གཞིས་རྩེ་གྲོང་ཁྱེར་ཁང་དམར་རྫོང་གིས་རྫོང་གྲོང་དང་། ཤང་གྲོང་། དེ་བཞིན་གཞུང་ལམ་ལམ་རྒྱུད་ཀྱི་ཁོར་ཡུག་གཙང་སྦྲར་ཕྱོགས་བསྡུས་བཅོས་སྐྱོང་བྱེད་ཤུགས་ཆེ་རུ་བཏང་ནས། རྫོང་གྲོང་གི་རྣམ་པ་ལེགས་སུ་ཕྱིན་ཡོད་པ་རེད།
ཟླ་11ཚེས་30ཉིན། གསར་འགོད་པས་ཁང་དམར་རྫོང་ཁོར་ཡུག་སྲུང་སྐྱོང་ཅུས་ནས་ཤེས་རྟོགས་བྱས་པར། ཁང་དམར་རྫོང་གིས་ཐོག་མཐའ་བར་གསུམ་དུ་རྫོང་གྲོང་ཁོར་ཡུག་འཕྲོད་བསྟེན་ལས་དོན་གཙོ་གནད་དུ་བཟུང་གི་ཡོད་པ་དང་། ཁང་དམར་རྫོང་གིས་སླར་ཡང་གད་སྙིགས་སྦས་ས་གསར་པ་ཞིག་གི་འཁོར་སྐྱོད་ཚོད་ལྟའི་ལས་ཀ་འགོ་ཚུགས་ཡོད་པ་རེད།