2015ལོའི་ཟླ་8པར། ཀྲུང་དབྱང་རྩ་འཛུགས་པུའུ་དང་། མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུའུ། རྒྱལ་ཁབ་འཕྲོད་བསྟེན་དང་འཆར་ལྡན་བུ་བཙའ་ཨུ་ལྷན་བཅས་ཀྱིས་སྨན་བཅོས་ཤེས་ལྡན་མི་སྣའི“ཚོགས་སྒྲིག་རྣམ་པའི”བོད་སྐྱོར་བྱ་རྒྱུའི་གཏན་འཁེལ་བྱས་ཏེ་རྒྱལ་ཡོངས་ཀྱི་ཞིང་ཆེན་དང་གྲོང་ཁྱེར་8ནས་སྨན་བཅོས་ཤེས་ལྡན་མི་སྣ་140ལྷག་ཙམ་བོད་དུ་ཡོང་བ་རེད།

སྨན་བཅོས་ལག་རྩལ་རྩེར་སོན་གྱིས། བོད་རྒྱ་སེམས་མཐུན་གྱི་རོགས་སྐྱོར་སྙིང་སྟོབས་བརྒྱུད་སྤྲོད་བྱས་པ།

ལེའོ་ཉིང་གི་བོད་སྐྱོར་སྨན་པ་ཁྲེན་དབྱིང་ཧན་ནང་སར་ལོག་རྒྱུ་ཡིན་པ་ཤེས་རྗེས། ནག་ཆུ་རྫོང་ནག་ཆུ་གྲོང་རྡལ་གྲོང་ཚོ་28པའི་འབྲོག་པ་ཚེ་རིང་གཡུ་སྒྲོན་གྱི་ནང་མི་རྣམས་སྨན་ཁང་དུ་བསྐྱོད་དེ་སྨན་པ་ཁོང་ལ་དཀར་གཙང་མཇལ་དར་ཕུལ།

ཚེ་རིང་གཡུ་སྒྲོན་གྱིས“སྨན་པ་ཁྲེན་ལགས་ལ་ཐུགས་རྗེ་ཆེ་ཞུ་རྒྱུ་ཡིན། ཁོང་གིས་ངའི་སྲོག་བསྐྱབས་གནང་བས་ངའི་ཚེ་གང་གི་དྲིན་ཅན་ཡིན”ཞེས་བཤད།

ན་ནིང་ཟླ་9པར། ཚེ་རིང་གཡུ་སྒྲོན་ཕྲུ་གུ་སྐྱེས་རྗེས་ཁྲག་མང་པོ་དོན་ཞིང་། དེ་སྔ་ལྷ་སའི་སྨན་ཁང་དུ་སྐྱོབ་བཅོས་བྱེད་པར་བསྐྱལ་དགོས་ཀྱི་ཡོད། ཡིན་ནའང་ཁྲེན་དབྱིང་ཧན་དང་བོད་སྐྱོར་སྨན་པ་ཚོས་དུས་ཐོག་ཏུ་ཁོ་མོར་གཤག་བཅོས་བྱས་ནས་བསྐྱབས།

“སྨན་དོན་རུ་ཁག་སླེབས་པ་དེས་སྨན་ཁང་ནང་ལོ་མང་རིང‘ནད་ཆུང་ཡག་པོ་བཅོས་མི་ཐུབ་པ་དང་། ནད་ཆེན་ལྟ་མི་ཐུབ་པའི’རྣམ་པར་འགྱུར་ལྡོག་ཕྱིན་སོང”ཞེས་ནག་ཆུ་ས་ཁུལ་མི་དམངས་སྨན་ཁང་གི་ཡོན་ཀྲང་ཧྥང་ཧྲེ་མིང་གིས་མྱོང་ཚོར་ཟབ་མོས་བཤད།

གྲངས་གཞི་ལས་མངོན་པར། འདས་ཟིན་པའི་ལོ་གཅིག་རིང་། བོད་རང་སྐྱོང་ལྗོངས་མི་དམངས་སྨན་ཁང་གི་ཉེན་ཚབས་ཆེ་བའི་ནད་པ་མྱུར་སྐྱོབ་ཐུབ་ཚད་11.6%མཐོ་རུ་ཕྱིན་ཡོད། བོད་ཀྱི་སྦྲུམ་མ་དང་ཕྲུ་གུ་སྐྱེ་མ་ཐག་པའི་བུད་མེད་འཆི་ཚད་2014ལོའི་ལོ་མཇུག་གི་ཁྲི་བཅུའི་ཆ་109ནས་103.45བར་ཆག་ཡོད་པ་དང་། ཕྲུ་གུ་དམར་འབྱར་ཤི་ཚད་17‰ནས་8.18‰བར་ཆག་ཡོད་པ་རེད།

བུམ་པ་གང་འབྱོའི་ཚུལ་གྱིས། ཡུལ་དེའི་སྨན་བཅོས་དཔུང་ཁག་གསོ་སྐྱོང་བྱས་པ།

བོད་རང་སྐྱོང་ལྗོངས་མི་དམངས་སྨན་ཁང་སྙིང་ཁམས་ཁྲག་རྩའི་ཁོག་ནད་ཚན་ཁག་གི་ཀྲུའུ་རེན་གཞོན་པ་ཟླ་བ་ཚེ་རིང་གིས“ང་ཚོའི་ཚན་ཁག་གིས་ལག་ལེན་བསྟར་བའི‘སྙིང་པར་ལུས་ཁམས་ཀྱི་སྙིང་འཕར་ཚད་རྒྱུན་གཏན་མིན་པའི་སྨན་བཅོས’རྣམ་གྲངས་ལ་དེ་སྔ་སྒྲིག་ཆས་མེད་ལ་ལག་རྩལ་ཡང་མེད། ཡིན་ནའང་ཚོགས་སྒྲིག་བོད་སྐྱོར་སྨན་པའི་སྣེ་ཁྲིད་འོག ད་ཆ་ང་ཚོས་རྒྱུན་གཏན་གྱི་སྨན་བཅོས་ཁག་གཅིག་བྱེད་ཀྱི་ཡོད”ཅེས་བཤད།

བོད་ཀྱི་སྨན་བཅོས་ཤེས་ལྡན་མི་སྣ་དཀོན་པའི་སྣང་ཚུལ་གཞི་རྩའི་ཐོག་ནས་འགྱུར་ལྡོག་གཏོང་ཆེད། བོད་ཀྱི་འཕྲོད་བསྟེན་དང་འཆར་ལྡན་བུ་བཙའ་ཨུ་ལྷན་སོགས་སྡེ་ཚན་གྱིས་བོད་སྐྱོར་སྨན་བཅོས་རུ་ཁག་ལ་ཡུལ་འདི་གའི་སྨན་བཅོས་མི་སྣ་རོགས་ཁྲིད་བྱ་རྒྱུར་གཞོགས་འདེགས་ཧུར་ཐག་བྱས་ཏེ། “གཅིག་གིས་གཅིག་འཁྲིད”དང“གཅིག་གིས་མང་པོ་འཁྲིད་པའི”སློབ་རོགས་ལམ་སྲོལ་བཙུགས་པ་དང“རིགས་གཅིག་མཁས་པས་རྐང་འཛིན་འཁྲིད་པ”དང“དགེ་རྒན་གྱིས་དགེ་ཕྲུག་འཁྲིད་པ”སོགས་ཀྱི་བྱ་ཐབས་བརྒྱུད་ཡུལ་འདི་རང་གི་རྐང་འཛིན་སྨན་པ་གསོ་སྐྱོང་བྱས་པ་རེད།

མིག་སྔར། བོད་སྐྱོར་སྨན་བཅོས་ཤེས་ལྡན་མི་སྣས་ཡུལ་འདི་གའི་སྨན་དོན་མི་སྣ་292ཆ་སྒྲིག་རོགས་ཁྲིད་བྱས་པ་རེད། བོད་རང་སྐྱོང་ལྗོངས་མི་དམངས་སྨན་ཁང“ཚོགས་སྒྲིག་རྣམ་པའི”བོད་སྐྱོར་སྨན་བཅོས་རུ་ཁག་གི་རུ་དཔོན་པེ་ཅིང་ཞེ་ཧོ་སྨན་ཁང་གི་ཡོན་ཀྲང་གཞོན་པ་ཧན་ཏིང་གིས“ང་ཚོས་ཚོགས་སྒྲིག་རོགས་སྐྱོར་བྱེད་དོན་ནི་ཡུལ་འདི་གའི་ཤེས་ལྡན་མི་སྣ་གསོ་སྐྱོང་ལ་ཤུགས་སྣོན་བརྒྱབ་ནས་སྨན་ཁང་གི་རྐང་འཛིན་པ་དངོས་སུ་གསོ་སྐྱོང་ཐུབ་པ་དང་སྨན་བཅོས་དཔུང་ཁག་ཅིག་འཛུགས་རྒྱུ་དེ་ཡིན”ཞེས་བཤད།

ཐོག་མའི་བསམ་འདུན་མ་བརྗེད་པར། དམངས་ལ་བདེ་བ་སྐྲུན་པའི་ཕན་སྦྱར་ལས་གཞི་ཞིག་བཏོད་པ།

ན་ནིང་ཟླ་9པར། ནག་ཆུ་ས་ཁུལ་འབྲི་རུ་རྫོང་གི་ལོ་75སླེབས་པའི་དབང་ཕྱུག་གྲུམ་བུའི་ནད་ཕོག་ནས་མལ་སར་ལུས་ཏེ་ལོ་ཕྱེད་སོང་རྗེས་གཟབ་གཟབ་མ་བྱས་པར་རུས་པ་ཆག་པ་མ་ཟད། སྡོད་རྩར་ཁྲག་དབལ་ཆགས། བོད་སྐྱོར་སྨན་བཅོས་རུ་ཁག་གིས་ཁོ་པར་སྨན་བཅོས་བྱས་པ་བརྒྱུད་དུས་ཐོག་ཏུ་སྐྱོབ་བཅོས་ཐུབ་པ་ལས་ནག་ཆུ་ས་ཁུལ་གྱི་གཤགས་བཅོས་ཆེན་པོ་བྱ་ཡུལ་གྱི་ལོ་ན་མཐོ་ཤོས་ཀྱི་ཟིན་ཐོ་བཏོད་པ་རེད།

དབང་ཕྱུག་གིས“ཏང་དང་སྲིད་གཞུང་གིས་ནང་སའི་སྨན་པ་ཡག་པོ་འདི་འདྲ་ང་ཚོར་ནད་གཞི་ལྟ་བར་དྲངས་པ་ནི་ང་ཚོའི་བདེ་སྐྱིད་ཆེ་ཤོས་ཡིན། ཏང་དང་སྲིད་གཞུང་ལ་ཐུགས་རྗེ་ཆེ་ཞུ་རྒྱུ་ཡིན”ཞེས་བཤད།

གསར་འགོད་པ་ལྷ་ས་གྲོང་ཁྱེར་མི་དམངས་སྨན་ཁང་བྱིས་པའི་གློ་ཡུ་ཕྲ་བ་བརྟག་དཔྱད་ཁང་དུ་སྐྱོད་སྐབས་དེང་རབས་ཅན་གྱི་གཤགས་བཅོས་སྒྲིག་ཆས་གྲལ་འགྲིག་པོར་བསྒྲིགས་འདུག པེ་ཅིང་གི“ཚོགས་སྒྲིག་རྣམ་པའི”བོད་སྐྱོར་སྨན་བཅོས་རུ་ཁག་གི་རུ་དཔོན་ལྷ་ས་གྲོང་ཁྱེར་མི་དམངས་སྨན་ཁང་གི་ཡོན་ཀྲང་ཡུས་ཡ་པིན་གྱིས་བརྟག་དཔྱད་ཁང་འདི་རྒྱལ་ཡོངས་སུ་སྔོན་ཐོན་གྲས་སུ་སླེབས་ཀྱི་ཡོད་པ་དང་བོད་རང་སྐྱོང་ལྗོངས་ལ་ལག་རྩལ་དེ་མེད་པའི་སྟོང་ཆ་གསབ་ཡོད། ཟླ་8ཚེས་1ཉིན་བར་སྨན་ཁང་གིས་གཤགས་བཅོས་ཁག་60བྱས་པ་རེད་ཅེས་བཤད།

བོད་རང་སྐྱོང་ལྗོངས་འཕྲོད་བསྟེན་དང་འཆར་ལྡན་བུ་བཙའ་ཨུ་ལྷན་གྱི་ཀྲུའུ་རེན་ཝང་ཡུན་ཐིང་གིས“ཚོགས་སྒྲིག་བོད་སྐྱོར་སྨན་པ་སླེབས་རྗེས། བོད་ཀྱི་མང་ཚོགས་ལ་སྨན་དང་སྨན་པ་དཀོན་པ་དང་ནད་གཞི་ལྟ་དཀའ་བའི་གནད་དོན་ཐག་གཅོད་བྱས་པ་དང་། ད་དུང་ང་ཚོར་ལག་རྩལ་གསར་པ་དང་ལྟ་བ་གསར་པ་དེ་བས་མང་བ་བསླབས་པ་མ་ཟད། མི་རིགས་ཁག་གི་མང་ཚོགས་ཚོར་བདེ་ཐང་དང་བདེ་སྐྱིད་བྱིན་ཡོད”ཅེས་བཤད།