ཕྱོགས་ཡོངས་ནས་འབྱོར་འབྲིང་བསྐྲུན་པའི་གཙོ་གནད་དེ“ཕྱོགས་ཡོངས”ཡིན་པ་དང་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་པའི་ཐོག་བཏོན་པའི“འཕེལ་རྒྱས་ཀྱི་འདུ་ཤེས་ཆེན་པོ་ལྔའི”ཁྲོད་ནས“མཐུན་སྦྱོར་འཕེལ་རྒྱས”ཀྱིས“ཕྱོགས་ཡོངས”ཞེས་པའི་ཡིག་འབྲུ་གཉིས་ནན་བཤད་བྱས་པ་དང་འཕེལ་རྒྱས་ཀྱི་དོ་སྙོམས་མིན་པའི་གནད་དོན་ཐག་གཅོད་བྱ་རྒྱུར་སྣང་ཆེན་བྱས་ཡོད། “ལོ་ལྔ་ཚན་བཅུ་གསུམ་པའི”རིང་གི་འཕེལ་རྒྱས་དམིགས་ཚད་ཕྱོགས་ཡོངས་ནས་མངོན་འགྱུར་བྱེད་པར་ངེས་པར་དུ་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་བྱ་གཞག་གི་སྤྱི་ཡོངས་ཀྱི་བཀོད་པ་ཁོང་དུ་བརྟན་པོ་ཆུད་དེ་འཕེལ་རྒྱས་ཁྲོད་ཀྱི་འབྲེལ་བ་འགངས་ཆེན་ཐག་གཅོད་ཡང་དག་བྱེད་པ་དང་མཐུན་སྦྱོར་འཕེལ་རྒྱས་ལ་སྐུལ་འདེད་གཏོང་བ། དོ་སྙོམས་ཀྱི་གྲུབ་ཆ་ཆགས་པ་བཅས་བྱས་ཐོག་འཕེལ་རྒྱས་ཀྱི་ཁྱོན་ཡོངས་རང་བཞིན་ཟམ་མི་ཆད་པར་ཤུགས་ཆེར་གཏོང་དགོས།

མཐུན་སྦྱོར་ནི་རྒྱུན་སྲིང་དང་སྐྱོན་བྲལ་ངང་འཕེལ་རྒྱས་འགྲོ་བའི་ནང་གནས་བླང་བྱ་ཡིན་ཞིང་། རང་རྒྱལ་གྱི་འཕེལ་རྒྱས་མཐུན་སྦྱོར་མེད་པ་དེ་ཡུན་རིང་ནང་ལྷག་པའི་གནད་དོན་ཞིག་ཡིན་པ་དང་ས་ཁོངས་དང་། གྲོང་ཁྱེར་དང་གྲོང་གསེབ། དཔལ་འབྱོར་དང་སྤྱི་ཚོགས། དངོས་པོའི་དཔལ་ཡོན་དང་བསམ་པའི་དཔལ་ཡོན། དཔལ་འབྱོར་འཛུགས་སྐྲུན་དང་རྒྱལ་སྲུང་འཛུགས་སྐྲུན་སོགས་འབྲེལ་བའི་ཐད་མཚོན་ཚུལ་མངོན་གསལ་དོད་པོ་ཡོད། གལ་ཏེ་དཔལ་འབྱོར་འཕེལ་རྒྱས་ཀྱི་ཆུ་ཚད་རྗེས་སུ་ལུས་པའི་གནས་ཚུལ་འོག་དུས་མཚམས་ཤིག་རིང་གི་ལས་འགན་གཙོ་བོ་ནི་མགྱོགས་མྱུར་འཕེལ་རྒྱས་གཏོང་དགོས་མོད། འོན་ཀྱང་ལམ་ཐག་ངེས་ཅན་དུ་སླེབས་རྗེས་འབྲེལ་བ་ལེགས་སྒྲིག་བྱ་རྒྱུར་དོ་སྣང་དང་འཕེལ་རྒྱས་ཀྱི་སྤྱི་ཡོངས་ཕན་ནུས་ལ་དོ་སྣང་བྱེད་དགོས།

དེ་ལྟར་མ་བྱས་ཚེ“ཤིང་ཟོམ”གྱི་ཆོས་ཉིད་མངོན་གསལ་དོད་དུ་འགྲོ་བ་དང་སྤྱི་ཚོགས་ཀྱི་འགལ་ཟླ་རབ་དང་རིམ་པ་ཟམ་མི་ཆད་པར་གཏིང་ཟབ་ཏུ་འགྲོ་སྲིད། “ལོ་ལྔ་ཚན་བཅུ་གསུམ་པའི”རིང་གི་དཔལ་འབྱོར་དང་སྤྱི་ཚོགས་འཕེལ་རྒྱས་འཆར་འགོད་བྱེད་པར་ངེས་པར་དུ་གྲུབ་ཆ་ལེགས་སྒྲིག་དང་ཞན་ཆ་གསབ་པའི་ཐད་ཚད་བརྒལ་རང་བཞིན་གྱི་འཕེལ་རིམ་ཡོང་བ་བྱེད་པ་དང་འཕེལ་རྒྱས་ཀྱི་མཐུན་སྦྱོར་རང་བཞིན་དང་དོ་སྙོམས་རང་བཞིན་ཟབ་ཏུ་གཏོང་དགོས།

འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པ་བྱེད་པར“འབྱོར་འབྲིང”ནན་བཤད་བྱས་པ་ཙམ་མ་ཟད་གལ་འགངས་དེ་བས་ཆེ་ལ་དེ་བས་སྒྲུབ་དཀའ་བ་ནི“ཕྱོགས་ཡོངས”ཡིན་ཞིང་། “འབྱོར་འབྲིང”གིས་འཕེལ་རྒྱས་ཀྱི་ཆུ་ཚད་མཚོན་པ་དང“ཕྱོགས་ཡོངས”ཀྱིས་འཕེལ་རྒྱས་ཀྱི་དོ་སྙོམས་རང་བཞིན་དང་། མཐུན་སྦྱོར་རང་བཞིན། རྒྱུན་མཐུད་རང་བཞིན་བཅས་མཚོན་གྱི་ཡོད། གལ་ཏེ་2020ལོར་སླེབས་སྐབས་ང་ཚོས་སྤྱི་འབོར་དང་མྱུར་ཚད་ཐད་ལས་འགན་ལེགས་གྲུབ་ཐུབ་མོད། འོན་ཀྱང་འཕེལ་རྒྱས་དོ་སྙོམས་མེད་པ་དང་། མཐུན་སྦྱོར་མེད་པ། རྒྱུན་མཐུད་མེད་པ་བཅས་ཀྱི་གནད་དོན་དེ་བས་ཚབས་ཆེར་འགྲོ་བ་དང་ཞན་ཆ་དེ་བས་མངོན་གསལ་དོད་དུ་སོང་ཚེ་དམིགས་ཚད་དངོས་སུ་མངོན་འགྱུར་ཐུབ་པར་བརྩི་མི་རུང་། 《གྲོས་འགོའི》ནང་འཕེལ་རྒྱས་ཀྱི་མཐུན་སྦྱོར་རང་བཞིན་ཟབ་ཏུ་གཏོང་བའི་གཙོ་གནད་ནི་གྲོང་ཁྱེར་དང་གྲོང་གསེབ་ཀྱི་ས་ཁོངས་མཐུན་སྦྱོར་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ་དང་། དཔལ་འབྱོར་དང་སྤྱི་ཚོགས་མཐུན་སྦྱོར་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ། བཟོ་ལས་ཅན་དང། ཆ་འཕྲིན་ཅན། གྲོང་ཁྱེར་དང་གྲོང་རྡལ་ཅན། ཞིང་ལས་དེང་རབས་ཅན་བཅས་གསར་པའི་གོམ་སྟབས་གཅིག་མཚུངས་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ་བཅས་བྱས་ཏེ་རྒྱལ་ཁབ་ཀྱི་སྟོབས་ཤུགས་ཆེ་རུ་གཏོང་བ་དང་དུས་མཚུངས་རྒྱལ་ཁབ་ཀྱི་འཇམ་ཤུགས་ཀྱང་ཆེ་རུ་གཏོང་རྒྱུར་དོ་སྣང་བྱེད་དགོས། ང་ཚོས་དགོངས་དོན་དེ་གཞིར་བཟུང་དམིགས་སའི་རང་བཞིན་ལྡན་པའི་སྒོ་ནས་ཆེད་མངགས་ཞིབ་འཇུག་དང་སྔར་བས་གཅིག་སྡུད་འགག་སྒྲོལ་བྱས་ཐོག་སྤྱོད་གོ་ཆོད་པའི་བསམ་ཕྱོགས་དང་དངོས་སྒྲུབ་ཀྱི་བྱེད་ཐབས་བཏོན་ནས་དེང་རབས་ཅན་འཛུགས་སྐྲུན་གྱི་ལྷུ་ཚིགས་ཁག་དང་ཕྱོགས་ཁག་མཐུན་སྦྱོར་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས་པ་བཏོན་པ་རེད།

མཇུག་བསྡུའི་དམག་འཐབ་དེར་དོ་སྙོམས་ཡོང་རྒྱུར་སྣང་ཆེན་བྱེད་དགོས། ཕྱོགས་ཡོངས་ནས་འབྱོར་འབྲིང་བསྐྲུན་རྒྱུ་དེ་མི་དམངས་ཡོངས་ལ་ཕན་པའི་འབྱོར་འབྲིང་དང་། དཔལ་འབྱོར་དང་། ཆབ་སྲིད། རིག་གནས། སྤྱི་ཚོགས། སྣོད་བཅུད་ཤེས་དཔལ་བཅས་འཛུགས་སྐྱོང་གི་ཕྱོགས་ལྔ་གཞི་གཅིག་ཁྱོན་ཡོངས་ནས་ཡར་རྒྱས་འགྲོ་བ་དེ་རེད། གྲོང་གསེབ་ཀྱི་མི་འབོར་དབུལ་པོ་ཁྲི་7017གོམ་སྟབས་གཅིག་གྱུར་ངང་འབྱོར་འབྲིང་ཡོང་ཐུབ་མིན་དང་། གྲོང་ཁྱེར་དང་གྲོང་རྡལ་གྱི་ཕྱི་འོང་རྒྱུན་སྐྱོད་མི་འབོར་དུང་ཕྱུར་2.5ལ་ཇི་ལྟར་བྱས་ཏེ་འདྲ་མཉམ་ངང་སྤྱི་པའི་ཞབས་ཞུ་ལོངས་སྤྱོད་ཐུབ་མིན། ཐོན་སྐྱེད་ནུས་པ་མགྱོགས་མྱུར་ཆེ་རུ་གཏོང་བ་དང་དུས་མཚུངས་ཇི་ལྟར་བྱས་ཏེ་སྤུས་ལེགས་སྣོན་བཅུད་ཐོན་ཟོག་མཁོ་འདོན་ནུས་པ་ཆེ་རུ་གཏོང་དགོས་པ་བཅས་ཐད《གྲོས་འགོའི》ནང་དེང་གི་དུས་མཚམས་སུ་རང་རྒྱལ་གྱི་སྤྱི་ཚོགས་བྱ་གཞག་འཕེལ་རྒྱས་དང་། སྣོད་བཅུད་ཁོར་ཡུག་སྲུང་སྐྱོང་། དམངས་འཚོ་འགན་ལེན་སོགས་ཐད་ལྷག་པའི་མངོན་གསལ་དོད་པའི་ཞན་ཆ་ཁ་ཤས་ལ་དམིགས་ནས་ངེས་པར་དུ་ས་ཁོངས་མཉམ་ལས་དང་། གྲོང་ཁྱེར་དང་གྲོང་གསེབ་གཞི་གཅིག་ཅན། དངོས་པོའི་དཔལ་ཡོན་དང་བསམ་པའི་དཔལ་ཡོན་གལ་ཆེ་མཉམ་དུ་འཛིན་པ། དཔལ་འབྱོར་འཛུགས་སྐྲུན་དང་རྒྱལ་སྲུང་འཛུགས་སྐྱོང་མཉམ་འདྲེས་བཅས་བྱ་རྒྱུ་མཐའ་འཁྱོངས་བྱས་ནས་འཕེལ་རྒྱས་ཀྱི་སྤྱི་ཡོངས་རང་བཞིན་སྔར་བས་ཤུགས་ཆེར་གཏོང་དགོས། དོན་དངོས་ཐོག་ཇི་ཙམ་གྱིས་ཞན་ཆ་ཡིན་པ་དེ་ཙམ་གྱིས་རྗེས་ཐོན་ལེགས་ཆ་ལྡན་པ་དང་། ཞན་ཆའི་ལྷུ་ཚིགས་ཁྲོད་ཤུགས་མང་ཙམ་རྒྱག་པ་དང་མངོན་གསལ་དོད་པའི་གནད་དོན་དང་ཞན་ཆ་ཐག་གཅོད་ཇི་ཙམ་གྱིས་ཧུར་ཐག་བྱས་ཚེ་དེ་ཙམ་གྱིས་རྒྱུ་ནོར་འགྲོ་ཆུང་ལ་དོན་གོ་ཆོད་པའི་ཕན་འབྲས་བཟང་པོ་ཐོན་ཐུབ་ནས་འཕེལ་རྒྱས་ཀྱི་དཀའ་གནད་སེལ་ཐུབ་པ་དང་འཕེལ་རྒྱས་ཀྱི་སྒུལ་ཤུགས་ཆེ་རུ་ཕྱིན་ཐོག་འཕེལ་རྒྱས་ཀྱི་ལེགས་ཆ་སྐྱེད་སྲིང་ཐུབ་ནས་ཟམ་མི་ཆད་པར་འཕེལ་རྒྱས་ཀྱི་བསམ་པའི་འཁྱེར་སོ་གསར་པ་རྒྱ་ཆེར་གཏོང་ཐུབ།（ཤིན་ཧྭ་གསར་འགྱུར་ཁང་པེ་ཅིང་ནས་འབྱོར་པའི་གློག་འཕྲིན）