རང་རྒྱལ་ནི་མི་རིགས་ལྔ་བཅུ་ང་དྲུག་ལས་གྲུབ་པའི་མི་རིགས་མང་བའི་རྒྱལ་ཁབ་ཅིག་ཡིན། དེ་ནི་རང་རྒྱལ་ལ་ལྡན་པའི་དམིགས་བསལ་ཆེ་བའི་ཁྱད་གཤིས་དང་མངོན་གསལ་དོད་པའི་མི་རིགས་ཀྱི་ཁྱད་ཆོས་ཤིག་རེད་ལ་རང་རྒྱལ་ལ་མ་གཏོགས་མེད་པའི་རྩ་ཆེའི་རྒྱུ་ནོར་དང་དམིགས་བསལ་གྱི་ལེགས་ཆ་གལ་ཆེན་ཞིག་ཀྱང་རེད། འོན་ཏེ་རྒྱུ་ནོར་དང་ལེགས་ཆ་དེ་དག་རང་སོར་བཞག་ན་ནུས་པ་རང་ཤུགས་སུ་ཐོན་ག་ལ་སྲིད། དེ་དག་གནས་པ་དང་འཕེལ་བར་བྱེད་པའི་རྨང་གཞིའི་སྔོན་འགྲོའི་ཆ་རྐྱེན་དང་དགོས་ངེས་ཀྱི་ཆ་རྐྱེན་ནི་མཐུན་སྒྲིལ་བྱ་རྒྱུ་དེ་རེད།
བློ་མཐུན་ཞིས་ཅིན་ཕིང་གིས་མི་རིགས་མཐུན་སྒྲིལ་ནི་མི་རིགས་ཁག་གི་མང་ཚོགས་ཀྱི་སྲོག་རྩ་ལྟ་བུ་ཡིན་ཞེས་དམིགས་སུ་བཀར་ནས་ནན་བཤད་གནང་ཡོད། མི་སེམས་མཐུན་ན་སྟོབས་ཤུགས་འཕེལ་ཞིང་། མཐུན་སྒྲིལ་མ་བྱས་ན་རང་ཉིད་རྩ་མེད་དུ་འགྲོ་བའི་ལྟེ་བྲལ་ནུས་ཤུགས་དང་། ཟུར་དུ་འབུད་ཤུགས། བསད་རྨས་གཏོང་ཤུགས་བཅས་ཆེན་པོ་ཞིག་ཐོན་མོད། འོན་ཏེ་མཐུན་སྒྲིལ་བྱས་ན་འགྲན་ཟླ་མེད་པའི་གོང་བུ་འགྲིལ་ཤུགས་དང་། བློ་ཁ་ཕྱོགས་ཤུགས། དམག་འཐབ་བྱེད་ཤུགས་བཅས་ཆེན་པོ་ཞིག་ཆགས་ཐུབ། མཐུན་སྒྲིལ་བྱེད་ཤུགས་ཆེ་རུ་བཏང་ན་མི་རིགས་ཁག་སྣ་མང་གཞི་གཅིག་གི་རྩ་ཆེའི་རྒྱུ་ནོར་གྱི་རིན་ཐང་གཞི་ནས་མངོན་རྒྱུ་སྨོས་ཅི་དགོས། དེ་འདྲ་བྱུང་ན་རྒྱལ་ཡོངས་མི་རིགས་ཁག་གི་མི་དམངས་དང་ཀྲུང་ཧྭ་བུ་ཕྲུག་ཡོངས་ཀྱི་ངོས་ནས་བརྗོད་ན་བསོད་ནམས་ཤིག་རེད། དེ་མིན་ན་མཐུན་སྒྲིལ་ཤོར་བ་དང་མཐུན་སྒྲིལ་མ་བྱུང་བར་མི་རིགས་ཁག་སྣ་མང་གཞི་གཅིག་གི་རྩ་ཆེའི་རྒྱུ་ནོར་གྱི་རིན་ཐང་མངོན་མི་ཐུབ་པ་དང་མི་རིགས་ཁག་སྣ་མང་གཞི་གཅིག་གི་དམིགས་བསལ་ལེགས་ཆ་དེ་ཞན་ཆར་འགྱུར་རྒྱུ་རེད། དེ་རྒྱལ་ཡོངས་མི་རིགས་ཁག་གི་མི་དམངས་དང་ཀྲུང་ཧྭ་བུ་ཕྲུག་ཡོངས་ཀྱི་ངོས་ནས་བརྗོད་ན་ཆག་སྒོ་ཆེན་པོ་ཞིག་རེད།
ང་ཚོ་མི་རིགས་ཚང་མའི་ངོས་ནས་བརྗོད་ན། རང་མི་རིགས་ཀྱི་ཁྱིམ་ཚང་ཆུང་ངུ་ཞིག་ཡོད་པ་མ་ཟད། རང་མི་རིགས་དང་འབྲེལ་བ་ཆེན་པོ་ཡོད་པའི་ཁྱིམ་ཚང་ཆེན་པོ་ཞིག་ཀྱང་ཡོད་པ་ནི“མེས་རྒྱལ”རེད། དོན་སྙིང་ངེས་ཅན་ཞིག་གི་ཐོག་ནས་བརྗོད་ན་མེས་རྒྱལ་ནི་ངོས་འཛིན་རྒྱུ་མེད་པའི་ཐ་སྙད་དང་མཚོན་རྟགས་མིན་པར་ཕོ་མོ་རྒན་གཞོན་གྱི་དབྱེ་བ་དང་མི་རིགས་ཀྱི་དབྱེ་བ་མེད་པའི་ཐུན་མོང་གི་ཁྱིམ་ཚང་ཞིག་རེད་ལ་ང་ཚོ་མི་ཚང་མ་དང་མི་རིགས་ཚང་མ་བདེ་སྡུག་གཅིག་མཐུན་དང་དབུགས་ལམ་གཅིག་གྱུར་གྱི་ལས་དབང་གཅིག་མཐུན་འདུས་གྲུབ་ཅིག་ཀྱང་རེད། མེས་རྒྱལ་ཞེས་པ་ནི་ཁྱེད་དང་ང་རེད་ལ་ཁོང་ཡང་རེད། མེས་རྒྱལ་ཉིད་ཁྱེད་དང་ང་ལས་གྲུབ་ལ་ཁོང་ལས་ཀྱང་གྲུབ་ཡོད། རང་རྒྱལ་གྱི་མི་རིགས་ལྔ་བཅུ་ང་དྲུག་ཚང་མ་ནི་ཀྲུང་ཧྭ་མི་རིགས་ཁྱིམ་ཚང་ཆེན་པོའི་ནང་གི་འདྲ་མཉམ་ནང་མི་ཡིན་ཞིང་། ཁྱེད་ཀྱི་ཁྲོད་དུ་ང་ཡོད་པ་དང་ངའི་ཁྲོད་དུ་ཁྱེད་ཡོད་པའི་ཕན་ཚུན་ཚང་མ་བྲལ་ཐབས་མེད་པའི་ཀྲུང་ཧྭ་མི་རིགས་ཀྱི་ལས་དབང་གཅིག་མཐུན་འདུས་གྲུབ་ཅིག་ཆགས་ཡོད། དེས་ན་ང་ཚོ་མི་རིགས་ཁག་གི་སྤུན་ཟླ་ཚོས་ཕན་ཚུན་སོ་སྲུང་རོགས་རེས་བྱས་ནས་ཐུན་མོང་ཐོག་མི་རིགས་མཐུན་སྒྲིལ་དང་མེས་རྒྱལ་གཅིག་གྱུར་སྲུང་སྐྱོང་བྱེད་དགོས།
དེང་སྐབས་ཀྲུང་ཧྭ་མི་རིགས་རླབས་ཆེན་བསྐྱར་དར་ཡོང་བ་བྱ་རྒྱུའི་ཀྲུང་གོའི་ཕུགས་འདུན་ནི་ང་ཚོ་ཀྲུང་ཧྭ་བུ་ཕྲུག་ཡོངས་ཀྱི་ཐུན་མོང་བསམ་འདུན་དང་འབད་འཐབ་དམིགས་ཚད་ཅིག་རེད། རླབས་ཆེན་བསྐྱར་དར་ཡོང་བ་བྱ་རྒྱུའི་ཀྲུང་གོའི་ཕུགས་འདུན་ནི་ཆོ་མེད་འབོད་ཚིག་ཅིག་མིན་པར་དེ་ནི་ང་ཚོ་མི་རིགས་ཚང་མ་དང་ཀྲུང་ཧྭ་བུ་ཕྲུག་ཡོངས་ཀྱིས་ཕྱར་བ་གྲུ་འདེགས་དང་འབད་འབུངས་ལྷོད་མེད་བྱས་ནས་མངོན་འགྱུར་བྱེད་དགོས་ཀྱི་ཡོད།
དེས་ན་ཀྲུང་ཧྭའི་བུ་ཕྲུག་ཚང་མས་ཀྲུང་ཧྭའི་མི་རིགས་ཚང་མ་ཁྱིམ་ཚང་གཅིག་ལྟར་འཆམ་པའི་བསམ་བློའི་ངོས་འཛིན་ཟབ་ཏུ་གཏོང་བ་དང་ཆབས་ཅིག་རླབས་ཆེན་མེས་རྒྱལ་དང་། ཀྲུང་ཧྭ་མི་རིགས། ཀྲུང་ཧྭའི་རིག་གནས། ཀྲུང་གོ་གུང་ཁྲན་ཏང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་བཅས་ལ་ངོས་འཛིན་གཅིག་མཐུན་བྱེད་ཤུགས་ཆེ་རུ་བཏང་སྟེ་ཀྲུང་གོའི་ཕུགས་འདུན་མངོན་དུ་འགྱུར་བའི་རླབས་ཆེན་བྱ་སྤྱོད་ནང་ཧུར་ཐག་ཞུགས་ནས་མི་རིགས་ཁག་གི་མི་དམངས་མཐུན་སྒྲིལ་རྡོག་རྩ་གཅིག་ཏུ་འགྲིལ་བ་དང་རླབས་ཆེན་མེས་རྒྱལ་དར་ཞིང་རྒྱས་པའི་ལྟ་ན་སྡུག་པའི་རྣམ་པ་ཞིག་ཐུན་མོང་ཐོག་གཏོད་དགོས་པ་དང་བྱ་སྤྱོད་དངོས་ཀྱི་ཐོག་ནས་མི་རིགས་མཐུན་སྒྲིལ་ལ་སྐུལ་འདེད་དང་མེས་རྒྱལ་གཅིག་གྱུར་ལ་སྲུང་སྐྱོང་བྱ་ཕྱིར་རང་ཉིད་ཀྱི་ལེགས་སྐྱེས་འབུལ་དགོས།