རྐང་པ།
རྐང་པ་གྲང་བསྲན་ཆུང་ཤོས་གནས་ཡིན་ལ།།
མཁལ་མཆེར་ཕོ་བའི་རྩ་ལམ་དེ་ནས་གྱེས༎
དེ་བཞིན་སྙིང་དང་བར་ཐག་རིང་བ་ཡི༎
ཁྲག་ཁམས་འཁོར་རྒྱུག་ལ་ཡང་ཤུགས་མི་འདང་༎
དེས་ན་ཉིན་ལྟར་ཆུ་འཁོལ་དྲོད་འཇམ་ནང་༎
རྐང་པ་གཉིས་པོ་སྦངས་ནས་ལུས་དྲོད་གསོས༎
ཁྲག་ཁམས་འཁོར་རྒྱུག་ཡོང་བར་ཕན་པ་ཆེ༎
ཞར་དུ་རྐང་མཐིལ་གཉིས་པོར་འཕུར་མཉེད་བྱོས༎
སྐེད་པ།
སྐེད་འཁོར་རྒྱུད་ནི་མཁལ་མའི་གནས་ཡིན་པས༎
དེ་རྒྱུད་འཁྱག་པའི་ཚེ་ན་ནད་རྟགས་ནི༎
ཕོ་ལ་སྐྱེས་པའི་ནད་ཀྱི་ནད་རྟགས་དང་༎
མོ་ལ་བུད་མེད་ནད་ཀྱི་ཟུག་རྔུ་འབྱུང་༎
དེས་ན་སྤྱོད་ལམ་གྱོན་གོས་མཐུག་ཙམ་དང་༎
སྐེད་འཁོར་དམར་ཧྲེང་ལུས་རྒྱུར་འཛེམ་པའོ༎
དེ་བཞིན་ལག་གི་སྦར་མོ་གཉིས་པོ་ཡི༎
མཁལ་གསང་གཉིས་པོ་འཕུར་ནས་དྲོད་པར་བྱ༎
མགོ་བོ།
མགོ་ནི་ལུས་དང་དབང་པོའི་གཙོ་བོ་སྟེ༎
དེ་ཀོ་འཁྱགས་པས་ཆམ་པ་ཡ་མ་དང་༎
མགོ་བོ་ན་བའི་ནད་རྟགས་ཁྱད་མཚར་འབྱུང་༎
དེ་བཞིན་མགོ་བོས་ལུས་དྲོད་བསྲུང་མི་ཐུབ༎
དེས་ན་དགུན་དུས་ཞྭ་མོ་གྱོན་པ་དགའ༎
ལྷག་པར་མཚོག་མ་དཔྲལ་བ་བཀབ་བྱས་ན༎
མགོ་བོའི་དྲོད་སྲུང་ཁྲག་རྩའི་འཁོར་རྒྱུག་གམ༎
རླུང་ཁྲག་བདེ་བར་རྒྱུ་ཞེས་སྨན་པས་གསུངས༎
སྐེའམ་མཇིང་པ།
སྐེའམ་མཇིང་པ་ལུས་པོའི་འཕྲང་ལམ་སྟེ༎
སྙིང་དང་ཀླད་ཁམས་ཁྲག་རྩའི་བཞུད་ལམ་ཡིན༎
ཤིན་ཏུ་གཉན་པའི་གནས་དེ་འཁྱག་ཆེ་ན༎
མཇིང་ཚིགས་དབུགས་ལམ་ན་ཚ་དེ་མུར་འོང་༎
དེས་ན་དགུན་དུས་ཁང་པའི་ནང་དུའམ༎
ཕྱི་རོལ་གང་ཅིར་དེ་ལ་གཅེས་དགོས་ཏེ༎
གོང་བ་ཅན་གྱི་གོས་དང་གོང་དཀྲིས་སམ༎
སྐེ་རས་དཀྲིའོ་དེ་དོན་ཡིད་འཇགས་འཚལ༎
པུས་མོ།
པུས་མོ་འཁྱགས་པས་པུས་ཚིགས་མཐའ་འཁོར་གྱི༎
ཤ་གནད་ཁྲག་རྩ་འཁུམས་ནས་ཟུག་རྔུ་འབྱུང་༎
པུས་ཚིགས་བསྲུང་བའི་འགག་རྩ་དྲོ་ཇུས་ཏེ༎
ངལ་བའམ་འཁྱག་དང་བཞའ་ལ་འཛེམ་པར་བྱ༎
རྣ་ཅོག
རྣ་ཅོག་དྲོད་ནི་ཡུད་ལ་ཡལ་འགྲོ་ཞིང་༎
པགས་པ་སྲབ་པས་འཁྱག་ཤུལ་རྨ་རུ་གྱུར༎
དེས་ན་རྣ་ཅོག་དྲོ་ཇུས་ཐབས་ཤེས་ནི༎
ཞྭའམ་ཁ་དཀྲིས་ཆེན་པོས་རྣ་ཅོག་གཏུམས༎
སྣ་ཁུང་།
སྣ་སྦུག་སྐྱི་ལྤགས་ཚོར་བ་སྐྱེན་དྲགས་པས༎
མཁའ་རླུང་གྲང་མོས་དེ་ལ་ཕོག་ཐུག་བྱུང་༎
སྐྱི་ལྤགས་བྱེད་ནུས་ཉམས་ཏེ་ཆམ་པ་ཕོག
དབུཌ་ལམ་གཉན་ཚད་ལ་སོཌ་འབྱུང་བར་བཤད༎
དེས་ན་དགུན་དུས་སྣ་གཤོག་གཉིས་པོ་དེ༎
མཐེ་བོང་མཛུབ་མོའི་བར་དུ་ཅུང་ཟད་འཕུར༎
སྣ་ཡི་དྲོད་བསྲུང་ཁྲག་རྒྱུན་འཁོར་རྒྱུག་བཟང་༎
ཡང་ན་ཆུ་གྲང་ནང་དུ་གོམས་པར་མཛོད༎
སྒལ་པ།
ལུས་ཀྱི་སྒལ་རྒྱབ་དེ་ཡང་གལ་ཆེ་སྟེ༎
སྒལ་རྒྱབ་སྣང་མེད་ཤོར་ནས་འཁྱགས་སོང་ན༎
བསེར་རླུང་ལུས་ལ་ཐིམས་ནས་ནད་གཞི་འབྱུང་༎
ལུས་པོའི་ནད་འགོག་ནུས་པ་ཉམས་པའོ༎
དེས་ན་དགུན་གྱི་དུས་སུ་ལུས་སྟོད་ལ༎
སྲིང་བལ་ལ་སོགས་སྤུ་རིགས་སྟོད་གོས་ཀྱིས༎
དྲོ་ཇུས་བྱས་ན་བཟང་ལ་དེ་མིན་དུ༎
ཉི་མའི་དྲོད་ལ་བསྲོས་ནའང་ལེགས་ཞེས་གསུངས༎