སྡེ་ཁུལ་དུ་ལས་ཞུགས་ལས་གཏོད་ཀྱི་འཇོན་ཐང་ཆེ་རུ་གཏོང་བའི་ལས་དོན་སྔར་བས་ཡག་པོ་སྒྲུབ་པ་དང་། ལྷག་དོན་དུ་སྡེ་ཁུལ་གྱི་ཏང་ཡོན་ལས་ཞུགས་གསོ་སྦྱོང་ལ་མངགས་པའི་ལས་དོན་སྔར་བས་ཡག་པོ་བསྒྲུབས་ནས། སྡེ་ཁུལ་མང་ཚོགས་ཀྱི་ངལ་རྩོལ་གྱི་རྩལ་ནུས་མཐོ་རུ་ཏན་ཏིག་གཏོང་བ་དང་སྡེ་ཁུལ་གྱི་ཏང་ཡོན་གྱི་ལས་ཞུགས་ལས་གཏོད་ལ་རྒྱབ་སྐྱོར་བྱས་ཐོག སྡེ་ཁུལ་གྱི་དཔལ་འབྱོར་འཕེལ་རྒྱས་དང་། སྤྱི་ཚོགས་བརྟན་ལྷིང་ཞི་མཐུན་ལ་ཐོན་ཁུངས་ཀྱི་འགན་ལེན་བྱ་ཆེད། ཉིན་ཤས་གོང་ལྷ་ཀླུ་སྡེ་ཁུལ་དུ་བཅའ་སྡོད་རང་སྐྱོང་ལྗོངས་སྔོན་གཏོད་ལེགས་བརྩོན་དང་རྨང་བརྟན་དམངས་ཕན་བྱེད་སྒོའི་ལས་དོན་རུ་ཁག（ལྷ་ས་སྦྲག་སྲིད་ཡན་ལག་ཀུང་སིས་མངགས）གིས་སྡེ་ཁུལ་དང་མཉམ་དུ་ལས་ཞུགས་གསོ་སྦྱོང་གི་ལས་དོན་ཡག་པོ་སྤེལ་བ་རེད།
སྡེ་ཁུལ་གྱི་དོན་དངོས་གཞིར་བཟུང་ལས་དོན་རུ་ཁག་དང་སྡེ་ཁུལ་གྱིས《ངལ་རྩོལ་ནུས་ཤུགས་བདམས་ནས་ལས་ཞུགས་གསོ་སྦྱོང་དུ་ཞུགས་རྒྱུའི་སྐོར་གྱི་ལྷ་ཀླུ་སྡེ་ཁུལ་དང་གྲོང་ཚོར་བཅའ་སྡོད་ལས་དོན་རུ་ཁག་གི་ཇུས་གཞི》མཉམ་དུ་བཏོན་ཡོད། ལྷ་ཀླུ་སྡེ་ཁུལ་དུ་བཅའ་སྡོད་ལས་དོན་རུ་ཁག་གི་འགན་འཁུར་བས། སྡེ་ཁུལ་གྱི་དོན་དངོས་གནས་ཚུལ་དང་ཟུང་འབྲེལ་བྱས་ནས། ང་ཚོས་གྲོང་གསེབ་གསར་པ་འཛུགས་སྐྲུན་བྱེད་པར་མཁོ་བའི་ངལ་རྩོལ་པ་གསོ་སྦྱོང་བྱ་རྒྱུ་ནས་འགོ་བཙུགས་ཏེ་ཇུས་གཞིའི་བླང་བྱ་ལྟར། འདི་ལོ་ནས་བཟུང་ལོ་གསུམ་ནས་ལྔའི་བར་ལས་ཞུགས་ལས་གཏོད་ཀྱི་འཇོན་ཐང་ཆེ་རུ་གཏོང་བའི་གསོ་སྦྱོང་བྱས་ནས་གསོ་སྦྱོང་དུ་ཞུགས་འདོད་ཡོད་པའི་ངལ་རྩོལ་པར་གོ་སྐབས་ཐེངས་གཅིག་ཡན་གྱི་གོ་སྐབས་རག་པ་བྱས་ནས་ལག་རྩལ་སྣེ་གཅིག་ཡན་ཁོང་དུ་ཆུད་པ་དང་། ལག་རྩལ་གྱི་རྨང་གཞི་ཡོད་པའི་ངལ་རྩོལ་པའི་རྩལ་ནུས་མཐོ་རུ་གཏོང་བ། ལས་གཏོད་འདུན་པ་ཡོད་པའི་ཤེས་ལྡན་མི་སྣའི་ལས་གཏོད་ཀྱི་སྤྲོ་སེམས་འཕེལ་བ་དང་ལས་གཏོད་འཇོན་ཐང་ཆེ་རུ་གཏོང་བ་བཅས་བྱས་ཏེ། སྡེ་ཁུལ་གྱི་ངལ་རྩོལ་པའི་ལས་ཞུགས་འགྲན་རྩོད་ནུས་པ་དང་། ལས་རིགས་བརྗེ་སྒྱུར་ནུས་པ། ལས་གཏོད་ལ་སྐུལ་ཁྲིད་བྱེད་པའི་ནུས་པ་བཅས་ཁྱོན་ཡོངས་ནས་ཆེ་རུ་གཏོང་རྒྱུ་ཡིན་ཞེས་ངོ་སྤྲོད་བྱས་པ་རེད།
“ཇུས་གཞི་བཏོན་པས་ལྷ་ཀླུ་སྡེ་ཁུལ་གྱི་ངལ་ནུས་ལྷག་མའི་ལས་ཞུགས་གསོ་སྦྱོང་ལ་སྐུལ་འདེད་ཐེབས་པ་དང་ལྷག་དོན་དུ་ཏང་ཡོན་གྱི་ལས་ཞུགས་རྩལ་ནུས་གསོ་སྦྱོང་ལ་སྐུལ་འདེད་ནུས་ལྡན་ཐུབ་ངེས་རེད”ཅེས་ལྷ་ཀླུ་སྡེ་ཁུལ་དུ་བཅའ་སྡོད་ལས་དོན་རུ་ཁག་གི་འགན་འཁུར་བས་བཤད་པ་རེད།