ཀྲུང་དབྱང་རྩ་འཛུགས་པུས་ཉེ་དུས《རྫོང་རིམ་པའི“ནན་གསུམ་དྲང་གསུམ”གྱི་ཆེད་དོན་སློབ་གསོ་གཏིང་ཟབ་ཏུ་བཏང་ནས་གཞི་རིམ་ལས་བྱེད་པས་ལས་ཀ་མི་བྱེད་པ་དང་ལས་ཀ་གང་བྱུང་བྱེད་པ་སོགས་མང་ཚོགས་ཀྱི་ཁེ་ཕན་ལ་གནོད་འཚེ་བཟོ་བའི་གནད་དོན་ཐག་གཅོད་ཧུར་ཐག་བྱ་རྒྱུའི་སྐོར་གྱི་བརྡ་ཐོ》པར་འགྲེམས་བྱས་ནས་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་ནན་པོ་བྱས་ཏེ་རྫོང་རིམ་པའི“ནན་གསུམ་དྲང་གསུམ”གྱི་ཆེད་དོན་སློབ་གསོའི་ཁྲོད་གཞི་རིམ་ལས་བྱེད་པས་ལས་ཀ་མི་བྱེད་པ་དང་ལས་ཀ་གང་བྱུང་བྱེད་པ་སོགས་མང་ཚོགས་ཀྱི་ཁེ་ཕན་ལ་གནོད་འཚེ་བཟོ་བའི་གནད་དོན་ཐག་གཅོད་ཧུར་ཐག་བྱེད་དགོས་པའི་བླང་བྱ་བཏོན་ཡོད།
མིག་སྔར་ས་ཁུལ་ཁག་གཅིག་གི་གཞི་རིམ་ལས་བྱེད་པའི་ཁྲོད་ལས་ཀ་མི་བྱེད་པ་དང་ལས་ཀ་གང་བྱུང་བྱེད་པའི་གནད་དོན་ལྷག་ཡོད། གཞི་རིམ་ལས་བྱེད་ཁག་གཅིག་གིས་མང་ཚོགས་ལས་དོན་སྒྲུབ་པར་ཡོང་སྐབས་རྣམ་འགྱུར་གྲང་ཤུར་ཤུར་སྟོན་པ་དང་། གོང་རིམ་གྱིས་བཀོད་སྒྲིག་བྱས་པའི་ལས་འགན་ཁྲལ་སེལ་སླ་བཅོས་བྱེད་པ། ལས་ཀ་ཕྱི་ཚུལ་ཙམ་བྱེད་པ་དང་འགན་འཁུར་མི་ཕོད་པ་སོགས་བྱེད་ཀྱི་ཡོད། གཞི་རིམ་ལས་བྱེད་ཁག་གཅིག་གིས་སྒྲིག་སྲོལ་ལ་མི་བརྩི་བ་དང་གོ་རིམ་ལྟར་ལས་དོན་མི་བསྒྲུབས་པ་དང་མང་ཚོགས་ཀྱི་བསམ་འཆར་ལ་སྣང་ཆེན་མ་བྱས་པར་ཐབས་ཇུས་གང་བྱུང་དུ་བཀོད་པ་དང་ལས་ཀ་གང་བྱུང་དུ་བྱེད་ཀྱི་ཡོད།
རྫོང་རིམ་པ་ནི་གོང་མཐུད་འོག་འབྲེལ་གྱི་འགག་རྩའི་ལྷུ་ཚིགས་སུ་གནས་ནས་དཔལ་འབྱོར་འཕེལ་རྒྱས་དང་། དམངས་འཚོ་འགན་ལེན། བརྟན་ལྷིང་སྲུང་སྐྱོང་། རྒྱལ་ཁབ་ཡུན་རིང་བདེ་འཁོད་ལ་སྐུལ་འདེད་གཏོང་བ་བཅས་ཀྱི་རྨང་གཞི་གལ་ཆེན་ཞིག་རེད། ཕྱོགས་ཡོངས་ནས་སྒྱུར་བཅོས་སྒོ་དབྱེ་གཏིང་ཟབ་ཏུ་གཏོང་བའི་ལོ་དེར་ཀྲུང་དབྱང་གི་སྒྱུར་བཅོས་ཀྱི་སྲིད་ཇུས་གལ་ཆེན་མང་དག་ཅིག་སྔ་རྗེས་སུ་འདོན་བཞིན་ཡོད་པས་གལ་སྲིད་གཞི་རིམ་ལས་བྱེད་པའི་ཁྲོད་ལས་ཀ་མི་བྱེད་པ་དང་ལས་ཀ་གང་བྱུང་བྱེད་པའི་གནད་དོན་འཕྲད་ཚེ་སྲིད་གཞུང་གི་བཀའ་རྒྱ་ཐད་ཀར་གཤམ་སྒྲོག་མི་ཐུབ་པ་དང་སྲིད་ཇུས་བཟང་པོ་དོན་འཁྱོལ་དང་རྩ་བ་ཚུགས་དཀའ་བར་གྱུར་ནས་གོང་འོག་དབར་འགོག་རྐྱེན་བཟོ་བའི་རྣམ་པ་ཐོན་གྱི་ཡོད། དོན་དངོས་ལས་དོན་ཁྲོད་གཞི་རིམ་ལས་བྱེད་པ་ཁག་གཅིག་གིས་སྔར་བཞིན་བསམ་བློ་དང་བྱ་སྤྱོད་ཁྲོད་ཀྲུང་དབྱང་གི་བླང་བྱ་དང་འཚམས་པའི་གོམ་སྟབས་སྤོ་མི་ཐུབ་པར“ལས་ཀ་གང་བྱུང་བྱེད་པའི”རྣམ་པ་རྟག་ཏུ་ཐོན་པའི་ཁར་ས་ཆ་ཁག་གཅིག་ཏུ་རྟོག་ཞིབ་དང་ལྟ་སྐུལ་གྱི་ལམ་སྲོལ་འཐུས་སྒོ་ཚང་པོ་མེད་པར“ལྕག་ཚན”མཐོ་པོ་འཕྱར་ནས་ག་ལེར་འཇོག་པ་དེས་ལས་ཀ་མི་བྱེད་པ་དང་ལས་ཀ་གང་བྱུང་བྱེད་པར་གོ་སྐབས་སྤྲོད་ཀྱི་ཡོད།
ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་ཐོག་ལས་ཀ་མི་བྱེད་པ་དང་ལས་ཀ་གང་བྱུང་བྱེད་པ་ཡོ་བསྲང་མཐའ་གཅིག་ཏུ་བྱེད་པ་དང་ཆབ་སྲིད་ཀྱི་བྱ་བར་ཡུན་རིང་སྣང་འཇོག་མི་བྱེད་པའི་གནད་དོན་མཐའ་གཅིག་ཏུ་སེལ་དགོས། ལས་ཀ་མི་བྱེད་པ་དང་ལས་ཀ་གང་བྱུང་བྱེད་པ་ཡོ་བསྲང་བྱ་རྒྱུ་དེ་ཏང་གི་སྲིད་སྐྱོང་ནུས་པ་དང་རྒྱལ་ཁབ་ཀྱི་འཕེལ་རྒྱས་མདུན་ལམ་དང་འབྲེལ་བ་ཡོད་པ་དང་མིག་སྔར་སྒྱུར་འཕེལ་བརྟན་གསུམ་གྱི་ལས་འགན་ལྕི་བས་སེལ་དགོས་ངེས་ཀྱི་དཀའ་ངལ་དང་རྙོག་འཛིང་གི་ལས་འགན་ཆེན་པོ་ཡོད་པས་གཞི་རིམ་ལས་བྱེད་པས་ཧུར་སེམས་དང་། རང་འགུལ་རང་བཞིན། གསར་གཏོད་རང་བཞིན་བཅས་འདོན་སྤེལ་བྱེད་དགོས་ངེས་རེད།
ཀྲུང་དབྱང་རྩ་འཛུགས་པུའི་བླང་བྱ་གཞིར་བཟུང་། འདི་ལོའི་ཟླ་10ནས་12བར་ནི་གཞི་རིམ་ལས་བྱེད་པས་ལས་ཀ་མི་བྱེད་པ་དང་ལས་ཀ་གང་བྱུང་བྱེད་པ་སོགས་མང་ཚོགས་ཀྱི་ཁེ་ཕན་ལ་གནོད་འཚེ་གཏོང་བའི་གནད་དོན་ཆེད་དོན་བཅོས་སྒྲིག་བྱེད་པའི་དུས་ཚོད་ཡིན་པས་ས་གནས་ཁག་གིས་གྲལ་བཤེར་ནན་པོ་བྱེད་པ་དང་འགན་འཁྲི་གཙོ་བོ་དང་། བཅོས་སྒྲིག་བྱེད་ཐབས། ལམ་ལུགས་བཀོད་སྒྲིག་བཅས་བྱས་ཏེ་ཁ་གསལ་བཟོས་ནས་ཤེས་རྟོགས་ཐུབ་པའི་གནད་དོན་ཐར་པར་གཏན་ནས་གཏོང་མི་རུང་། གཞི་རིམ་ལས་བྱེད་པས་རང་འགུལ་ངང“ནན་གསུམ་དྲང་གསུམ”ལ་གཞིགས་ནས་ཡོ་བསྲང་དང་རང་བཤེར་བྱས་ནས་ལས་ཀ་མི་བྱེད་པ་དང་ལས་ཀ་གང་བྱུང་བྱེད་པ་རང་འགུལ་ངང་ཡོ་བསྲང་དང་གཏན་འགོག་བྱས་ཏེ་ཇུས་འགོད་དྲང་པོ་དང་། ལས་ཀ་དྲང་པོ། མི་དྲང་པོ་བཅས་བྱེད་པའི་སྤྱོད་ཚུལ་བཟང་པོ་སྐྱེད་སྲིང་བྱེད་དགོས། གཞི་རྩའི་ཆ་ནས་བལྟས་ཚེ་ལས་བྱེད་འདེམས་སྤྱོད་ལམ་ལུགས་འཐུས་སྒོ་ཚང་དུ་གཏོང་བ་དང་འགན་འདྲིའི་ལམ་སྲོལ་ཤུགས་ཆེར་བཏང་ནས་ལས་དོན་སྒྲུབ་འདོད་པ་དང་། སྒྲུབ་མཁས་པ། སྒྲུབ་ཤེས་པ་བཅས་ཀྱི་ལས་བྱེད་པ་བསྐོ་གཞག་བྱེད་པ་དང་། ལས་ཀ་མི་བྱེད་པ་དང་ལས་ཀ་གང་བྱུང་བྱེད་པ་གནས་དབྱུང་གཏོང་དགོས།