འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པ་བྱ་རྒྱུ་དེ་རྒྱལ་ཁ་ཕུ་ཐག་གཅོད་པའི་དུས་མཚམས་དང་དབུལ་སྒྲོལ་འགག་སྒྲོལ་གྱི་མཐའ་མའི་གདོང་མཆོང་དུས་མཚམས་སུ་སླེབས་སྐབས་ཀྲུང་དབྱང་གིས་དབུལ་སྐྱོར་གསར་སྤེལ་ལས་དོན་ཚོགས་འདུ་འཚོགས་པ་དེ་ནི་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་པ་འཚོགས་རྗེས་སླར་ཡང་སྐོང་ཚོགས་བྱས་པའི་ཀྲུང་དབྱང་གི་ལས་དོན་ཚོགས་འདུ་ཐེངས་དང་པོ་ཡིན་པ་དེ་ཐོག་ནས་ཏང་ཀྲུང་དབྱང་གིས་དབུལ་སྐྱོར་གསར་སྤེལ་ལས་དོན་ལ་ཚད་མཐོའི་མཐོང་ཆེན་གནང་ལུགས་གང་ལེགས་མཚོན་ཡོད་པ་རེད། ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས་འཐབ་ཇུས་དང་སྤྱི་ཡོངས་ཀྱི་མཐོ་ཚད་ཐོག་ནས་དབུལ་སྒྲོལ་འགག་སྒྲོལ་ལ་སྐུལ་མ་གཏོང་བའི་དོན་སྙིང་གལ་ཆེན་ལ་རྒྱས་བཤད་གཏིང་ཟབ་གནང་བ་དང་མིག་སྔ་དང་སླད་ཕྱིན་དུས་སྐབས་ཤིག་རིང་གི་དབུལ་སྒྲོལ་འགག་སྒྲོལ་ལས་འགན་ཐད་བཀོད་སྒྲིག་བྱས་ནས་དུས་སྐབས་གསར་པའི་དབུལ་སྐྱོར་གསར་སྤེལ་ལས་དོན་གྱི་མཛད་ཇུས་གལ་ཆེན་དང་། དམིགས་ཚད་དང་ལས་འགན། སྤྱིའི་བླང་བྱ་བཅས་ཁ་གསལ་བཟོས་ཡོད་པ་རེད། 2020ལོར་སླེབས་སྐབས་གྲོང་གསེབ་ཀྱི་མི་འབོར་དབུལ་པོ་དབུལ་སྒྲོལ་ཐུབ་པའི་འགན་ལེན་བྱེད་པར་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱས་ནས་དབུལ་སྐྱོར་གསར་སྤེལ་ལས་དོན་དེ་མཐོ་སར་འཇོག་པ་དང་། ཕུགས་ལ་བསམ་བློ་གཏོང་བ། ཏན་ཏིག་ངང་སྒྲུབ་པ་བཅས་བྱེད་དགོས།

དབུལ་ཕོངས་སེལ་རྒྱུ་ནི་གནའ་དེང་གི་ཀྲུང་གོ་དང་ཕྱི་རྒྱལ་གྱིས་རྒྱལ་སྐྱོང་སྲིད་གཉེར་གྱི་དོན་ཆེན་ཞིག་རེད། དབུལ་ཕོངས་སེལ་བ་དང་། དམངས་འཚོ་ལེགས་སུ་གཏོང་བ། ཐུན་མོང་ཐོག་རིམ་བཞིན་ཕྱུག་པོ་ཆགས་པ་བྱ་རྒྱུ་བཅས་ནི་སྤྱི་ཚོགས་རིང་ལུགས་ཀྱི་ངོ་བོའི་བླང་བྱ་ཞིག་ཡིན་ལ་རང་རེའི་ཏང་གི་འགན་འཁྲི་གལ་ཆེན་ཞིག་ཀྱང་རེད། ཀྲུང་གོ་གསར་པ་དབུ་བརྙེས་ཚུན་རང་རེའི་ཏང་གིས་མི་དམངས་ཀྱི་སྣེ་ཁྲིད་དེ་དབུལ་ཕོངས་ལ་སེལ་བའི་དུང་བརྡ་སྒྲོག་པ་དང་ལྷག་པར་དུ་སྒྱུར་བཅོས་སྒོ་དབྱེ་བྱས་ཚུན་ང་ཚོས་གཞི་ཁྱོན་ཆེ་བའི་དབུལ་སྒྲོལ་གསར་སྤེལ་གྱི་བྱ་སྤྱོད་ལག་ལེན་བསྟར་བས་གྲོང་གསེབ་ཀྱི་མི་འབོར་དབུལ་པོ་དུང་ཕྱུར་7ལྷག་ཙམ་གྲུབ་འབྲས་ཐོབ་པའི་ངང་དབུལ་སྒྲོལ་བྱུང་ནས་འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་ཕྱིར་རྨང་གཞི་བརྟན་པོ་འདིང་ཐུབ་པ་བྱུང་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་ང་ཚོས་དབུལ་སྐྱོར་གསར་སྤེལ་གྱི་ལས་དོན་དེ“ཕྱོགས་ཡོངས་ནས་བཞིའི”འཐབ་ཇུས་བཀོད་སྒྲིག་ནང་བཞག་ནས་ལོ་བརྒྱའི་འབད་འཐབ་དམིགས་ཚད་ཨང་དང་པོ་མངོན་འགྱུར་ཡོང་བའི་གཙོ་གནད་ལས་དོན་དུ་བརྩིས་ཏེ་དེ་བས་མངོན་གསལ་དོད་པའི་གནས་བབ་ཐོག་བཞག་ནས་གནད་སྨིན་དབུལ་སྐྱོར་ལག་ལེན་ཤུགས་ཆེན་བསྟར་བ་དང་ཀྲུང་གོའི་ཁྱད་ཆོས་ཀྱི་དབུལ་སྐྱོར་གསར་སྤེལ་གྱི་འགྲོ་ལམ་ཟམ་མི་ཆད་པར་ཕུན་སུམ་ཇེ་ཚོགས་དང་རྒྱ་སྐྱེད་བཏང་བས་དབུལ་སྐྱོར་གསར་སྤེལ་བྱ་གཞག་ཡར་རྒྱས་མངོན་གསལ་དོད་པོ་བྱུང་ཡོད་པ་རེད།

དབུལ་སྐྱོར་གསར་སྤེལ་དེ་འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་རྒྱུ་དང་། མི་དམངས་ཀྱི་བདེ་རྩ། ཏང་གི་སྲིད་སྐྱོང་རྨང་གཞི་སྲ་བརྟན། རྒྱལ་ཁབ་ཡུན་རིང་བདེ་འཁོད། རྒྱལ་སྤྱིའི་ཐོག་གི་རང་རྒྱལ་གྱི་གཟུགས་བརྙན་བཅས་དང་འབྲེལ་བ་ཡོད་པ་ཞིག་རེད། འབྱོར་འབྲིང་ལ་སླེབས་ཡོད་མེད་དེ་མི་སེར་ལ་ལྟ་རྒྱུ་ནི་འགག་རྩ་ཡིན། འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པ་བྱེད་པའི་དཀའ་ཚེགས་ཆེ་ཤོས་ཀྱི་ལས་འགན་ནི་དབུལ་སྒྲོལ་འགག་སྒྲོལ་ཡིན་པ་དང་ཞན་ཆ་མངོན་གསལ་དོད་ཤོས་ནི་གྲོང་གསེབ་ཏུ་ད་དུང་མི་འབོར་དབུལ་པོ་ཁྲི་7000ལྷག་ཙམ་ཡོད་པ་དེ་རེད། ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་པའི་ཐོག་འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་རྒྱུའི་འབད་འཐབ་དམིགས་ཚད་མངོན་འགྱུར་ཡོང་བ་བྱ་རྒྱུ་ནས་འགོ་བཙུགས་ཏེ“དབུལ་སྐྱོར་འགག་སྒྲོལ”དེ“དབུལ་སྒྲོལ་འགག་སྒྲོལ”དུ་འགྱུར་བ་བྱས་ནས་དུས་སྐབས་གསར་པའི་དབུལ་སྒྲོལ་འགག་སྒྲོལ་གྱི་དམིགས་ཚད་ཁ་གསལ་བཟོས་ཏེ་2020ལོར་སླེབས་སྐབས“འགན་ལེན་གཉིས”མངོན་འགྱུར་ཡོང་བ་བྱེད་པ་དང་། གྲོང་གསེབ་ཀྱི་མི་འབོར་དབུལ་པོ་དབུལ་སྒྲོལ་ཡོང་བའི་འགན་ལེན་དང་རྫོང་དབུལ་པོ་ཡོངས་རྫོགས་ཀྱི་དབུལ་པོའི་ཞྭ་མོ་ཕུད་རྒྱུའི་འགན་ལེན་བྱེད་དགོས། འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པ་དང་ལོ་བརྒྱའི་འབད་འཐབ་དམིགས་ཚད་ཨང་དང་པོ་མངོན་འགྱུར་ཡོང་བར་གྲོང་གསེབ་ཀྱི་མི་འབོར་དབུལ་པོ་ཡོངས་རྫོགས་དབུལ་སྒྲོལ་ཡོང་བ་བྱ་རྒྱུ་ནི་མཚོན་བྱེད་རང་བཞིན་གྱི་དམིགས་ཚད་ཅིག་ཡིན་ཞེས་ཤོད་ཆོག

མིག་སྔར་རང་རྒྱལ་གྱི་དབུལ་སྒྲོལ་འགག་སྒྲོལ་གྱི་དུས་བབ་སྔར་བཞིན་ཛ་དྲག་པོ་ཡོད། དབུལ་སྒྲོལ་དམིགས་ཚད་དཀའ་རྙོག་ཆེ་བས་2020ལོར་སླེབས་སྐབས་གྲོང་གསེབ་ཀྱི་མི་འབོར་དབུལ་པོ་ཁྲི་7000ལྷག་ཙམ་དབུལ་སྒྲོལ་ཐུབ་པ་བྱེད་པར་ལོ་ལྟར་མི་གྲངས་དབུལ་པོ་ཁྲི་1000ལྷག་ཙམ་ཉུང་དུ་གཏོང་དགོས་པ་དང་། དབུལ་སྒྲོལ་འགག་སྒྲོལ་ལས་དོན་སྔོན་སླ་རྗེས་དཀའ་དང་ཇི་ཙམ་སྒྲུབ་པ་དེ་ཙམ་གྱིས་མ་གནས་མཐོ་བ་དང་། དཀའ་ཚད་ཆེ་བ། ཕན་འབྲས་ཐོན་འགོར་བ་བཅས་ཡོད། དཔལ་འབྱོར་ཆག་པའི་གནོན་ཤུགས་ཆེ་བ་དང་། མི་འབོར་དབུལ་པོའི་ལས་ཞུགས་དང་འབབ་འཕར་གྱི་དཀའ་གནད་ཆེ་རུ་འགྲོ་བ། ཞིང་པ་ཁག་གཅིག་གི་ལས་ཀ་ཤོར་ནས་སླར་ཡང་དབུལ་ཕོངས་སུ་གྱུར་པ་སོགས་རེད། ཁ་ཕྱོགས་དེ་གནད་ལ་ཁེལ་བ་བཙལ་ཐུབ་ན་གཞི་ནས་འགྲོ་ཕྱོགས་སྟངས་འཛིན་ཐུབ་པ་དང་རང་འགུལ་ངང་བྱས་རྗེས་བཞག་ན་གཞི་ནས་དཀའ་ངལ་ཁྱད་བསད་ཀྱིས་མདུན་ཕྱོགས་སུ་བསྐྱོད་ཐུབ། ད་ཆ་དབུལ་སྒྲོལ་འགག་སྒྲོལ་ལ་ལོ་མང་རིང་ཐག་གཅོད་མ་ཐུབ་པའི་རིམ་པ་ཟབ་པའི་འགལ་བ་དང་གནད་དོན་ཁག་གཅིག་འཕྲད་ཡོད་ལ་གནས་ཚུལ་གསར་པ་དང་འགྲན་སློང་གསར་པའང་འཕྲད་ཡོད། དབུལ་སྒྲོལ་འགག་སྒྲོལ་དེ་དཀའ་གནད་ལས་སྒྲོལ་བ་དང་འགག་སྒྲོལ་གྱི་མཐའ་མའི་གདོང་མཆོང་དུས་མཚམས་སུ་སླེབས་ནས་འཕྲད་པའི་གནད་དོན་མཐའ་དག་ནི་དབུལ་ཕོངས་ནང་གི་དབུལ་ཕོངས་དང་དཀའ་ངལ་ནང་གི་དཀའ་ངལ་ལས་མ་འདས་པས་རྒྱུན་སྲོལ་གྱི་བསམ་ཕྱོགས་དང་བྱ་ཐབས་དང་སྔ་ལམ་འགྱུར་མེད་ཁོ་ནར་བརྟེན་ན་ལས་འགན་ལེགས་གྲུབ་བྱེད་དཀའ་བས་ངེས་པར་དུ་སྔར་བས་ཆེ་བའི་ཆོད་སེམས་དང་། སྔར་བས་ཁ་གསལ་བའི་བསམ་ཕྱོགས། དེ་བས་གནད་སྨིན་གྱི་བྱ་ཐབས། རྒྱུན་སྲོལ་ལས་བརྒལ་བའི་སྒྲུབ་ཤུགས་ཆེར་གཏོང་བཅས་ཀྱི་ཐོག་ནས་མང་པོ་གཅིག་ཏུ་བློ་མཐུན་ན། ཉམ་ཆུང་གིས་ཀྱང་དོན་ཆེན་འགྲུབ་ཅེས་པ་ལྟར་དབུལ་སྒྲོལ་འགག་སྒྲོལ་གྱི་དམིགས་ཚད་མངོན་འགྱུར་ཡོང་ཐུབ།

“གནམ་འོག་གི་ཟང་ཟིང་བཅོས་རྒྱུ་ནི་མི་རང་ག་བ་ཞིག་གི་དར་རྒུད་ཙམ་མིན་པར་མང་ཚོགས་ཁྲི་སྟོང་མང་པོའི་བདེ་སྡུག་དང་འབྲེལ”དབུལ་སྒྲོལ་འགག་སྒྲོལ་དམག་འཐབ་ཀྱི་གདོང་མཆོང་དུང་བརྡ་བཏང་ཟིན་པས་ཏང་ཡོངས་ཀྱི་བློ་མཐུན་ཚོས་ངེས་པར་དུ་བསམ་བློ་དང་བྱ་སྤྱོད་དེ་ཏང་ཀྲུང་དབྱང་གི་འཐབ་ཇུས་བཀོད་སྒྲིག་ཐོག་གཅིག་གྱུར་ཡོང་བ་དང“འགན་ལེན་གཉིས”ཀྱི་དམིགས་ཚད་མངོན་འགྱུར་ཡོང་བའི་ཐོག་གཅིག་གྱུར་ཡོང་བ་བྱས་ནས་རྒྱལ་ཡོངས་དང་སྤྱི་ཚོགས་ཡོངས་ཀྱི་སྟོབས་ཤུགས་སྐུལ་སློང་བྱས་ཏེ“རི་ཀླུང་གསར་པར་བསྒྱུར་རྒྱུའི་སྙིང་སྟོབས་ལྡན་པའི”དཔའ་ཉམས་དང“རྒྱལ་ཁ་ལེན་མ་ཐུབ་ན་ཕྱིར་མི་ལོག་པའི”ངར་ཤུགས་བསྐྱེད་དེ་དབུལ་ཕོངས་སེལ་རྒྱུར་ཕྱོགས་ཡོངས་ནས་ཕར་རྒོལ་གྱིས་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་མཐའ་གཅིག་ཏུ་བླངས་ནས་2020ལོར་སླེབས་སྐབས་ས་ཁུལ་དབུལ་ཕོངས་དང་མི་འབོར་དབུལ་ཕོངས་ཚང་མ་དང་མཉམ་དུ་ཕྱོགས་ཡོངས་ནས་འབྱོར་འབྲིང་སྤྱི་ཚོགས་སུ་སླེབས་ཐུབ་པ་བྱས་ནས་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་འགྲུབ་ཕྱིར་འོད་སྟོང་འཕྲོ་བའི་ལེའུ་གསར་པ་ཞིག་རྩོམ་དགོས།