལྗོངས་ཁུལ་གྱིས“ངང་མཚོ”དང་མཛེས་ལྗོངས་པར་ལེན་པ་དང་།　འཁྱགས་རོམ་ཐོག་རྐང་ཐང་མར་སྐྱོད་པ།　དཔྱིད་དུས་མཚེའུ་དར་ཁ་ཞིག་པའི་མཛེས་ལྗོངས་སོགས་བཏོན་ཞིང་།　ཁོར་ཡུག་སྲུང་སྐྱོང་གི་སྤྱི་ཕན་བྱེད་སྒོ་དང་སྤྲོ་གསེང་རོལ་རྩེད་རྣམ་གྲངས་དག་གིས་རྒྱ་ཆེའི་ཡུལ་སྐོར་བ་ཚོར་ལོ་གསར་གྱི་རྣམ་པ་གསར་པ་ཞིག་གཏོད་བཞིན་འདུག