ཤིན་ཧྭ་གསར་འགྱུར་ཁང་མཉམ་འབྲེལ་རྒྱལ་ཚོགས་ནས་ཟླ་9ཚེས་26ཉིན་གློག་འཕྲིན་འབྱོར་གསལ།　ཚེས་26ཉིན་རྒྱལ་ཁབ་ཀྱི་ཀྲུའུ་ཞི་ཞིས་ཅིན་ཕིང་གིས་ཉིའུ་གཡོད་དུ་ཡོད་པའི་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་རུ་ཀྲུང་གོ་དང་མཉམ་འབྲེལ་རྒྱལ་ཚོགས་ཀྱིས་ཐུན་མོང་ཐོག་སྐོང་ཚོགས་བྱས་པའི་ལྷོ་ལྷོ་མཉམ་ལས་ཀྱི་གྲལ་སྒོར་གྲོས་ཚོགས་ལ་ཞུགས་པ་དང་འབྲེལ་གཙོ་སྐྱོང་ཡང་གནང་ནས་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་སོགས་ཀྱི་འགོ་ཁྲིད་པ་དང་རྒྱལ་སྤྱིའི་རྩ་འཛུགས་ཀྱི་འགན་ཁུར་བ་དང་ལྷོ་ལྷོ་མཉམ་ལས་ཀྱི་ཉམས་མྱོང་ཕྱོགས་སྡོམ་གནང་བ་དང་།　མཉམ་ལས་ངང་འཕེལ་རྒྱས་གཏོང་བའི་ཇུས་ཆེན་ཐུན་མོང་ཐོག་གྲོས་མོལ་གནང་བ་རེད།　ལྷོ་ཨ་ཧྥེ་རི་ཁའི་ཙུང་ཐུང་ཙུའུ་མ་དང་།　ཨེ་ཅིབ་ཀྱི་ཙུང་ཐུང་སའེ་ཞིས།　ཙན་པི་ཡའི་ཙུང་ཐུང་ལུན་ཀུའུ་སོགས་རྒྱལ་ཁབ་ཀྱི་གཙོ་བདག་དང་།　སྲིད་གཞུང་གི་འགོ་གཙོ།　དེ་བཞིན་མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཧྥན་ཅི་ཝུན་དང་མཉམ་འབྲེལ་རྒྱལ་ཚོགས་གསར་སྤེལ་འཆར་གཞི་ཧྲུའུ་དང་འཛམ་གླིང་དངུལ་ཁང་སོགས་རྒྱལ་སྤྱིའི་རྩ་འཛུགས་ཀྱི་འགན་འཁུར་བ་ཚོགས་འདུར་ཞུགས་པ་རེད།

ཞིས་ཅིན་ཕིང་གིས་གསུང་བཤད་གནང་སྐབས།　1974ལོར་སྐུ་ཞབས་ཏེང་ཞའོ་ཕིང་གིས་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་གསུང་བཤད་གནང་སྐབས།　ཀྲུང་གོ་ནི་འཕེལ་རྒྱས་འགྲོ་བཞིན་པའི་རྒྱལ་ཁབ་ཡིན་པ་དང་།　ཀྲུང་གོ་ནི་འཛམ་གླིང་གསུམ་པའི་ཁོངས་སུ་གཏོགས་ཞེས་གསུངས་མྱོང་ཡོད།　ལོ་40ལྷག་ཙམ་གྱི་རྗེས་སུ་ཀྲུང་གོར་འཕེལ་རྒྱས་ཀྱི་གྲུབ་འབྲས་ཧ་ཅང་ཆེན་པོ་ཐོབ་ཀྱང་།　སྔར་བཞིན་འཕེལ་རྒྱས་འགྲོ་བཞིན་པའི་རྒྱལ་ཁབ་ཡིན་པ་དང་།　ལྷོ་ལྷོ་མཉམ་ལས་ལ་སྔར་བཞིན་སྔར་རྒྱུན་ལྟར་སྣང་ཆེན་བྱེད་ཀྱི་ཡོད།　ཀྲུང་གོ་ཕྱོགས་ཀྱིས་ད་ཐེངས་ཀྱི་གྲལ་སྒོར་གྲོས་ཚོགས་འཚོག་རྒྱུའི་གྲོས་འགོ་བཏོན་པ་དེ།　ལྷོ་ལྷོ་མཉམ་ལས་ཆུ་ཚད་སྔར་བས་མཐོ་བ་དང་རིམ་པ་སྔར་བས་ཟབ་པའི་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་གཏོང་རེ་བྱེད་ཀྱི་ཡོད་ཅེས་གསུངས་པ་རེད།

ཞིས་ཅིན་ཕིང་གིས་ལྷོ་ལྷོ་མཉམ་ལས་ནི་འཕེལ་རྒྱས་འགྲོ་བཞིན་པའི་རྒྱལ་ཁབ་མཉམ་འབྲེལ་དང་རང་སྟོབས་རང་འཕེལ་ཡོང་བའི་རླབས་ཆེན་གྱི་གསར་གཏོད་དང་འདྲ་མཉམ་དང་།　ཕན་ཚུན་ཡིད་ཆེས།　གཉིས་ཁེ་གཉིས་ཐོབ།　མཐུན་སྒྲིལ་རོགས་རེས་བཅས་ཀྱི་མཉམ་ལས་ཤིག་ཡིན་པས།　ང་ཚོར་གོང་འཕེལ་དར་རྒྱས་ཀྱི་ལམ་བུ་གསར་རྐྱང་ཞིག་གསར་གཏོད་བྱེད་རོགས་བྱེད་ཐུབ།　འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་སྤྱི་ཡོངས་ཀྱི་སྟོབས་ཤུགས་ཆེ་རུ་ཕྱིན་པ་དང་སྦྲགས།　ལྷོ་ལྷོ་མཉམ་ལས་ཀྱིས་འཕེལ་རྒྱས་འགྲོ་བཞིན་པའི་རྒྱལ་ཁབ་དར་རྒྱས་ཡོང་བར་སྐུལ་མ་གཏོང་བ་དང་།　འཛམ་གླིང་གི་དཔལ་འབྱོར་སྟོབས་ལྡན་དང་།　རྒྱུན་སྲིང་།　དོ་སྙོམས།　བསྟུན་མཁས་ངང་འཕར་བ་བཅས་ལ་སྐུལ་འདེད་གཏོང་བར་ནུས་པ་སྔར་བས་ཆེ་བ་འདོན་སྤེལ་ཐུབ་ངེས་རེད་ཅེས་གསུངས་པ་རེད།

ཞིས་ཅིན་ཕིང་གིས་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱིས་དཔལ་འབྱོར་འཕེལ་རྒྱས་དང་དམངས་འཚོ་ལེགས་སུ་གཏོང་བར་རོགས་རམ་བྱ་ཕྱིར།　སླད་ཕྱིན་ལོ་ལྔའི་རིང་ཀྲུང་གོས་འཕེལ་རྒྱས་འགྲོ་བཞིན་པའི་རྒྱལ་ཁབ་ལ“བརྒྱ་རེ་དྲུག”གི་རྣམ་གྲངས་ཀྱི་རྒྱབ་སྐྱོར་བྱ་རྒྱུ་ཡིན་པའི་ནང་།　དབུལ་སྒྲོལ་རྣམ་གྲངས་100དང་།　ཞིང་ལས་མཉམ་ལས་རྣམ་གྲངས་100　ཚོང་དོན་ལ་སྐུལ་མ་གཏོང་བའི་རོགས་སྐྱོར་རྣམ་གྲངས་100　སྣོད་བཅུད་སྲུང་སྐྱོང་དང་གནམ་གཤིས་འགྱུར་ལྡོག་ལ་ཁ་གཏད་གཅོག་པའི་རྣམ་གྲངས་100　སྨན་ཁང་དང་སྨན་བཅོས་ཁང་གི་རྣམ་གྲངས་100　སློབ་གསོ་དང་ལས་རིགས་གསོ་སྦྱོང་ལྟེ་གནས་ཀྱི་རྣམ་གྲངས་100བཅས་ཚུད་ཡོད།　སླད་ཕྱིན་ལོ་ལྔའི་རིང་ཀྲུང་གོས་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་ཀྲུང་གོར་གསོ་སྦྱོང་ལ་ཡོང་བའི་མི་གྲངས་ཁྲི་12དང་སྦྱངས་འབྲས་བྱ་དགའི་དངུལ་གྱི་མི་གྲངས་ཁྲི་15མཁོ་འདོན་དང་།　འཕེལ་རྒྱས་འགྲོ་བཞིན་པའི་རྒྱལ་ཁབ་ལ་ལས་རིགས་ལག་རྩལ་པ་ཁྲི་50གསོ་སྐྱོང་བྱ་རྒྱུ་རེད།　ཀྲུང་གོས་ལྷོ་ལྷོ་མཉམ་ལས་དང་འཕེལ་རྒྱས་སློབ་གླིང་འཛུགས་རྒྱུ་དང་འབྲེལ།　འཛམ་གླིང་འཕྲོད་བསྟེན་རྩ་འཛུགས་ལ་ལག་ཡོད་ཕྱི་རྒྱལ་དངུལ་བརྗེས་ཨ་སྒོར་ཁྲི་200ཟིན་པའི་རོགས་སྐྱོར་བྱ་རྒྱུ་ཡིན་པ་ཁྱབ་བསྒྲགས་གནང་བ་རེད།

ཞིས་ཅིན་ཕིང་གིས་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་དང་མཐུན་སྒྲིལ་མཉམ་ལས་བྱ་རྒྱུ་ནི་ཀྲུང་གོའི་ཕྱི་ཕྱོགས་འབྲེལ་བའི་ནང་གི་གཡོ་འགུལ་མི་ཐེབས་པའི་རྨང་གཞི་ཞིག་རེད།　ཀྲུང་གོ་ནི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཁོངས་མི་ཞིག་ཡིན་པར་བརྟེན།　ཀྲུང་གོའི་འཕེལ་རྒྱས་ཀྱི་གོ་སྐབས་དེ་འཕེལ་རྒྱས་འགྲོ་བཞིན་པའི་རྒྱལ་ཁབ་དང་མཉམ་དུ་ལོངས་སྤྱོད་བྱ་རྒྱུ་ཡིན།　ཀྲུང་གོ་ཕྱོགས་ཀྱིས་རང་ཉིད་ཀྱི་འཕེལ་རྒྱས་དེ་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཐུན་མོང་འཕེལ་རྒྱས་དང་ཟུང་འབྲེལ་དམ་ཟབ་བྱེད་པ་དང་།　ཀྲུང་གོའི་ཕུགས་འདུན་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་མི་དམངས་ཚོས་བདེ་སྐྱིད་མཛེས་སྡུག་ལྡན་པའི་འཚོ་བ་སྐྱེལ་ཐུབ་པ་བྱེད་པའི་ཕུགས་འདུན་ཟུང་འབྲེལ་དམ་ཟབ་བྱས་ཏེ།　ལག་གདང་སྦྲེལ་ནས་མཉམ་དུ་འཕེལ་རྒྱས་འགྲོ་བའི་ཡངས་ཤིང་རྒྱ་ཆེ་བའི་བགྲོད་ལམ་དུ་བསྐྱོད་རྒྱུ་ཡིན་ཞེས་ནན་བཤད་གནང་བ་རེད།