འདི་ནི་སེ་ར་ལྷོ་ལམ་སྤྱི་ཚོགས་ཚན་རིག་ཁང་གི་འཁྲིས་སུ་ཡོད་པའི་དམངས་ཕན་གོང་ཁེའི་ཚགས་ཤ་དང་མར་བྲིན་ཚོང་ས་ཚིགས་སུ་ལྷ་སའི་གྲོང་མིས་གོང་ཁེའི་ཚགས་ཤ་ཉོ་བའི་གནས་ཚུལ་ཡིན་པ།
རྫོང་རྒྱབ་ཀླུ་ཁང་དུ་བཙུགས་པའི་ལྷ་ས་གྲོང་ཁྱེར་གྱི་དམངས་ཕན་གོང་ཁེའི་ཕྱིར་ཚོང་བྱ་ཡུལ་ནས་མར་ཉོ་བཞིན་ཡོད་པའི་ཨ་མ་བཀྲ་བཟང་གིས“མར་རྒྱ་མ་གང་ལ་སྒོར་34དང་ཚགས་ཤ་རྒྱ་མ་རེར་སྒོར་29རེད་འདུག ཁྲོམ་རའི་རིན་གོང་ལས་ཧ་ཅང་གི་ཁེ་བ་འདུག”ཅེས་བསྔགས་བརྗོད་བྱས། ལྷ་ས་གྲོང་ཁྱེར་གྱི་ཚགས་ཤ་དང་མར་གྱི་ཁྲོམ་རའི་རིན་གོང་བརྟན་པོ་དང་ཡོང་འབབ་དམའ་བའི་མང་ཚོགས་ཀྱི་འཛད་སྤྱོད་དགོས་མཁོ་བསྐངས་ཆེད་ཉེ་ཆར་ལྷ་ས་གྲོང་ཨུད་དང་གྲོང་ཁྱེར་སྲིད་གཞུང་གིས“སྲིད་གཞུང་གིས་ཁྲིད་སྟོན་བྱེད་པ་དང་། ཁེ་ལས་ཀྱིས་འཁོར་སྐྱོད་བྱེད་པ། ཁ་གསབ་འོས་འཚམ་སྤྲོད་པ”བཅས་ཀྱི་རྣམ་པ་བརྒྱུད་ལྷ་ས་གྲོང་ཁྱེར་གྲོང་ཁྱེར་མ་འཇོག་ཀུང་སིས་འབྲེལ་ཡོད་སྡེ་ཚན་དང་མཉམ་འབྲེལ་ཐོག་ཉེ་དུས་སི་ཁྲོན་དང་ཀན་སུའུ་ནས་ཚགས་ཤ་ཏུན་130དང་མར་ཏུན་20སྔོན་མངགས་བྱས་ཡོད། མིག་སྔར་ཚགས་ཤ་ཏུན་80ལྷ་སར་དབོར་ཟིན་པ་མ་ཟད་ཁྲོམ་རར་བཏོན་ཟིན་པ་རེད།
ལྷ་སའི་གྲོང་ཁྱེར་མ་འཇོག་ཀུང་སིའི་ཏུང་ཧྲི་ཀྲང་འཇམ་དབྱངས་དངོས་གྲུབ་ཀྱིས་ལས་དོན་དེ་ནུས་ལྡན་ངང་སྤེལ་བའི་ཕུགས་ཕན་ལམ་སྲོལ་ཆགས་པ་བྱ་ཆེད་གྲོང་ཁྱེར་དེ་ཡོངས་སུ་དམངས་ཕན་གོང་ཁེའི་ཚགས་ཤ་དང་མར་ཐད་ཚོང་བྱ་ཡུལ་10འཛུགས་རྩིས་ཡོད་པ་དང་མིག་སྔར་དམངས་ཕན་ཕྱིར་ཚོང་བྱ་ཡུལ་4དངོས་སུ་སྤྱོད་འགོ་ཚུགས་ཟིན་ཡོད་ཅེས་ངོ་སྤྲོད་བྱས།ཟླ་11ཚེས་16ཉིན་བར་སྐོར་ཁྲོམ་གཞུང་གི་དམངས་ཕན་ཚགས་ཤ་དང་མར་ཐད་ཚོང་བྱ་ཡུལ་དུ་ར་མོ་ཆེ་སྡེ་ཁུལ་གྱི་གྲོང་མི་ཚེ་གཡང་གིས“རང་ཉིད་ཁྱིམ་གྱི་ཚགས་ཤ་མང་ཆེ་བ་དམངས་ཕན་ཕྱིར་ཚོང་ཁང་ནས་ཉོས་པ་ཤ་སྟག་ཡིན། ཕྱི་ནས་རྒྱ་མ་རེར་སྒོར་40བྱས་པ་དེར་དམངས་ཕན་ཕྱིར་ཚོང་ཁང་ནས་སྒོར་29ལས་བྱེད་ཀྱི་མི་འདུག་ལ། བྲོ་བའང་ཧ་ཅང་ཞིམ་པོ་འདུག ང་ཚོ་ནང་མི་ཚང་མ་ཚགས་ཤ་དེ་ཟ་རྒྱུར་དགའ་པོ་ཡོད”ཅེས་གསར་འགོད་པར་བཤད།
འཇམ་དབྱངས་དངོས་གྲུབ་ཀྱིས་ངོ་སྤྲོད་བྱས་པ་གཞིར་བཟུང་། ཟླ་11ཚེས་13ཉིན་སེ་ར་ལྷོ་ལམ་དང་། ཚེས་གསུམ་ཐང་ལམ། རྫོང་རྒྱབ་ཀླུ་ཁང་སྤྱི་གླིང་སོགས་སུ་གསར་དུ་བཙུགས་པའི་དམངས་ཕན་གོང་ཁེའི་ཚགས་ཤ་དང་། མར། སྔོ་ཚལ་སོགས་ཕྱིར་ཚོང་བྱ་ཡུལ་དངོས་སུ་སྤྱོད་འགོ་ཚུགས་ཡོད། སེ་ར་ལྷོ་ལམ་སྤྱི་ཚོགས་ཚན་རིག་ཁང་ཉེ་འགྲམ་གྱི་ཕྱིར་ཚོང་བྱ་ཡུལ་དུ་བགྲེས་སོང་བཀྲ་ཤིས་ཀྱིས་དམངས་ཕན་གོང་ཁེའི་ཚགས་ཤ་དང་མར་ཐད་ཚོང་བྱ་ཡུལ་རང་ཁྱིམ་གྱི་སྒོ་རྩར་བཙུགས་པས་སྟབས་བདེ་ལ་ཕན་ཐོགས་པོ་ཞིག་འདུག་ཅེས་བཤད།
འཇམ་དབྱངས་དངོས་གྲུབ་ཀྱིས“ང་ཚོས་ཉོ་སྒྲུབ་བྱས་པའི་ཚགས་ཤ་དང་མར་ཚང་མ་ས་གནས་དེ་གའི་ནད་ཡམས་རྟོག་ཞིབ་སྡེ་ཚན་གྱིས་ཞིབ་བཤེར་བྱས་རྗེས་གཞི་ནས་ལྷ་སར་དབོར་གྱི་ཡོད། ལྷ་སར་འབྱོར་རྗེས་འབྲེལ་ཡོད་ཞིབ་བཤེར་བྱས་པ་བརྒྱུད་ཚང་མ་ཚད་དང་མཐུན་ཡོད་པས་མི་སེར་ཚོས་བློ་བདེའི་ངང་ཉོ་ཆོག”ཅེས་བཤད།