དེང་སྐབས་མི་རྣམས་ཀྱི་འཚོ་བའི་ཆུ་ཚད་མཐོ་རུ་ཕྱིན་ནས་ཟས་རིགས་ལ་ཆ་བཞག་ན་འབྲུ་རིགས་དང་།　ཤ　སྣུམ།　མངར་ཆ།　ཚལ་རིགས་སོགས་རྣམ་གྲངས་ཧ་ཅང་མང་པོ་ཡོད་པ་སོ་སོར་བྲོ་བ་དང་རང་བཞིན་མི་འདྲ་བ་རེ་ཡོད་པ་མ་ཟད།　ནུས་པ་ཡང་མི་འདྲ་བ་རེ་ཡོད།　དེར་བརྟེན་ང་ཚོས་རྒྱུན་དུ་ཟས་རིགས་སོ་སོའི་རང་བཞིན་དང་ནུས་པ་ཁོང་དུ་ཆུད་པ་བྱས་ནས་ལུས་ཁམས་ལ་འཕྲོད་སྦྱོར་ཆེ་བ་དང་།　བཅུད་ཡོད་པ།　འཇུ་བདེ་བ་བཅས་ཀྱི་ཟས་སྐོམ་རན་ཚོད་ཟ་བ།　ལུས་ཁམས་ལ་‍མི་འཕྲོད་པའི་ཟས་སྐོམ་དང་།　འཇུ་མི་བདེ་བའི་ཟས་སྐོམ།　ཡང་ན་ཕོག་དུག་ཡོད་པའི་ཟས་སྐོམ་དཔེར་ན།　ཆང་དང་།　ཨ་རག　　སུར་པན་སོགས་ཉུང་ཙམ་ཟ་བ།　ལྷག་པར་ཟས་སྐོམ་རྙིང་པ་དང་།　རུལ་པ།　བཙོག་པ།　མ་ཚོས་པ།　རྗེན་པ།　ནད་ཤི་ཐེབས་པའི་ཕྱུགས་རིགས་ཀྱི་ཤ་སོགས་དེ་བས་བཟའ་རྒྱུ་མེད།　གལ་ཏེ་ཁ་ཟས་ཟ་སྟངས་ལ་དོ་སྣང་མ་བྱས་པར་གང་བྱུང་བཟས་པ་ཡིན་ན།　ཕོ་བའི་མེ་དྲོད་ཉམས་ནས་ལུས་སྟོབས་ཉམས་པ་དང་།　ནད་གཞི་འགོག་པའི་ནུས་པ་ཆུང་དུ་འགྲོ་བ།　མ་ཞུ་ཕོ་ནད་སོགས་ཀྱི་ནད་མང་པོ་སློང་བ་མ་ཟད།　ཐ་ན་དུག་ཕོག་པ་སོགས་ཀྱི་གནས་ཚུལ་ཡང་ཡོང་སྲིད།