ལོ་དྲུག་གོང་ཀྲང་ཀྲའོ་དབྱང་གིས་ཧྥུའུ་ཅན་མི་དམངས་ཀྱི་མངགས་བཅོལ་སེམས་ནང་བཅངས་བཞིན་དུ“གངས་ལྗོངས་ཀྱི་སྔོ་ལྗང་མཛེས་ལྗོངས་ཁུལ་གྱི་ནུབ་སྒོ་ཆེ་མོ”ཞེས་བརྗོད་པའི་ཀོང་པོ་རྒྱ་མདའ་རྫོང་དུ་སླེབས་ནས་ཁོང་གི་བོད་སྐྱོར་ལས་དོན་སྤེལ་འགོ་ཚུགས། ལོ་གསུམ་གྱི་བོད་སྐྱོར་དུས་ཚད་ཐིམས་རྗེས་ཁོང་གིས་སྔར་བཞིན་དགའ་ཞེན་ཆེ་བའི་གནས་དེར་བསྡད་ནས་མུ་མཐུད་ལེགས་སྐྱེས་འབུལ་རྒྱུའི་ཐག་བཅད།

རྫོང་དཔོན་གཞོན་པ་ནས་རྫོང་ཨུད་ཀྱི་ཧྲུའུ་ཅི་གཞོན་པ་དང་བོད་སྐྱོར་ཁག་དྲུག་པ་ནས་ཁག་བདུན་པའི་བར་ཀྲང་ཀྲའོ་དབྱང་གིས་ཀོང་པོ་རྒྱ་མདའ་རྫོང་གི་ཁྱད་ཆོས་དང་ཟུང་འབྲེལ་བྱས་ཏེ་གཅིག་རྒྱུན་གཅིག་འཛིན་གྱི་སྒོ་ནས་ལས་ཀའི་བསམ་ཕྱོགས་རྒྱུན་ཆད་མེད་པར་གཏིང་ཟབ་ཏུ་གཏོང་བ་དང་། བོད་སྐྱོར་གྱི་ནང་དོན་ཕུན་སུམ་ཚོགས་སུ་གཏོང་བ། ལས་ཀའི་ཕན་འབྲས་ཆེ་རུ་གཏོང་བ་བཅས་བྱས་པ་རེད།

ལོ་དྲུག་རིང་། ཀྲང་ཀྲའོ་དབྱང་གིས་ཀོང་པོ་རྒྱ་མདའ་རྫོང་གི་རི་ཀླུང་ཚང་མར་སྤྱིར་ན་བསྐྱོད་ཟིན་པ་དང་། རྫོང་དེ་ཡོངས་ཀྱི་སྲིད་འཛིན་གྲོང་ཚོ་ཚང་མར་བརྟག་ཞིབ་དང་འཚམས་འདྲི་བྱས་པ་མ་ཟད། མང་ཚོགས་དུད་ཚང་ཆིག་སྟོང་ལས་བརྒལ་བར་འཚམས་འདྲི་ཞུས་པ་རེད། རྟག་ཏུ་ས་བབ་སྨི་5000ཡན་གྱི་ཤང་གྲོང་དང་འབྲོག་རར་ལས་དོན་སྒྲུབ་པར་སྐྱོད་དགོས་པའི་དབང་གིས་གཉིད་མི་ཁུག་པ་དང་། བྲང་ཁ་སྡོམ་པ། དབུགས་གཏོང་དཀའ་བ་སོགས་ཀྱི་ནད་ཀྱིས་ཀྲང་ཀྲའོ་དབྱང་ལ་མནར་གཅོད་ཡང་སེ་གཏོང་གི་ཡོད་ཀྱང་། ཁོང་གི་བོད་སྐྱོར་ལས་དོན་ཡག་པོ་སྒྲུབ་པའི་ཆོད་སེམས་དེ་བས་བརྟན་དུ་ཕྱིན་ཡོད།

བོད་སྐྱོར་གདམ་ག་བྱས་པ་དེ་ནི་ལེགས་སྐྱེས་འབུལ་རྒྱུ་གདམ་ག་བྱས་པ་ཞིག་རེད། བོད་དུ་སླེབས་པ་ནས་བཟུང་། ཀྲང་ཀྲའོ་དབྱང་གིས་རྟག་ཏུ་རང་ཉིད་ལ“ང་ཚོས་ས་གནས་དེ་གའི་ལས་བྱེད་པར་བཏོན་པའི་རེ་བ་ཚང་མ་ང་ཚོ་བོད་སྐྱོར་ལས་བྱེད་པ་ཚོས་སྔོན་ལ་བྱེད་ཐུབ་པ་དགོས། སྤྱོད་གཙང་གཞུང་དྲང་གིས་ཀོང་པོ་རྒྱ་མདའ་རྫོང་གི་བྱ་གཞག་ལ་ཞུགས་མཁན་དང་། ལག་ལེན་བ། སྐུལ་འདེད་བ་བཅས་བྱེད་དགོས་པའི”རེ་བ་བཏོན་གྱི་ཡོད།

2013ལོར་ཁག་བདུན་པའི་བོད་སྐྱོར་ལས་དོན་སྤེལ་འགོ་ཚུགས་རྗེས། ཀྲང་ཀྲའོ་དབྱང་གིས་སྣེ་ཁྲིད་འོག་ཀོང་པོ་རྒྱ་དམའ་རྫོང་གི་བོད་སྐྱོར་ལས་དོན་རུ་ཁག་གི་རུ་མི་ཚོས་ཀོང་པོ་རྒྱ་མདའ་རྫོང་གི་མི་བྱེད་པ་དང་། ཀོང་པོ་རྒྱ་མདའ་རྫོང་གི་ཡུལ་སྐད་ཤོད་པ། ཀོང་པོ་རྒྱ་མདའ་རྫོང་གི་ལས་ཀ་བྱེད་པ་བཅས་མཐའ་འཁྱོངས་ཀྱིས་དམིགས་བསལ་མི་བྱེད་པར་ས་གནས་དེ་གའི་ལས་བྱེད་པ་དང་མང་ཚོགས་དང་མཉམ་དུ་བརྟན་ལྷིང་སྲུང་སྐྱོང་དང་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འཐབ་ས་དང་པོར་ཐོག་མཐའ་བར་གསུམ་དུ་འབད་བརྩོན་བྱས་ནས། བོད་དུ་སྡོད་པ་དང་ལས་གནས་སུ་སྡོད་རྒྱུ་རྒྱུན་འཁྱོངས་བྱས་ཏེ། བྱ་སྤྱོད་དངོས་ཀྱིས་བོད་སྐྱོར་ལས་བྱེད་པའི་གཟུགས་བརྙན་བཟང་པོ་བཏོད་ཡོད།

བོད་དུ་སླེབས་པ་ནས་བཟུང་། ཁོང་གིས་ཐོག་མཐའ་བར་གསུམ་དུ“ལྷག་བསམ་ཟོལ་མེད་དང་འགན་འཁྲི”ཟུང་འབྲེལ་བྱ་རྒྱུ་མཐའ་འཁྱོངས་ཀྱིས“ལྷག་བསམ་ཟོལ་མེད་ཀྱིས་བོད་སྐྱོར་བྱ་རྒྱུ”ཁྱབ་གདལ་བཏང་བ་དང་། ཁོང་གིས་ཡིད་ཆེས་དང་། བསམ་ཤེས། རྒྱབ་སྐྱོར་བཅས་ཀྱིས་དམངས་འཚོའི་བྱ་གཞག་ལ་གཞི་ཚུགས་པ་དང་ལྷག་བསམ་ཟོལ་མེད་ལ་བརྟེན་ནས་མང་ཚོགས་ཀྱི་སེམས་པ་ཐོབ་པ་བྱས་ཏེ། མི་རིགས་མཐུན་སྒྲིལ་ལ་སྐུལ་འདེད་བཏང་ཡོད།

ཀོང་པོ་རྒྱ་དམའ་རྫོང་ཉང་ཕུ་ཤང་བསྙེན་མོ་ནང་གྲོང་ཚོའི་དུད་ཚང་དབུལ་པོ་ངག་དབང་ཆོས་སྒྲོན་ཁྱིམ་དུ་མི་4ཡོད་པ་དང་འཚོ་བའི་ཆ་རྐྱེན་ཧ་ཅང་ཞན་པོ་ཡོད། ཀྲང་ཀྲའོ་དབྱང་གིས་གནས་ཚུལ་ཤེས་རྗེས་ཁག་བདུན་པའི་བོད་སྐྱོར་ལས་དོན་རུ་ཁག་གིས་འཚོ་བའི་དཀའ་ངལ་ཐག་གཅོད་བྱེད་པའི་རོགས་སྐྱོབ་མ་དངུལ་ཁྲི་3གཏོང་རྒྱུའི་ཐག་བཅད། ད་ཆ་ངག་དབང་ཆོས་སྒྲོན་ཁྱིམ་གྱི་འཚོ་བར་སླར་ཡང་རེ་བའི་མེ་ལྕེ་འབར་ནས་སློབ་མཚམས་ཆད་པའི་བུ་མོ་སླར་ཡང་སློབ་གྲྭར་སྐྱོད་རྒྱུ་བྱུང་བ་རེད།

དེ་དང་ཆབས་ཅིག “ལྷག་བསམ་ཟོལ་མེད་ཀྱི་བོད་སྐྱོར”བྱེད་རིང་། ཀྲང་ཀྲའོ་དབྱང་གིས་ཀོང་པོ་རྒྱ་མདའརྫོང་གི་དུད་ཚང་དབུལ་པོ་དང་དཀའ་ངལ་ཡོད་པའི་མང་ཚོགས་ཀྱི་ད་ཡོད་གནས་ཚུལ་ལ་དམིགས་ནས《ཀོང་པོ་རྒྱ་མདའ་རྫོང་གི་2013ལོ་ནས—2016ལོའི་བར་གྱི་དབུལ་སྐྱོར་ལས་ཀའི་ཇུས་གཞི》བཟོས་ནས། ལོ་ལྟར་རྫོང་གི་བོད་སྐྱོར་མ་དངུལ་ནས་སྒོར་ཁྲི་400བཏོན་ཏེ་དབུལ་སྐྱོར་ལས་དོན་ལ་སྤྱོད་རྒྱུའི་གཏན་འབེབས་བྱས་པ་རེད།

ལོ་དྲུག་རིང་། ཀྲང་ཀྲའོ་དབྱང་གིས་བོད་སྐྱོར་ལས་དོན་ལ་གསར་གཏོད་དང་། དངོས་སྒྲུབ། འཕེལ་རྒྱས་བཅས་བྱ་རྒྱུ་གསལ་བཤད་བྱས་པ་དང་། ཀོང་པོ་རྒྱ་མདའ་རྫོང་གི་རྒྱ་ཆེའི་མང་ཚོགས་ལ་གསལ་བསྒྲགས་བྱས་པ་དེ་ལྷག་བསམ་ཟོལ་མེད་དང་། དམངས་ཆེད། ལེགས་སྐྱེས་འབུལ་བ་བཅས་རེད།