ཤིན་ཧྭ་གསར་འགྱུར་ཁང་ལྷ་ས་ནས་ཟླ་7ཚེས་28ཉིན་གློག་འཕྲིན་འབྱོར་གསལ། 2016ལོའི་སློབ་ཆེན་སློབ་མས་ནུབ་རྒྱུད་ལ་དང་བླངས་ཞབས་འདེགས་ཞུ་བའི་འཆར་གཞིའི་བོད་ལྗོངས་ཆེད་དོན་གསོ་སྦྱོང་ཚེས་28ཉིན་ལྷ་སར་བྱེད་འགོ་ཚུགས་ཤིང་། རྒྱལ་ཡོངས་ཀྱི་ས་གནས་ཁག་ནས་ཡོང་བའི་དང་བླངས་པ་1400གསོ་སྦྱོང་མཇུག་འགྲིལ་རྗེས་བོད་ཀྱི་གཞི་རིམ་དུ་བསྐྱོད་དེ་དུས་ཡུན་ལོ་1ནས་3བར་གྱི་དང་བླངས་ཞབས་འདེགས་ཞུ་རྒྱུ་ཡིན་པ་རེད།

2003ལོར་རྒྱལ་ཁབ་ཀྱིས་སློབ་ཆེན་སློབ་མས་ནུབ་རྒྱུད་ལ་དང་བླངས་ཞབས་འདེགས་ཞུ་བའི་འཆར་གཞི་ལག་བསྟར་བྱེད་འགོ་བཙུགས་ཤིང་། ཡོངས་བསྒྲགས་ངང་བསྡུ་བ་དང་། རང་མོས་ཀྱིས་མིང་ཐོ་འགོད་པ། རྩ་འཛུགས་ཀྱིས་འདེམས་བསྐོ་བྱེད་པ། གཅིག་སྡུད་ཐོག་མངགས་པ་བཅས་ཀྱི་བྱེད་སྟངས་ལྟར་ལོ་རེར་ལོ་འདི་གར་ཐོན་པའི་མཐོ་སློབ་དཀྱུས་མའི་སློབ་ཆེན་སློབ་མ་དང་ཡང་ན་སློབ་གྲྭར་འགྲོ་མུས་ཀྱི་ཞིབ་འཇུག་སློབ་མ་ངེས་ཅན་བསྡུས་ནས་ནུབ་རྒྱུད་ཀྱི་གཞི་རིམ་དུ་དུས་ཡུན་ལོ་1ནས་3བར་གྱི་དང་བླངས་ཞབས་འདེཌ་ཞུ་གི་ཡོད་པ་རེད།

གུང་གཞོན་སྡེ་ཚོགས་བོད་རང་སྐྱོང་ལྗོངས་ཨུ་ཡོན་ལྷན་ཁང་དང་བླངས་ཞབས་ཞུ་པའི་ལས་དོན་པུའི་པུའུ་ཀྲང་གཞོན་པ་ཆིན་ལིན་གྱིས་ངོ་སྤྲོད་བྱས་པར་གཞིགས་ན། འདི་ལོར་བོད་རང་སྐྱོང་ལྗོངས་ཀྱིས་དང་བླངས་པ་1400བསྡུས་པའི་ཁར་དུས་འགྱངས་ཞབས་འདེགས་ཞུ་མཁན་དང་བླངས་པ་600བསྣན་པས་ཁྱོན་དང་བླངས་པ་2000ཡོད་པ་དང་། གསར་དུ་བསྡུས་པའི་དང་བླངས་པ་ཚོ་ནི་རྒྱལ་ཡོངས་ཀྱི་ཞིང་ཆེན་20ནས་ཡོང་ཞིང་། ཁོང་ཚོས་ཞིང་ལས་དང་། སྨན་བཅོས། སློབ་གསོ་བཅས་ཀྱི་ཁྱབ་ཁོངས་ལ་རྒྱབ་སྐྱོར་བྱེད་རྒྱུ་པ་རེད།

དང་བླངས་པ་ཚོ་ལས་དོན་དང་འཚོ་བ་གསར་པར་སྔར་བས་གོམས་པར་བྱེད་ཆེད། གུང་གཞོན་སྡེ་ཚོགས་བོད་རང་སྐྱོང་ལྗོངས་ཨུ་ཡོན་ལྷན་ཁང་གིས་དུས་ཡུན་ཉིན་དྲུག་གི་གསོ་སྦྱོང་སློབ་ཚན་བཀོད་སྒྲིག་བྱས་ཤིང་། གསོ་སྦྱོང་ནང་ས་མཐོའི་བདེ་སྲུང་དང་། བོད་ཀྱི་ལོ་རྒྱུས། བོད་ཀྱི་ལྗོངས་བབ་སོགས་ཚུད་ཡོད་པ་རེད།

གུང་གཞོན་སྡེ་ཚོགས་བོད་རང་སྐྱོང་ལྗོངས་ཨུ་ཡོན་ལྷན་ཁང་གི་ཧྲུའུ་ཅི་གཞོན་པ་ཝང་ཞའོ་ཧུའེ་ཡིས། “ནུབ་རྒྱུད་འཆར་གཞི”ལག་བསྟར་བྱས་པ་ལས་ན་གཞོན་ཤེས་ལྡན་པར་སྦྱོང་བརྡར་ཐེབས་པ་སོགས་བྱུང་ནས་བོད་ཀྱི་འཕེལ་རྒྱས་ལ་གསོན་ཤུགས་གསར་པ་བསྣན་ཡོད་ཅེས་བཤད་པ་རེད།

2003ལོ་ཚུན་དུ། རིམ་རྩིས་བརྒྱབ་ན་ནུབ་རྒྱུད་འཆར་གཞིའི་དང་བླངས་པ་4500ལྷག་ཙམ་གྱིས་བོད་ཀྱི་རྨང་གཞིའི་སློབ་གསོ་དང་། ཞིང་ལས་ཚན་རྩལ། སྨན་བཅོས་འཕྲོད་བསྟེན་སོགས་ཁྱབ་ཁོངས་སུ་དང་བླངས་ཞབས་འདེགས་ཞུས་ཤིང་། དེ་དག་ལས་མི་1500ལྷག་ཙམ་གྱིས་ཞབས་ཞུ་དུས་ཡུན་འཐིམས་རྗེས་མུ་མཐུད་བོད་དུ་ལས་ཞུགས་ལས་གཏོད་བྱེད་བཞིན་ཡོད་པ་རེད།