ལོ་3རིང་བོད་སྐྱོར་ལས་བྱེད་པ་58ཀྱིས་སྒེར་སེམས་མེད་པར་ལས་དོན་སྤེལ་ཞིང་། བོད་སྐྱོར་མ་དངུལ་འབོར་ཆེན་ཞིག་བཏང་བ་དང་བོད་སྐྱོར་རྣམ་གྲངས་འབོར་ཆེན་ཞིག་ལག་ལེན་བསྟར་བ་ལས་མངའ་རིས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་རྣམ་པར་འགྱུར་ལྡོག་གཏིང་ཟབ་ཕྱིན་པ་དང་མང་ཚོགས་ཀྱི་ཐོན་སྐྱེད་དང་འཚོ་བའི་ཆུ་ཚད་མཐོ་རུ་སོང་ནས་ཧྲའན་ཤིས་དང་བོད་ལྗོངས་དབར་ལ་བརྩེ་སེམས་ཟབ་པའི་བོད་སྐྱོར་གྱི་ལེའུ་ཞིག་བརྩམས་པ་རེད།

དཔལ་འབྱོར་བོད་སྐྱོར་གྱི་ཕན་འབྲས་ཆེ་བ།

དཔལ་འབྱོར་བོད་སྐྱོར་ནི་ཁ་གཏད་རོགས་སྐྱོར་ལས་དོན་གྱི་གཞི་རྟེན་གལ་ཆེན་ཞིག་ཡིན་ཞིང་། བསྡོམས་རྩིས་བྱས་པར་གཞིགས་ན། ཧྲའན་ཤིས་ཞིང་ཆེན་གྱིས་མངའ་རིས་ལ་རོགས་སྐྱོར་བྱེད་པའི“ལོ་ལྔ་ཚན་བཅུ་གཉིས་པའི”འཆར་འགོད་ནང་ཁྱོན་བསྡོམས་རྣམ་གྲངས་32ཡོད་པར་མ་དངུལ་བསྡོམས་སྒོར་དུང་ཕྱུར་3.97ཟིན་ཞིང་། དེའི་ནང་70%གཞི་རིམ་དང་དམངས་འཚོར་བཏང་ཡོད། གཞན་ཡང་2015ལོར་ད་དུང་མ་འཇོག་དུང་ཕྱུར་2.59ཟིན་པའི“ལོ་ལྔ་ཚན་བཅུ་གསུམ་པའི”གཙོ་གནད་རོགས་སྐྲུན་རྣམ་གྲངས་ཏེ། མངའ་རིས་ཧྲའན་ཤིས་ཚོད་ལྟའི་སློབ་འབྲིང་འཛུགས་སྐྲུན་བྱེད་འགོ་ཚུགས་པ་དང་འཆར་གཞིའི་མ་འཇོག་སྒོར་དུང་ཕྱུར་1.2ལེགས་གྲུབ་ཟིན་ཡོད། ཧྲའན་ཤིས་ཞིང་ཆེན་གྱིས“ལོ་ལྔ་ཚན་བཅུ་གཉིས་པའི”རིང་བོད་སྐྱོར་མ་དངུལ་སྒོར་དུང་ཕྱུར་5.17བཏང་བ་དང་རྣམ་གྲངས་འཛུགས་སྐྲུན་ཁག་འཆར་གཞི་ལས་བརྒལ་ནས་ལེགས་གྲུབ་བྱུང་ཡོད།

ཧྲའན་ཤིས་ཞིང་ཆེན་གྱི་ཁག་བདུན་པའི་བོད་སྐྱོར་ལས་དོན་རུ་ཁག་གིས་བོད་སྐྱོར་མ་དངུལ་དང་ས་གནས་མ་དངུལ་བསྡུ་སྒྲིལ་བེད་སྤྱོད་བྱ་རྒྱུར་ཚད་མཐོའི་མཐོང་ཆེན་བྱས་ཏེ་རྣམ་གྲངས་ལ་མ་དངུལ་གཏོང་བ་དང་མ་དངུལ་བེད་སྤྱོད་ཀྱི་ཕན་འབྲས་ཆེ་རུ་གཏོང་བའི་ཐད་ཚོད་ལྟ་ནུས་ལྡན་བྱས་ཡོད། མིག་སྔར་སྤྱིའི་མ་འཇོག་སྒོར་ཁྲི་3200ཟིན་པའི་སྒར་རྫོང་དགུན་ས་དེང་རབས་འབྲོག་ལས་དང་མི་ཐབས་རྩྭ་འདེབས་དཔེ་སྟོན་རྟེན་གཞི་སོགས་རྣམ་གྲངས་ཁག་གཅིག་གིས་དུས་འགོའི་ལས་དོན་ཁྲོད་ས་གནས་ཀྱི་ཆེད་དོན་མ་དངུལ་དང་ཧྲའན་ཤིས་ཞིང་ཆེན་གྱི་བོད་སྐྱོར་རྣམ་གྲངས་དབར་ཟུང་འབྲེལ་ནུས་ལྡན་ཐུབ་པ་དང་འབྲེལ་ཧྲའན་ཤིས་ཞིང་ཆེན་གྱི་ཞིང་སྐྱོར་མ་དངུལ་བསྡུ་སྒྲིལ་དང་དེང་རབས་ཞིང་ལས་ཐོན་ལས་གླིང་སོགས་ཀྱི་ལས་ཀའི་ཉམས་མྱོང་དཔྱད་གཞིར་ཧུར་ཐག་བཟུང་བས། མངའ་རིས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་འགྲོ་བའི་བཀྲག་མདངས་འཚེར་ས་གསར་པ་ཞིག་ཏུ་གྱུར་ཡོད།

ལག་རྩལ་བསླབས་ནས་འཇོན་ཐང་ཅན་སྐྱོང་བ།

ལོ་3རིང་ཧྲའན་ཤིས་ཞིང་ཆེན་གྱི་ཁག་བདུན་པའི་བོད་སྐྱོར་ལས་དོན་རུ་ཁག་གིས་ཚུར་གདན་དྲངས་པ་དང་ཕྱིར་སྐྱོད་པ་ཕན་ཚུན་ཟུང་འབྲེལ་བྱ་རྒྱུ་མཐའ་འཁྱོངས་དང་ཡུན་རིང་བོད་སྐྱོར་དང་དུས་ཐུང་བོད་སྐྱོར་ཕན་ཚུན་ཟུང་འབྲེལ་བྱ་རྒྱུ་མཐའ་འཁྱོངས་བྱས་ཏེ་མངའ་རིས་ཀྱི་འཇོན་ཐང་ཅན་གསོ་སྐྱོང་ལམ་སྲོལ་ཧུར་ཐག་བཙུགས་ནས་མངའ་རིས་ལ་གཏན་འཇགས་ཀྱི་ལག་རྩལ་དང་འཇོན་ཐང་ཅན་ལྡན་པར་བྱས་ཡོད།

མངའ་རིས་ཀྱི་ལག་རྩལ་ལས་བྱེད་པའི་དགོས་མཁོར་དམིགས་ཏེ་ཧྲའན་ཤིས་ཞིང་ཆེན་གྱིས་མངའ་རིས་ཀྱི་གཞི་རིམ་ལས་བྱེད་པ་དང་འཇོན་ཐང་ཅན་མི་ཐེངས་395ཧྲའན་ཤིས་ཞིང་ཆེན་གྱི་སྡེ་ཚན་ཁག་ཏུ་རྣམ་གྲངས་དོ་དམ་དང་། གྲོང་ཁྱེར་དང་གྲོང་གསེབ་འཛུགས་སྐྲུན། སློབ་གསོ་འཕེལ་རྒྱས་སོགས་ཀྱི་གནས་སྦྱར་སྦྱོང་བརྡར་དང་སྤེལ་རེས་གསོ་སྦྱོང་དུ་ཞུགས་རྒྱུར་མཐུན་སྦྱོར་དང་སྒྲིག་འཛུགས་བྱས་པ་ལས་མངའ་རིས་ཀྱི་ལས་བྱེད་པ་དང་ལག་རྩལ་མི་སྣའི་ལས་སྒོའི་བྱང་ཚད་དང་ནུས་པ་ཆེས་ཆེར་སོང་བ་རེད།

དམིགས་སུ་གླེང་དགོས་པ་ཞིག་ནི་2015ལོའི་ཟླ་8པ་ནས་བཟུང་ཧྲའན་ཤིས་ཞིང་ཆེན་གྱིས“ཚོགས་སྒྲིག་རྣམ་པའི”སྨན་བཅོས་བོད་སྐྱོར་གྱི་ཚོད་ལྟའི་ལས་དོན་སྤེལ་འགོ་བརྩམས་པ་དང་ཁག་དང་པོའི་སྨན་བཅོས་ལག་རྩལ་འཇོན་ཐང་ཅན་16སླེབས་པ་ལས་མངའ་རིས་ས་ཁུལ་གྱི་ས་ཁུལ་རིམ་པའི་སྨན་བཅོས་སྒྲིག་གཞིར་འཇོན་ཐང་ཅན་ཤིན་ཏུ་དཀོན་པའི་གནད་དོན་ཐག་གཅོད་ཐུབ་པ་མ་ཟད། ད་དུང་མངའ་རིས་ས་ཁུལ་མི་དམངས་སྨན་ཁང་གི“ཀ་པ་རིམ་པ་གཉིས་པའི”གསར་འཛུགས་ལས་དོན་དང་120མྱུར་སྐྱོབ་ལྟེ་གནས་འཁོར་རྒྱུག་བྱས་པ་ལས་སྨན་ཁང་གི་ཚན་ཁག་འཛུགས་པ་དང་ཚད་ལྡན་ཅན་དང་ཚད་གཞི་ཅན་གྱི་དོ་དམ་ཆུ་ཚད་མངོན་གསལ་དོད་པོས་མཐོ་རུ་ཕྱིན་པ་རེད།

སྤེལ་རེས་དང་མཉམ་འདྲེས་ལ་སྐུལ་བ།

ཧྲའན་ཤིས་དང་མངའ་རིས་དབར་གྱི་སྤེལ་རེས་མཉམ་འདྲེས་ལ་སྐུལ་འདེད་དང་མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བ་ཡོང་རྒྱུར་སྐུལ་མ་གཏོང་བ་ནི་བོད་སྐྱོར་ལས་དོན་གྱི་གྲུབ་ཆ་གལ་ཆེན་ཞིག་ཡིན།

2014ལོའི་ཟླ་7པར་སྐབས་དེ་དུས་ཀྱི་ཧྲའན་ཤིས་ཞིང་ཨུད་ཧྲུའུ་ཅི་ཡིན་པའི་བློ་མཐུན་ཀྲོའུ་ཀྲེང་ཡུང་གིས་ཏང་སྲིད་འཐུས་མི་ཚོགས་པའི་སྣེ་ཁྲིད་དེ་བོད་དུ་ཡོང་ནས་བྱེད་ཐབས་གལ་ཆེན་དང་རྣམ་གྲངས་གལ་ཆེན་ཁག་34གཏན་འཁེལ་བྱས་ཡོད། 2015ལོའི་ཟླ་9ཚེས་6ཉིན་ཧྲའན་ཤིས་ཞིང་ཨུད་རྒྱུན་ལས་ཨུ་ལྷན་གྱིས་བོད་སྐྱོར་དང་བོད་དང་འབྲེལ་བའི་ལས་དོན་གྱི་ཆེད་དོན་ཚོགས་འདུ་འཚོགས་ཏེ་བོད་སྐྱོར་དང་བོད་དང་འབྲེལ་བའི་ལས་དོན་ལ་ཤུགས་རྒྱག་པའི་བྱ་ཐབས་ཁག་10ཞིབ་འཇུག་བྱས་ཡོད། 2015ལོའི་ཟླ་9ཚེས་9ཉིན་ནས་ཚེས་12ཉིན་བར་སྐབས་དེ་དུས་ཧྲའན་ཤིས་ཞིང་ཨུད་ཀྱི་ཧྲུའུ་ཅི་གཞོན་པ་དང་ཁ་གཏད་བོད་སྐྱོར་ལས་དོན་གྱི་འགོ་ཁྲིད་ཚོགས་ཆུང་གི་ཙུའུ་ཀྲང་ཡིན་པའི་བློ་མཐུན་ཧུའུ་ཧོ་ཕིང་གིས་མངའ་རིས་ལ་ལྟ་ཞིབ་ཏུ་ཕེབས་རྗེས་ཁ་གཏད་བོད་སྐྱོར་ལས་དོན་ལ་ཤུགས་རྒྱག་པའི་ཞིབ་ཕྲའི་བྱེད་ཐབས་ཁག་12གཏན་འཁེལ་བྱས་པ་རེད།

ཞིང་ཆེན་དང་རང་སྐྱོང་ལྗོངས་གཉིས་ཀྱི་མཐོ་རིམ་དབར་སྤེལ་རེས་འགྲོ་འོང་བྱས་པ་ལས་ཧྲའན་ཤིས་ཀྱི་ཁག་བདུན་པའི་བོད་སྐྱོར་ལས་དོན་གཏིང་ཟབ་སྤེལ་རྒྱུར་སྐུལ་འདེད་བཏང་ཡོད། ལས་དོན་རུ་ཁག་གིས་གོ་སྐབས་དམ་འཛིན་གྱིས་ཧྲའན་ཤིས་ཞིང་ཆེན་གྱི་འབྲེལ་ཡོད་ཕྱོགས་དང་མངའ་རིས་ས་ཁུལ་དབར་ལས་རིགས་ཁ་གཏད་བོད་སྐྱོར་བྱས་པར་ཧྲའན་ཤིས་ཞིང་ཆེན་གྱི་ཐད་གཏོགས་ཚན་པ་20ལྷག་ཙམ་གྱིས་ལས་རིགས་ཁ་གཏད་རོགས་སྐྱོར་ལས་དོན་སྤེལ་ཡོད། ཧྲའན་ཤིས་ཞིང་ཆེན་གྱིས་ས་ཁུལ་དང་གྲོང་ཁྱེར་10དང་སྤུ་ཧྲེང་དང་སྒར་རྫོང་གི་ཤང་གྲོང་8དབར་ཁ་གཏད་རོགས་སྐྱོར་གྱི་འབྲེལ་བ་བཙུགས་ཏེ“ལོ་ལྔ་ཚན་བཅུ་གསུམ་པའི”ཁ་གཏད་རོགས་སྐྱོར་གྲོས་མཐུན་བཞག་ཡོད། ཧྲའན་ཤིས་ཞིང་ཆེན་གྱི་ས་ཁུལ་དང་གྲོང་ཁྱེར་གཅིག་གིས་བོད་ཀྱི་ཤང་གྲོང་གཅིག་ལ་ཁ་གཏད་རོགས་སྐྱོར་བྱེད་པའི་བྱ་ཐབས་ལས་རྒྱལ་ཡོངས་ཀྱི་ཁ་གཏད་བོད་སྐྱོར་ལས་ཀར་ཉམས་མྱོང་བསགས་ཡོད།