ན་ནིང་ཁྲོམ་རར་བཏོན་པ་ནས་བཟུང་ད་བར་ཚགས་ཤ་བྲིན་ཚད་རྒྱ་མ་ཁྲི་10ཙམ་ཟིན་པ།　

ཁ་ས་གསར་འགོད་པས།　ལྷ་སའི་གྲོང་ཁྱེར་མ་འཇོག་ཀུང་སི་ནས་ཤེས་རྟོགས་བྱས་པར།　ཁྲོམ་ར་ཕུན་སུམ་ཚོགས་སུ་གཏོང་བ་དང་།　ཟོག་གོང་བརྟན་པོ་ཡོང་བ།　དམངས་འཚོར་ཕན་འདོགས་པ་བཅས་ཀྱི་ཆེད།　ལྷ་ས་གྲོང་ཁྱེར་སྲིད་གཞུང་གིས།　　ན་ནིང་ནས་བཟུང་བྱེད་ཐབས་སྣ་ཚོགས་སྤྱད་དེ་ཀན་སུའུ་དཔའ་རིས་དང་སི་ཁྲོན་རྔ་བ་ཀྲོའུ་མཛོད་དགེ་རྫོང་སོགས་ནས་གོང་ཁེའི་ཚགས་ཤ་དང་མར་སོགས་འཐེན་ནས་ཁྲོམ་རར་བཏོན་ཏེ་གྲོང་མི་ཚོའི་རྒྱུན་གཏན་འཚོ་བའི་དགོས་མཁོ་བསྐངས་ཡོད་པ་རེད།　ལས་དོན་དེ་སྤེལ་བ་བརྒྱུད།　　ལྷ་སའི་གྲོང་མི་མི་ཉུང་བ་ཞིག་ལ་ཕན་པ་ཆེན་པོ་ཐོབ་ཅིང་།　2014ལོའི་ཟླ་10ཚེས་13ཉིན།　ཚགས་ཤ་དེ་རིགས་ཁྲོམ་རར་ཐོག་མར་བཏོན་པ་ནས་བཟུང་འདི་ལོའི་ཟླ་9པའི་བར་ལྷ་ས་གྲོང་ཁྱེར་སྲིད་གཞུང་གིས་རིམ་རྩིས་བྱས་ན།　ཚགས་ཤ་ཐེངས་16འཐེན་ནས་ཁྱོན་རྒྱ་མ་ཁྲི་10ཙམ་བཙོངས་པ་མ་ཟད།　མར་ཡང་རྒྱ་མ་ཁྲི་16བཙོངས་པ་རེད།　　ཐད་ཚོང་ཁང་གི་ལས་དོན་མི་སྣ་ཞིག་གིས“མིག་སྔར་ང་ཚོའི་ཐད་ཚོང་ཁང་གིས་ཉིན་རེར་ཚགས་ཤ་རྒྱ་མ་300ནས་400བར་འཚོང་གི་ཡོད་པས།　ཐོག་མ་དང་བསྡུར་ན་ཚོང་ཚད་མི་ཉུང་བ་ཞིག་འཕར་ཡོད།　　གྲོང་མི་མང་པོ་ཞིག་གིས་ང་ཚོའི་ཐོན་རྫས་རྒྱུས་མངའ་ལོན་རྗེས།　ཐད་ཚོང་ཁང་ནས་ཉོ་འདོད་བྱེད་ཀྱི་འདུག　གཞན་ཡང་ང་ཚོའི་ཐད་ཚོང་ཁང་དུ་ད་དུང་གོང་ཁེའི་ལུག་ཤ་ཁག་གཅིག་ཡོད་པས།　གྲོང་མི་ཆ་ཤས་ཀྱི་དགོས་མཁོ་སྐོང་ཐུབ”ཅེས་ངོ་སྤྲོད་བྱས།　

ཚགས་ཤ་དེ་དག་ལ་ནད་ཡམས་ཞིབ་བཤེར་བྱས་ཟིན་པ།　

གསར་འགོད་པས་ཤེས་རྟོགས་བྱས་པར།　ཁ་ས་ཁྲོམ་རར་བཏོན་པའི་གོང་ཁེའི་ཚགས་ཤ་ཏུན་20དེ་དག་སི་ཁྲོན་རྔ་བ་ཀྲོའུ་མཛོད་དགེ་རྫོང་ནས་འཐེན་པ་དང་།　ཐད་ཚོང་ཁང་ནི་བར་སྐོར་ཚོང་གྲོང་Aཁུལ་གྱི་ཐོག་བརྩེགས་གསུམ་པའི“ལྷ་ས་གྲོང་ཁྱེར་དམངས་ཕན་ཤ་མར་ཐད་འཚོང་ཁང”དུ་ཡོད།　　སྔ་དྲོའི་ཆུ་ཚོད་9པ་ནས་ཕྱི་དྲོའི་ཆུ་ཚོད་5：30བར་གྲོང་མི་ཚོ་ཐད་ཚོང་ཁང་དུ་ཕེབས་ནས་ཤར་མར་གང་དགོས་གདམ་ཆོག　　གཞན་ཡང་ད་ཐེངས་ཁྲོམ་རར་བཏོན་པའི་ཚགས་ཤ་རྒྱ་མ་རེར་སྒོར་26ཡིན་པ་དེ་ཁྲོམ་རའི་གོང་ཚད་ལས་དམའ་བ་ཡོད།　

གསར་འགོད་པས་ད་དུང་ཤེས་རྟོགས་བྱས་པར།　འཛད་སྤྱོད་པའི་ཁྲིམས་མཐུན་ཁེ་དབང་སྲུང་ཆེད།　ད་ཐེངས་ཁྲོམ་རར་བཏོན་པའི་ཚགས་ཤ་དང་མར་ལ་ལྷ་ས་གྲོང་ཁྱེར་སྤུས་ཚད་ནད་ཡམས་ཞིབ་བཤེར་སྡེ་ཚན་གྱིས་ཞིབ་བཤེར་བྱས་ཟིན་པ་མ་ཟད།　ཚང་མ་ཚད་ལོན་པའི་ཐོན་རྫས་ཤ་སྟག་ཡིན་པས།　　རྒྱ་ཆེའི་གྲོང་མི་ཚོས་ཐུགས་བློ་བདེ་པོའི་ངང་ཉོས་ན་འགྲིག　　　

སྤུད་ཀ་དག་ལ་གོང་ཁེ་བས་གྲོང་མི་ཚོའི་ཡིད་དབང་བཀུག

ཁ་ས་གསར་འགོད་པས་བར་སྐོར་ཚོང་གྲོང་Aཁུལ་གྱི་ཐོག་བརྩེགས་གསུམ་པའི་ཐད་ཚོང་ཁང་དུ་གྲོང་མི་མི་ཉུང་བ་ཞིག་གིས་གོང་ཁེའི་ཚགས་ཤ་ཉོ་བཞིན་ཡོད་པ་མཐོང་བྱུང་།　　ཉི་དྲོ་གླིང་སྡེ་ཁུལ་གྱི་པ་སངས་ཀྱིས་གསར་འགོད་པར“དགུན་ཁ་སླེབས་ཉེར་ཡོད་པས་ཚགས་ཤ་དང་མར་ནི་དགུན་ཟས་ཡག་ཤོས་རེད།　འོན་ཀྱང་ད་ཕན་ལོ་ཤས་རིང་ཁྲོམ་རར་ཚགས་ཤའི་རིན་གོང་འཕར་ནས་མིག་སྔར་རྒྱ་མ་རེར་སྒོར་40ནས་50བར་བྱེད་ཀྱི་འདུག　དེ་གོང་སྲིད་གཞུང་གིས་ང་ཚོར་གོང་ཁེའི་ཚགས་ཤ་མཁོ་འདོན་བྱས་པས།　ཟོག་གོང་བརྟན་དུ་ཕྱིན་པ་མ་ཟད།　　དམངས་ཀྱི་དཀའ་གནད་སེལ་བསལ་བས།　མང་ཚོགས་ཀྱི་དགའ་བསུ་ཆེན་པོ་ཐོབ་ཡོད།　དེས་མ་ཚད་ཚགས་ཤ་རྒྱ་མ་རེར་སྒོར་26ལས་བྱེད་ཀྱི་མེད་པས་དངོས་ནས་གོང་ཁེ་པོ་འདུག　ད་ཆ་ང་སྡོད་སའི་ཁུལ་ཆུང་ནས་ཐད་ཚོང་ཁང་བར་སྤྱི་སྤྱོད་རླངས་འཁོར་ཡོད་པས་སྟབས་ཧ་ཅང་བདེ་པོ་འདུག”ཅེས་བརྗོད་བྱུང་།